Lûk 18
18
Ngàyn ə̀ zhwiə kwu yî tuə sesaʼ kyîa
1Njisə̀s ə fɨnə mɛ̂ kəpî ngàyn zhizè sê chùmtè epàm sə vəynse se zaʼlê ə ghənə nə ghənə kyi sə̂ tsə̂mə̀ kə shîŋə̀ tekɨ̂m, pɔ va. 2È və pi nə, “Tuə sesaʼ kyîke tè nyi ə tɔ̂ŋ zhizè, fànə̀ va Zhə̀fè, njiə va nə wùə nyi afɨa. 3Zhwîə kwu vîvè e nyi kepî ə tɔ̂ŋ nə zɛ, ndùə kə ə və ə ndɛ tuʼmè m̀kɨ̂m, piə nə, ‘Saʼ fi tu kɨmke sê pàyn zɨ̂mè.’ 4È ve sè pə̂ pîə, tuə sesaʼ nə kɛ e puʼsə̂ kə ndò. Ə tè fɨyn kɛsê kwâʼtè kè vəyn nə zhi təyn saʼ ətəyn, naʼapi kə zhi fànə va Zhə̀fè, njiə va nə wùə nyi afɨa, 5polə zâ, ə pə̂yn ə vəyn nə zɨ̂yn ə è pə̀ ə zhi ə ndɛ kè tuʼmè m̀kɨ̂m nyi nə̀yn nə nâʼà zhi nə fɨyn kyi va zɨ̂tèzè.”
6Pɛ̂pɛ ə wàmnə̀ za ə ke pi sê chùmtè epàm sə vəynse nə, “Ghàyn zɨtə̂ tso nə tuə sesaʼ nə kɨnə za wàmne za nyi, va chichi ə. 7Ə̀ nyiə kàʼa ə pɨl faŋ Fèzhə̀ se zɨtê echi zɛ ə ghɨ fəynfe ghɛ ə fe chɔʼte chîə sê fəynfe, èchwì ètuʼu ə? Ə fe za kàʼa ə fe ə puʼsə̂ kə ndò ghənə ə? 8M piə sê ghàyn nə, Zhə̀fè nə̀ layntə̂ va se saʼa fo saʼ ə̀ghənə. Naʼapi za, ə Va Wùə tə kɛsê pə̀yn fâ ə chi, è nə fe ndò ghɨghe mə ghe pa pomə̂ ndò sê Zhə̀fè ə?”
Ngàynə̀ wùə Falàsî yî wùə sè tâks
9È və fɨnə mɛ̀ ngàyn zhizè sê ghənə ghəmɔ̀ʼɔ ghɛ ə ghe tè fe kə ngɨŋ sə ghənə̂sè tə nyi tyəm chichi, ghɨə mɔʼɔ ghe e tyəm va, ə piə nə, 10“Ghɨ yîghe tè kɔʼ ndùə nji ə Ndɛ Ètsə̀mə, ə̀ pɛ̀ se tsə̀m, emɔ̀ʼ e nyi wùə ə̀ Falàsî, vəmɔ̀ʼɔ̂ e tənə sètâks. 11Wùə ə̀ Falàsî vɛ ə ndùə tyəmə sə nɨŋ sè tsə̂mə̀, piə nə, ‘M fo àzɔ̀ŋnè kɛke ə Zhə̀fè kûmə̀ nə m va chi kə ghɨə mɔ̀ʼɔ̂ ghɛ ə ghe zâŋsə̀ fiə fɨa ghɨ̀u səndô, vachi kə ghɛghe kəmə saʼe, chûmtə̀ va zəyn ə ghɨ̀ə. M va chi pi kə wùə ə vɨ̀nə ə è tənə tâksè nyi. 12M pamə ècho shîŋə̀ te pɛ̀ ə ngâm, chyâtə̀ efɨa vɨm se epɨ̀as èghɨm, mə fo àmɔ̀ʼ sê ghò.’ 13Wùə vɛ ə è tè tənə tâksè za ə piə è tsə̀mə̀ ndò ə tyəmə kə sə aghaf ə tàʼa kɔ̀ŋ naʼapi se naynə̂ kɔʼsə̂ ekwùtwəyn pîza ə ndəmə àgho ə vəyn angàŋtè se maʼlə̀ ewiyn piə nə, ‘Zhə̀fè, kose səyn sê mi, m nyi wùə əghɛ piə!’ 14M pîə sê ghàyn nə wùə nə vɛ tè fɨ ə piə è kwɨlə̂ tânə̀ ə və ndɛ kè mə Zhə̀fè ə kəʼsê pisə vəynse, pîza ə tàʼa kəʼsê ə sepi sə wùə ə̀ Falàsî sɛ. Nâʼàpî ndè vɛ ə è kɔʼsə ngɨŋ ə vəyn ekwùtwəyn, Zhə̀fè nə̀ tsosə̂ vəyn ə chi, ə naʼapi ndè vɛ ə è nji ngɨŋ ə vəyn ə chi, ə Zhə̀fè nə̂ kɔʼsə vəyn ekwùtwəyn.”
Kə Njisə̀s tè pɔse mɨ̂ətə̀m
(Matyò 19.13-15; Mâk 10.13-16)
15Ghɨ tè njiə pə̂ è mɨə̀tə̀m sê Njisə̀s nə è kòm ghənə ə è pɔse ghənə. Chùmtè epàm sə vəynse ə fe za se zɔ̂ sê ghɨ təynghe. 16Pîza Njisə̀s ə tɔŋɔ əghɔ ətəynghe ə piə nə ghənə pə̀yn ke ndò, ə se pi sê chùmtè epàm sə vəynse nə, “Ghàyn za mɨə̀tə̀m, ə ghənə pə̀yn sê mi. Kə è fɨnə tâmtè ghənə kûmə̀ nə fɔ̂yn ə Fezhə̀e kyi əghɨ ghɛ ə ghe nyi nyiə kə̂ ghənə. 17M piə sê ghàyn səmɔʼ nə, ə̀ faŋ pi ndè se pomə efɔ̀yn ə Fezhə̀e kə vayn pɔ, è vâyn tə nji elùʼ efɔ̀yn nə ghâyn.”
Wùə etwɔ vî və pfɨf ghɛe se Njisə̀s
(Matyò 19.16-30; Mâk 10.17-31)
18Wùə twɔ ə̀ ghɨ Njûs viu ə se pfɨfə sê vəyn nə, “Tyə̀ynsè èchùŋ, m nyiə kàʼa ə m ghayn nâʼà ghè se nə kyi endam zɛ ə ze tə mîə va ə?”
19Njisə̀s ə pfɨfə sê vəyn nə, “Kûmə̀ ghè ə ò tɔŋtə̂ mi nə wùə è èchùŋ ə? Nâʼà wùə èchùŋ va, ə tsɛ̂ kəva Zhə̀fè. 20Ò ke tesaʼ tənə ə te piə nə, ‹Kə wùə nə̂ nyîŋə̀ è zhwiə wùə kɨ̀sə ə nyi pi yî ndom ə̀ wùə, kə wùə nə̂ zhwi, kə wùə nə̂ chɔŋ, kə wùə nə̂ tyəm tsɛ̀ èsaʼ àkaŋ, kɔʼse pɛ̂ è nɛ̂.›”
21Wùə ètwɔ vɛ ə ke pì nə, “Mə ndə̀m saʼ nə tɨ̂nə̀ nâʼà tèkɨ̂m, kè se zhə̀tə pə̀yn kə m tè pa nyi vâyn èpɔ.”
22Njisə̀s ə zɨə zâ ə piə sê vəyn nə, “Ò pa kyi eghɛ èmɔ̀ʼ se nə̀yn, ndùə pəʼle nâʼà fɨave ekɨ̂m kə ò kyi ə fo ekɛ ətəyn sê ghɨafɨfə, kə ò kyi eghaʼ ekwùtwəynze. Ə ò nə̀yn nyi, o pə̀ chûmtə̀ mi.” 23Wùtwɔ vɛ ə zɨə eghɛ nə zɛ, ze ə nə̀, è və saŋnə̂ va kûmə̀ nə è tè nyi ke nâʼà wùə èghaʼâ.
24Njisə̀s ə naynə̂ vəyn nyìə ə ke pi nə, “E tɛ nâʼà sə ŋaŋ sê ghɨ ghaʼa se nji elùʼ efɔ̀yn ə Fezhə̀e! 25E pɔynə̂ sê nyàm ə̀ kwaŋ se tɔynê apùʼ ə saʼa tsɛ̂ kə wùə èghaʼâ nji elùʼ efɔ̀yn ə Fezhə̀e.”
26Ghɨ ghɛ ə zɨə ewâmnè əvəyn ə ke pfɨf sê vəyn nə, “E za nyi zâ, ə tə sɔ̂ fɨə nâʼà ndè?”
27È və piə sê ghənə nə, “Eghɛ zɛ ə ze ghaʼ wùə pɔynə̂ kə nyi sê Zhə̀fè.”
28Pità ə pfɨfə sê vəyn nə, piə è və fe kə̂ ghənə nyi mə ə zà pɨ̂əyn mə̂ ghənə̂mè chûmtə̀ kə vəyn ə.
29Njisə̀s ə pə̀ynsə̀ sê ghənə nə, “M piə sê ghàyn səmɔʼ nə, ə wùə tsɨ̀yn mə è və zà pɨəyn ə vəynke kɨ̀sə ə nyi pî zhwîə vəyn, kɨ̀sə ə nyì pì ə̀ ghɔnyìə, kɨ̀sə ə nyi pi pɨ̀a vəyn è nyiə vəyn, kɨ̀sə ə nyi pi əghɔ vəynghe kûmə̀ eghɛ efɔ̀yn ə Fezhə̀e, 30ə Zhə̀fè kwəynse ghaʼ nə zɨ̂nə̀ sê vəyn fâ chi, ze tsɨ̂ə kə nyî, ə è tə fɨyn kyi endam zɛ ə ze tə mîə va ə mbi è fe zɛ ə è pə̀.”
Njisə̀s ə fɨyn pi nə kwu zhize sè paʼ sə pə̂ ndò
(Matyò 20.17-19; Mâk 10.32-34)
31Njisə̀s ə njiə ndò è chùmtè epàm sə vəynse, njò sepɛ̀ ə piə sê ghənə nə, “Ghàyn ke nə ghâsènì kɔʼɔ ndùə ə Njèlusalɛ̀m zôyn nyì, naʼapi ghè kə fɨ̀aʼtè seghaʼâsè se nyi mə se ə nyàʼ kûmə̀ Vawùə nyi se kwəyn. 32Ə njiə fo vəyn sê tûm, ə ve nyəʼsè vəyn, è ghɛ e ghoməghe sê vəyn, fɨnə tsɨlə̂ m̀tɛ̂ ə vəyn ewiyn. 33Ə nə̀ pusə vəyn è wàynsè ə fɨyn kyi zhwi vəyn, ə ə̀ nyi m̀tuʼ mta, ə è kɛsə̂ zômə̀.”
34Kə è wàmnè za, ghənə tàʼa kê nə è piə nə ghe ə, kûmə̀ nə tɔf zɛ ə e tè nyi əfètəyn eghɛ nə zɛ tè nyi mə ze ə ndə̀te sê ghənə.
Njisə̀s ə tsuʼ fòfkè
(Matyò 20.29-34; Mâk 10.46-52)
35Njisə̀s ə nə̀ sè paʼsə̂ ndùə ə Njèlikò, wùə èfòfə viu e tsɨs ə etipì endom, ndɔnə. 36È və zɨə kə̂ nɔ̂yn ə ghɨ̀kè tè tsɛ̂ ə pfɨfə nə, ə̀ kyànə̀ ghè ə?
37Ə piə sê vəyn nə ə tsɛ̀ Njisə̀s, ə vâ wùə Nazalɛ̀t.
38È və pɨa piə nə, “Njisə̀s, Va Fɔ̀yn Ndàfît, kose səyn sê mi!”
39Ghɨ ghɛ ə ghe tè ndùə əshi e sè kɨmsə̂ vəyn piə nə è kɨme mɔŋ. È və sè fɨnə pɨlə pɨa ndùə kə əshi, piə kə nə, “Va Fɔ̀yn Ndàfît, kose səyn sê mi!”
40Njisə̀s ə tyəmə ə piə nə ghəmɔ̀ʼɔ pə̀yn è vəyn sê zhi. Ə pə̀ paʼsə̂ è vəyn ə və shi, Njisə̀s ə pfɨfə sê vəyn nə, 41“Ò kyiŋə nə m ghaynghe sê ghò ə?”
È və piə nə, “Pɛ̂pɛ, nə̀yn nə mə kɛsə̂ fe tèluʼ!”
42Njisə̀s ə ke pi sê vəyn nə, “Pomə zɛze ə nə̀yn, ò vɛ ò tɛ. Kɛse zhə̀te ə ò fe tèluʼ.”
43Kè sə ashìŋə̀, è və kɛsə̂ fe tèluʼ ə ndò sè chûmtə̀ ndùə vəyn, tsîtə̀ ndùə Fèzhə̀. Ə tè fe naʼapi ndè ghɛ zɛ ə ze kyàyn, è və pɔŋɔ tsîtə̀ kə Fèzhə̀.
अहिले सेलेक्ट गरिएको:
Lûk 18: bfm
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
