Luke 16

Sa Nasiḵape Antangḵon

1Pun ḵanan os Jesus atta disipuluna, “Inninggaw osae anḵeḵewwaaḻon ni baḵnange nampatangḵonona'tta binaḵnangna. Inninggaw namabasuḻ ḵan siyae ḵanana, ‘Sa annae tagu tangtanggaona da ḵuḵuwan ni baḵnang.’ 2Pun impaayag ni baḵnang woḵ ḵanana ḵan siya, ‘Ngai dingngoḻḵu we mipanggob si nanangtanggaam atta ḵuḵuwaḵ? Idatongnu listaan da tinangḵonam te ḵaanoḵ siḵa si ḵewaaḻnu.’

3“Pun ḵanana'tte long-agna, ‘Ngai nin ay ḵooḵ sinsadi te annae ḵaanonaḵ atte apuḵ si ḵewaaḻḵu? Ippun ḵosdoḻḵu we anḵewaaḻ aḵ amode isun ni amboḵa ya mabainaḵ ose antapatapaya. 4Igammuḵ ḵooḵ sinsadi ta maḵaanaḵ ḵad si ḵewaaḻḵu, awad da tagu we angayag ḵan saḵon atta boḻoyda.’

5“Pun inayagana sin-ossa'tta naḵautang atte apuna. Ḵanana si ummuna, ‘Piga utangnu'tte apuḵ?’ 6Ḵanana, ‘Singgasute ammutu we olives we mantika.’ Ḵanan ni sanae antangḵon, ‘Annaya listaannu. Tumuḵduḵa ta igilime limampuḻu we ammutu.’ 7Ḵanana bos atte osa, ‘Siḵa ḵad, piga bos utangnu?’ Ḵanana, ‘Sillibu we saḻube wheat.’ Pun ḵanan ni antangḵon, ‘Annaya listaannu we aḻam ya igilime waḻun gasute saḻub.’

8“Inigammun ḵad ni apuna, intaḻayagna sanae adipun mataḻgodane anḵeḵewwaaḻona si ḵinalaingnae namnammoḵ si iḵataguna. Te tuttuwae da tagu we adipun namati, nalaingdae angwa'tta inondae maḵaug-uggud atta udume tagu we isuna didae adipun nasilawan da somsomoḵda. 9Pun annaya ibagaḵ ḵan diḵayu, usaronyu da binaḵnangyu'tte annae lubung aḵ maḵabuḻbuḻunanyu te dumatong ḵad timpu we maaminan ḵayu, awaton diḵayu'd langite inggawanyu'ḵ inggana.”

Sa Ustu We Angusaran Si Pilaḵ

10Ḵanan Jesus we namagatup, “Sa mataḻgodane angdon atte aḵit, mataḻgodan atte ad-adu, ḵad sa adipun mataḻgodane angdon atte aḵit, adipun os mataḻgodan atte ad-adu. 11Ḵad nu adi ḵayu mataḻgodane angdon atta ḵinabaḵnang si lubung, ngai bos inonae mitaḻgod ḵan diḵayu tuttuwae ḵinabaḵnang? 12Nu adi ḵayu bos mataḻgodane angdon atta ḵuḵuwan ni osa, ngai asi angitod aḵ ḵuḵuwayu? 13Adipun maḵwa'tte sammilu anserbi'tta duwae apu te aaddi ye ay-ayatona osa ya an-awidana osa. Ḵad ipapatinae anserbi si osa ya am-amsewona osa. Ḵad nu ḵatti, adipun maḵwae anserbiḵa ḵan Apudyus nu siya gamgamam ḵinabaḵnang.”

Sa Imbagan Jesus Atta Pharisee

(Mat. 11:12-13; 5:31-32; Mrk. 10:11-12)

14Dingngoḻ ḵad da Pharisee imbagan Jesus, inam-amsewda te siya pionda pilaḵ. 15Pun ḵanan Jesus ḵan dida, “Diḵayu ḵad, ambalinonyu long-agyu'ḵ naun-unan si antotollong da tagu yaḵon iniiggammun Apudyus da somsomoḵyu. Ummanyu te sa ibelang da tagu we ampatog, lawwelawweng atte antotollong Apudyus.

16“Sa lintog Moses ya sa inggilin da profeta, siya tinuttuwan da tagu inggana si timpun John we Ambobonyag. Inggan ni sadi ye timpu, niwaḻagawag Ambaḻu we Damag mipanggob si ampangatan Apudyus ḵad da losane tagu ipatutdae midoga. 17Yaḵon naḻaslasu we mawawan langit ḵan luta nu sa simpattoḵe Lintog Apudyus we ambalin aḵ ippun anuna.”

18Pun ḵanan os Jesus, “Ngaimane laḻaḵi ye angidang atte asawana ya ḵasin os angasawa'ḵ sabali ye bubai, maḵabasuḻ atte dagdagas. Isuna bos si laḻaḵi ye angasawa si inidangandae bubai, maḵabasuḻ os atte dagdagas.”

Sa Baḵnang Ya Aḵ Lazarus

19Ḵanan Jesus, “Inninggaw laḻaḵi ye baḵnange nansilup atta ampapatoge silupe naḵwa'tte purple we sinnun ḵad inaḻgawe nansida ya anggangganas. 20Inninggaw ḵapuse angngadan aḵ Lazarus we napaḵḵutan long-agna si gagatoḻ. Inaḻgawe umoyda igga si sawang ni boḻoy ni baḵnang, 21te piona oḵyane angan taḵon ay bugtae dadaḵon ni baḵnang atte lamisaan. Ḵad taḵon ay da asu, ummoyda dinendelan da gagatoḻ Lazarus.

22“Natoy ḵad sadi ye ḵapus, innaḻan da anghel woḵ ummoyda innigga si daḻnig Abraham. Natoy ḵad os baḵnang, illibonda, 23woḵ ummoy ad Hades we igaw da natoy. Pun ummamdan ampaḵaḻamana. Nantangad ḵad, innilana'ḵ Abraham atte adayu ya aḵ Lazarus atte daḻnigna. 24Pune sadi nampoḵaw woḵ ḵanana, ‘Ama Abraham, ḵadaguwanaḵ ḵappos ta ibuunnu'ḵ Lazarus ta ilinongna tammuduna'tte danum ta itodtodna si delaḵ ta matungninan. Te annan ummamdan ampaḵaḻamaḵ si apuy.’

25“Yaḵon ḵanan Abraham, ‘Abengḵu, iḵagasmoḵnu timpun ni nataguwame allin-awa biyagnu. Ḵad aḵ Lazarus, nampaḵaḻam. Yaḵon sinsadi, annae allaylayad sina ya siḵa ḵad, annate ampaḵapaḵaḻamḵa. 26Daḵampun aḵ abus ay sadi te annat digdig atte nambootan taḵu ta da maḻyade umoy sinate maḻpu sina, adipun maḵwa ya da maḻpu sinat, adipun os maḵwae umalida sina.’

27“Pun ḵanan ni baḵnang, ‘Ḵodawoḵ ud ḵan siḵa ama Abraham ta ibuunnu'ḵ Lazarus si boḻoy da amaḵ, 28ta bagbagaana da limae sunudḵu ta adida oḵyan os umali si annae igaw ni ummamdane ampaḵaḻaman.’

29“Yaḵon ḵanan Abraham, ‘Nu mipanggob atta susunudnu, awad de inggilin Moses ya da profeta we anuttudu ḵan dida. Ḵad dongngonda oḵyan ya tuttuwaonda da sanae nigili.’

30“Ḵanan ni baḵnang, ‘Ama Abraham, potog sanat. Yaḵon nu awad oḵyan pagay maḻpu si igaw da natoy ya umoy ḵan dida, ibabawida da basuḻda ya agaydae angwa.’

31“Yaḵon ḵanan Abraham, ‘Nu adida amati'tta inggilin Moses ya da profeta, adidapun os maawise amati taḵon ay nu awad umuli ye maḻpu'tta natoy.’ ”

अहिले सेलेक्ट गरिएको:

Luke 16: kml

हाइलाइट

शेयर गर्नुहोस्

कपी गर्नुहोस्