Matiwos Dooshishiyo 3
3
Gupfo Yohans b́ nabtsok'o
(Mar. 1:1-8; Luk'. 3:1-18; Yoh. 1:19-28)
1Manoor gupfo Yohans Yhud worwotse nabfere b́weyi. 2#Mat. 4:17; Mar. 1:15 B́daniferowere «Eshe! Ik' mengstu b karntsotse naandrone erere» b́ etfo.
3 #
Isa. 40:3 « ‹Doonzo weerindo k'aniwere,
B́fudonore káátswere!› etfetst worwotse kuhiru asho k'ároniye»
ett́ nebiyo Isayas b́keewtso Yohans jangoni b́teh.
4 #
2 Naash. 1:8; Zek. 13:4; Lew. 11:22 Yohans taho kambli s'iron wozeka b́tesh, b́gebatsowere shaak'a bí edefo, b́ máfonwere p'elonat dok'shi mas'a b́tesh. 5Manoor Iyerusalemitse Yhud dats jamatse, Yordanos gúúr jamatse ash asho Yohans maantsa bowaafo. 6Bowere bomorro keewfetst, Yordanos fokotse Yohans kishatsna bogupefo.
7 #
Mat. 12:34; 23:33 Ernmó Yohans ferisawino eteefwotsnat Seduk'awino eteefwotsitse aywots gupeyosh bíyo bowafere b́bek'tsok'on boosh hank'o bíeti «It dawnzi nana'uwotso! weyiru fayotse it keshetwok'o kone izi itsha? 8Eshe naandrone it ettsok'o kitsit fino finore. 9#Yoh. 8:33 ‹Noo Abraham nana'uwots noone› eto itn b́kishitwok'o itsh ark'aye, Ik'o shútsanotsitse Abrahamsh nana'uwotsi tizosh falitwe etirwe itsha. 10#Mat. 7:19 Andmó, shakurtso miti shir jamotse fe'e. Mansh shuwi sheeng shuraw mit jamo k'ut'de'er tawots juwetwe. 11Eshe hamb taa, naandi jangosh aatson iti gupetwe, taayere il wetwonmó S'ayin shayironat tawon itn gupetwe, bíye taayere ayidek't bogfe, taa b́ tufitsi c'aamo dab́ kurosh bodktanaliye. 12Bíye b́ kishatse k'orbiyo detsfe, bínowere búts úro sheengshde'er s'ayintsitwe. Sndewonowere t'iwots gaas'etwee, buuyonmó tahraw tawon mitsitwe.»
Iyesus b́ gupetsok'o
(Mar. 1:9-11; Luk'. 3:21-22)
13Manoor Iyesus Yohans kishon gupewosh Gelil datsatse tuut Yordanos foko maants b́weyi. 14Yohansmó «Han woteratse, taa nkishon gupewo taash b́geyifere, aawk'oneya nee tmaants nweeti?» ett bín baziyo dek'b́twi.
15Iyesusmó «Ik'i shinatse kááw wotts fin jamo hank'on s'eentso noon b́geyitsotse, ando taan bazi k'aye» ett bísh bí aaniy. Yohanswere keewman wotowe ett bín b́gupi. 16Iyesus gupeyat aatsotse b́ keshtsok'on manoor daro k'esheeb́wtsi, Ik'i S'ayin shayiro kurkund araat Iyesus ats b́ oot'fere b́ bek'i. 17#Aze. 22:2; Dub. 7; Isa. 42:1; Mar. 11; Luk'. 9:35 Manoor «Hambe, bín t geneúwitwo t shunts na'oni» etiru k'ááro darotse b́weyi.
अहिले सेलेक्ट गरिएको:
Matiwos Dooshishiyo 3: BrnNTLtn
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
The Word for the World International Publishing PO Box 26363, Colorado Springs, CO 80919, USA
