Lúcas 16
16
Pe capataz hembiapo vaiva’ekue
1Upérõ Hesu he’i hemimbo’ekuérape: Peteĩ kuimba’e imba’eitáva icapataz peteĩva, oñemombe’u katu ipatrónpe icapataz ohundipaha ohóvo imba’eita.
2Upévare ha’e ohenói icapatázpe ha he’i ichupe: Mba’e piko ko ahenduva’aína nderehe. Emoĩmba hekópe opaite cuénta, nde ndaikatuvéima reiko che capataz ramo.
3Upémaramo pe capataz he’i ipy’apýpe: Mba’épa ajapóta ko’ág̃a. Che patron ndoipotái che apytave icapataz ramo. Ajo’o hag̃ua nachembarete porãi, ha atĩ ajerure hag̃ua che remikotevẽ rehe.
4Aikuaáma, mba’épa ajapóta che patron chemosẽ ramo hógagui, aháta umi odevéva ichupe rógape.
5Ha pe capataz ohenói peteĩteĩme umi odevéva guive ipatrónpe, ha oporandu peteĩteĩme: Mboýpa nde redeve che patrónpe.
6Ha peteĩha he’i pe capatázpe: Che adeve nde patrónpe 100 kambuchiguasu acéite, 4.000 lítro rupi. Ha pe capataz he’i ichupe: Ejapyhy nde kuatia, eguapy ha emoĩnte 50 kambuchiguasu, 2.000 lítro rupi.
7Ha pe capataz oporandu pe mokõiháme: Mba’épa nde redeve che patrónpe. Ha ha’e ombohovái: Che adeve ichupe 400 vosa trígo. Upérõ pe capataz he’i ichupe: Kóina ápe oĩ nde kuatia, eguapy ha emoĩnte 320.
8Ha pe patron ohecha ramo icapataz rembiapo vai omomba’e ichupe iletrádo haguére. Ko’ã ára atyguasu ra’ykuéra ningo iletradove umi tesape ra’ykuéragui.
9Ha Che ningo ha’e voi peẽme: Pembovy’a pene irũnguérape pende pirapire rupi, ha pende sogue ramo pene irũnguéra penemog̃uahẽta hógape peikove aja pukukue.
10Upe oiporúva hekópe umi mba’e michĩ oñeme’ẽva ichupe oñangareko hag̃ua hesekuéra, ha’e oiporúta hekópe avei umi mba’e tuicháva oñeme’ẽtava ichupe oñangareko hag̃ua. Ha upe oiporúva hekope’ỹ umi mba’e michĩva, oiporúta hekope’ỹ avei umi mba’e tuicháva, oñeme’ẽtava ichupe oñangareko hag̃ua.
11Peẽ ndapeiporúi ramo hekópe pe pirapire oñeme’ẽmava’ekue peẽme peñangareko hag̃ua, mávapa upéicharamo ome’ẽne peẽme umi me’ẽmby yvága peguáva.
12Ha peẽ ndapeiporúi ramo hekópe umi mba’e ndaha’éiva pene mba’eteéva, mávapa ome’ẽséne peẽme pene mba’eteéva.
13Peteĩ tembiguái ndaikatúi omba’apo mokõi patrónpe g̃uarã, opoiva’erã ipatróngui, ohayhu hag̃ua ambuépe, ipatron pyahúpe, térãpa omoirũva’erã peteĩme omboyke hag̃ua ambuépe. Peẽ ndaikatúi peservi Ñanderuetépe ha pirapirépe avei.
14Opaite ko’ã mba’e ko’ãva umi fariseokuéra ohendupa avei, ha oñembohory Hesu rehe, ohayhuetereígui hikuái pirapire.
15Ha Hesu he’i ichupekuéra: Peẽ pejehechauka heko porãva ramo pene retãyguakuéra apytépe, Ñanderuete katu oikuaa porã pende py’apýpe oĩva guive. Umi mba’e ojererekóva tetãyguakuéra apytépe mba’eguasu ramo, Ñanderuete resápe mba’e výro rei ha ombojeguarúva ichupe.
16Moises rembiapoukapykuéra ha profetakuéra ñe’ẽ oikóma Juan Bautísta peve, ha ha’e rire oñepyrũma oñemombe’u Ñanderuete retãguasu ha opavave oñeha’ã mbaretépe oike hag̃ua ipype.
17Yvága ha yvy ikatu ohasa pya’eve, peteĩ Moises rembiapoukapy ñe’ẽ pehẽnguemi (létra) ojepe’a rãngue.
18Oimeraẽ opoíva hembirekógui ha omenda jey ambue kuña rehe ombyai imendare reko, ha pe kuimba’e omenda ramo peteĩ kuña ojepoiva’ekuére ombyai avei imendare reko.
Pe imba’e retáva ha Lázaro
19Oiko ningo peteĩ imba’e retáva, oñemondéva ao porã ha hepyetévape, ha ojapómiva karuguasu meme árape.
20Ko imba’e retáva rokẽme oĩ jepi peteĩ imboriahuetéva, ijaipáva, hérava Lázaro.
21Ha hi’ãiterei ichupe oñemohyg̃uatã umi tembi’u ku’ikue ho’áva pe imba’e retáva meságui, umi jagua jepe ou oheréi ijaikuéra.
22Ojehu ningo, ko mboriahu kóva omano ha angelkuéra ogueraha ichupe Abraham rapypa’ũme (paraísope). Omano avei upe imba’e retáva, ha oñeñotỹ.
23Ha’e ohasa asyete aja aña retãme, ojesaupi ha ohecha mombyryete Abrahámpe, ha hendive ohecha avei Lázarope.
24Upérõ pe imba’e retava’ekue osapukái ha he’i: Che ru Abraham, cheporiahuverekomína ha ere Lázarope tomyakỹ ikuã apỹi ýpe ha tou ombopiro’ymi hag̃ua che kũ, che ahasa asyetereígui ko tata rendýpe.
25Abraham katu ombohovái ichupe: Che ra’y, nemandu’áke rehasa porã hague reikove aja, ha Lázaro katu ohasa asyeteva’ekue, ha ko’ág̃a oñemoangapyhy ichupe ko’ápe, nde katu rehasa asyetereíma.
26Ha ñane pa’ũme oĩ avei peteĩ yvykua ipypukuetereíva (yvypore’ỹ) ikatu’ỹ hag̃uáicha avave ohasa ko’águi pene rendápe, ni amoitégui ohasa ore rendápe.
27Ha upéi pe imba’e retava’ekue he’i: Upéicharamo, che ru, emondomína Lázarope che ru rógape.
28Areko ningo 5 che ryvy ha eavisa porã ichupekuéra, ani hag̃ua ou hikuái avei ko tenda ojehasa asyetereihápe.
29Abraham katu he’i ichupe: Ha’ekuéra oguereko Moises ha profetakuéra kuatiañe’ẽ, tohendu ha tojapo hikuái ojehaiuka haguéicha.
30Ha’e katu ombohovái Abrahámpe: Nahániri, ha’ekuéra ohecha ha ohendu ramo peteĩ omanova’ekuépe, oñembyasýta hembiapo vai haguére ha omoambuéta hekove reko vai.
31Abraham katu he’i ichupe: Ha’ekuéra nohenduséi ramo Moises ha profetakuérape, nohendumo’ãi avei peteĩ opu’ã ramojepe omanova’ekue apytégui.
अहिले सेलेक्ट गरिएको:
Lúcas 16: ÑÑP2015
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
