يوحنا 3

سِيذِيثْنغ عِيْسَى يسڒْمَاذ خ وبْرِيذ ن جْذِيذ

1تُوْغَا يدْجَا يجّن ن ورْيَاز قَّارن-اَس نِيْكُوْدِيم زِي ڒْحِزب ن يفَرِّسِيْين. نتَّا ذ يجّن زِي لْحُكَّام ن أَيث-إِسْرَائِيل. 2يُوْسَا-د غَار عِيْسَى س دْجِيڒث ينَّا-ٱس: "آ لْمُعَلِّم، نشِّين نسّن بلِّي شك ذ اَمْسڒْمَاذ إِي د يُوْسِين زِي أَربِّـي. وَار يزمَّر ؤُڒَا ذ يجّن اَذ يݣّ شَان لْمُعْجِيزَاث زِي مِين تݣّذ شك إِلَّا مڒَا كِذس أَربِّـي."

3ئِنْدق-د عِيْسَى ينَّا-ٱس: "أَقَا تسْڒِيذ ڒْحَقّ: وَار يزمَّر ؤُڒَا ذ يجّن اَذ يࢲر ڒْمُلْك ن أَربِّـي إِلَّا مڒَا يخْڒق-د ذ جْذِيذ."

4ينَّا-ٱس نِيْكُوْدِيم: "مَامّش غَا يݣّ بْنَاذم اَذ د يخْڒق ذ جْذِيذ مڒَا يوْسَار؟ مَا يزمَّر اَذ يَاذف عَاوذ ذݣ وعدِّيس ن يمَّاس اَذ د يخْڒق ذ جْذِيذ؟"

5ينَّا-ٱس عِيْسَى: "أَقَا تسْڒِيذ ڒْحَقّ: مڒَا شَان يِجّن وَار د يخْڒِيق شَا س وَامَان ذ أَرُّوح ن أَربِّـي، وَار يزمَّر اَذ يَاذف ذِي ڒْمُلْك ن أَربِّـي. 6مِين يتْوَاخڒْقن زِي دَّات، نتَّاث ذ دَّات. مِين يتْوَاخڒْقن زِي أَرُّوْح ن أَربِّـي، نتَّا ذ أَرُّوْح. 7مڒَا نِّيغ-أَش يتخصَّا-كنِّيو اَذ د تْخڒْقم ذ جْذِيذ، وَار تْعجِّيب شَا. 8أَرِّيح يتْصُوْض مَانِي يخس نتَّا. أَذ تسْڒِيذ إِ صُّوْت نّس، وَلَكِن وَار ثسِّينذ شَا مَانِيس د يكَّا ؤُڒَا ذ مَانِي غَا يرَاح. أَمُّو إِي ݣِّين مَارَّا يِنِّي يتْوَاخڒْقن س أَرُّوح ن أَربِّـي."

9ينَّا-ٱس نِيكُوْدِيم: "مَامّش مَانَايَا؟"

10يَارَّا خَاس عِيْسَى ينَّا-ٱس: "إِيوَا ثْسڒْمَاذذ شك أَيث-إِسْرَائِيل وَار ثْفهِّيمذ شَا مَانَايَا؟ 11أَقَا تسْڒِيذ ڒْحَقّ: نشِّين نسَّاوَاڒ زِي مِين نسّن، نْشهّذ س مِين نࢲْرَا، وَلَكِن كنِّيو وَار ثقْبِيڒم شَا شْهَاذث نّغ. 12مڒَا سِّيوْڒغ غَارْوم خ ثْمسْڒَايِين ن ثْمُوْرْث كنِّيو وَار تِيمْنم شَا، مَامّش غَا ثَامْنم مڒَا سِّيوْڒغ-اَوم خ ثْمسْڒَايِين ن وجنَّا؟ 13ؤُڒَا ذ يجّن مَا يُوڒِي غَار وجنَّا إِلَّا ونِّي د يهْوَان زݣ وجنَّا، نتَّا ذ مِّيس ن بْنَاذم.

14أَمشنَاو مَامّش يسْبدّ مُوْسَى فِيغر ن نحَّاس خ ثحْنَاشْت ذِي ڒخْڒَا، أَمُّو يتْخصَّا اَذ يتْوَاسْبدّ مِّيس ن بْنَاذم ذݣ وجنَّا.#3‏.14 مَانَايَا يتَاس-د زِي لْكِتَاب ن لْأَرْقَام 21: 6‏-9. ئِضْڒق-د سِيذِي أَربِّـي يفِيغرَان مسْمُوْمِين خ شَّعْب بْذَان تقّْسن-اَسن، مُّوْثن خَربِّي زَّايْسن. يُوْسَا-د شَّعْب غَار سِيذْنَا مُوْسَى نَّان-اَس: "نخْضَا وَامِي نتْشثْشَا أُو نسِّيوڒ ذِي سِيذِي أَربِّـي ؤُڒَا ذَايش. تَّار-اَس إِ أَربِّـي حمَا اَخَانغ يسْبَعّذ يفِيغرَان-أَ." سّنِّي سِيذْنَا مُوْسَى يتَّار إِ أَربِّـي. يَارَّا-د أَربِّـي خ سِيذْنَا مُوْسَى ينَّا-ٱس: عْذڒ يج وفِيغر س نحَّاس اݣّ-يث خ يِجّن ن ثحْنَاشْت، أَغَارس خْزَرن يِنِّي ؤُمِي قّْسن يفِيغرَان حمَا اَذ دَّرن." ئِرُوْح سِيذْنَا مُوْسَى يعْذڒ فِيغر نِّي س نحَّاس يݣِّي-ث خ ثحْنَاشْت. تُوْغَا ونِّي ؤُمِي يقّس وفِيغر يخزَّر غَار وفِيغر نِّي ن نحَّاس يتدَّر. 15مَارَّا ونِّي زَّايس غَا يَامْنن اَغَارس ثِيڒِي ثُوْذَارْث إِ ڒبْدَا."

16وَامِي يحِبّ أَربِّـي دُّنشْت-أَ، ئِهْذَا-يَاس مِّيس أَوحْذَانِي حمَا ونِّي زَّايس غَا يَامْنن وَار يفنِّي شَا اَغَارس ثِيڒِي ثُوْذَارْث ن ڒبْدَا. 17أَربِّـي وَار د يسّكّ شَا مِّيس غَار دُّنشْت حمَا اَذ يحَاسب يوْذَان؛ لَّا، يسّكّ-يث-يذ حمَا اَزَّايس يسنْجم يوْذَان. 18ونِّي زَّايس يتَامْنن اَتَاف وَار يتْوَاحَاسِيب شَا. ونِّي وَار زَّايس يتِيمْنن شَا اَقَا يتْوَاحَاسَاب مِينْزِي نتَّا وَار يُوْمِين شَا زݣ يِيسم ن مِّيس ن أَربِّـي اَوحْذَانِي. 19ذ وَا ذ لْحُكم إِي خَاس غَا يِيڒِين: نُّوْر يُوْسَا-د غَار يِوْذَان، ئِوْذَان خْسن ثَادْجسْت حْسن زِي نُّوْر مِينْزِي تݣّن شَّرّْ. 20مَارَّا ونِّي يتݣّن مِين يدْجَان ذ اَعفَّان يتْعِيفَّا نُّوْر، وَار غَارس د يتِيس شَا غَار نُّوْر حمَا وَار تْنفْضِيحنْت شَا ڒفْعَايڒ نّس. 21ونِّي يخدّْمن نِيشَان اَذ د يَاس غَار نُّوْر. أَمُّو اَذ د يبَان بلِّي ڒخْذَايم نّس يتݣّ-يثنْت إِ أَربِّـي.

نَّبِي يَحْيَى يشهّذ بلِّي سِيذِيثْنغ عِيْسَى يمْغَر خ كُڒْشِي

22منْبَعْد إِ مَانَايَا عِيْسَى ذ يمحْضَارن نّس ؤُسِين-د غَار ثْمُوْرْث ن يَهُوْذِيَا يقِّيم اَكِذْسن ذِنِّي، ئِتْطهَّار إِ يِوْذَان س وَامَان. 23ؤُڒَا ذ يَحْيَى يتْطهَّار إِ يِوْذَان س وَامَان ذِي ڒْعُنْصَر ن نُوْن ذِي طَّارف ن ثنْدِينْت ن سَالِيم مِينْزِي ذِنِّي اَمَان اَطَّاس. تَاسن-د ذِنِّي يِوْذَان حمَا اَثن يطهَّار. 24(ئِوْقع مَانَايَا قْبڒ مَا ذ ݣّن يَحْيَى ذِي ڒحْبس.) 25يوْقع لْخِلَاف جَار يمحْضَارن ن يَحْيَى ذ يِجّن ن ؤُئِسْرَائِيلِي خ مَامّش غَا يِيڒي ڒُوْضُو. 26ؤُسِين-د غَار يَحْيَى نَّان-اَس: "آ لْمُعَلِّم، ونِّي تُوْغَا اَكِذش يدْجَان اَجمَّاض إِ يِغْزَار ن لْأُرْدُن أُو شك ثْشهْذذ خَاس، نتَّا يتْطهَّار إِ يِوْذَان س وَامَان ݣُّوْرن غَارس مَارَّا."

27ينَّا-ٱسن يَحْيَى: "وَار يزمَّر بْنَاذم اَغَارس ثِيڒِي شَان ثْمسْڒَايْث مڒَا وَار ذَاس د تُوْسِي شَا زِي أَربِّـي. 28كنِّيو س يِيخف نْوم ثْشهْذم قَا نِّيغ-اَوم: نش وَار دْجِيغ شَا ذ لْمَسِيح؛ لَّا، تْوَاسّكّغ-د قْبڒ إِ نتَّا. 29ونِّي غَار ثدْجَا ثسْڒِيث، نتَّا ذ مُوْڒَاي. أَوْزِير ن مُولَاي#3‏.29 أَوْزِير ن مُوْڒَاي نتَّا ذ صَاحب لْعَرِيس نِغ ذ اَمدُّوْكڒ ن مُوْڒَاي. يعْنِي ونِّي يتْبدَّان زَّاثس يتْسْڒَا-يَاس، نتَّا يفَرّح اَطَّاس إِ وَاوَاڒ ن مُوْڒَاي. أَمُّو ؤُڒَا ذ نش فَرْحغ اَطَّاس. 30أُو لَابُد نتَّا اَذ يمْغَر، نش اَذ نقْصغ."

31ونِّي إِي د يتَاسن زݣ وجنَّا، نتَّا يمْغَر خ كُڒْشِي. وَلَكِن ونِّي إِي د يتَاسن زِي ثْمُوْرْث نتَّا زِي ثْمُوْرْث، ئِسَّاوَاڒ اَمشْنَاو يوْذَان ن ثْمُوْرْث. ونِّي إِي د يتَاسن زݣ وجنَّا، نتَّا يمْغَر خ كُڒْشِي. 32ئِشهّذ زِي مِين يࢲْرَا ذ مِين يسْڒَا، وَلَكِن شْهَاذث نّس وَار ت يقبّڒ ؤُڒَا ذ يجّن. 33ونِّي يقبّْڒن شْهَاذث نّس، أَتَاف يتْحَقّق بلِّي أَربِّـي ذ لْحَقِيقَا إِݣ يدْجَا. 34ونِّي إِي د يسّكّ أَربِّـي يسَّاوَاڒ س وَاوَاڒ ن أَربِّـي مِينْزِي يتِيشّ-اَس أَرُّوح نّس بْڒَا ڒقْيَاس. 35بَابَاس يعِيزّ خَاس مِّيس، يݣّا-ٱس كُڒْشِي ذݣ وفُوْس نّس. 36ونِّي يتَامْنن زِي مِّيس اَتَاف غَارس ثُوْذَارْث ن ڒبْدَا. ونِّي وَار يتْطِيعِين شَا إِ مِّيس، أَتَاف وَار غَارس بُو ثُوْذَارْث اَخَاس يغْضب أَربِّـي."

अहिले सेलेक्ट गरिएको:

يوحنا 3: ريف

हाइलाइट

शेयर गर्नुहोस्

कपी गर्नुहोस्