Luke 5

Sa Nangayagan Jesus Atta Ummunae Disipuluna

(Mat. 4:18-22; Mrk. 1:16-20)

1Sin-aḻgawan ḵad, inninggaw aḵ Jesus si taḻantag ni Baybay ad Gennesaret.#5:1 Baybay ad Gennesaret - osae ngadan ni Baybay ad Galilee. Naaligummu da amode tagu ḵan siya ta dongngonda ituttudunae Ugud Apudyus. 2Pun innilan Jesus da duwae bangka'tte taḻantage tinenan da mammaugadiw te ummoyda insaḵsaḵ da tabuḵuḻda. 3Pun summaḵay aḵ Jesus si bangkae ḵuwan Simon woḵ imbagana ḵan siyae ibattawana'ḵ aḵit si taḻantag. Pun tummuḵdu'ḵ Jesus woḵ nantuttudu'tta tagu.

4Nagangput ḵade nantuttudu, ḵanana ḵan Simon, “Ipaoynu bangkam atte adaḻom ya uyudonyu da tabuḵuḻyu ta angugadiw ḵayu.”

5Ḵanana, “Apu, illabḻabini gaye nangugadiw woḵ ippun paat innaḻani. Yaḵon gapu ta imbagam, iyadayuni ta uyudonni da tabuḵuḻni.” 6Indawatda ḵad, amod pagay da ugadiwe naaḻa inggana'ḵ annae mapissay da tabuḵuḻda. 7Gapu'tte sadi, nampaypayda'tta buḻundae inninggaw si osae bangka ta umoyda badangan dida. Dummatongda ḵad, binutbutda da tabuḵuḻ woḵ pinnuda duwae bangka'tta ugadiw woḵ tigangayda milisob.

8Innilan ḵad Simon Peter naḵwa, nanalluḵu'tte sinagung Jesus woḵ ḵanana, “Apu tenam saḵon te ḵabasbassuḻanaḵ!” 9Inugudna ḵaḵna te nataag da Simon ya da buḻunna'tte amod innaḻadae ugadiw. 10Nataag os da buḻunnae da James ḵan John we abeng Zebedee. Pune sadi, ḵanan Jesus ḵan Simon, “Adiḵa maḵimut te misaḻad sinsadi, daḵampun ogon aḵ ugadiw tabuḵuḻam yaḵon da tagu ta amatida ḵan saḵon.” 11Pun intaḵdangda da bangkada'tte taḻantag woḵ tinenanda da losan ta mitun-udda ḵan Jesus.

Sa Naleprosy Ye Laḻaḵi

(Mat. 8:1-4; Mrk. 1:40-45)

12Sin-aḻgawan ḵad si inninggawan Jesus atte osae ili, inggaw osae laḻaḵi ye ummamdan leprosyna. Innilana ḵad aḵ Jesus, ummadani ḵan siya woḵ nanalluḵu. Ḵananae nandagdagu, “Apu, nu piom ḵaanom saḵitḵu.”

13Pun indawawan Jesus imana woḵ ḵananae nangappad, “On, pioḵ! Maḵaan saḵitnu!” Pun daguse naḵaan leprosyna. 14Ḵanan Jesus, “Inḵa ampaila si padi ta panoḵnoḵanae naḵaan leprosym. Ḵad ittom ḵan siya idatunnu ḵan Apudyus we isun ni imbilin Moses ta amanoḵnoḵan da tagu we tuttuwae naḵaan. Malaksid atte padi, adim paat ibaga ḵingwaḵ ḵan siḵa'tta ngaiman.”

15Yaḵon amo nandinongoḻ ugud atte mipanggob ḵan Jesus. Pun ummamdan da tagu we ummoy nangngoḻ atte tuttuduna ya paḵaanda da saḵitda. 16Aḵ Jesus ḵad, pasig bumuttunge umoy alluwaḻu'tte bumbummaaw.

Sa Naparalaese Laḻaḵi

(Mat. 9:1-8; Mrk. 2:1-12)

17Sin-aḻgawan ḵad, nantuttudu'ḵ Jesus si boḻoy. Atuḵtuḵdu sidi da Pharisee#5:17 Da Pharisee osadae grupun da Judyu atte timpun Jesus. Dida da pangat atte mipanggob si religion da Judyu. Uunnudonda lintog Moses ya da ugalin da danaḵḵoḻda. Patiyondae da tagu ḵad awad da ḵalidodwada baḵon nu ispirituda ya umuli da natoy atte umali ye aḻgaw. Patiyonda bose awad da anghel. ya da mimistulun ni lintog. Naḻpuda'tta losane ili'tte probinsiya'd Galilee ya sa probinsiya'd Judea, nidoga'd Jerusalem. Iinggaw ḵabooḻan Apudyus ḵan Jesus ta lamogna ḵaanon da saḵit. 18Pune sadi, indatong da udume laḻaḵi naparalaese binuliganda. Padasonda ilonoḵ atte boḻoy ta ibadongda si sinagung Jesus, 19yaḵon adidapun naḵailonoḵ te amode nansossodete tagu. Pun insaḵyatda'tte otop woḵ ummabutda'ḵ singgetbang. Nagangput ḵad, inuyudda nabuligan atte gaggawan da tagu'tte sinagung Jesus. 20Innilan ḵad ay Jesus pammatida, ḵanana'tte naparalaes, “Sunud, napakawan da basuḻnu.”

21Gapu'tte sadi ye imbagana, ḵanan da Pharisee ya da mimistulun ni lintog atta somsomoḵda, “Ngaipana ugudon ḵaḵnat? Itaḻayagna long-agnae miyisu ḵan Apudyus we abus aḵ anna ḵaḻabbonganae amakawan atta basuḻ.”

22Aḵ Jesus ḵad, inigammuna somsomoḵda pun ḵanana ḵan dida, “Ngaipa ḵaḵnat somsomoḵyu? 23Ngai ḵad ain naḻaslasu we ibaga ḵan siya, ‘Napakawan da basuḻnu,’ baḵon nu ‘Tumaḵdogḵa ya anaddaḻanḵa’? 24Yaḵon ta angigammuwanyu we saḵone Abeng Di Tagu#5:24 Abeng Di Tagu - Sa ngadane inusar Jesus atte long-agna. Siya ngadane inusarna'tte Baru we Tuḻag nu antuttudu mipanggob ḵan siya. Matthew 8:20, 9:6, 10:23, 11:19, 12:8. we naḻpu'd langite niyanaḵ sina'd luta, anna ḵaḻabbongaḵ sina'd lutae amakawan atta basuḻ da tagu.” Ḵanana'tte naparalaes, “Bumangonḵa, aḻam bulignu ta inḵan si boḻoyyu.” 25Pun daguse bummangone intotollong da tagu, innaḻana buligna woḵ ummoyone andaydayaw ḵan Apudyus. 26Pune sadi, nataag da inninggaw sidi ye tagu ḵan naḵimtanda'tta innilada woḵ ḵanandae nangidaydayaw ḵan Apudyus, “Atopay! Nakaskasdaaw pagay innilani sinsadi!”

Sa Nangayagan Jesus Ḵan Levi

(Mat. 9:9-13; Mrk. 2:13-17)

27Nagangput ḵad, lummawa'ḵ Jesus woḵ innilana osae andadagup atta bugise nangngadan aḵ Levi we tutuḵdu'tte opisinan da andadagup atta bugis. Ḵanana ḵan siya, “Tun-udonaḵ ta ambalinoḵ siḵa'ḵ disipuluḵ.” 28Pun lummibbat woḵ tinenana da ḵuḵuwana woḵ nitun-ud ḵan siya.

29Pun minangilin Levi da Jesus atte boḻoyna. Inninggaw da adu we andadagup atta bugis ya da udume tagu we naḵaḵan ḵan dida. 30Singngongonot da Pharisee ya da udume mimistulun ni lintog atta disipulun Jesus we ḵananda, “Ngaipa ḵayu maḵaḵan atta andadagup atta bugis ya da udume ḵabasbassuḻan?”

31Ḵanan Jesus we summongbat ḵan dida, “Da anḵosdoḻ, adidapun ḵasapuḻan an-aagas. Yaḵon da masaḵit, ḵasapuḻanda. 32Te adiyaḵpun ummali ta ayagaḵ da naun-unane tagu yaḵon ummaliyaḵ ta ayagaḵ da ḵabasbassuḻan ta ambabawida'tta basuḻda ya agaydae angwa.”

Sa Mipanggob Atte Allaun

(Mat. 9:14-17; Mrk. 2:18-22)

33Pun ḵananda ḵan Jesus, “Da disipulun John, dam-oda allaun ta alluwaḻuda. Ḵaḵna bos da disipulun da Pharisee. Da ḵuwam ḵad, inaḻgawe anganda ḵan uminumda. Ngaipada ḵoon ḵaḵna?”

34Ḵanan Jesus, “Allaun ḵamman da buḻbuḻun ni angasawae laḻaḵi nu awad ḵan dida? Anganda pos pagay. 35Yaḵon sa umali ye aḻgaw nu miyadayu nangasawae laḻaḵi ḵan dida, sadi da aḻgawe allaunda.”

36Ḵanana bose nangugud ḵan dida si sanae pani, “Naippun tagu'ḵ pissayona baru we luput ta ituḵupna'tte dadaane silup. Te nu ḵoona ḵaḵna, sa baru we luput madadail ya adipun os miyapot atte dadaan. 37Naippun os tagu'ḵ ibilungna inabuyu'tte dadaane geddange bibillungan. Te nu ḵoona ḵaḵna, bumtaḵ sadi ye geddange bibillungan ḵad umabuyang ya madadail geddange bibillungan. 38Yaḵon ḵasapuḻane ibilung oḵyan inabuyu si baru we geddange bibillungan. 39Sa osa bos, sa uminum si dadaane bayas, adinapun simsiman bogsaḻ te ummingsa'tte dadaane bayas ya ḵanana'tte somsomoḵna, ‘Napiya pagay dadaan.’ ”

अहिले सेलेक्ट गरिएको:

Luke 5: kml

हाइलाइट

शेयर गर्नुहोस्

कपी गर्नुहोस्