Juan 7
7
Hesu ryvykuéra ndojeroviái hese
1Ko’ã mba’e rire Hesu oguata ágotyo pégotyo Galiléa yvýre, ndoikoséi Juda yvýpe, Judayguakuéra ojukaségui ichupe.
2Hi’ag̃uíma ramo Judaygua arete, hérava oga’ikuéra arete, (enramáda).
3Hesu ryvykuéra he’i ichupe: Esẽ ko’águi ha tereho Judápe, ne remimbo’ekuéra upepeguáva ohecha hag̃ua avei ne rembiapokuéra.
4Avave ningo ndojapói mba’eve ñemiháme ojekuaaukase ramo. Ejehechauka opavavépe Jerusalen aretépe.
5Ityvyrakuéra voi jepe ndojeroviái hese.
6Upérõ Hesu he’i ichupekuéra: Che hóra ningo ne’ĩra og̃uahẽ, peẽme g̃uarã katu oimeraẽ hóra iporãma.
7Pene retãygua ndaikatúi ndaija’éi penderehe, ha’ekuéra katu cherehe ndaija’éi, ahechaukágui heko ha hembiapokuéra ivaiha.
8Tapeho katu peẽ pe aretépe, che ndahamo’ãi gueteri, ne’ĩra gueteri og̃uahẽ che hóra.
9He’i rire ko’ã mba’e opyta Galiléape.
Hesu oho pe aretépe
10Ityvyrakuéra oho rire pe aretépe, Hesu oho avei, ñemiha meguáichante.
11Judayguakuéra katu oheka ichupe pe aretehápe, ha he’i: Moõpa oime pe kuimba’e péva.
12Heta oime umi oñe’ẽngururúva hese, oime he’íva: Ha’e heko porãha. Ambuekuéra katu he’i: Ndaupéichai, Ha’e oporombotavysenteha.
13Opáichavo avave noñe’ẽ hatãi mba’eve hese, okyhyjégui Judaygua myakãharakuéragui.
14Ha pe arete mbytépe Hesu oike Ñanderuete rogaguasúpe oporombo’e hag̃ua.
15Umi Judaygua ohecharamoite ha he’i joa: Mba’éicha piko Ha’e oikuaa porã Ñanderuete kuatiañe’ẽ, avave nombo’éi ramo ichupe.
16Upérõ Hesu ombohovái ichupekuéra: Ko mba’e che ambo’éva nachemba’éi, pe chembouva’ekue mba’énte.
17Upe ojaposéva añetehápe Ñanderuete rembipota, upéva oikuaava’erã ko che ambo’éva ou Ñanderuetégui térãpa che ñe’ẽnte.
18Upe oporombo’éva iñakãgui reínte, oheka oñembotuicha hag̃ua; pe ombotuicháva pe ombouva’ekuépe ichupe, hendive oĩ pe añetegua, ha ipype ndaipóri japu ni ñembotavy.
19Moises piko nome’ẽiraka’e peẽme Ñanderuete rembiapoukapykuéra. Ha avave pende apytégui ndojapói hekópe Ñanderuete rembiapoukapykuéra. Mba’érehepa peñeha’ãha chejuka hag̃ua.
20Ha umi oñembyatýva he’i: Mba’epochy oĩ ndepype. Mávapa he’i oñeha’ã ndejuka hag̃ua.
21Hesu katu ombohovái ichupekuéra ha he’i: Peteĩ milágro ajapova’ekuére sábado árape, peẽ pepyta pehecharamo ha peponderapa.
22Moises ome’ẽva’ekue peẽme pe pire’i ñekytĩ’o (circuncision), ndoúi ramojepe Moisésgui, ñande ypykuéra oguerekóma voi ko jepokuaa kóva, ha sábado ára ramojepe, peẽ peikytĩ’o avei kuimba’ekuérape.
23Ha peẽ peikytĩ’o sábado árape ani hag̃ua oñemboyke Moises rembiapoukapy, mba’upe piko peẽ pendepochy chendive, amonguera haguére peteĩ kuimba’épe sábado árape.
24Ani pembojovake hi’ã háichante peẽme, pembojovake hekópe.
25Upérõ oĩmimi ijapytépe oporandúva: Ndaha’éi piko kóva upe ojehekáva ojejuka hag̃ua.
26Ma’ẽmína, opavave rovake ningo Ha’e oñe’ẽhína, ha avave nde’íri mba’eve ichupe. Ore mburuvichakuéra piko ohechakuaáma Ha’eha pe Crísto.
27Ore roikuaa porã katu moõguipa kóva ouva’ekue, pe Crísto ou ramo katu avave ndoikuaamo’ãi mamoguápa Ha’e ou.
28Upévove Hesu oñe’ẽ hatã Ñanderuete rogaguasúpe ha he’i: Peẽ chekuaa porã chéve, ha peikuaa porã avei mamoguápa Che, Che ndajúi chejehegui reínte, oĩ ningo pe chembouva’ekue, ha ichupe peẽ ndapeikuaái.
29Che katu aikuaa ichupe, Che ningo imba’e, ha Ha’e voi ningo chembouva’ekue.
30Upérõ oñeha’ãmba oapresa hag̃ua ichupe, avavete katu ndopokói hese, ne’ĩragui og̃uahẽ hi’óra.
31Hetami Israelgua ojerovia hese, ha he’i hikuái: Pe Crísto ou ramo piko ojapo hetavéne milágro kóva ojapova’ekuégui.
Fariseokuéra oapresauka Hesúpe
32Umi fariséo ohendu umi mba’e oje’éva Hesu rehe, upévare pa’iguasukuéra ha fariseokuéra omondo itahachikuéra oapresa hag̃ua Hesúpe.
33Hesu katu he’i: Ndachearemo’ãvéima penendive, upéi aha jevýta chembouva’ekue rendápe.
34Peẽ cherekáta, ndachejohumo’ãi katu, ndaikatumo’ãigui peẽ peju Che aĩtahápe.
35Upémaramo umi Judaygua oñeporandu joa: Moõ piko ohóta kóva ikatu’ỹ hag̃ua jajohu ichupe. Ohose piko Grécia retãme ohekombo’e hag̃ua Greciayguakuérape.
36Mba’e piko he’ise ko’ã ñe’ẽ: Cherekáta ha ndachejohumo’ãi, ha Che ahatahápe, peẽ ndaikatúi peg̃uahẽ.
37Pe areteguasu ára pahápe Hesu oñembo’y ha oñe’ẽ hatã ha he’i: Upe ijy’uhéiva tou che rendápe ha toy’u.
38Upe ojeroviáva cherehe, Ñanderuete kuatiañe’ẽ he’i háicha, ipy’apýgui osyrýta y tuicha sakã oporomoingovéva.
39Ko’ã mba’e Hesu he’i pe Pytu Porãmbáva rehe, oñeme’ẽva’erãva opaite ojeroviávape guive añetehápe hese. Hesu he’ívo ko’ã ñe’ẽ, pe Pytu Porãmbáva ne’ĩra ou, Hesu Crísto noñemboheko jajáigui gueteri.
40Umi oñembyatyva’ekue apytégui oĩ umi he’íva: Añetehápe ningo kóva peteĩ proféta.
41Ambuekuéra katu he’i: Kóva ningo pe Crísto voi, ambueve katu he’i: Galiléagui piko oúne pe Crísto.
42Ñanderuete kuatiañe’ẽme ningo he’i pe Crísto David ñemoñareha ha onaceva’erãha Belénpe, tetã ruvicha David oiko haguépe.
43Upéicha umi oñembyatyva’ekue oñoñe’ẽjoapi hikuái hese.
44Ijapytépe oĩ umi oapresaséva Hesúpe, avave katu ndopokói hese.
45Umi tahachi ojevývo pa’iguasu ha fariseokuéra rendápe, ha’ekuéra oporandu ichupekuéra mba’érehepa ndapeguerúi Hesúpe.
46Upérõ umi tahachi ombohovái ichupekuéra: Araka’eve peteĩ kuimba’e noñe’ẽi gueteri ko kuimba’e kóva oñe’ẽ háicha.
47Upérõ fariseokuéra oporandu ichupekuéra: Ha’e piko penembotavypáma avei.
48Oime piko mburuvicha térã fariseokuéra apytépe ojeroviáva hese.
49Ko’ã oñembyatýva, ndoikuaa porãi katu Ñanderuete rembiapoukapykuéra, maldecipyréma, he’i fariseokuéra.
50Upémaramo Nicodémo, pe ouva’ekue Hesu rendápe pyhare jave, ha’e voi avei peteĩ fariséo, he’i ichupekuéra:
51Ñane rembiapoukapykuéra piko ombojovake peteĩ kuimba’épe oñehendu mboyve ichupe ha ojekuaa porã raẽ’ỹre mávapa Ha’e, ha mba’épa ojapohína.
52Ombohovái hikuái ichupe ha he’i: Nde piko Galileaygua avei. Ehekánte Ñanderuete kuatiañe’ẽme ha rehechava’erã Galiléagui ndoumo’ãiha pe Crísto.
53Ha ohopa joa hikuái hogapekuéra.
अहिले सेलेक्ट गरिएको:
Juan 7: ÑÑP2015
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
