लूका 22:54-60

त्यसपछि तिनीहरूले उहाँलाई पक्रेर लगे, र उहाँलाई प्रधान पूजाहारीको घरमा लगे। पत्रुसले उहाँलाई टाढैबाट पछ्याए। तर जब तिनीहरू चोकको बीचमा आगो बालेर साथसाथै बसेका थिए, अनि पत्रुस पनि तिनीहरूसितै बसे। एउटी सेविका केटीले आगोको उज्यालोमा तिनलाई त्यहाँ बसिरहेको देखी। त्यसले तिनलाई नजिकैबाट नियालेर हेरी र भनी, “यी मानिस पनि तिनीसँगै थिए।” तर तिनले इन्कार गरेर भने, “ए नारी, म उहाँलाई चिन्दिनँ।” केही बेरपछि कोही अर्को व्यक्‍तिले तिनलाई देख्यो र भन्यो, “तिमी पनि तिनीहरूमध्येकै एक हौ।” पत्रुसले जवाफ दिए, “ए मानिस, म होइनँ।” लगभग एक घण्टापछि अर्को एक जनाले दृढतासाथ भन्यो, “साँच्‍चै नै यी मानिस तिनीसँगै थिए; किनकि यिनी पनि गालीली हुन्।” पत्रुसले जवाफ दिए, “ए मानिस, तिमी के भनिरहेछौ, म जान्दिनँ।” तिनी बोलिरहेकै बेलामा भाले बास्यो।