Nimlivolivon 9
9
No kanoyong na ni Sawlo ji Yeso
1No kanang rana am ji namtadan ni Sawlo o kalalaw na so omraralay ni Yeso a tao a zakaten. Am ori o nyangay na do rako a panirsirngen no mapatanatanang so nakem da si Ama ta do to, 2ta kakzeben na o kapeyteygami na no tomalamozong no aro a peyneynozyan da no tao do Yotay do Tamaseke a ili a manci no kapya da sya omrakep so amraralay ni Yeso a tao, tana mahakay a tana mavakes am miminen na sira yangay do pamemtengan do Yelosaleng.
3Masngen rana do Tamaseke am to ngyan so zezak apo do teyngato a tomiray sya. 4Am ori o nikavazakwang na do teyrahem a kapakamizing na so macisirsiring jya. Maniring am, “Sawlo, Sawlo, ikongo mo pakakasyan jyaken.” 5Maniring am, “Mo Panirsirngen, sino ka.” Maniring am, “Yaken rana am si Yeso ko a yamo pakakasin. 6Peyvangon rana mangay do ili, ta yamyan so asa ka tao a manci nya jimo so vazay ko jimo.” 7O kararay ni Sawlo am tey maonib sira, ji rana makapeyzezyak, ta amyan so mamizing da am ji da cita. 8Meyvangon si Sawlo am peyvezezngen na o mata na am ji makacita. Ori o nyalakan da sya no kararay na yangay do Tamaseke. 9So nipakatlo na araw a jya nimakacita, jya nimangakaday.
10Amyan do Tamaseke so asa ka omraralay ni Yeso a tao a meyngaran si Ananiya. Nimapacita jya si Yeso. Maniring am, “Ananiya.” Maniring am, “Ikongo o mo kakzeben jyaken, mo Panirsirngen.” 11Maniring si Yeso am, “Mangay ka do ngaranan da so Matazineng a rarahan. Ta myan do vahay ni Yota o asa ka tao do Tasose a meyngaran si Sawlo a yameynozi dang. 12Nipaziman ko na jya o katovoy ko jimo a mangay a somidong sya a mapaopta so lima mo a kapakacita na rana.” 13Maniring si Ananiya am, “Mo Panirsirngen, ko nimamizing rana do aro a tao o marahet a vazay na do keyyan da no aro a nipakakasi na a omraralay nimo do Yelosaleng. 14Iya rana am nipya da no panipanirsirngen no mapatanatanang so nakem da si Ama ta do to a mangay a omrakep so omraralay nimo a tao.”
15Maniring jya si Yeso am, “Mangay ka, ta ko nipamnekan si Sawlo a mahap so vazay ko a meylimwang no ngaran ko do beken a tao do Yotay a kano aro a panipanirsirngen, pacyangayan nyo a Isedi a tao. 16Ta pazimanen ko jya o karo no alalaw na do ipeyvazay na jyaken.”
17Am ori o nyangay na rana ni Ananiya. Somdep rana do vahay am paoptahen na o lima na do kataotao na ni Sawlo. Maniring am, “Mo kakteh, o mo nimacita do rarahan a Panirsirngen ta si Yeso am na nitovoy yaken a mai a tomazogaw nimo. Ta kakzeben na imo a makacita rana a italamozong no Seyzi.” 18Mamizing na ni Sawlo o ciring na am mina todakas do mata na o akmey isis no among. So nipakacita na rana. Am ori o nipeyvangon na rana kataktak da jya. 19So nipangakaday na rana a kowyat na rana no kataotao na.
Mangnanao si Sawlo do Tamaseke
Kadadayan na so araraw am amyan pa si Sawlo do Tamaseke a macihza jira do omraralay ni Yeso, 20a kangay na do aro a peyneynozyan a meylimwang ni Yeso a manoyong a Anak na ni Ama ta do to. 21Mamizing da no aro a tao am isavasavak da. Ori o nipancyan da nya do kadwan jira so, “Beken a oya asyo o nimapakakasi so omraralay ni Yeso a tao do Yelosaleng? O na nyai do jya am ala na littan sira a yavaoden a yangay na do panipanirsirngen no mapatanatanang so nakem da si Ama ta do to do Yelosaleng.”
22So ikatey mateneng na ni Sawlo a mangnanao a jyamogaw a macinekanekad jira a manci ni Yeso a Misayya. Am ori o ji da makatenngi jya pasapan no aro a tao do Yotay do Tamaseke.
23Kadadayan na do araraw am ipeysirsiring da o kazakat da si Sawlo no tao do Yotay. 24So ipangday da do maraw a kado mahep omavat ji Sawlo a zakaten no makowbot do ili. Am keyyan no tao a nimanci nya ji Sawlo. 25Am ori o nitontonan da sya no sinjya do mahep do rako a yala do likod no makarang a atoy no ili da kakaro na rana dang.
Meysinaoli si Sawlo do Yelosaleng
26Makaranes si Sawlo do Yelosaleng am naknakmen na o kapacikaop na do omraralay ni Yeso a tao. Am nikanyahey da, ta ji da anoyngi o kanoyong na rana omanoyong ji Yeso. 27Am kanisomidong na sya ni Parnapo a mangay tomita so nipamnekan ni Yeso a omlivolivon no ciriciring na a kapanci na nya jira so mina kapakacita na ni Sawlo si Yeso do rarahan a nisomirisiring sya a kapanci na pa nya jira so kaji na mogawan ni Sawlo a meylimwang ni Yeso do Tamaseke. 28Am ori o nikabwangan da rana ji Sawlo no nipamnekan ni Yeso a omlivolivon no ciriciring na. So ji na nimamogawi a meylimwang ni Yeso do Yelosaleng. 29No kanang am nimacisirsiring a kapacinekanekad na do tao do Yotay a meyzezyak so ciring da no tao do Sila. Am naknakmen da o kazakat da si Sawlo. 30Katenngan da no akma ney kakteh do cinai o akman sang a vazay am yangay da do Kaysadiya katovoy da sya mangay rana do meyngongyod a ili da do Tasose.
31No kanang rana am abo rana o ikalaw da no omraralay ni Yeso a tao do Yotay a kado Cyadidi a kado Samadiya. So nikakdeng da rana so nakem ji Yeso. Ta arako o nisidongan na sira no Seyzi. Am ori o nikaro no tao a omanoyong ji Yeso. So nikapiya no icicirawat da rana omahap so vazay na ni Ama ta do to.
Mapeyzokab a vazay ni Pite do Dita kado Yepey
32Si Pite rana am nilivolivon na o peycyeylilyan na angayan na tomazogaw no omraralay ni Yeso a tao. Makaranes do Dita am, 33macita na dang o asa ka tao a meyngaran si Aynayya. Iya rana am nimakasapa tao, mina kawao (8) a kawan a jya nimeyvavangon. 34Maniring jya si Pite am, “Mo Aynayya, peyvangon rana kahap so ireyrayan mo. Ta na rana nipeypapya imo ni Yeso Kizisto.” So nikapya na rana. 35Macita da ori no aro a tao a meyvahay do Dita kado Salon am anoyngan da rana si Yeso.
36Do Yepey rana ili da am amyan so asa ka mavakes a omraralay ni Yeso a meyngaran si Tapitay. O ngaran na do ciring no Sila am si Tocya. Peypeypangayan na am ibosbosan. Aro apiya vazay na, ta sidongen na sira o abo so nizpi a tao. 37Amyan si Pite do Dita am meyngen a kawakwak na rana ni Tapitay. Am ori o niryosan da sya kapangay da sya do kavava no vahay na. 38Manovoy sira so rarwa ka tao a mangay ji Pite, ta mamizing da si Pite amyan do Dita. Maniring sira am, “Makeykai ka mangay do ili namen.” 39So nipacihza da rana ji Pite a mangay do Dita. Makaranes sira am yangay da do kavava no vahay na ni Tapitay. So nikamimin da no vao a mavakes amlimot sya amlavi a mapacita no nitapang na ni Tapitay a ayob da no kapeyigegen na pa do karawan. 40Karahan am powboten na sira ni Pite a kapeylilitod na meynozi a somazap so kataotao na ni Tapitay. Maniring am, “Mo Tapitay, peyvangon rana.” Meyratateng am meyvezezeng o mata na a makacita si Pite kapeyvangon na rana amlisna. 41Am ori o nyalakan na so lima na ni Pite a patanken a kapanci na no aro a vao a mavakes a kano karwan da omraralay ni Yeso a somdep rana. So nipakacittan da rana si Tapitay a nimirwa a mavyay. 42O akman rana sang a vazay am nimamizing da rana no tao do Yepey. Ori o nipeyparo da rana no tao a omanoyong ji Yeso do Yepey. 43Si Pite rana am todavezed do dang a macivahay ji Simong. O vazay ni Simong am mapakapkapya so nihab da kolit no baka.
अहिले सेलेक्ट गरिएको:
Nimlivolivon 9: snt
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
The Bible Society in Taiwan
