Matthew 13
13
Jesus‑em Ungipaghaatkegkanga Piitesighaghta
1Tawani ataasimi aghneghmi Jesus aanluni mangteghameng, naayvam esnengakun aqumluni apeghtughikaq. 2Yulghuteghllaget kanglluqaghsatni, angyamun uuglluni aqumegkaq, enkaam yulghuteghllaget esnemetkat. 3Ungipaghaatetgun allaaghhiinaghmeng apeghtuqii. Pikii,
“Piitesighaghta piitesighaghvigminun aglaghluni, ifkaghquqaq piitutneng. 4Piitesighaghvigmini ifkaghqiyalghiimi piitutneng, ilangi tumetgun tekitkat, enkaam qawaaget tagiluteng neghuqiit. 5Ilangi piitutet tekitkat uyghagaghtuqakun sunapagilngughqun. Tawaninginaq piitkat qayughllak sunanga ugmestaaghhaq. 6Iwernga siqineq piisalghiimi maatneghan paneghtekii qayughllak akupagilnguut. 7Ilangi piitutem tekitkat sikughllugtuqakun, sikughlluget piisalghiimeng piitfigiqiit piitutet. 8Iwernga ilangi piitutet tekitkat sunakegtakun piitestikat grain‑meng, ilangi 100, ilangi 60, ilangi 30. 9Sigutelguusi, nagatek!”
Ungipaghaatet Apalliit
10Taagken maligsaaghtengita takuluku Jesus aaptekaat, “Sangan ungipaghaatmeng atuqaqsin apeghtuneghpeki yuget?”
11Jesus‑em kiimsiqii, “Elpesinun Kiyaghneghem liitestekaqaa talughngalghii ipapighqellgha Ataneghpagullghan Qilagem, iwernga ellngitnun liitesimangitaa. 12Enkaam yuuk liigikellengegkaq, wataqaaghaq liigikellengataghaghyaghqaaguq, iwernga yuuk liigikellepagilnguq liigikellgha iqillequq. 13Tamaaken apalluqluku apeghtughaqanka ungipaghaatetgun, qayughllak esghaateghngaaghmeng esghaasigalnguut, nagateghngaaghmeng nagaqiigalnguut, talwa liigikigalnguut. 14Enkaam ellngitgun Isaiah‑m uuknaliqutkillgha apeghiightuq. Taaggun uuknaliqellghakun Kiyaghneq pikaaguq,
‘Ellngit nagatepestaaghllequt taawanginaq liigiknaanghitiit;
esghaatepestaaghllequt, taawanginaq liigiknaanghitiit esghaqateng,
15qayughllak ellngita umyugiit pineghllugtekaagut.
Sigutngit tusaqneghlluugtekaagut, iyetengllu quneghtekaqiit.
Tawatelnguunghisaqumeng iiymeggneng esghaannayaghtut,
sigutmeggneng nagaquunnayaghtut, umyugamegteggun liigiknayaghtut,
enkaam qiivnayaghtut whangamnun naallghutesqelluteng.’
16“Iwernga quyanaghhalek elpesi! Iyesi esghaataqut, sigutesillu nagaquutaqut. 17Ipa ungipaatamsi, uuknaliqistelghutetlu, yulghutanganllu Kiyaghneghem, esghaghyukaqsaghiit esghaqasi, iwernga esghaamangitiit. Nagaqughyukaqsaghiitlu nagaquqasi, iwernga nagaquumangitiit.
Jesus‑em Aapqanga Ungipaghaatkegkani Piitesighaghta
18“Nagateggu sameng piiqutanga ungipaghaatkegkaqa piitesighaghta. 19Piitutet tumet saaghwitgun tekitkat usputngaat kitumun alngunak nagaquullghiimun ungipameng Ataneghpagulleghmeng ayuqelghiimeng. Liigikenghilkagu ungipaq Tughneghaam tagiluni wayaghlleqaa tekitkaayalghii ilungakun. 20Tamaakut piitutet uyghagtuqakun sunakun tekitkat usputngaat kitumun alngunak nagaquullghiimun ungipameng, tawaninginaq ungipaq tugukliqaa quyakusiqluku. 21Iwernga ungipaq ilungani mulumangilnguq qayughllak akungellghilnguq. Enkaam seghleliighyalghiimi nalighmeng amyuqetaatkellengyalghiimi, apalluqluku ungipaq tawaninginaq ugpeqinanightuq. 22Tamaakut piitutet sikughllugtuqakun sunakun tekitkat usputngaat kitumun alngunak nagaquullghiimun ungipameng, taawanginaq teggellghiillghan kiyaghtaaghusighqameng, aklungighiyulleghllaganllu piitfigighaqaa ungipaq. Tamaaken apalluqluku piitestingigatuq. 23Tamaakut piitutet tekitkat sunakegtakun usputngaat yugnun nagaquullghiinunllu liigikilghiinunllu ungipameng. Enkaam piitesqughaqut ilangi 100, ilangi 60, ilangi 30.”
Jesus‑em Ungipaaghaatkegkanga Weeds‑a
24Taagken Jesus‑em aapqaa ilanga ungipaghaan ellngitnun, pikii, “Ataneghpagullgha Qilagem yugtun piitesighaqatun pinilghiimeng piitutmeng piitesighaghvigmini ayuquq. 25Unugmi ataasimi qavasimaluki, anguyaga tagiluni piitesighaqaq weeds‑meng akulngitgun wheat‑et, taagken aghulaqegkaq. 26Nunivagseghat piisalghiimeng, wheat‑et akumluteng weeds‑meng ayuqeftut. 27Piitesighaghta qepghaghtelghutngan takuluku aaptekaat, ‘Ataneq, pinilghiimengmi piitutmeng piitesiighaghsin piitesighaghvigpeni; naken weeds‑et piit?’ 28Yugem kiimsiiqii, ‘Anguyagem tawaten pikaqii’. Aaptekaat, ‘Weeds‑et ikuultekii?’ 29Kiimsiqii, ‘Nakaa, qayughllak weeds‑et ikuqufsiki qemall wheat‑etlu ilalkiilleqasi. 30Qerngiita wheat‑etlu weeds‑etlu nagusteki kenlanga unatalleghqamun. Enan unataghyaghqaaghtekata unataghtet ungipaannaaghanka weeds‑et sivukesqelluki, qepughluki paneghsaghqaaluki. Enkaam wheat‑et unataghtesluki kagpagtesnaaghanka kagpagvimnun.’”
Jesus‑em Ungipaghaatkegkanga Mustard‑em Piitutanga
31,32Allameng Jesus‑em aapqaa ungipaghaan, “Ataneghpagullgha Qilagem piitutngatun mustard‑em ayuquq. Piitutem mekestaalleghpigaqaa, iwernga yugem piitesighaneghminigu piitesighaghvigmikun nunivagseghaghyaggaghneng aangelleghpigaakayuguuq. Uqfigughhneghani qawaaget tagiluteng avayaakun unglusiiqut.”
Jesus‑em Ungipaghaatkegkanga Yeast‑a
33Allameng Jesus‑em aapqaa ungipaghaan, “Ataneghpagullgha Qilagem yeast‑atun ayuquq. Aghnam tuguluku akuutuskanga avlawaghllagmun, enkaam akuutaghllaga ghhuughtesteghllakaa.”
Jesus‑em Atuqegkangi Ungipaghaatet
34Jesus‑em apeghtuneghminiki yulghuteghllaget quunpeng atuqaqii ungipaghaatet. Ipapestaaq sangwaa qamaglluku apeghtuusaqegkaa ungipaghaatetgun ayuquq. 35Tawaten pikaalghii apeghiighnaluku uuknaliqistem pillgha,
“Ungipaghaatet atuqelleqanka aleghququmki.
Ungipaalleqanka Kiyaghneghem liitesimangilkanganeng ima ulimayuggaallghaneng nuna.”
Jesus‑em Aapqangi Ungipaghaatkegkani Weeds‑et
36Taagken Jesus‑em unilluki yulghutet iitqaq mangteghamun. Maligsaaghtengita takuluku aaptekaat, “Sameng pisiigwat ungipaghaatkegkaghten weeds‑et piitesighaghvigmelnguut?”
37Jesus‑em kiimsiqii, “Yuuk piitesighaqaq pinilghiimeng piitutmeng, Ighneqaa Yugem; 38piitesighaghvik nunanguuq; pinilghiit piitutet yuguut Ataneghpagullghem pikii; weeds‑et yuguut Tughneghaam pikii. 39Anguyak piitestikaq weeds‑meng Tughneghaaguq. Unatalleq nunam kenletghuutelqaa, unataghtet yaqulguut. 40Unatalleghmi weeds‑et qerngughlluki paneghtaqiit. Tawateghpigaq kenletghuutellghani nunam, yuget Tughneghaam pingi qerngughlluki paneghsaghqaagut. 41Ighnegha Yugem yaqulegmineng kayagtiyaghqaaguq iqitesqelluki Ataneghpagulleghmineng qamaglluki seghleghqusitlu, seghletunllu pistet. 42Enkaam kenghegnun miluulleqiit, tawani qiyaaghwaghllagllequt, gguteteng terqitaagtaamiita. 43Taagken Kiyaghneghem yugi kuukgullequt siqineghtun Ataneghpagullghani Atameng. Sigutelguusi, nagatek!”
Jesus‑em Ungipaghaatkegkanga Iighngalghii Aklungi
44“Ataneghpagullgha Qilagem aklungistun ayuquq iighngalghii piitesighaghvigmi. Yugem naalkelluki iinqigtekii. Quyam angtalanganeng, aghulaqluni qamaglluki saghyani akikluki, taagken taana piitesighaghvik tukfiqaa.”
Jesus‑em Ungipaghaatkegkanga Pearl‑a
45“Whatetuqlu Ataneghpagullgha Qilagem: tukfightughta ivaghilghii piniipiglleghhiimeng pearl‑meng tukfighyaghqameng. 46Naalkunneghmini piniipiglleghhiimeng akituqameng, akikughaqaa qamaglluku saghyani, tukfighnaluku taana pearl‑a.”
Jesus‑em Ungipaghaatkegkanga Negaghpak
47“Ataneghpagullgha Qilagem, negaghpagtunllu ayuquq. Iqalliniightet negaghpagteng naayvamun ateghlluku aghqellaaqut enkaam allaaghhiinaghmeng iqallugteghllagaqut. 48Negaghpak sayugluku quutmun, aqumluteng iqalluget avughaqiit, pinilghit kanaghsimiita qaltanun, enkaam seghlellghi egtaqiit. 49Tawatesaghqaaguq kenletghuutellghani nunam. Yaqulget tagiluteng avughlleqiit seghleghet yuget pinilghiineng. 50Enkaam seghleghet kenghegnun miluulleqiit, tawani qiyaaghwaghllagllequt, gguteteng terqitaagtaamiita.”
Nutaghatlu Neghightatlu Apeghtuusat
51Taagken Jesus‑em aaptekii maligsaaghteni, “Qamaglluki tamaakut liigikestekii?” Kiimsiqaat, “Aa‑a.” 52Taagken pikii, “Tamaghhaghmi apeghtughikayuk Liilightuusaneng apeghtuqaq Ataneghpagullghaneng Qilagem whatelnguuguq: mangteghalek yuuk nusugralghii kagpagvigmineng nutaghamengllu neghightamengllu.”
Nazareth‑mi Ighsakegkangat Jesus
53Jesus taaqsami apeghtughineghmeng ungipaghaatneng aghulaqegkaq. 54Aglaghluni neminun apeghtughiyan synagogue‑ngitni, yuget saghiighayagutkaat. Ellmeggneng aapqughaaghutkat, “Naken peghqinellenga? Nakenllu aghtughyaghqaanghillenga allaaghlluwhaghtimun? 55Ighneqenghitaguu kaapentam? Mary naakenghitaguu, uuk anglegutkenghitakii James‑enkut, Joseph‑enkut, Simon‑enkut, Judas‑enkut? 56Nayagillu maanneghitaat? Naken liitellengeghllagtallu aghtughyaghqaanghillengallu?” 57Enkaam tuguklighyunghitkaat.
Jesus‑em pikii, “Nani alngunak yuget siivakaqaat uuknaliqista iwerngaqun ellngan katam nunanganillu nengllugutanganillu.” 58Tamaani allaaghlluwhaghtipagumangilnguq qayughllak ugpeqenghilkangat.
अहिले सेलेक्ट गरिएको:
Matthew 13: ess
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2018, Wycliffe Bible Translators, Inc. All rights reserved.
