Luke 23

Sa Nipuḻangan Jesus Ḵan Pilate

(Mat. 27:1-2, 11-14; Mrk. 15:1-5; Jhn. 18:28-38)

1Pune sadi, losanda lummanibbat ta iyoyda'ḵ Jesus ḵan Gobernor Pilate. Dummatongda ḵad sidi, 2indaḻumda'ḵ Jesus woḵ ḵananda, “Indasanni annae tagu we al-allelawona da susunude ganaḵ Israel. Sa ḵumagwa, ḵananae adiḵanipun oḵyan ambayad si bugis atte Emperor ad Rome ya sa ḵumaḵlu, ḵananae siya Kristu we Ari.”

3Pun ḵanan Pilate we nan-imus ḵan Jesus, “Siḵa ḵamman Arin da Judyu?”

Ḵanan Jesus, “Ustu imbagam.”

4Pun ḵanan Pilate atta papangat da papadi ya da adu we tagu, “Naippun indasaḵ aḵ basuḻ ni annae tagu.”

5Yaḵon ḵanandae nangipatut, “Ginuluguluna da adu we tagu'tte intero we probinsiya'd Judea. Insaḻadnae nantuttudu'tte probinsiya'd Galilee woḵ dummatong ad Judea ya taḵon ay sinsadi sina'd Jerusalem.”

Sa Nipuḻangan Jesus Ḵan Herod

6Dingngoḻ ḵad Pilate imbagan da tagu inimusna ḵan dida ḵanane, “Naḻpu ḵamman annae laḻaḵi si probinsiya'd Galilee?” 7Inigammuna ḵade naḻpu'ḵ Jesus atte probinsiya'd Galilee ye nampangatan Herod, impaiyoyna ḵan Herod te niyaspuḻe inninggaw aḵ Herod ad Jerusalem atte sadi ye timpu.

8Innilan ḵad Herod aḵ Jesus, amod de layadna te nabayage piona ilan te dingngoḻna mipanggob ḵan siya ya piona ilan da nakaskasdaawe sinyale ḵoona. 9Pun adu da inimusna yaḵon adipun paat summongbat aḵ Jesus. 10Da papangat ḵad da papadi ya da mimistulun ni lintoge ataḵtaḵdog, amo pinabasuḻda. 11Pun aḵ Herod nidoga bos atta suḻdadunae nanginsultu ya nangang-angyag ḵan Jesus. Sinilupanda si langgoyode isuna silup da ari woḵ naabus ḵad impaulida ḵan Pilate. 12Inggan ni sadi ye aḻgaw, nambuḻbuḻun da Pilate ḵan Herod te sa naḻaḵpuse aḻgaw ambusuḻda.

Sa Naḵoddongan Jesus Aḵ Matoy

(Mat. 27:15-26; Mrk. 15:6-15; Jhn. 18:39-40; 19:4-16)

13Pun impaayag Pilate da papangat da papadi, da udume papangat da Judyu ya da tagu, 14ḵanana ḵan dida, “Indatongyu annae tagu ḵan saḵone ḵananyu we al-allelawona da tagu. Yaḵon andongoḻ ḵayu, sa nanumaḻyaaḵ si sinagungyu naippun indasaḵ aḵ basuḻna'ḵ amanoḵnoḵ atte ipabasuḻyu ḵan siya. 15Taḵon ay aḵ Herod, naippun indasana'ḵ ḵingwana te annae impaulina ḵan ditaḵu, pun naippun ustu'ḵ gapunae magongat. 16On paaplitḵu ya puḵayaḵ.” 17Imbagana sadi te sa ugalin Pilate si tinawon atte Gayagayae ngannonda Nallausan, puḵayana osa'tta baḻude ḵodawon da tagu.#23:17 Sa annae verse, adipun nigili'tte iblun Luke atta adu we ambaḻu we ḵopya atte Greek, yaḵon awad atte Matthew 27:15 ya Mark 15:6.

18Yaḵon ḵananda losane nanug-uy, “Gongatomot! Aḵ Barabbas pionni ye puḵayam!” 19Aḵ Barabbas ḵad, nibaḻud te ginuluna da iJerusalem ya inggaw os gingngatna.

20Pion Pilate we puḵayan aḵ Jesus te siya ḵasinna naḵaugudan atta tagu, 21yaḵon amo ḵanandae nanug-uy, “Paipattoḻnu'tte kros! Paipattoḻnu'tte kros!”

22Piḵlun ḵad Pilate we naḵaugud ḵan dida, ḵanana, “Ngaipa? Ngai ḵad ain ḵingwanae gapun ni mapatoyana? Naippun indasaḵ aḵ basuḻ ni annae tagu. Pun taḵon ay nu paaplitḵu ya puḵayaḵ.”

23Yaḵon amo nanugtug-uyda impatute ampaipattoḻ ḵan Jesus atte kros inggana'ḵ naabaḵ aḵ Pilate, 24pun iyyunudna pionda, 25woḵ pinuḵayana tagu we pionda papuḵaye nibaḻud gapu'tte nangguluwana ḵan ginnumngatana. Yaḵon aḵ Jesus, impuḻangna'tta suḻdadu ta ipattoḻda'tte kros ta mituttuwa pionda'tte mipanggob ḵan siya.

Sa Nipattoḻan Jesus Atte Kros

(Mat. 27:32-44; Mrk. 15:21-32; Jhn. 19:17-27)

26Pun sa nangitallayanda ḵan siya, dinoḵmaanda'ḵ Simon we iCyrene we naḻpu'tta ili ye umoy atte siyudad woḵ impabuḵudda de kros ta mitun-ud ḵan Jesus.

27Inninggaw os da amoamode tagu we nitun-ud ḵan Jesus ya da bubai ye sin-iibil ḵan andomdom. 28Yaḵon nantawili ḵad aḵ Jesus ḵanana, “Bubbubai ye iJerusalem, daḵampun oḵyan aḵ saḵon ibilanyu yaḵon siya ibilanyu da long-agyu ya da abengyu. 29Te aaddi ye dumatong aḻgawe umamdan ampaḵaḻaman ḵad ḵanan da tagu, ‘Amo pian da basig ya da adipun mabugi ḵan ampasusu.’ 30Te sa sanate timpu, ḵodawon da tagu'tta beleg ḵanane, ‘Magday ḵayu ta mabumbunan ḵani.’#23:30 Hosea 10:8. 31Te nu ḵaḵna ḵoonda ḵan saḵone ippun basuḻḵu we mipani si allilingsi ye ḵayu, aaddi ye sindumallu ḵoonda ḵan diḵayu we naḵabasuḻe mipani si naaḻ-aḻane ḵayu.”

32Inninggaw os da duwae tulisane imbuḻunda ḵan Jesus ta umoyda midoga magongat. 33Dummatongda'tte igawe ngannonda “Battuḵag.” Impattoḻda'ḵ Jesus atte kros. Da duwae tulisan, impattoḻda bos dida'tta de krosda, sa osa'tte madawinanna ya sa osa'tte madawigina. 34Pun ḵanan Jesus, “Ama, pakawanom dida te ippun igammuda'tte ḵoonda.”

Da suḻdadu ḵad, nambubbunutda woḵ nambisbisaḵanda silupna. 35Summisiḵad da tagu we nambubuya yaḵon insassaud da papangat da Judyu we angigga'ḵ nges-el ḵan siyae ḵananda, “Tinaguna da udume tagu. Taguwona oḵyan long-agna nu tuttuwae siya Kristu we pinilin Apudyus.”

36Inang-angyag os da suḻdadu. Pun ummadanida ta idawdawda ḵilom ḵan siya, 37woḵ ḵananda, “Nu tuttuwae siḵa Arin da Judyu, taguwom long-agnu.”

38Inninggaw os nigili'tte lap-at ni uḻuwan Jesus we ḵanana, “Annaya Arin da Judyu.”

39Taḵon ay osan tulisane nipattoḻ si daḻnig Jesus, inang-angyagna bose ḵanana, “Daḵampun ḵamman aḵ siḵa Kristu? Taguwom long-agnu ya indogam diḵani!”

40Yaḵon sa buḻunnae tulisan, sinuppaḵana woḵ ḵanana, “Adiḵapun ḵamman maḵimut ḵan Apudyus? An-iisu we naḵoddongan taḵu'ḵ matoy. 41Yaḵon dita labbongnae madusa te naḵabasuḻta yaḵon sa annae tagu ippun basuḻna.” 42Pune sadi, ḵanana ḵan Jesus, “Jesus, iḵagasmoḵnu ḵappos saḵon nu umaliḵae ampangat.”

43Ḵanan Jesus ḵan siya, “Ibagaḵ ḵan siḵa ḵatuttuwaan, sinsadi ye aḻgaw midogaḵa ḵan saḵon ad langit.”

Sa Natoyan Jesus

(Mat. 27:45-56; Mrk. 15:33-41; Jhn. 19:28-30)

44Anna ḵade mumamatuḵ, gummiḵbot losane ili inggana'ḵ ummag-agaw, 45te gummiḵbot init. Pun napissay nanḵagwa kortinan ni templo.#23:45 Sa sanae kortina, awad atte Ḵasantuwane partin ni templo. Abus ḵangatuwane padi'ḵ maḵwae lumnoḵ te mibelange sana igaw Apudyus. Nanḵagwa napissay kortina ta angipailae maḵwae umadani da losane tagun Apudyus gapu ta natoy aḵ Jesus para'tta losane basuḻ taḵu. 46Napapḵaaw aḵ Jesus woḵ ḵanana, “Ama, itaḻgodḵu ḵalidodwaḵ ḵan siḵa.”#23:46 Psalm 31:5. Imbagana ḵad sadi, naḵaan angosna.

47Innilan ḵad ni kapitan da suḻdadu da sadi ye naḵwa ḵananae nandayaw ḵan Apudyus, “Tuttuwae naun-unan annae tagu!”

48Da adu we tagu we nadagupe namubuya, innilada ḵad da naḵwa ḵesandae ḵinabḵabḵabda da baḻuḵungda te andomdomda. 49Yaḵon da losane buḻbuḻun Jesus ya da bubai ye nibuḻune naḻpu'tte probinsiya'd Galilee, summisiḵaddae nan-oottap.

Sa Nilibonan Jesus

(Mat. 27:57-61; Mrk. 15:42-47; Jhn. 19:38-42)

50-51Inninggaw laḻaḵi ye nangngadan aḵ Joseph we iyArimathea we osae ili si probinsiya'd Judea. Siya ḵad, ambaḻu ya naun-unan, pasigna uuwayon dumaḵngan ni ampangatan Apudyus. Osa'tta ḵuḵunsisaḻ#23:50-51 Sanhedrin - sana isun ni korti ye andaḵdaḵngan da papangat da papadi, da papangat da Judyu ya da mimistulun ni lintog ta dida anḵuwis. yaḵon adipun ummapyu si nan-uunudan da buḻunna ya sa ḵingwada ḵan Jesus. 52Aḵ Joseph, ummoy ḵan Pilate ta umoyna ḵodawon ladag Jesus. 53Pun ummoyna impas atte kros woḵ putiputana'tte itaḵe sinnun woḵ asinaot ummoy illibon si liyange ḵaḵḵopyae natiḵitiḵane batu we naippun nilibon. 54Sa gapun ni nangwaana si sadi, madam-an misaḻdan ni umillongan da Judyu te masdom ni ansaganaan da Judyu.#23:54 Sa ugalin da Judyu, misaḻad si umillongan atte masdom ni Friday ya magangput atte masdom ni Sabadu.

55Da bubbubai ḵade naḵaoy ḵan Jesus we naḻpu'tte probinsiya'd Galilee, nibuḻunda ḵan Joseph woḵ innilada nangilibonana ḵan Jesus ya sa inonae nangilibon. 56Pun ummoyonda ta umoyda isagana lana ḵan bangbanglu ta siya asida umoy iyappus si ladag. Yaḵon sa umillongan, ummillongda te siya lintogda.

अहिले सेलेक्ट गरिएको:

Luke 23: kml

हाइलाइट

शेयर गर्नुहोस्

कपी गर्नुहोस्