यहुन्ना 6
6
पाँच हजार मनकाँ ने खाणो खुवाणो
1ईंका केड़े ईसू गलील समन्द के पेली पार ग्या, जिंने तिबिरियस समन्द भी केता हा। 2अन एक मोटी भीड़ वाँका पाच्छे वेगी, काँके ज्यो परच्या का काम वीं माँदा मनकाँ पे बतातो हो, वी वाँने देकता हा। 3तद्याँ ईसू मंगरा पे चढन आपणाँ चेला के हाते बेटग्या। 4यहूदी लोगाँ को फसे को तेवार नके हो। 5जद्याँ ईसू अटने वटने देक्यो के, एक मोटी भीड़ वाँका नके अईरी हे, तो वणा फिल्लीपुसऊँ पूँछ्यो, “ईं हारई लोगाँ के खाबा का वाते रोट्याँ कटाऊँ मोल ला सका हा?” 6ईसू या बात फिलिपुस ने परकबा के वाते पूछी ही, काँके ईसू तो खुद पेल्याऊँ जाणता हा के, “कई करणो हे।”
7फिलिपुस वींने जवाब दिदो, “दो सो चाँदी का सिक्का की रोट्याँ लान थोड़ी थोड़ी हाराई ने देवाँ, तद्याँ भी वीं कम पड़ जाई।”
8ईसू का चेला मूँ एक दूजे चेले अन्दरियास, ज्यो समोन पतरस को भई हो, वणी क्यो, 9“अटे एक छोरा के नके पाँच जो की रोट्याँ अन दो माछळ्याँ हे, पण अतरा लोगाँ में अणाऊँ कई वेई?”
10ईसू जवाब दिदो, “लोगाँ ने बेवाड़ी दो।” वाँ जगाँ घणी चुंटी हो। वटे मनक मनकईस लगे-भगे पाँचेक हजार हा। वीं वटे बेटग्या। 11तद्याँ ईसू रोट्याँ लिदी अन परमेसर ने धन्नेवाद देन बेठबावाला ने जतरी वीं छावता हा, वतरी बाट दिदी अन वस्यानीस वणा माछळ्याँ भी जतरी छावता हा, बांट दिदी। 12जद्याँ वीं खान धापग्या तो ईसू आपणाँ चेलाऊँ क्यो, “परोस्या केड़े बंची तकी रोट्याँ भेळी करो, जणीऊँ एक भी रोटी बेकार ने वेवे।” 13पछे चेला मनकाँ में जो की पाँच रोट्याँ के परोसबा का केड़े बंचगी ही वणाऊँ बारा ठोपला भरिया।
14तद्याँ ज्यो परच्यो ईंस बतायो वींने वीं लोग देकन केबा लागा के, “ईं दनियाँ में ज्यो परमेसर का आड़ीऊँ बोलबावाळो आबावाळो हे। हाँची में यो वोईस हे।” 15ईसू यो जाणन के, “वी लोग मने जबरदस्ती पकड़न राजा बणबा के वाते आरिया हे।” तो वीं एकलाई मंगरा पे परोग्या।
ईसू को पाणी पे चालणो
16जद्याँ हाँज हुई तो वाँका चेला समन्द का कनारे ग्या। 17अन अंदारो घणो वेग्यो हो, पण ईसू वाँके नके आलतरे ने आया हा, तो नाव में बेटन समन्द के पेली पार कफरनूम का आड़ी चाल पड़्या। 18अन डूँज के मस समन्द को पाणी ज्योर-ज्योरऊँ हिळोळा मारबा लागो। 19जद्याँ वीं नावऊँ दो-तीन कोस का लगे-भगे जातारिया, तो वणा ईसू ने समन्द का पाणी पे चालता तका आपणी आड़ी आता देक्या तो, वीं ओरू भी घणा दरपग्या। 20पण ईसू वाँने क्यो, “यो तो मूँ हूँ, दरपो मती।” 21ईं वाते वणा ईसू ने राजी मनऊँ नाव में चढा लिदा। अन तरत वाँ नाव वी जगाँ पोंछगी, जटे वीं जारिया हा।
मनकाँ को ईसू ने होदणा
22आगले दन लोग-बागाँ की भीड़, ज्या समन्द के पेली पार रेगी ही, वाँने यो पतो पड़्यो के, वटे एकीस नाव ही अन ईसू आपणाँ चेला का हाते वींमें ने ग्या हा। 23तद्याँ कुई नावाँ तिबिरियस नगरऊँ वीं जगाँ अई, जटे वणा परबू ने धन्नेवाद देयाँ केड़े रोट्याँ खादी ही। 24जद्याँ लोग-बागाँ की भीड़ देक्यो के, अटे ने तो ईसू हे अन नेई वींका चेला हे, तो वीं नावाँ में बेटन ईसू ने होदता तका कफरनूम आग्या।
ईसू जीवन की रोटी हे
25जद्याँ समन्द का पेली पार जान मनकाँ ईसुऊँ मलन क्यो, “हो गरुजी, थाँ अटे कदी आया?”
26ईसू वाँने जवाब दिदो, “मूँ थाँकाऊँ सई-सई केवूँ हूँ, थाँ मने ईं वाते ने होदो हो के, थाँ मोटा-मोटा परच्या देक्या, पण ईं वाते के, थाँने भरपेट रोट्याँ खवाड़ी ही। 27वीं खाणा वाते मेनत मती करो, ज्यो वासी जावे हे। पण वीं खाणा का वाते मेनत करो, ज्यो अनंत जीवन का वाते हे। अन यो खाणो मनक को पूत थाँने देई, काँके परमेसर वींने यो अदिकार दिदो हे।”
28वणा मनकाँ ईसुऊँ क्यो, “परमेसर जणा कामाँ ने छावे हे, वाँने करबा का वाते माँ कई करा?”
29ईसू वाँने जबाव दिदो, “परमेसर ज्यो छावे हे, वो यो हे के, जिंने वणी खन्दायो हे, वींपे विस्वास करो।”
30तद्याँ वणा वींकाऊँ पूँछ्यो, “पछे थूँ कस्यो परच्यो बताई, जिंने देकन माँ थाँरा पे विस्वास करा? थूँ कई कर सके हे? 31#निर 16:4,15; भज 78:24माकाँ बडाबा हुन्ना काकड़ में मन्ना खादो हो। जस्यान पवितर सास्तर में बतायो ग्यो हे के, ‘परमेसर वाँने खाबा के वाते, हरगऊँ रोट्याँ दिदी ही।’ ”
32ईंपे ईसू वाँने क्यो, “मूँ थाँने हाँची बताऊँ हूँ वो मूसो ने हो जणी थाँने खाबा का वाते हरगऊँ रोट्याँ दिदी ही। पण वीं मारा बापू परमेसर हे, जीं थाँने हरगऊँ हाँची रोट्याँ देवे हे। 33वीं रोट्याँ ज्याँने परमेसर देवे हे वीं हरगऊँ उतरे हे अन दनियाँ का मनकाँने जीवन देवे हे।”
34लोग-बागाँ वणाऊँ क्यो, “हो मालिक, अबे माने वाँ रोटी दो अन हमेस्या देतो रेज्यो।”
35तद्याँ ईसू वाकाँऊँ क्यो, “जीवन की रोटी मूँ हूँ। ज्यो मारा नके आवे हे वो कदी भुको ने रेई, अन ज्यो मारा पे विस्वास करे हे, वो कदी तरियो ने रेई। 36पण में थाँने पेल्याई क्यो हे के, थाँ मने देक लिदो हे, पछे भी थाँ मारा पे विस्वास ने करो हो। 37ज्याँने भी परमेसर मने हुप्याँ हे वीं हाराई मारा नके आई अन ज्यो कुई मारा नके आई, वणाऊँ मूँ कदी भी मुण्डो ने फेरूँ। 38काँके मूँ आपणी मरजी ने, पण वींकी मरजी ने पुरी करबा ने आयो हूँ, जणी मने हरगऊँ खन्दायो हे। 39अन मने खन्दाबावाळा की याईस मरजी हे के, ज्याँने परमेसर मने हुप्याँ हे, वाँका मूँ किंको भी नास ने वेबा दूँ अन अन्त का दन में हाराई ने जीवता कर देऊँ। 40काँके याईस मारा बाप की मरजी हे के, ज्यो कुई बेटा ने देके, अन वींपे विस्वास करे, वीं अनंत जीवन पावे। अन मूँ खुद वाँने अन्त का दन में पाछो जीवाई देऊँ।”
41अणा बाताँऊँ यहूदी मनक ईसू पे बक-बक करबा लागा, काँके वो केतो हो के, “वाँ रोटी मूँ हूँ ज्या हरगऊँ उतरी हे।” 42अन वणा क्यो, “कई यो युसुप को बेटो ईसू ने हे, कई आपाँ ईंका बई-बापूने ने ओळका हा। पछे यो कस्यान के सके हे के, ‘यो हरगऊँ उतरियो हे’?”
43ईसू वाँने जवाब दिदो, “एक-दूजाऊँ बक-बक मती करो। 44कुई भी मारा नके ने आ सके हे, जद्याँ तईं मने खन्दाबावाळा परमेसर वींने मारा ओड़ी बला ने ले, अन मूँ वाँने अन्त का दन में पाच्छा जिवई देऊँ। 45#यसा 54:13परमेसर का आड़ीऊँ बोलबावाळा आपणाँ लेक में यो लिक्यो हे के, ‘वीं हाराई परमेसर का आड़ीऊँ हिकाया तका वेई।’ ज्यो कूण बापऊँ हुणे अन हिके हे, वीं मारा नके आवे हे। 46ओ ने के कणी परमेसर ने देक्या। पण मूँ ज्यो परमेसर का आड़ीऊँ हे, बेस मेंईस वींने देक्यो हे। 47मूँ थाँने सई-सई केवूँ हूँ के, ज्यो कुई मारा पे विस्वास करे हे, अनंत जीवन वाँकोइस हे। 48मूँ जीवन की रोटी हूँ, ज्या अनंत जीवन देवे हे। 49थाँका बड़ाबा हुन्ना कांकड़ में मन्नो खादो हो, तद्याँ भी वीं मरग्या। 50पण ज्यो कुई हरगऊँ उतरी तकी ईं रोटी ने खाई, वो कदी भी ने मरी। 51जीवन की रोटी जा हरगऊँ उतरी हे वाँ मूँईस हूँ। यद्याँ कुई अणी रोटी ने खाई, तो वीं हमेस्यान जीवता रेई अन ज्या रोटी मूँ दनियाँ का जीवन का वाते देवूँ, वाँ मारी देह हे। अणीऊँस दनियाँ का मनक जीवता रेवे हे।”
52ईंपे यहूदी लोग-बागाँ यो केन एक-दूजाऊँ बेस करबा लागा के, “ओ मनक कस्यान आपणी खुद की देह खाबा ने दे सके हे?”
53ईसू वाँने क्यो, “मूँ थाँकाऊँ हाँची केवूँ हूँ जद्याँ तईं मनक का पूत की देह ने ने खावो, अन वींको लुई ने पिवो, तद्याँ तईं थाँकामें जीवन भी ने वेई। 54ज्यो मारी देह खावे हे अन लुई पिवे हे, अनंत जीवन वींकोइस हे, अन मूँ आकरी का दन में वींने पाछो जीवतो कर देऊँ। 55काँके मारी देह हाँचो खाणो हे अन मारो लुई हाँची पिबा की चीज हे। 56ज्यो मारी देह खावे अन लुई पीई हे, वीं मारा में बण्या तका रेई अन मूँ वाँका में बण्यो तको रेऊँ। 57जस्यान मने जीवता बापू खन्दायो अन मूँ मारा बापू का कारण जीवतो हूँ वस्यानीस वीं भी ज्यो मने खाई मारा कारण जीवता रेई। 58या हरगऊँ उतरी तकी रोटी हे, आ वणी मन्ना का जस्यान ने हे, जिंने आपणाँ बड़ाबा खादो, तद्याँ भी वीं मरग्या। पण ज्यो कुई या रोटी खाई, वीं हमेस्यान जीवता रेई।”
59ईं हारी बाताँ ईसू कफरनूम नगर का एक परातना घर में किदी ही।
अनंत जीवन की हिक
60ईसू पे विस्वास करबावाळा मूँ घणा जणा यो हुणन क्यो के, “या हिक घणी अबकी हे। ईंने कूण मान सके?”
61ईसू ने आपणाँ मन में पतो पड़ग्यो के, मारा पे विस्वास करबावाळा ने ईं बात को ओळमो हे। तद्याँ ईसू वाँने क्यो, “कई या हिक थाँने बुरी लागी हे? 62अन यद्याँ थाँ मनक का पूत ने जटे वो पेल्याँ हो, वीं जगाँ पाछो ऊपरे हरग में जाता तको देको, तो कई करो? 63परमेसर की आत्मा तो जीवन देबावाळी हे, पण मनकाँ की तागतऊँ कई फायदो ने हे। जीं बचन में थाँकाऊँ क्या हे, वीं आत्मिक जीवन देवे हे। 64पण थाँकामें नरई अस्या हे जीं विस्वास ने करे।” काँके ईसू पेल्याऊँ ओ जाणतो हो के, वीं कुई हे, ज्यो विस्वास ने करी। अन वो कुई हे ज्यो वींने धोकाऊँ पकड़वाई। 65अन ईसू क्यो, “ईं वाते में थाँने क्यो हो के, जद्याँ तईं परमेसर आबा ने दे, वतरे कुई भी मनक मारा नके ने आ सके हे।”
66ईं बात की वजेऊँ ईसू का पाच्छे चालबावाळा नरई वींने छोड़न पराग्या अन कदी भी वीं पाच्छा ने आया। 67तद्याँ ईसू आपणाँ बाराई चेलाऊँ क्यो, “कई थाँ भी जाणा छारिया हो?”
68 #
मत्ती 16:16; मर 8:29; लूका 9:20 समोन पतरस वींने जवाब दिदो, “हो परबू, माँ किंका नके जावाँ? अनंत जीवन का बचन तो थाँका नकेईस हे। 69अबे माँ विस्वास किदो अन ओळकग्या हाँ के, परमेसर का आड़ीऊँ आबावाळो पुवितर मनक थाँईस हो।”
70ईसू वाँने क्यो, “कई में थाँ बारेई जणा ने चुण्या हे? पछे भी थाँकामूँ एक जणो सेतान हे।” 71यो वाँकाणी समोन इसकरियोती का पूत यहूदा का वाते क्यो हो, काँके यो वोईस हो ज्यो वणा बारा मेंऊँ एक हो, वो वाँने धोको देन पकड़ाबावाळो हो।
अहिले सेलेक्ट गरिएको:
यहुन्ना 6: एम टी आर
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
(c) 2010-2017, New Life Computer Institute. All rights reserved
