Mateu 8
8
Umukaturu yepe lepruzu
1Uwiye irumu iwitera sui siya miraita uri sakakuera.
2Asui yepe lepruzu uri suaki umunya ixupe benditu umbeu ixupe:
—Seruixawa sã reputari rame rexari ikiaima ixe.
3Asui Jesus uxari sese ipu umbeu:
—Ẽẽ haputari ikiaimawaa inde. Asui aramete ikiaima ae lepra sui.
4Asui Jesus umbeu ixupe:
—Terembeu nẽ awa supe, maa resu nerapee rupi remukame nepira saserduti umaa, remee prezenti Deus supe kuaye Muize umunduwaa yawe aintaumee aintaukuawa arama nerese kuaita miraita.
Umukaturu surara ikriadu
5Asui Jesus uwike irumu Kafarnaum kiti yepe suraraita ikapitão uri ipiri upurandu arama irumu.
6Umbeu ixupe:
—Inde seruixawa yepe sekriadu imembekawaa ipira uyenu uiku seruka upe upurara turusu.
7Asui Jesus umbeu ixupe:
—Hasu kuri hamukaturu ae inde arama.
8Asui kua suraraita kapitão umbeu:
—Seruixawa, timaa purangawaa ixe rewike arama seruka upe, anyunte rembeu yepe inyenga asui kuri purangana kua kurumiwasu.
9Ixete serakuenawaa supe aramawaa, ixete suraraita ruixawa, hamundu rame yepe arama urikute usu, asui hamundu rame yepe uri sepiri uri sepiri, hamundu rame sekriadu, remunya ae, asui umunya ae.
10Asui Jesus usendu irumu inyenga iakayemu umaa ixupe umbeu ainta supe kuaita uriwaita sakakuera:
—Supiwa hambeu penye arama: "Umbaare hawasemu yepe aintasuiwara kuaita Israelitaita uruyariwaa kirimbawa iyawe kua apigawa".
11Asui hambeu penye arama:
—Aintauri kuri siyawaita tumasawaa sui yapira sui yuiri, aintauwapika kuri meza ruaki aintairumu kuaita Abraão Izaki yuiri Jaku yuiri aintaruixawa irumu kuri kua iwaka ruixawa.
12Maa Deus imiraita kuerawaa yepe aintaumburi kuri isui ainta pitunawasuwaa kiti, aintauyaxiu kuri aintausuu kuri aintaranya aintapiaiwasawa irumu.
13Asui Jesus umbeu ixupe:
—Kua suraraita kapitão, resuana nerapee rupi hamunya kuri inde arama maye reruyariwaa yawe nepia upe. Asui aramete ikatuana kua ikriadu.
Umukaturu Pedru sugra
14Asui Jesus uwike irumu Pedru ruka upe umaa isugra uyenu uiku saku ipira takua irumu.
15Asui upisika ipu, asui takua uxari ae. Asui Pedru sugra upuamu umunya timbiu aintaumbau arama.
Jesus umukaturu kuaita siyawaita
16Asui karuka rame aintaururi ipiri siya demuniu upukuariwaita asui inyenga irumute umburi aintasui kuaita demuniwita, umukaturu yuiri kuaita imãsiwaita panye.
17Jesus umunya kuaye utitikawaa yawe kua Izaia yawe umbeu:
—Aepawate uyuka yanesui yanepituasawa, aepawate yuiri urasu yanesui kua mãsi.
Usuwaita sakakuera
18Asui Jesus umaa irumu siya miraita umundu aintausu lagu ruaxara kiti.
19Asui yepe umpinimawaa uri Jesus ipiri umbeu ixupe:
—Inde umbuesarawaa hasu kuri nerakakuera maa kiti resuwaa.
20Jesus unyee ixupe:
—Kuaita paka aintaurikute aintaruka iwi upe, kuaita yuiri wiraita aintaurikute aintaninyu, maa kua unaseriwaa umaa kua ara timaa uriku upituwaa rendawa.
21Asui yepe umbuewaa umbeu ixupe:
—Seruixawa, rexarire hasaru hamaa umanu kua sepaya.
22Asui Jesus umbeu ixupe:
—Reyuiriana serakakuera, rexari umanuwaita umburi kuaita umanuwaita aintasuiwara.
Umpitu iwitu
23Asui uwiye igara upe asui umbuewaita aintauwiye irumu.
24Asui anyunte kirimbawawaa iwitu upeyu aintarese gapenu upeteka uwike aintaigara kiti lagu turusuwaa piterupi, maa Jesus ukiri uiku.
25Asui umbuewaita aintaumbaka ae aintaumbeu ixupe:
—Yaneruixawa, remukaturu yande aiwana yayupipika.
26Asui umbeu ainta supe:
—Marantaa pesikie penye kuairawaita peruyari? Asui upuamu umbeu kirimbawawaa inyenga irumu iwitu supe parana supe yuiri, asui upitu iwitu gapenu yuiri.
27Asui aintaakayemu aintaumaa kuaita apigawaita, aintauyupurungita aintapawa, aintaunyee:
—Awataa kua apigawa aintauruyari arama inyenga iwitu parana yuiri?
Umukaturu urikuwaita demuniu
28Asui usikana lagu ruaxara kiti aintarendawa upe kuaita Gadarenuwaita asui mukuĩ apigawa urikuwaita demuniu aintapia upe aintauri semiteriu sui ipiaiwawaita ainta ape tiawa upuderi usasawa pee rupi.
29Asui aintaumaa irumu Jesus anyunte aintausasemu kirimbawa aintaumbeu:
—Maataa resikari yaneirumu inde Deus raira? Maitaa reyuiriana rexari yapurara senundere usika yanerangawa?
30Ape siya tayasu umbau kampu upe kuayentu aintasui.
31Ape kuaita demuniwita aintaupurandu Jesus aintaumbeu ixupe:
—Remburi rame yande apigawaita sui rexari yawike tayasu ipia upe.
32Asui umbeu ainta supe:
—Pesuana. Asui kuaita demuniwita aintausemu rire apigawaita sui aintauwike tayasu ipia upe panye, asui anyunte aintauyana aintauwari barera kiti lagu turusuwaa upe aintaukanyemu arama.
33Asui kuaita usaruwaita tayasu aintauyawawa aintatawa kiti aintaumbeu arama panye kua Jesus umunyawaa aintaumbeu yuiri maye aintausasawa kuaita urikuwaita demuniu.
34Asui aintauri Jesus ipiri kuaita tawa upewaita panye aintaumaa irumu ae aintaupurandu ae kirimbawa uyuiri arama aintarendawa sui.
अहिले सेलेक्ट गरिएको:
Mateu 8: BBp
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
