ይዃንስት ወንጌል 6
6
ፈወነ 6
እየሱስ ኣኰ ሽኽ እቅ ሚገቨጘ
1እንዝ ግረ እየሱስ ጥቭርያደውስ ይሽተው ገሊለቱ ባኽርድየንት ከር ባኽር ደርቸይል ፊሩ። 2ጭቕጘ ንቕፀው ኽዝቭም ፅውዝጅንጢል ፃቨቍ ታምራንዝቍ ምልክታንድ ቓላንስቅ፣ ጝት ቲክኑ። 3እየሱስም ኣበል ፍ ጝክንደጢጅቅ ጐዩ። 4ኣይዅዳኒዙ ፈዝየ በልድም ችጝ ዊኑ።
5እየሱስም ንቕፀው ኽዝቭ ጝጐ ተራንድ ጭቅ የው ቓሉ፤ ፊልበውስትም፦ «እንቍጠ ኽዝቪዝቅ ኣቐው ሚ ኣዊስ ጅቭንቅ?» ዩ። 6እኒንት ዋቕረውድ ፊትንጠ በንጚ ጘጝ ፃቭጡድ ጝቕም ኣርቓ ዊኑ። 7ፊልበውስም፦ «ጝታይተእጝቅዝቅ ላው ላው ቅርጨ እኳ ችጛንስ ማጥን ሊጘ ላ ዲናርዙ#6፡7 ላው ዲናርድ ላው ግርየዙ ምኻየ የጝ። ሚ ጅቭናን እኳ ኣቓውም» ዩ።
8ጝክንደጢስ ላውድ ስሙን ቢጥሮስት ዝን እንድርያስም፦ 9«እንል ኣኰ ስቅም ምጭዝመ ሊጘ መልቍ ኻዝዝ ፃየው ላው እፈረ እኩ፤ ኣነጚ እንዛይ እንቝጠ ኽዝቭዝ ውር ኣጥጛ?» ዩ። 10እየሱስም፦ «እቅድዛት ጐይስጥን» ዩ። ጘጝ ስፍረይል ንቕፀው ፃቀ ዊኑ፤ እቅድም ጐይ፤ ጝታእግዘድም ኣኰ ሽኽ ኣጥጘ ግልቍ ዊን። 11እየሱስም ኣኰ ምጭድ ጒ እደረት ሚዝየንዝ በር ጐየቊዝ ጝታበንዘዊዝጘ ኣድሉ፤ ኻዝዝድዛትም ጘጝት ፃቭ ኣድሉ። 12እጝቅቅ ዅጝ እፍትጘት ግረ ጝክንደጥድዛት፦ «ቲርፈው ሚስ ላውቅ ሊቫየጘ እጝቅትቅ ጥቅልጥን» ዩ። 13ጛይም እቅድ ዅጘቍ ኣኰ ስቅም ሚጪስ ትርፈውድየንት ጥቅልጝ ፅጭ ሊጘ ሚስቫን እቻዝ።
14እቅድም ጘጝ ፃቨው ታምርድ ቓልጛንድ፦ «እርግጥ እኒን እጅርድ ኣልሚዝጐ ተረው ነቭይድ የጝ!» ይ። 15ጘጝም እቅድ ግድዝ ፊስጝ ኒግስጥጘ ኻስቭጘጘ ኣርቓንስቅ እንደ ገነ ጝለ ፈቀቅ የው ላው ኣበዝጐ ፊሩ።
እየሱስ ባኽር ዲጊዝ ልኵዝ ፃጘጘ
(ማቲ. 14፡22-33፤ ማር. 6፡45-52)
16ኵናንድም ጝክንደጥድ ባኽሪዝጐ ጊም። 17ታኰዝ ተሳፍርሽጝም ቅፍርናዀም ትጐ ከርጥጘ ጕ፤ ጊዝያትድም ኵን ዊኑ፤ እየሱስም ገነ ጝታጐ ተሪየውም ዊኑ። 18ኣይንድ ኻይሉ ፊግየ ጣዛ ዊናንስቅ ባኽርድ ተናውጥሹ። 19ኣኰ ዊንም ዋልጠ ኪለው ሚትር#6፡19 ግሪኪዝ፦ «ለርን ኣኰ ዊንም ሰውርጝን ፈወነ» የኵ። ባኽርድ ቂዝፍጛ ፊርጘት ግረ እየሱስ ባኽርድየንት ደዳ ታኰይዝጐ ኣልታንድ ቓልጝ ጐውት። 20ጘጝ ግን፦ «ያን የጝ ጐውትርነ!» ዩ። 21ጛይም ጝት ለምርጝ ታኰይል ኣሳፍርዝጥጘ በን፤ ዊገድ ግን ታኰድ በውዝ ጛይ ፊርጘው ስፍረይል ችጙ።
22ጛምርሲዝም ባኽሪዝ እጂ እዳቕጝ ዊነቍ እቅድ፣ ጝግል ዊነውድ ላው ታኰ ጭቝ ኣቐጘ፣ ጝዝም እየሱስት ክንደጥድ ጭቝ ተሳፍርሽጝ ፊርጘጘ፣ እየሱስ ጝቕም ግን ጛጅቅ ታኰይል ጥዊየው ኣቐጘ ቓልጝ ዊን። 23ላጥ ታኵጥ ቈሽ ጥቭርያደውስስ ጕጝ ኣደረ እደረት ሚዝየንዝ ሚ ዀሰው ስፍረይዝጐ ተር። 24እቅድም እየሱስም ኣነ ጝክንደጥድ ጝግል እጀቍ ኣጘጘ ቓልጛንድ ጛይ ታኵጢዝ ተሳፍርሽጝ ጝት ደምዝጛ ቅፍርናዀም ትጐ ፊር።
እየሱስ ርዅየዙ ሚ የጝ
25ጝትም ባኽሪዝ እጂስ ችጛንድ፦ «ክንሰተወ! እንል ኣውን ተትሩ?» ይ። 26እየሱስም፦ «እማን እማን የኵን፤ ይት ደምዝርነውድ ዅርን እፍትርናንስቅጚ ታምርዙ ምልክት ቓልድርናንስቅም ኣየው። 27ጨቅሸው ሚዝቍዝ ሰራሽትርነ፤ ኽሽስ እጅር ዅር ነየው ዘላልምዙ ርዅየ ኣቐው ዅረዝቍዝ ሰራጭጥን፤ ምላሰንድም እደረ ጝግል ደደደድሰው ማኽተምዝ ኻትትምኩ» ዩ። 28እቅድም፦ «እደስለ እደረት ሰቭድ ሰራሸናንስ ማጥን ይናጭስ ጥውሸውድ ወረጘ የጝ?» ይ። 29እየሱስም፦ «እደረት ሰቭድመ ጘጝ እፃቐዊዝ ኣምነነው የጝ» ዩ። 30ጛይም፦ «ክት ቓልን ኣምንናንስ ማጥን ወረጘ ታምርዙ ምልክት ፃቭትር? ውርስ ሰራሽትር? 31‹ጛይ ዅጛንስ ማጥን ሲመይስ ሚ ይዉ› ይሽት ፃፍሸጘ ይናኣቅልድ በራኸይስ መነ ዅጝኵ» ይ።#ዘፀ. 16፡4፤ 15፤ መዝ. 78፡24።
32እየሱስም፦ «እማን እማን የኵን! ሲመይስ ሚ ነየውድ ሙሴም ኣየው፤ እማንተው ሚድ ሲመይስ ነየውድ ይር የጝ። 33እደረት ሚድ ሲመይስ ጊመው፣ ኣልሚዝም ርዅየ የወው የጝ» ዩ። 34ጛይም፦ «ኣደረወ! እደስለስ እነየው ሚድ ዊትርቅ ነቅ» ይ። 35እየሱስም፦ «ርዅየዙ ሚድ ያን የጝ፤ ይጐ ተረውድቅ ስሪስቅ ግድርዳውም፤ ይት ኣምነውድም ስሪስቅ ዝቛንዳውም። 36ዊገድ ግን ያን ክታጭስ ዊግጠጘ፣ ይት ቓልድርንም እኳ እምኒርነቅም። 37ኣይር ይጭስ ነየውድቅ ይጐ ተረኵ፤ ይጐ ተረውድየንትም ስሪስቅ ቢዘ በርሰቅም። 38ያን ሲመይስ ጊመውድ ይት እፃቐዊዙ ፍቃድድ ፃቫንስ የጝጚ ይቕምቱ ፍቃድድ ፃቫንስም ኣየው። 39ይት እፃቐዊዙ ፍቃድድም ጘጝ ይጭስ ነየቊስቅ ላው እኳ ድሲጝቀ ኻትሸነ ግርየዝ ክርጘይስ ጒሳንስ የጝ። 40ይርት ፍቃድድ፣ ዅርት ቓል ጝት ኣምነውድቅ ዘላልምዙ ርዅየ ችጛንስ የጝ፤ ያንም ኻትሸነይዙ ግርየይዝ ክርጘይስ ጒስጭር።»
41ኣይዅዳንድም እየሱስ፦ «ሲመይስ ጊመው ሚድ ያን የጝ» ያንስቅ ኣጕርምርምጛ፦ 42«እኒን ዮሴፍት ዅር እየሱስ ኣየውቀ? ጚር ጝኘትስ ኣርቕነኵን ኣየውቀ? እደስለ ነን፦ ‹ሲመይስ ጊሙን› የውድ ወረጘ የጝ?» ይ። 43እየሱስም፦ «ክታስ ክታይ ኣጕርምርምትርነ። 44ይት እፃቐው ኣይር ዊትረውድ ኣየውዝየ ይጐ ተርጠ ቸለው ኣውማውም እጀው፤ ይጐ ተረውድየንትም ኻትሸነ ግርየይዝ ክርጘይስ ጒስጭር። 45ነቭያታነ መፃፊዝ፦ ‹እጝቅቅ እደረቲስ ክንደቍ ኣጥቍ› ይሽት ፃፍሽኩ፤ እንዝ ማጥን ኣውማው ኣይርቲስ ወሸውዝመ ጝጊስ ክንደውዝድቅ ይጐ ተርጡ።#እሳ. 54፡13። 46እደረቲስ ተረዊዝለ እደረት ቓለው ኣውማውም እጀው፤ ኣይርት ቓለውድ ጘጝ ጭቝ የጝ። 47እማን እማን የኵን! ይት ኣምነውድቅ ዘላልምዙ ርዅየ ችጝጡ። 48ርዅየዙ ሚድ ያን የጝ። 49ክታኣቅልድ በራኸይስ መነ ዅ፤ ኣነጚ ክር። 50ዊገድ ግን እጅር ክራየጘ ዃንስ ማጥን ሲመይስ ጊመው ሚድ እኒን የጝ። 51ሲመይስ ጊመው ርዅየ ይወው ሚድ ያን የጝ፤ ኣውማው እጅር እኒን ሚስ ዃን ዘላልም ፅብጡ፤ እኒን ሚድም ኣልሚዝቅ ርዅየ ኣቓንስ ማጥን ያን ይወው ይስየድ የጝ» ዩ።
52ኣይንድም ኣይዅዳንድ፦ «እን እጅርድ ጝስየድየንት ይን ዅናንስ ማጥን ኣወሽ የጝ ነይጠ ቸለውድ?» ይጛ ጛስ ጛይ ጭቕጘ ተክራክርሽ። 53እየሱስም እንት ዩ፦ «እማን እማን የኵን፤ እጅር ዅርዙ ሰየድ ዂርነውዝየ፣ ጝብርድም ዝዪይርነውዝየ፣ ክታቐምትል ርዅየ እጅርነቅም። 54ይስየድ ዀው፣ ይብርድም ዝየውድቅ ዘላልምዙ ርዅየ ችጝጡ፤ ያንም ኻትሸነ ግርየይዝ ክርጘይስ ጕይስጭር። 55ይስየድ እማንተው ዅረ የጝ፤ ይብርድም እማንተቍ ዝይን ጛይ። 56ይስየድ ዀው፣ ይብርድም ዝየውድቅ ይጅቅ ፅብጡ፤ ያንም ጝጅቅ ፅብጭር። 57ፅበው ኣይር ይት እፃቐጘ፣ ያንም ጝቍዝ ፅበው ኣቐጘ፣ ይት ዀውድም ይቍዝ ርዅየዝ ፅብጡ። 58ሲመይስ ጊመው ሚድ እኒን የጝ፤ ክታኣቅልድ በራኸይስ ዅጘው መነይዝጘም ኣየው፤ ጝት ዀቍድ ክርጝኵ፤ እኒን ሚድ ዀውድ ግን ዘላልም ርዅየዝ ፅብጡ።» 59እየሱስ እኒንት ዊግተውድ ቅፍርናዀም ምኵራቪስ ክንሳድ ዊኑ።
ንቕፀቍ ክንደጥ እየሱስት ቲክነነውድ በርጘጘ
60ጝክንደጢስም ንቕፀቍድ እኒንት ወሽጛንድ፦ «እኒን ለምርጥነ ቺግርዘው ቃል የጝ፤ እኒንትስ ኣው የጝ ለምርጠ ቸለውድ?» ይ። 61እየሱስም ጝክንደጥድ እን ዊገይዝቍዝ ጛስ ጛይ ኣጕርምርማጛንድ ጝመንፈሲዝ ኣርቕ፦ «እኒንመ ክታት ፅጋሱ? 62እጅር ዅር በውገ ዊነው ስፍረይል ዋጥር ኣርጋንድ ቓልድርናን ወረጘ ይትርነ የጝ? 63እደረት መንፈስ ርዅየ ይወኵ፤ እቀ ኻይል ግን ውርም ጣቅማው፤ ያን ክታጭስ ድቈው ቃልድየን መንፈስ የጝ፤ ርዅየም የጝ። 64ኣነጚ ክታማኽሊስ ላው ላው እምናቍ እቅ እኵ» ዩ። እየሱስ እንት የው ዊግተውድ ጝት ኣምናቍድ ኣውታይ ኣጘጘ፣ ጝት ዲቍስ ይውጡድም ኣው ኣቐጘ፣ በውገይስ ኪርም ኣርቕ ዊናንስቅ የጝ። 65እየሱስም እንደ ገነ፦ « ‹ኣይር ጝጭስ ፊቅደው እጅርድ ኣየውዝየ ኣውማውቅ ይጐ ተርጠ ቸላውም› የር ድቈውድ እንዝ ማጥን የጝ» ዩ።
66እንዝ ምላሰንዝ ጝክንደጢስ ንቕፀቍድ እግርገ ዋጥር፤ ጝዝለ ጝት ቲክኒየቍም። 67እየሱስም ፅጭ ሊጘ ክንደጥድዛት፦ «ክትንሰ ፊርትርነ በንርኵመ?» የው ዋቕሩ። 68ስሙን ቢጥሮስም፦ «ኣደረወ! ኣውትጐ ፊርና? ክት ርዅየዙ ቃል ፃይርኵሩ። 69ይንስ ክት ቅዱስ እደረት ዅር ኣረጘ ኣምንንኵኑን፤ ኣርቕንምኵኑን» ዩ።#ማቲ. 16፡16፤ ማር. 8፡29፤ ሉቃ. 9፡20። 70እየሱስም፦ «ክትን ፅጭ ሊጘድ ያን ማርፅኩን፤ ኣነጚ ክታጊስ ላውድ ዳቪለውስ የጝ» ዩ። 71እኒንት የውድ ስሙንት ዅር ኣስቈረትቱ ይዅዳት ማጥን የጝ፤ ጘጝ ውርም እኳ ፅጭ ሊጘይስ ላውድ ኣቕሽም እየሱስት ዲቅስ ይውጡድ ጘጝ ዊናንስቅ የጝ።
अहिले सेलेक्ट गरिएको:
ይዃንስት ወንጌል 6: ኽምጣኣኪ
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
