YOANA 5
5
1Ato wanta kegh kïwö Yeso kutang Yerusalem wölo kimi ichon pö pipö Yaudi nyo wow. 2Kimi ato lekïto atoni le Yerusalem ato lekïto Kuka Kechir ngarpïl nyo kitïng körkerwok mut nyo kikuro ompö Eprania Petesda. 3Kimito tuyot nyo pö pich cho chang cho kichirsot cho kiruyot atoni: pich cho köryote, cho ngwolsot nko cho kimeyta porwöy. [Kimi chane kïköngöy otini kawïch kegh pögh, 4ompöwölo kiröku malaykayan asistanka akwigh ngarpïlun kïwïch pögh. Tö ato lït chi nyo pö tagh pöghechoni otini kawïch, kesopö nyinte sömew anka tïkwïl nyo kötïng.] 5Kimito chi atoni nyo kökikuchir könyis 38. 6Otini kïsïwa Yeso nyinte kïrïwöy akunkïtï lö kökikuchir nyinte könyis cho chang, kïlenchï, “Imökenyi söpe nya?” 7Kuyokyï chichay Yeso lö, “Möminye chi, Echotyon nyo tönanïn ngarpïl ori otini kawïchawich pögh, otini olentan omukyini olïtöy kïlït chitö anka ori kïnyaghanïn.” 8Kïlenchï Yeso chichay, “Ngeta aicheng menyontengu aiwö.” 9Otini lawel kïsöp chichay, kïcheng menyontenyi akïwö. Ki asispa Sapato* nyoni kighisyö ngalechoni. 10#Nem 13:19; Yer 17:21. Kïlenyona kïlenchï pïchay pö Yaudi chichay kakisop, “Asispa Sapato nyï, kïröy Kirurutköcho kepotoy menyon.”
11Kïlenchï chichay, “Kömwowanïn chichoni kesopanïn lö, chenga menyontengu aiwö.” 12Kïtep pïchay pö Yaudi lö, “Ngo chichoni kömwowunyi lö, ‘Chenga menyontengu aiwö?’ ” 13Wölo kimenkïtnye chichoni kikisop lö ki ngo nyinte, ompöwölo kimito söpïch atoni akökikïwö Yeso.
14Kïnyorchï Yeso chichay ato le soya Kö pö Tororöt,* kïlenchï, “Rose lö, kakesopinyi ye. Megha ngat ngokï tömengwïnchin kïgh anka nyo gha kïtïl nyoni.” 15Atolapay kïnget chichay akïwö kïmwochï pïchay pö Yaudi lö kichï Yeso nyaye kisop nyinte.
16Kutor nyu pipö Yaudi kurey Yeso ompö ngölyontononi, ompöwölo kisop nyinte chi asispa Sapato. 17Kïlenchï Yeso chane, “Ighöy Paponyan pöghisyenyi kïtenö osis, apöghisïyan ante tïkwïl.” 18Kïkany kïlïm pipö Yaudi lenyoni, kïnörekyö tya, akïmar or nyo tïgho nyinte, amelö ompöwölo kinyar kirurut pö asispa Sapato, wölo ompö wölini kimwa nyinte lö, Paponyi Tororöt, nyo poru lö kigh kegh kïkongityö nko Tororöt.
Wowïn pö Wero Tororöt
19Kuyokyï Yeso chane lö, “Omwowokwa nyoman lö meghönye Weri kïgh onkït, poto nyo sïwïyi kwighöy Kwanta. Kïgh nyo ighöy Kwanta, kwighöy Weri tïkwïl. 20Ompöwölo chömöy Kwanta Werïnyi akuporchini nyinte kïyoni ighöy nyinte, akuporchini ngat kwighöy tïku walaka cho echön kïmolï chete atatanganyakwa. 21Kïle wölini ighöy Paponyan cho kimeghö kututu akutö söpon, kïlenyoni tïkwïl, töni Werïnyi söpon pich cho chömöy nyinte. 22Melö rwokyini Paponyan chi anka tïkwïl, kakutö nyinte Werïnyi owesyö kïmïkul nyo rwokyini pich, 23atökutö pich tïkwïl konyït Weri le wölini töni chane konyït Kwanta. Anka tïkwïl nyo mökonyïtönye Werïnyi, kïmökonyïtönye Kwanta nyo kiyonï nyinte.
24“Amwowokwa nyoman lö anka tïkwïl nyo lïmöy ngalechan akughan nyinte nyo kiyokwanïn, kïtïng söpon pö kokay. Melö kirwokyini nyinte, wölo kakïngetunö meghat akïlït söpon. 25Amwowokwa nyoman lö, ngwïnöy asis akikungwïn asisoni ato lïmöy pich cho kimeghö kuti Wero Tororöt, akïsöpchöt chane cho lïmöy kutinoni. 26Ompöwölo le wölini ngwïno Paponyan owesyo söpon kïmïkul, kï kegh nyinte Werïnyi kïsïch söpon ompö owesyeto Kwanta. 27Akakutö nyinte owesyö Werïnyi kurwokyï pich, ompöwölo Wero Chi nyinte. 28Motöngönchï ngölyontononi, ompöwölo pkonöy osiswö ato lïmöy pich tïkwïl cho mi pïrïmpot kutinyi 29#Dan 12:2. akïngetunö chane lapay pïrïmpotikwa, ngetu pich cho kigh nyo karam akïsöpchö, kïngetï chane cho kigh nyo gha atökerwokyï.
Cho söwintönchini Yeso
30“Moghanye kïgh nyonikïny ompö owesyenyu kegh. Orwokyinan kïrïp kegh nko ngölyonteto Paponyan, kïlenyona kutenate kirwokötenyan, ompöwölo moghanye kïle wölini komöktonan ante, wölo oghan kïkarkegh nko machata nyinte nyo kiyokwanïn. 31Akwato osöwintönchan kegh ante, kïmöpönye man söwintönenyan. 32Wölo mi chitö anka nyo osöwintönchinan, ankïtön lö ngalechoni ngölono nyinte parakunyan kï ngala man. 33#Yna 1:19-27; 3:27-30. Kyayontekwa kinetankökwo wölo mi Yoana, kïsöwintönchï nyinte ngala man. 34Amelö, ompöwölo otwoytonan kegh söwintöno pich, wölo kamwaghan ngalechï atökemï kesörwokwa. 35Kikarkegh Yoana nko kitömöwön nyo kinoghöy akulïwu, achamakwa ongörekyeghenö löpoyïntanyi ompö osis cho ngörï. 36Wölo otïngetan söwintön nyo wow kïsir nyanya kipö Yoana. Ompöwölo ighisyewut cho kikonanïn Paponyu awany kï ighisyewut choni cho oghan, choni cho söwintönchini lö kiyokwanïn Paponyu. 37#Mat 3:17; Mrk 1:11; Luk 3:22. Akïsöwintönchinanïn Paponyu nyo kiyokwanïn. Tomönye alïmakwa kutinyi nyonikïny akïtomönye asïwenakwa kïtontanyi 38akï möminye ngölyontenyi nko akwa, ompöwölo melö kyaghanakwa chichoni kiyokï nyinte. 39Omitekwa osyoköy Kikirut, amitö olentöy kïsïko söpon pö kokay Kikirutchoni, wölo ngölonenanïn ngalechoni chane! 40Akwanyï mochömekwanye opkone wölo omitan atamuka osïkö söpon.
41“Momöranye salata ompö pich. 42Wölo onkïtokwa, lö möminye chamata Tororöt mïkulöwekwa. 43Kyangwïnan ompö owesyeto Paponyu, wölo tomönye atachanïkwa akwato töp ntökungwïn chitö anka ompö owesyenyi, otochekwa nyinte. 44Omukekwa oghöne lö ne akwanyï ochömekwa otoke salat nyo le nyingwo kegh akwanyï momörekwanye salata Tororöt? 45Molenchï kegh orwokyinokwa ompö tawu Paponyan. Chi nyo rwokinokwa kï Musa nyini okönekwa. 46Ntökyaghanakwa Kirurut pö Musa, kötö oghönekwa ngalechï omwowokwa, ompöwölo kikir nyinte ngalechan. 47Wölo otini ye moghönekwanye ngalechini kikir nyinte, omukekwa nyu oghöne lö ne ngalechï omwowokwa?”
Kapagh Yeso söpïch nyo wow
(Mat 14:13-21; Mrk 6:30-44; Luk 9:10-17)
अहिले सेलेक्ट गरिएको:
YOANA 5: PIPÏLIA
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
©Bible Society of Kenya, 2019
