Matthew 3
3
Sa Tuttudun John We Ambobonyag
(Mrk. 1:1-8; Luk. 3:1-18; Jhn. 1:19-28)
1Sa inninggawan da Jesus ad Nazareth, ummoy aḵ John we Ambobonyag atte probinsiya'd Judea atte bumbummaaw woḵ insaḻadnae nangiwaḻagawag atta ummoy sidi nandongoḻ ḵan siya. 2Ḵanana, “Ibabawiyu da basuḻyu ya agayyu we angwa te gattoḵe sinsadi awad ḵan diḵayu ampangatan Apudyus.” 3Aḵ John, siya inggilin Profeta Isaiah we ḵanana,
“Sa bumbummaaw,
awad de angiwaḻagawage ḵanana,
‘Saganaonyu daḻan atte umaliyan Apu
ya pagodongonyu daḻane ayona.’ ”#3:3 Isaiah 40:3.
4Sa silup John naaboḻe dutdut di camel ya laḻat taḵyadna. Ḵad dudun ḵan dilu ḵanoḵanona. 5Pun ummoy da tagu we naḻpu'd Jerusalem ḵan siya ya da losane ili'tte probinsiya'd Judea ya da naḻpu'tta nampaliḵwose ili'tte tawwang Jordan. 6Imbabaggada da basuḻda pun binonyagan John dida'tte tawwang Jordan.
7Yaḵon innilan ḵad John da adu we Pharisee#3:7 Da Pharisee osadae grupun da Judyu atte timpun Jesus. Dida da pangat atte mipanggob si religion da Judyu. Uunnudonda lintog Moses ya da ugalin da danaḵḵoḻda. Patiyondae da tagu ḵad awad da ḵalidodwada baḵon nu ispirituda ya umuli da natoy atte umali ye aḻgaw. Patiyonda bose awad da anghel. ḵan da Sadducee#3:7 Da Sadducee dida da grupu we ḵaaduwan da padi ye ampangat atte templo. Sa ḵasomsomḵanda'tta long-agda nangatngatuda nu da udume tagu ya da udume padi. Da patiyonda ḵan ḵoḵoḵḵonda nisabali'tta Pharisee. Amo ummanda pas-oman gubilnun da iRome ta naippun sumullagi'tta iRome ya da Judyu. ye umoy ampabonyag ḵan siya, ḵanana, “Diḵayu we ganaḵ ni uḻog! Nankamali sinomsomoḵyu we nangibagae lamogyu iligsi da long-agyu'tte madusaanyu ḵan Apudyus nu pabonyag ḵayu. 8Adipun paat maḵwa te ḵasapuḻane ḵoonyu da losan ta ipailayu we tuttuwae imbabawiyu da basuḻyu ya agayyu we angwa. 9Adiyu ḵanan atta somsomoḵyu we miligsi ḵayu te aḵ Abraham daḵdaḵoḻyu. Annaya ibagaḵ ḵan diḵayu, aḵ Apudyus lamogna ambalinon da annae batu'ḵ ganaḵ Abraham! 10Sa mipaniyan ni madusaanyu, isun ni wasaye nisasagganae ampoḵpoḵ atte ḵayu ya losane ḵayu we adipun amunga'ḵ ambaḻu mapoḵpoḵda ya miballuda'tte apuy.
11“Bonyagaḵ diḵayu'tte danum aḵ angipailae nambabawi ḵayu'tta basuḻyu ya agayyu we angwa. Yaḵon sa dumatonge miyun-unud ḵan saḵon, bonyagana diḵayu si Ispiritu Santu ya sa apuy.#3:11 Bonyagana diḵayu si apuy: Sa osae piona ugudon, dusaon Apudyus da tagu we adipun ambabawi'tta basuḻda ya ansinagungda ḵan Apudyus. Ḵad sa osae piona ugudon padason Apudyus da taguna mipagapu'tte ampaḵaḻamane saḵite isun di masgob ta madaḻusanda. Nangatngatu nu saḵon ya gapu si ḵinangatuna, naippun labbongḵu we angaptin atte sandalna. 12Naḵasaganae anguwis atta tagu ḵad mipani anḵuḵuwisna'tte tagu we naḵasaganae antopa si de wheat. Sa bogas ni de wheat, dagupona ya igappotna'tte aḻangna. Yaḵon sa losane dugi, aminona aḻan ya soggona'tte apuye adipun masobsoban.”
Sa Nabonyagan Jesus
(Mrk. 1:9-11; Luk. 3:21-22)
13Pun sa sadi ye timpu, dummatong aḵ Jesus we naḻpu'tte probinsiya'd Galilee woḵ ummoy si tawwang Jordan ta pabonyag ḵan John. 14Yaḵon pinadas John inawis ta adi pabonyag ḵan John woḵ ḵanana, “Saḵon oḵyan bonyagam, yaḵon sinsadi ummaliḵa ḵan saḵon ta pabonyagḵa.”
15Yaḵon ḵanan Jesus we summongbat, “Ḵoom sinsadi te ustu nu ḵoon taḵu anna ta ituttuwa taḵu da losane pinion Apudyus.” Pun binonyagan John.
16Naabus ḵad aḵ Jesus nabonyagan, daguse tummoḵwaḻ si danum woḵ baag-en nabuḵtan ad langit. Pun innilana Ispiritu Santu we dumoḻadoḻae isunan kalapati woḵ nansap-oy ḵan siya. 17Baag-en ḵanan ni gingae naḻpu'd langit, “Annaya Abengḵu we ay-ayatoḵ ya mamas-omaḵ ḵan siya.”
अहिले सेलेक्ट गरिएको:
Matthew 3: kml
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2019 Translators Association of the Philippines (TAP), All rights reserved.
