ሉቃስት ወንጌል 18
18
ፈወነ 18
ቲግየዝ ፃልየነው ጥውሽጠጘ
1እንዝ ግረ እየሱስ ሲዙሪጝቀ ዊትርቅ ፃልየነው ጥውሽጠጘድ ክንስጠ በን ጝክንደጢዝ እኒን ተከድ ድቁ። 2«ላይ ኻትመትል እደረት ጐውታው፣ እጅርም ኣይቭታው ላው ደጘ ዊኑ። 3ጚ ኻትመየንትል ፅብረይ ላይ ልጀጊርድ ቈሽ ዊንች፤ ጚይም እን ደጘይል ተትራ፦ ‹ይቃርኘይጅቅ ጨቅን ፃቀር የጝ፤ ኣለቀይ ፍርድ ነቅ› ይራ ዊንች። 4ጘጝ ግን ፍርድ ይዊጝቀ እክሰው ግርየ ዲቍሱ፤ እግረ ግን እንት የው ኻስቩ፦ ‹ውርም እኳ እደረት ጐውጠቅ፣ እጅርም ኣይቭጠቅ ኣቓን። 5እኝቸን ልጀጊርድሸን ኒዝንዝራንስቅ ፊርጥ በጨጚ፤ ኣቒየውዝየ ግን ዋጥርጥርዳ ሲለስተ ጚ› ዩ።»
6ኣደረም ዊስ፦ «ጭቓ ደጘድ ዊግተውድየንት ኣስክስጥን። 7እደስለ እደረ ኻር ጊርቅ ጝት ጨወቍ ጝምርፃኒዝ ፊርዳውመ? ቸለል የውስ ጛት ከቨነዊስ ደይጡመ? 8ደዪጝቀ በውዝ ፊርድጡ የኵን፤ ዊገድ ግን እጅር ዅር ተራንት ኰር ዝቨቲስ እምንት ችጝጡመ ኣጢ? ዩ።»
ፈሪሳነው እጅርዝመ ቀረጥ ቀቨው እጅርዝ ተከድ
9ቈሽም፦ «ይን ፃድቃን» ይጝጛ ማክኽሸቊዝመ ላጥድ ነቀቍ እቂዝ እኒን ተከድ ዊግቱ፦ 10«ሊጘ እቅ ፃልይጥጘ መቅደሲል ፊር፤ ላውድ ፈሪሳነው፣ ላውድ ቈሽ ቀረጥ ቀቨተ ዊኑ። 11ፈሪሳነውድ ችብር ጝእዘኒዝ እንት ያጕ ፃልዩ፦ ‹እደረወ! ያን ላጢዝጘ ቀመተም፣ ኣመፅኘም፣ ሸርሙጠም፣ ኣይቀር ኣቓንስቅ ክት ሚዝየንዘኵን፤ ኽሽም እን ቀረጥ ቀቨተይዝጘ ኣይቀር ኣቓንስቅ ሚዝየንዘኵን። 12ሸወጭዝ ሊጘ ግርቅ ፃመኵን፤ ችጘዊስቅ ኣስራት ይወኵን› ዩ። 13እድየን ቀረጥ ቀቨተድ ግን እክልት የው ችብሩ፤ ጭቅ የው እኳ ሲመይት ቓልጠ ዲፍሪየውም፤ ዊገድ ግን ጝእዘንድ ድቝላ፦ ‹ኣደረወ! ያን ኽጥያትኘድየንት ሳቝጫ› ያ ዊኑ። 14እማንዝ የኵን፤ እድ ፈሪሳነዊስቅ እን ቀረጥ ቀቨተድ ፃድቅ ኣቕ ፊሩ፤ ምላሰንድ ጝቕምት ንየስ ንየስ ሸውድቅ ዝጥቅ ይጡ፤ ጝቕምት ዝጥቅ ሸውድቅ ግን ንየስ ይጡ።»#ማቲ. 23፡12፤ ሉቃ. 14፡11።
እየሱስ ኽፃናታን በርከጘ
(ማቲ. 19፡13-15፤ ማር. 10፡13-16)
15እየሱስ ጝናንጣንድ ጝታዲጊል እቝር በርክጠ ማጥን እቅ ኽፃናታን ጝጐ ነስ፤ ጝክንደጥድ ግን እኒንት ቓልጛንድ እቅድዛት ቃርሽ። 16እየሱስ ግን ኽፃናታንድዛት ጝጐ ጭጝ፦ «ኽፃናታን ይጐ ተርጥጘ ማጥን ጊግቭትርነ፤ ምላሰንድም እደረት ምጝግስትየን እንዛት ተከቊዝ ጚ። 17እማንዝ የኵን፤ እደረት ምጝግስትየንት ኽፃንዝጘ ለምራውድቅ ጝርግል ጥዋውም» ዩ።
ኻፍታም ኣይዅዳነ ኻልቀይዝ ዋቕረ
(ማቲ. 19፡16-30፤ ማር. 10፡17-31)
18ኣይዅዳነ ኻልቅጢስም ላውድ፦ «ቀሰው ክንሰተወ! ዘላልምዙ ርዅየ ችጝጨ ማጥን ውር ፃቭጨ?» የው እየሱስት ዋቕሩ። 19እየሱስም፦ «ወረጘ የጝ ቀሰው ይረውድፈ! ላው እደረትለ ቀሰውም እጀው። 20ትዛዛንድ ኣርቕረኵ፤ ጛይም፦ ‹ሻርሙጥተ፤ ቁተ፤ ስተ፤ ኻሽትዝ ሚዝርድተ፤ ኪር ክኘት ኪብርዝ፤› የቍድ ጛይ» ዩ።#ዘፀ. 20፡12-16፤ ዘዳ. 5፡16-20። 21ጘጝም፦ «እንዛትስ ገነ መሉሲጝቀ ኪርም ፋፅምኩን» ዩ። 22እየሱስም እኒንት ወሻንድ፦ «እደስለስ ገነ ላይ እዳቕርኵች፤ ክፃይረው ኻፍትድቅ ቂይር ድኽዝ ይይ፤ ምጝግስተሰማያትስም ኻቭትዙ መዝገቭ ችጝትር፤ ጝዝለ ተትር ይት ቲክን» ዩ። 23እጅርድ ግን ኽየው ኻቭት ጕርየ ዊናንስቅ እኒንት ወሻንድ ጭቕጘ ኻዝኑ።
24እየሱስም እጅርድ ኻዝነጘ ቓል፦ «ኻፍታማንዝ እደረ ምጝግስትል ጥወነውድ ውርጘ ቺግርዘው የጝፈ! 25ኻፍታም ምጝግስተሰማያት ጥዋንትሽ ግምለ ሚርቨዙ እልዝ ጭልቓን ቀለኵ» ዩ። 26እንት ያንድ ወሸቍ እቅድም፦ «እደስለ ኣው የጝ ቓደነው ቸለውድፈ!» ይ። 27እየሱስ ግን፦ «እጅርዝ ቸልሻው ዊገድየን እደረስ ግን ቸልሸኵ» ዩ።
28ቢጥሮስም፦ «እንወ! ይን ይናፃይነውድቅ በርን ክት ቲክኑን» ዩ። 29እየሱስም፦ «እማንዝ የኵን፤ እደረት ምጝግስትት ማጥን የው ጝጝንድ፣ ዊንም ጝውነት፣ ዊንም ጝፅንት፣ ዊንም ጝኣቅልድ፣ ዊንም ጝቝርት በረው እጅር፣ 30እን ዚቭኒዝ ንቕፀው ኣፅቨ፣ ተረው ዚቭኒዝ ቈሽ ዘላልምዙ ርዅየ ለምራው ኣውማውም እጀው» ዩ።
እየሱስ ጝክርጘይዝቍዝ ሸወት ዊግተጘ
(ማቲ. 20፡17-19፤ ማር. 10፡32-34)
31እየሱስም ፅጭ ሊጘድ ጝጐ ኣልስ እንት ዩ፦ «ነስየ እየሩሳልየም ፊርንቅ፤ እጅር ዅርት ማጥን ነቭያታኒዝ ፃፍሸውድቅ ጝግል ፋፅምሽጡ። 32ጘጝም ኣኽዛቫነ ናኒል ዲቍሽት ይውሽትጡ፤ ጛይም ጝት ቂልድጥቍ፤ ገልታዝጥቍ፤ ጝዲጊልም ጝታብፅቕንድ ትፍ ይጥቍ፤ ጝዝለም ጊርፍጝ በርጝ ቍውጥቍ። 33ኣነጚ ሸወትረ ግርየይዝ ክርጘይስ ጕጡ» ዩ። 34ጝክንደጥድ ግን እንቝጥጘ ዊቂስቅ ላውድም ቲዚየቍ፤ ጘጝ ዊግተው ዊገድ ጛጊስ ሲውርሻንስቅ ውር ዊግተጘ እኳ ኣርቒየቍም።
እየሱስ ኣያሪኰስ ላው ኻርቨ ቓዘጘ
(ማቲ. 20፡29-34፤ ማር. 10፡46-52)
35እየሱስ እያሪኰ ትጐ ኣልታንድ ላው ኻርቨ እጅር ምፅዋት ጨዋ ጒደን ደዪይል ጐይ ዊኑ። 36ጘጝም ጝጋቢዝ ዲቈው ንቕፀው ኽዝቭዝ ድመድ ወሻንድ፦ «እን ጃጃተድ ወረጘ የጝፈ? የው ዋቕሩ። 37እቅድም፦ «ናዝሪትቱ እየሱስ እንዝ ዲቋ የጝ» ይጝ ድቍ። 38ጘጝም፦ «ዳዊትት ዅር እየሱስወ! ኣለቀይ ሳቝጭ» ያ ቓፁ። 39ቀድምጝ በው በዊል ፃጝጛ ዊነቍ እቅድም፦ «እፈ ዝም ይ» ይጝ ቃርሽ፤ ጘጝ ግን ጝድመድ ኣጒስ ሸው፦ «ዳዊትት ዅርወ! ኣለቀይ ሳቝጭ» ያ ቓፁ።
40እየሱስም ችብር፦ «ይጐ ነስጥን» የው ኣዙ፤ ኻርቨድም ጝጐ ኣልታንድ፦ 41«ውር ፃቭጨ በንረኵ?» የው ዋቕሩ፤ ጘጝም፦ «ኣደረወ! ቓለነው በነኵና» ዩ። 42እየሱስም፦ «ቓል! ክእምንትድ ቓዝኩ» ዩ። 43ኻርቨድም ኣይንድ ጝእልጣንድ ቢትጝ ጫቓለነው ቸሉ፤ እደረትም ሚዝየንዛ እየሱስት ቲክኑ፤ ኽዝቭድም እጝቅ እኒንት ቓላንድ እደረት ሚዝየንዙ።
अहिले सेलेक्ट गरिएको:
ሉቃስት ወንጌል 18: ኽምጣኣኪ
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
