Lúcas 21
21
Peteĩ viúda ome’ẽ michĩmi pirapire Ñanderuete rogaguasúpe
1Hesu oma’ẽvo hetãyguakuéra imba’e retáva rehe ome’ẽ jave ipirapire iglésia cájape.
2Ohecha avei peteĩ viúda imboriahuetévape, omoĩ jave mokõi monéda imichĩvéva iglésia cájape.
3Upérõ Hesu he’i: Añetehápe, ha’e peẽme, ko viúda kóva omoĩ hetaiteve opavavégui.
4Opaite umi ambuekuéra ome’ẽnte hembývagui ichupekuéra, kóva katu omoĩmba oguerekóva guive opaite hembi’u repyrãmínte jepe.
Hesu he’i Ñanderuete rogaguasu ojeityva’erãha
5Ha Hesu jerekuévo oĩ heta umi oñembyatýva ha ijapytégui oĩ umi he’íva pema’ẽ Ñanderuete rogaguasu rehe, ijita iporãite ha ojeguapa yvyariguakuéra me’ẽmby hepyetévape.
6Hesu katu ombohovái ichupekuéra: Og̃uahẽta peteĩ ára opaite ko’ã mba’e pehechavapeína ojeitypava’erã, ijitakuéra jepe ndopytamo’ãi ojo’ári.
7Upémaramo oporandu hikuái Hesúpe: Araka’épa ko’ã mba’e oikóta, ha mba’eichagua señálpa ojehúta oiko hag̃ua ko’ã mba’e.
8Ha Hesu ombohovái: Cháke, peñeñangareko porãke ani hag̃ua peñembotavy. Heta ou gua’uva’erã che rérape, ha he’íta: Che ningo pe Crísto ha umi ára paha og̃uahẽmbotaitéma. Anítei pemoirũ ichupekuéra ha ani peguerovia he’íva guive peẽme.
9Pehendu ramo ñorãirõnguéra ha umi tetãygua oñemoĩva hetã ruvichatee rehe, ani peñemondýi, opaite ko’ã mba’e ningo ojehuraẽva’erã, og̃uahẽ mboyve umi ára paha.
10Upérõ Hesu he’i ichupekuéra: Tetãnguéra opu’ãta ojuehe, ha peteĩ tetãguasu ambue tetãguasu rehe.
11Oikova’erã yvy ryryiguasuete ha heta tetãme oĩta ñembyahýi ha mba’asy vai oñemyasãitava ohóvo. Oĩta ñemondyiguasu, ha techaukahaguasu ojehechaukáta ára yvate rehe.
12Ko’ã mba’e ko’ãva ojehupa mboyve katu, ha’ekuéra penemuñáta Ñanderuete rogapýpe jepe ha penemoingéta cárcelpe, ha’ekuéra pendegueraháta tetã ruvicha ha mburuvichakuéra rendápe, ha peẽ pehasa asyva’erã che réra rehehápe.
13Ko’ã mba’e ko’ãva opyta peẽme g̃uarã mba’e techaukaha (señal) ramo.
14Pemoinge porã katu ko’ã mba’e pende py’apýpe, ani hag̃ua pejepy’apy pene ñe’ẽrã rehe, pejétava mburuvichakuéra renondépe.
15Che voi ningo ame’ẽta peẽme arandu ha umi ñe’ẽ peẽ pejeva’erãva, ha pe arandu Che ame’ẽtava peẽme penderehe ija’e’ỹva ndaikatúi oñemoĩ hese.
16Pende ru ha pende sy jepe, ha pende ryke’y, pene pehẽngue ha pene amígo avei, penemoĩta mburuvichakuéra pópe, ha oĩta avei pende apytégui umi ojejukátava.
17Heta ndaija’eiva’erã penderehe, che réra rehehápe.
18Peikuaa porãke, pene akã rague jepe noñehundi reimo’ãi.
19Pene paciéncia rupi pesalvava’erã pende rekove.
20Peẽ pehecha ramo tetã ambueygua omongora Jerusalénpe, peikuaáta iñehundirã og̃uahẽmbotamaha.
21Upérõ umi oĩva Juda departaméntope tokañy cerrokuérape, ha umi oĩva pe tavaguasupýpe tosẽmba upégui; ha umi oĩva guive ñúme, anítei oike Jerusalen ryepýpe.
22Ko’ã ára jehavira oikóta, ojehupa hag̃ua umi profecía ohaimava’ekue guive Ñanderuete kuatiañe’ẽme.
23Angái, umi kuña hyeguasúva, ha umi omokambúva umi árape. Oĩva’erã py’angekõi ndetuicháva yvy apére, ha pochyguasu ko Israel retãme.
24Ha hetaiterei ojejukáta kyse puku rãimbépe, ambuekuéra ojegueraháta jepokuapýpe opaite tetãnguérape. Ha Jerusalen opytáta ambue tetãnguéra poguýpe, oñemboty peve (opa peve) umi ára Ñanderuete ome’ẽmava’ekue ichupekuéra.
Mba’épa ojehúta Hesu ou jevyva’erãha árape
25Upérõ ojehechava’erã techaukaha (señal) kuarahy, jasy ha jasytata rehe, ha yvy apére oñemyasãita ohóvo kyhyjeguasu tetãnguéra apytépe pe yguasu ipochyetégui ha umi yapenúgui ijyvate.
26Heta ipy’amanóta okyhyjégui umi mba’evai oha’ãrõtava ojehu hag̃ua ha ára (yvága) pegua pu’akakuéra oñemomỹi joava’erã.
27Upéramo ojehecháta yvyarigua Ra’y ouvahína peteĩ arai ári, ipu’akaguasu ha heko jajaipa reheve.
28Oñepyrũvo ojehu ko’ã mba’e ko’ãva, pevy’a katu ha peneakãrapu’ã og̃uahẽmbotámagui pende salvacion.
29Ha Hesu omombe’u ichupekuéra peteĩ ñe’ẽ mbojoja: Pema’ẽ pe hígo yvyra rehe, ha opaite yvyra rehe.
30Pehecha ramo hokyha, peikuaa porãke og̃uahẽmbotamaha pe ára haku (veráno).
31Upéicha avei peẽ pehechárõ ojehuha opaite ko’ã mba’e, peikuaáke Ñanderuete retãguasu oikopotamaha.
32Añetehápe, Che ha’e peẽme, ndohasamo’ãiha Abraham ñemoñarenguéra, oikopa peve ko’ã mba’e ko’ãva.
33Pe ára yvate ha ko yvy ohasapava’erã, che ñe’ẽ katu ndohasaiva’erã araka’eve ojehu’ỹre (che ha’eva’ekue).
34Peñeñangarekóke ani hag̃ua oñemombarete pende py’apy vício ka’úpe, térã pejepy’apy pene rembi’urã rehe, ha peha’ãrõ’ỹre pe ára péva ho’a sapy’a pende’ári peteĩ ñuhãicha.
35Ha katuete og̃uahẽva’erã pe ára péva opavavépe g̃uarã, oikóva guive ko yvy apére.
36Peiko ku guárdia pyharegua oiko háicha pemaña porãvo (pemangea porãvo) opaite mba’ére pende jerére ojehúva guive. Peñembo’epeína peẽ penembarete hag̃ua, ha ani hag̃ua ho’apa avei ko’ã mba’e oútava pende’ári, ha ikatu hag̃ua peñembo’y pe yvyarigua Ra’y renondépe.
37Hesu oporombo’e arakuépe Ñanderuete rogaguasúpe, ha pyharekuépe oho opyta pe cérro oñembohérava cérro Olivotýpe.
38Ha Hesu retãyguakuéra oupa ko’ẽjúvo Ñanderuete rogaguasúpe, ohendu jevy hag̃ua ichupe.
अहिले सेलेक्ट गरिएको:
Lúcas 21: ÑÑP2015
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
