Matayo 3
3
Likoroto e Yoana Laipatisani
(Marko 1:1–8; Luka 3:2–18; Yoana 1:19–28)
1Kore te inia ng'amata apa, nelotu Yoana Laipatisani elikoo te lkees le Yudea 2#Mat 4:17; Mrk 1:15ejoito, <<Erriidu amu etinyikua nkitoria e chumata.>>
3 #
Isa 40:3
Amu ele apa eiroroki mbaa enyena to loiboni le Nkai Isaya,
<<Ening'o ltoilo le ilo obuakita te lkees ejo,
<Entibiraki Laitoriani nkoitiei,
entorioi nkoitieii kunini enyena.> >>
4 #
2Lki 1:8
Kore Yoana, neichopito nkilani naaitibirieki lpapit le ntames, nerretenita nkimeente e nchoni te nkiji enye. Kore ndaa enye naa lmaat o naichuo e soro. 5Nedotunyie ꞉Yerusalem o Yudea pooki o lubot pooki e Yordan aapuo netii ninye. 6Neipatis ninche te sere e Yordan, eibalie ꞉ninche ng'ok enche. 7#Mat 12:34, 23:33Kake kore payie edol ꞉ninye ltung'ana kumo loo Lparisayo o Sadukayo epuonuta inie ng'oji neipatisie ltung'ana, nejoki ninche, <<Naichoi ana ee lasuria! Ng'ae otiaka ntae, ing'ataa ngoro nalotu e Nkai? 8Entiiu naa lng'anayio ooiririkino nkirriidunoto ee ng'ok. 9Emijokino maate, <Kore Abraam, ikiata iyioo era papa lang.> Amu kajoki ntae, keidim Nkai neitibiru nkera too kulo soito metaa nkera e Abraam.#3:9 Teneji nkera e Abraam naa rerei loo Lburania outu ajo ituwuana ana Abraam. Naa kore Abraam, keyieloi apa tankaraki nkurukoto enye o naning Nkai. Kake kore kulo tung'ana, meata ninche nkurukoto nemening Nkai. Ng'ura sii Yoana 8:33,39; Rroman 2:28–29; 4:12; 9:7. 10#Mat 7:19Naa kore taata, eidipaki aatipik ntolu ntana ee lkeek metaa kore pooki cheni lemeiu lng'anayio supati, nedung'uni, nenang'akini nkima. 11Kaipatis ntae ta nkare payie iwuenienie nkirriidunoto, kake kore ilo laaijipu naa keata ngolon kitok alang nanu, namaichiaakino abaki tanaitai namuka enyena. Naa keipatis ninye ntae ta Ltau Sinyati o te nkima. 12Kore ta nkaina enye naa keibung'uta masaaita naorieki nkano supat o siau, neor lkurroto, neiturrurroki nkano supat ng'oji neiteng'elieki ndaa, nepejoo siau te nkima nemerai.>>
Nkipatisare e Yeso
(Marko 1:9–11; Luka 3:21–22)
13Kore tesiedi, nelotu Yeso eing'uaa Galilaya alo sere e Yordan meipatisa ꞉Yoana. 14Nenyok Yoana aibooyo, ejo, <<Keyiere paa iyie likimpatis nanu, nilotu iyie natii?>>
15Newoliki ꞉Yeso ajoki, <<Nchoo eaku nejia taata, amu keichiaakino tinikias kuna payie kintabaya sipata e Nkai.>>
Nechamaa ꞉Yoana.
16Kore ake payie eipatisi Yeso, neipung'u taatua nkare. Nebolo chumata, nedol ꞉ninye Ltau Sinyati le Nkai edou ana nkutukurruk, newuenie ninye. 17#Ng'as 22:2; SNk 2:7; Isa 42:1; Mat 12:18, 17:5; Mrk 1:11; Luka 9:35Nening'oi ltoilo oing'uaa chumata ejo, <<Ana Nkerai ai nacham naa katachamayie.>>
अहिले सेलेक्ट गरिएको:
Matayo 3: saq
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2021, Bible Translation and Literacy
