Mata 1

Gà bàba gà tsir Yesuw ana tə da a bəɗ a

Luka 3:23-38

123 Yesuw Kiristi ka, a dara i gwala Dawda a. Batsah tsir tar ibam, Abəraham. Araha na bazlam mawùba tar a: 2Abəraham a lah mewe Izak. Izak ibam, a wa Zakup. Zakup tekeɗe, a wa gà Yuda nda gà asiŋ gà damər ŋgar ŋgiɗ tserdze. 3Yuda a wa gà Perez nda Zaraha, məmər tar ibam, Tamara. Perez a wa Heseruna. Heseruna a wa Aram. 4Aram a wa Aminadab. Aminadab a wa Nasuna. Nasuna a wa Salmuna. 5Salmuna a wa Buwaz, məmər ŋgar ka, Rahab. Buwaz a wa Yubet, məmər ŋgar tekeɗe, Rut. Yubet a wa Yasa. 6Yasa a wa Dawda ana a ne batsah Əbay akahər ata ya.

Dawda ibam, a wa Salumun. Na a war ka, məkəs ana a zla aà Wuriya ya. 7Salumun a daha, a wa Rabuwam. Rabuwam ibam, a daha, a wa Aviya. Aviya tekeɗe, a daha, a wa Asa. 8Asa ŋgat a wa Yehusafat. Yehusafat a wa Yehuram. Yehuram a wa Widziya. 9Widziya a wa Yutam. Yutam a wa Akas. Akas a wa Hezekiya. 10Hezekiya a wa Manasse. Manasse a wa Amus. Amus a wa Yusiya. 11Yusiya a wa Yekuniya, nda gà asiŋ gà damər ŋgar tserdze. A wa taŋa ka, akahər ana ta gasa gà Isərayel a Babila ya.

12I dəba mada tar ana tə da à tar a fataya ka, Yekuniya a wa Salatiyel. Salatiyel ibam, a daha, a wa Zarubabila. 13Zarubabila tekeɗe, a daha, a wa Abihuda. Abihuda a daha, a wa Aliyakim mbaŋa. Aliyakim a wa Azur. 14Azur ŋgat a wa Sadukw. Sadukw ibam, a wa Akim. Akim mbaŋa ka, a wa Aliyuda. 15Aliyuda a wa Eliyazar. Eliyazar a wa Matan. Matan ibam, a wa Zakup. 16Zakup ibam, a wa Yasufa kuɗa. Ŋgat ka, zal Mariya, məmər Yesuw ana tə zalar *Kiristi ya.

17Daga aà Abəraham a haa aà Dawda ka, mburma kurwa gəra faɗ na ta wa ba, zazəɗ dər zazəɗ dər a. Dite daga aà Dawda a, tsikw haa a təv ana ta gasa gà Isərayel aka ahəɗ Babila ya ka, mburma kurwa gəra faɗ asa mbaŋa. A gəs i fataya tsikw aà mawà Kiristi ka, mburma kurwa gəra faɗ asa mbaŋa na mawà ba tar ana tə zazaɗa dər a.

Mawà Yesuw Kiristi

Luka 1:26—2:20

18Taŋa, meme na ta wa Yesuw Kiristi ya. Məmər ŋgar ka, zləm ŋa Mariya, makasl Yasufa. Ama aka na tàa zlaba zukw tsiye ka, tə samata ka, hitwis aka ɗera aka Mariya ya, ndzəɗa Mezite Mesife Mbulum aka vəlar aɗəm kəla. 19Yasufa ana makasl ŋgar a ka, a tsàh lele, mala ndzer ŋa ika miɗ Mbulum, a sasar meɗife à bakal Mariya ika miɗ mburma, tə tsaraka tsa. Aɗaba taŋa a waya mimiyeke à makasl ŋgar sifek nda akəl pəra. 20I təv ana a riŋ a dzele a gà gər kataya, aka miyak dər zukw tsiye ka, gawla Mbulum ilik a patar aba i sunwa ya, a gwaɗar: «Yasufa gwala Dawda, ka ta ge magəɗa aà mazla Mariya kamala daala yak a tsa, aɗaba a ŋgat kəla ka, nda ndzəɗa Mezite Mesife Mbulum, tsəka, ahəm mburma tsa. 21A ta we a kəla ŋa ka, asləka ŋa. Ki zeler a Yesuw, aɗaba a ta mbele a à gà mburma ŋgar i bakal tar a.»

22Gà dukw ata tserdze ya, ta ge a ba ka, dite dukw ana Mbulum BATSAH kwa ŋa a tsik akahər ata nda ahər mala məma à guma ŋgar a ka, aka pàt aba lele kuɗa. A gwa ka:

23«Dəm gama ata a ta ŋget a kəla.

A we a ka, ti ti zel a a kəla ŋa, *Emmanuwel,«

kamala megweɗe ya: «Mbulum a riŋ a ndze a nda kwa.»*fa*

24Aləka Yasufa a piɗeke ka, a ge dər kamala biy na gawla Mbulum ata a tsiker a. I dəba ŋa ya, a zlaba Mariya aà daala ŋgar kuɗa. 25Ama tàa həna nda ŋgat tsa, haa a pat ana a wara iɗəm kəla ata Yasufa a zeler a Yesuw a dzekwiŋ.

अहिले सेलेक्ट गरिएको:

Mata 1: gnd

हाइलाइट

शेयर गर्नुहोस्

कपी गर्नुहोस्