ሉቃስት ወንጌል 22

ፈወነ 22

ይዅዳ እየሱስት ዲቍስ ይውጠ ቲስመመጘ

(ማቲ. 26፡1-5፤ ማር. 14፡1-2፤ ይዃ. 11፡45-53)

1ፈዝየ የነው ቅጣ ዀነው በሊዝ ግርየድ ችጝ ዊኑ።#ዘፀ. 12፡1-27። 2ካኽነጣነ ኻልቅጢዝመ ወሪትት ኽግ ክንሰጢዝም ኽዝቭድ ጐውትጛንስቅ፣ እየሱስት ስውርዝ ቍወነው መለ ደምዝጝጛ ዊን። 3ኣይንድም ፅጭ ሊጘይጅቅ እጊት ዊነው ኣስቈረውትቱ ይዅዳትል ሲጣን ጥዉ። 4ጘጝም ካኽነጣነ ኻልቅጢዝመ መቅደስ ጝንድ ኻየቊዝ ኻልቅጢዝጐ ፊር፣ እየሱስት ኣወሽ ዲቍስ ይውጠጘድ ጛጅቅ ዊግሹ። 5ጛይም እን ዊገይዝ ዲስ ይጝ፣ ቍርሻን ይውጥጘ ወለይሽ። 6ይዅዳም ውሊዝ ቲስመም ኽዝቭ ዊናው ግርየዝ ዲቍስ ይውጠ ሚቸው ግርየ ደምዘነው ኪርሙ።

ፈዝየት ድረይዝመ ቅዱስ ቍርቫንዙ ስረቲዝ

(ማቲ. 26፡17-25፤ ማር. 14፡12-21፤ ይዃ. 13፡21-30)

7እንዝ ግረ ፈዝየት ቢገድ ዝውሸው ቅጣ ዀነው በልድ ችጙ። 8እየሱስም፦ «ፈዝየት ድረይድ ዅነ ማጥን ፊትርን ኣስልጥን» የው ቢጥሮስመ ይዃንስስ እፃቑ።

9ጛይም፦ «ኣውል የጝ ኣስልነ በንረውድ?» ይጝ ዋቕር። 10እየሱስም፦ «እት ኻትመይል ጥውርናንድ ጭን ኣቝ መውረው እጅር ችጝትርንቅ፤ ጘጝ እጅርድ ጥወው ጝኒል ኣሽ ቲክንድርን ጥውጥን። 11ጝኒዝ ወነድየንትም፦ ‹ክንሰተድ <ይክንደጢጅቅ ፈዝየት ድረይድ ዅጨ ማጥን ኣብኒዝ ጝንድ ኣውል የጝ?> የኵ› ይጥን። 12ጘጝም ኽየው ዲቭሪል ወፃሽ ኣስልሸው ፈራቐው ወልወል ቓሊስጡ፤ ጝግል ኣስልጥን» ዩ።

13ጛይም ፊርጛንድ እየሱስ ድቈጘ እጝቅትቅ ችጝ፤ ፈዝየት ድረይድም ጝግል ኣስል።

14ፈዝየት ድረይድ ዀነው ሰትድ ችጛንድም ፅጭ ሊጘ ኻወርየታኒጅቅ መዲል ጐዩ። 15ጛጭስም፦ «ይሚከረይዝ በውገ እኒን ፈዝየት ድረይድ ክታጅቅ ኣቕ ዀነው ጭቕጘ በና ዊኑን። 16እን ዊገይዝ ትርጕምድ እደረት ምጝግስቲዝ ኻትሽጢስቅ እን ፈዝየት ድረይድ ሊጘት ዀቅም የኵን» ዩ።

17እንዝ ግረ ፅወድየንት ለምር ሚዝየንዝ በር፦ «ኣስጥን ክትን እጝቅቅ ላብጠ እኒስ ዚጥን። 18ነንስ ኪርም እደረት ምጝግስትየን ተርቲስቅ እን ወይኒዝ ፍረይዙ ድቘይስ ዝቀቅም የኵን» ዩ።

19ኽቭስትድም ጒ ሚዝየንዙ፤ ጛጭስም ኪል ይው በር፦ «እኒን ክታቺ ይውሽተው ይስየድ የጝ፤ ይት ኻስቭርናንስ ማጥን እኒንት ፃቭጥን» ዩ። 20እኒዝጘ ቈሽ ድረይድ ዅጘት ግረ ፅወድ ጒ በር፦ «እኒን ፅወድ ክታቺ ቅብረው የብሪዝ ሚስርትሸው ኣይር ኪዳን የጝ።#የር. 31፡31-34።

21«ዊገድ ግን ይት ዲቍስ ይወው እጅሪዝ ናንሸን ይጅቅ መዲል ጚ።#መዝ. 41፡9። 22እጅር ዅርስ በውግስ ዊስንሸጘ ክረነውድ እዳቓውም፤ ዊገድ ግን ጝት ዲቍስ ይወው እጅሪዝ ወየው» ዩ።

23ጝክንደጥድም ጛስ ጛይ፦ «ይናማኽሊስ እነየው ዊገ ሰራሸውድ ኣው የጝ?» ይሽተ ይሽተነው ኪርም።

እጝቂስቅ ኪብረው እጅር ኣወየውድ ኣቐጘ

24ቈሽም ጛይ፦ «ይናእጝቂስቅ ንየቱ ኣቐውድ ኣው የጝ?» ይሽተይሽትጛ ጛስ ጛይ ተከራክርሽጥጘ ኪርም።#ማቲ. 18፡1፤ ማር. 9፡34፤ ሉቃ. 9፡46። 25እየሱስ ግን እንት ዩ፦ «እን ኣልሚዝ ንጕሳንድ ጝታኽዝቭድ ኻይልዝ ቅምጘኵ፤ ጝታኻልቅጥድም፦ ‹ቀሰው ፃቨቍ› ይሽትጝ ጭጝሽጘኵ።#ማቲ. 20፡25-27፤ ማር. 10፡42-44። 26ክትን ግን ጝታጘ ኣትርነ፤ ኽሽስ ክታማኽሊስ ኽየውድ እጥኒዝጘ፣ ቅመውድም ቅምሸዊዝጘ ኣነ።#ማቲ. 23፡11፤ ማር. 9፡35። 27ኣየውጚ! መዲል ጐይ ዀዊስመ ችብር ኣግልግለዊስ ኣውየን የጝ ኽየውድ? መዲል ጐይ ዀውድ ኣየውመ? ያን ግን ክታማኽሊል ችብር ኣግልግለዊዝጘ የጝ።#ይዃ. 13፡12-15። 28ክትንም ይሚከረይዝቅ ይጊስ ቲቲጝቀ ይጅቅ ፀናቕርንኵርኑ። 29ኣቓንስቅም ይር ይት ይመጘ፣ ያን ቈሽ ይምጝስቲዝ ክታት ይምጭር። 30ይምጝስቲዝ ኰርም ይመዲል ጐይርን ዅትርንቅ፤ ዚትርንቅ፤ ዙፋናንልም ጐይርን ፅጭ ሊጘ እስራየልት ዊግናኒል ፊርድትርንቅ።»#ማቲ. 19፡28።

ቢጥሮስ ኻዲጠጘድ እየሱስ በውግስ ዊግተጘ

(ማቲ. 26፡31-35፤ ማር. 14፡27-31፤ ይዃ. 13፡36-38)

31እንዝ ግረ እየሱስ ቢጥሮስት፦ «ስሙን! ስሙን! እንወ! ሲጣን ክታት ዚሩ ጣቅሰናንትጘ ጣቅስጠ በን ጨዉ። 32ያን ግን ክእምንትድ ድዛይየጘ ክማጥን ፃልዩን፤ ክትም ኣኑሽር ይጐ ዋጥርዳንድ ዊስር ክፅንት ፀናዝ» ዩ። 33ስሙንም እየሱስት፦ «ኣደረወ! እፅወም ኣነ ክርጘድቅ ክጅቅ ለምጨ ኣስልጨር የጝ» ዩ። 34እየሱስም፦ «ቢጥሮስ! ንጭ ጂርወ ዋቒጝቀ ይት ሸውን ኻዲትር» ዩ።

35እንዝ ግረም ጝክንደጥድዛት፦ «ቡርሰዝመ ኽረጢት ፃዪጝቀ፣ ፃብጣንም ፃብሪጝቀ እፃቓንድ ክታጊስ ሚንትርነ ግቱመ» ዩ፤ ጛይም፦ «ውርም ግቲየው» ይ።#ማቲ. 10፡9-10፤ ማር. 6፡8-9፤ ሉቃ. 9፡3፤ 10፡4። 36እየሱስም፦ «ነን ግን ቡርሰም ኣነ ኸረጢት ፃየውድቅ ፃይነ፤ ሰይፍ እጀውድም ጝኣልቨድ ቂ ሰይፍ ጅቭነ። 37‹ኣመፅኝጢጅቅ እጊቱ› የው መፃፍ ይማጥን ዊግተውድቅ ችጝጠ ጥውሸኵ የኵን፤ የይ! ይማጥን ፃፍሸውድቅ ችጘው ግርየድ ነን ችጝኩ» ዩ።#እሳ. 53፡12። 38ጛይም፦ «ኣደረወ እንወ! እንል ሊጘ ሰይፍጥ እኵ» ይ፤ ጘጝም ዊስ፦ «ኣጥጘች» ዩ።

እየሱስ ደቭረ ዘይት ኣበይል ፃልየጘ

(ማቲ. 26፡36-46፤ ማር. 14፡32-42)

39እንዝ ግረ እየሱስ ጝጊስ ፍ፣ ጝክንደጘ ደቭረ ዘይት ኣበይል ፊሩ፤ ጝክንደጥድም ጝት ቲክንጝ ፊር። 40ጝግል ችጘጘም፦ «ፊተነል ጥዋይርነጘ ፃልይጥን» ዩ። 41ጛጊስም ቕርጘ ዊርውርን ችጝዘነ ብጣይዝ ቝጠ እክልድ የው ግርቨቭሽ እንት ያ ፃልየነው ኪርሙ። 42«ኣየወ! ክት ዊድረር ኣርሽስ እን ሚከረይዝወ ፅወይንት ይጊስ እድጐ ዲቍሽ፤ ዊገድ ግን ይፍቃድድ ኣይጝቀ ክፍቃድድ ኣነ» ዩ። 43ኣይንድ መላክ ሲመይስ ተር በርታዙ። 44እየሱስም ጐውት ጭቕጘ ጨጝቅሻንስቅ ኻይልዝ ፃልያ ዊኑ። ጝስዛድም ብሪዙ ጥርብርብተይዝጘ ቅብራ ዊኑ። 45ጛይም ጭቕጘ ኻዝነነዊስ ጐው ፅገውሽጛንስቅ ኽርይጝ ዊን። 46ጘጝም፦ «ውር ማጥን የጝ ኽርይርነውድፈ? ኽሽስ ፊተነል ጥዋይርነጘ ጕርን ፃልይጥን» ዩ።

47ጘጝ ገነ ዊግታ ሲጝቀም፣ ንቕፀቍ እቅ ተር፤ ፅጭ ሊጘይጅቅ ዊነው ይዅዳም ጛት ቃዋ ተሩ፤ እምቝጠም እየሱስትጐ ኣልት ዩ። 48እየሱስ ግን፦ «ይዅዳወ! እምቕራመ እጅር ዅርት ዲቍስር ይውተ?» ዩ።

49እየሱስ ጅቅ ዊነቍ እቅድም ኣቐው ዊገድቅ ቓልጛንድ፦ «ኣደረወ! ሰይፍዝ ጣዝነ ኣቕሻ» ይ። 50ጛጊስም ላውድ ጕ ካኽነጣነ ኻልቀይዝ በረድየንት ጣዝ ለወ ቀርዝድ ቀቭ ማሉ። 51እየሱስ ግን፦ «በጭ! እንስ ጥውሻውም» ዩ። እድ እጅሪዙ ቀርዝድየንትም ዳቕ ቓዙ።

52እንዝ ግረ ጝት ፃይጥጘ ተረቍ ካኽነጣነ ኻልቅጥድ፣ መቅደስድ ኻየቊዝ ኣዘጢዝመ ሽመቅሊዝ፦ «ሽፍተ ፃይትርነጘመ ሰይፍዝመ ዱለዝ ፃይርን ተትርኑ? 53ግሪ ጨቨቅ ክታጅቅ መቅደሲል ፅባ ክታናንጣንድ ጕዪይርነቅም ዊንድርኑ፤ ነን ግን ክታግርየ የጝ፤ ቈሽም ጥመዝ ስልጣኒዙ ግርየ የጝ» ዩ።#ሉቃ. 19፡47፤ 21፡37።

ቢጥሮስ እየሱስት ኻድየጘ

(ማቲ. 26፡57-58፤69-75፤ ማር. 14፡53-54፤66-72፤ ይዃ. 18፡12-18፤25-27)

54እንዝ ግረ እየሱስት ፃይጝ ፊር፤ ካኽነጣነ ኻልቀይዝ ኻፅሪልም ፊስ፤ ቢጥሮስም እክልድ የው ቲክና ዊኑ። 55እቅድም ካኽነጣነ ኻልቀይዝ ኻፅር ማኽሊል ልየ ኻውሽጝ ላብጠ ጐይጝ ፅብጛ ቢጥሮስም ጝታማኽሊል ጐዩ። 56ቢጥሮስም ልየይዝ ጋቢል ብርኻኒዝጐቱ ጐይ ፅባ ላይ ጊርድ ጝት ትክ ይር ቓልድር በትር፦ «እኒንም ቃል እየሱስ ጅቅ ዊኑ» ይች። 57ቢጥሮስ ግን፦ «እፈ እውነ ክተ! ያን ጝት ኣርቐቅም» የው ኻድዩ። 58ዊቱ ዊን የው ቈሽ ላየ እጅር ቢጥሮስት ቓል፦ «ክትም ጛጊስ ላውድ የጝ» ዩ፤ ጘጝም፦ «እፈ እጅር ክተ! ያን ጝት ኣርቐቅም» ዩ። 59ላው ሰት ኣጠ ዊን የው ቈሽ፣ ላየ እጅር ቢጥሮስት፦ «እን እጅርድ ገሊለቱ የጝ፤ እርግጥም እየሱስ ጅቅ ዊኑ» የው ጭቕጘ ደድስ ዊግቱ። 60ቢጥሮስም፦ «እፈ እጅር ክተ! እኒን ክት ይረው እጅርድየንት ያን ኣርቐቅም» ዩ፤ ኣይንድም ገነ ዊግታ ሲጝቀ ጂርወ ዋቑ። 61ኣደረም ዋጥር የው ቢጥሮስት ቓሉ፤ ቢጥሮስም፦ «ንጭ ጂርወ ዋቒጝቀ ይት ሸውን ኻዲትር» የው ኣደረ ዊግተው ቃልድ ትዝ ዩ። 62ቢጥሮስም ቢዘይል ፍ ኽርር የው ሊዙ።

63ኣይንድም እየሱስት ፃየቍ እቅድ ተዘቫቭትሽጛ ድድብጛ ዊን። 64ጝእልጣንድም ሺፍንጝ ጝጋፅድ ጥፊዝ ጣዝጛ፦ «ነቭይ ኣረውዝየ ክት ጣዘውድ ኣው የጝ? እስቲ ድቋ?» ይጛ ዋቕርጛ ዊን። 65ላጥ ንቕፀቍ ዛንዝቍ ዊቅም ዊግትጛ ዊን።

እየሱስ ፍርድዙ ሸጐዊል ኣልተጘ

(ማቲ. 26፡59-66፤ ማር. 14፡55-64፤ ይዃ. 18፡19-24)

66ቅሻንድም ኽዝቪዝ ሽመቅልድ፣ ካኽነጣነ ኻልቅጥድ፣ ወሪትት ኽግ ክንሰጥድም ላብጠ ኣኽቭሽ። እየሱስትም ጝታሸጐዊል ኣልስጝ፦ 67«እስቲ ድቍ! ክት ክርስቶስመ?» ይጝ ዋቕር፤ እየሱስም፦ «ድቍሽም ኣምናይርነቅም። 68ክታት ዋቕራንም ዊሳይርነቅም። 69ዊገድ ግን ነንስ ኪርም እጅር ዅር ኻይሉ እደረት ለዊል ጐይጡ» ዩ። 70ኣይንድም ጛይ እጝቅቅ፦ «እደስለ ክት እደረት ዅርመ?» ይጝ ዋቕር፤ ጘጝም፦ «የይ፤ ክትን ይርናንትጘ የጝ» ዩ። 71ጛይም፦ «ነስየ ውርት ሚዝር ደሚስጠፈ! ይናቕም በገዘ ጝምቸይዝ ዊግታንድቀ ወሽንጅነቅ» ይ።

अहिले सेलेक्ट गरिएको:

ሉቃስት ወንጌል 22: ኽምጣኣኪ

हाइलाइट

शेयर गर्नुहोस्

कपी गर्नुहोस्