Matááyo 7
7
Hol ˈdeensen hayyíe
1Yíésu geđi gáál geey, kieye, Haí hol ˈdeđénsen, itín Waag hí ˈdéénsen. 2Har hí gálaat ˈdeđenseteka, Waag úba hát tikiˈde kinaallá haí ˈdeđensete. Hé hí he ki ekemeycho-, hí gálaat he ki fafiyyoká, in úba Waag hí he kí fafiyya. 3Kúún háteka fiilit ninni-, nyárkú il ˈjiiyyeká argiyyo-, kor đúúrích guđo-, ko il gaa ijóól hol ma ki arginyal? 4Tá kúún háteka nyárkú geđicho-, kieye, Bá mosh, fiilit ninni-, ko il ˈjiiyyééllá ko il gáá ee, mú chegedho-, kor đúúrích ko il gaa ijóól ma arginyal? 5Kó ˈdeent gálaat argiyyo-, kor ˈdeentkú ma arginyal! Erkob đúúrích ko il gaa ijóóllá hol il gáá éeb. Hát kinaallá ˈdiiyyeka, in biiy hát ˈdabaanká gaa argiyya, fiilit ninni-, nyárkú il ˈjiiyyéétíá úba mú il gaa egeyye.
6Haí hé ˈdúwa-, Waag hí léká chier shíiny, chier hí hol ˈdu gáá náan, hí ˈdániny. Haí bier ˈduuˈdúwaká golchom ˈgas met ki okodîny, bier golchom hí ˈdú ˈdídhminy.
Waag roogonóo, he haí aargiˈda
7Aaléka, Waag he roogonóo, Waag he haí shigicha. Waag ˈdú kiritíe, it Waag he ma gaa ˈdaabiny. ˈBíl af ˈdóo, Waag ˈbíl af haí kí fuuˈda. 8Máá Waag he ruogonoká he hai aargira. Máá Waag ˈdú ˈdootká hé Waag he ma gaa ˈdaabiny. Máá ˈbíl af ˈduoká, Waag ˈbíl af haí ki fuuˈda.
9Itín mááya veelle hí kúlmaat ruogoneka, véel wáár shigia? 10Muuninyka, veel hí beech heeteka, véel chár shigia? 11Har káána úba hí gál ˈdeđewká kátaka, it umkícho hé ˈdabaan-, hí shigichoká óg. Tá ˈJaa kíchia úr ijoká gál hí rogononká, he ˈdaab máre shigia? 12Hát lullé midhab-, gálaat hí ki ekemeyo-, hí feˈdoká, itín úba hát tikiˈde kinaallá gálaat ki eekemeyyíe. Hééllá he hemuumurit Waag hí Móshe ka shiicheká ubaa ˈdeem gál Waag hí ˈdeem ka shigicheká héllé.
Káraf gaa chálká ubaa kár af gaa guđoká
13Káráf gaa chálká nadhíe. Káráf gaa guđoká ubaa ˈgíéríchlé gooróká íín ál manyjanyiet-, biiyoká he mé nannaa. Gál káraf gaa guđo kinaal nannaatká íín hé burnayká. 14Tá káraf gaa chálká ubaa ˈgíéríchlé gaa chálká íín ál luolmiti-, biiyoká he mé nannaa. Gál káraf gaa chálallá nannaatká hé iraam mánká.
ˈGór saanollé gaalí ki kiimita
15Gál hol gál Waag hí ˈdeem ka shigichoká ka hođuo-, hođomlééllá hol ˈdeeˈdemíe. Gál kinaallá ke dhaayka, wála ke yeedhe, kor íín he đányár ˈdeewká. 16Gáál saanolle haí ki kiimisata. Tá gálaat hé saano kinnach ubaa saano vinna ˈgór híí ˈguoká gáá babáat? Híʼi, hé hát kinaallá muuniny. 17ˈGór midhabká saano midhabká hí gáá higisa. ˈGór ˈdeewká íín saano ˈdeewká hí gáá higisa. 18Hát tikiˈdééllá ˈgór midhabká hé saano ˈdeewká hí ma gáá higisiny. Héétí ˈgór ˈdeewká hé saano midhabká hí ma gáá higisiny. 19ˈGór saano midhabká hí ma gáá higisinyká ali ha gaalí gaa muura, ˈjiet ha gaalí gaa verene. 20Aaléka, itín úba gálaat saanolle haí ki kiimisata.
21Gál ye Máá Guđo, Máá Guđo, yegetká ˈbaal hé Guch Uratiká ma higiliny, gál hí higiloká he gál hát ˈJaa chia úr ijoká hí fedoká el gaa igiroká. 22Kúlích gálaat ˈdéé ki iđinyle ali kí ˈdeenká gál ilishká hai ye geđia, kieye, Máá Guđo, Máá Guđo, ˈdaa meenykúka nyáá nyí fayamkú gálaat ki ˈdiiyeenneká, muunîny? Héétí ˈdaa meenykúka nyáá nyí gálaat aryáán yiem gaa ˈdeeyche-, nyí hé burnay-, gálaat hí af ˈdaˈdaboká ˈdaa meenykú ki eekemeycheká, muunîny? hai ye yeedhe. 23Tá yú gáál il mé ha geđia, It halúg hé Waag hí ma fedinyká gaa seseennééllo! Yú yáá hí muog, ye met gaa sedhíe! ha yú gáál yeedhe.
Máá ˈdaalléká ubaa máá gáf ˈguoká énylé he ˈdisseká
24Aaléka, máá ˈdeeny chiallá maalo-, ˈdéé el gaa igiroká hát máá ˈdaallé-, ˈbílle tiirt waar ˈgayyoká ˈdug gaa ˈdisseká. 25Aalé ir tune, ir he tuneká hele fame, wááních fargogoká ká kiite, ˈbíl kinaal ˈjie, tá ˈdaa giri ˈbíl muí tiirt waar ˈgayyoká ˈdug gaa ˈdisseká ˈbil hé les ma ˈdôny. 26Tá máá ˈdeeny chiallá maalo-, kor ˈdéé el ma gaa igirinyká he hát máá gáf ˈguo-, ˈbílle yuoch gaa ˈdisseká. 27Aalé ir tune, ir he tuneká hele fame, wááních fargogoká ká kiite, ˈbíl kinaal ˈjie, tá ˈdaa giri ˈbíl muí yuoch gaa ˈdisseká, ˈbil đo ˈgieˈgey, le ˈdoy, Yíésu hí gáál yie.
28Aalé Yíésu ˈdeenyééllá lulle ˈdiiyiminyle beeteká, nyesebich mú he onisinylééllá af ˈdabe. 29Hééllá he ˈdaa giri mú he onisinyle he onisiny máá kansím ˈguoká ka taal-, he onisiny gálle gálaat nyatalaam oonisuoká ma ka taalinyká.
अहिले सेलेक्ट गरिएको:
Matááyo 7: dsh
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Bible Translation and Literacy
