Yuána 9
9
Yíésu máá in mannayká in kaay
1Aaléka, Yíésu sienylé he gaa igireká, máá in mánt kí ˈdalidheká arge. 2Yíésu lalille hí heete, gaal kieye, Máá gáál he oonisúóllo, máállá in mánt kí ˈdalidhééllá ííni ađaabano híléê, ebá gál hí ˈdaleká ađaabano hile, mú in mánt kí ˈdale? gaalí yie. 3Yíésu gáál geey, kieye, Máállá hatallá ka ˈdalidhééllá, hé kieye, mu íín ubaa gál hí ˈdaleká ađaabano hile muuniny. Hééllá he ˈdaa giri Waag fargogintle mú hujich gaa nanniyyo-, gálaat hí aargiroká. 4Biiy hátlé kulichká taalle Máá ye ali gáá kaayká kí hújíchle naannuo. Chúúré gálaat hí hujich ma gaa nanninyká ali hai kí ˈdeenne. 5ˈDaab yú lésallá gaa ijóóllá yú he les édhúmlé, Yíésu hí gáál yie.
6Aalé mu hatal yieká, đo abarany les ki lay, abarany eeˈd hol ki ˈdaaˈdie, sháˈd hoy, máá giri in mánká in gaa liilie, 7mú geey, kieye, Sí, naˈbual Siloom in gaa ˈjío, yie. (Síloom hélle kieye, Ali gaa kaany.) Aalé máá giriká sedhe, ˈjidhdhe, gagalóóllá hé biiy gaa argoká.
8Mú olle ubaa gál urgúaka mu rogonmeká mú aargireká hol yiete, kieye, Hééllá hé máá tikiˈde-, les ije-, rogonmeká muunîny? hol yie. 9Gáál ˈdáá tikiˈd kieye, He mu ííni, yie. Gáál ˈbaal kieye, Hé mu íín muuniny, mu taalle mú hollo hol ki egínta, yie. Máá giriká dhúrle kieye, Yú he máá kinaallá, yie. 10Gaal mú yiete, kieye, Tá háteeye in kaate? gaalí mú yie. 11Mu gáál geey, kieye, Máá gaalí Yíésu yegetká sháˈd tág koy, ye sháˈd in gaa liilie, kieye, Sí, naˈbual Siloom in gaa ˈjío, ye yie, in yú đo sedhe, ˈjidhdheká đo biiy gaa arge, muí gáál yie. 12Gaal mú yiete, kieye, Mu káána ále gaa ija? yie. Aalé mu kieye, Mu ál gaa ijoká yáá muog, yie.
13Aalé gaal máá biiy gaa arge kinaal gál Farisaay ˈdú eedhdhe. 14Kúlích giri Yíésu hí sháˈd tág gaa koy-, mú in yé ka ˈdeeyká he Kúlích Hef ˈGisanká. 15Aalé gál Farisaay mu hátlé biiy gaa argeká úba mú yiete. Máá giriká kieye, Mu sháˈdo ye in gaa liilie, aalé yú ˈjidhdheká đo káána biiy gaa arga hállá, yie. 16Gál Farisaay ˈbáál kieye, Máállá ˈdaa giri Kúlích Hef ˈGisanká nyátálle ma ki yaalinyká, hé gon Waag ma gáá yímen, yie. Gáál ˈbaal hí kieye, Mu har máá ađááb ˈguoká kátaka, mu háteeye hé gálaat af ˈdaˈdabsúóllá ekemeye? yie. Gaal đo hol af ká điidhe, eiy ˈgite.
17Gaal geđi máá biiy gaa argeká yiete, kieye, Mu in ko in yé ká ˈdeey háluke, kó mú héllé nyí ká geđichoká mán? gaalí mú yie. Mu gáál ˈdéé hol ˈdú nie, kieye, Mu he máá Waag hí ˈdeem ká shigichoká, yie.
18Gál Yuuˈdi kinaal hát mu kis in mannay-, tá káána in kaadhdheká hé hátle hí mé ma ki síen, gaal đo gál mú ˈdaloká gálaat ali ˈdú fie. 19Aalé gaal gál mú ˈdaleká yiete, kieye, Hééllá iny kíchia-, hí hogote-, in mánt kí ˈdalidheká? Tá mu háteeye biiy gaa arge? gaalí gáál yie. 20Gál mú ˈdaloká gáál ˈdéé hol ˈdú nie, kieye, Máállá hát he inykínyo-, tá in mánt kí ˈdalidheká nyáá nyí óg. 21Tá mú biiy gaa arginyle ubaa máá mú in eiy ˈdeeyká nyáá nyí muog. Mu íín hé guđo, yietíe, hí ká geeyo, gál mú ˈdaloká hí gáál yie. 22Gál mú ˈdaloká hatallá yíéllá, gaal gál guguđo-, Yuuˈdiká he kiadhe. Hééllá he ˈdaa giri gál Yuuˈdi kis ˈdéé muˈde-, kieye, Máá kieye, Yíésu he Messíya,#9:22 Af Heberewka Kirísto he Messíya. Messíya hélle kieye, Máá Waag hí salab mé ki liiyye-, Waag hí kansím koyyeká. yeetká, ˈbíl ˈdiiyiminyká ha gaalí gaa aruma, yieká. 23ˈDaa kinaallá ˈdugaka in gál mú ˈdaloká kieye, Mu hé guđo, mú itle hí yietíe, gáál yie.
24Aalé gaal geđi máá biiy gaa argeká ká vie, geey, kieye, Ebá Waag ˈdúo, hé ˈdúwaká húógot. Nyiin íín máá kinaallá hát ađaabano ˈguoká nyáá nyí óg, gaalí mú yie. 25Aalé máá giriká kieye, Mu ađaabano ˈgaakaʼ, mánkaʼ, yáá muog. Tá hé yú ógká íín tikiˈde, yú érléká yáá in mannay, kor káána yáá biiy gaa arge, gáál yie. 26Gaal đo kieye, Mu meete ko ki ekey? Mu háteeye ko in yé ká ˈdeey? gaalí mú yie. 27Aalé mu kieye, Yáá hí kis geey, kor it ye af nee ma kôny. Tá háteka geđi hí mamalloká hí feˈdéel? Itín úba hí mú lalille chegetoká hí féˈde? yie.
28Aalé gaal đo mú chaarim ˈdú mure, kor kieye, Kúúni mú máá lalillé. Nyiin íín, nyí lali Moshe. 29Móshe hát Waag hol geđieká nyáá nyí óg, tá máállá ál he gáá yimieká nyáá nyí muog, gaalí mú yie. 30Máá giriká kieye, Hééllá he hé ki af ˈdaˈdaboká! It ál muí gáá yimieká muog, kor mu hé ye in yé ká ˈdeey. 31Waag hát gál ađaabano ˈguoká af nee ma kokonyká hé ki óg. Waag máá hí kikiat-, Waag hát feˈdoká el gaa igiroká he af nee kokoyyo. 32Máá in mánt kí ˈdalidhe-, kor gaalí in kaayká hé kálta máá hí maaleká mán. 33Máállá Waag ma gáá yimenka, hé onnônyka hééllá ma ekemêny, muí gáál yie. 34Gál guguđo Yuuˈdiká hatal muí yieká kieye, Kúún in ađaabano guđoká kí ˈdalaate háluke, tá har nyí ki ˈdiyeenne! gaalí mú yie. Gaal đo mú ˈbíl ˈdiiyiminyká gaa arie.
In mant gálle Waag ˈduuwle ma kiimisanká
35Aalé Yíésu máá in kaayká hát gaalí ˈbíl ˈdiiyiminyká gaa arieká maale. Yíésu mú bííyle mé nie, mú yiete, kieye, Kó Iny Máádhat iiy chie? yie. 36Aalé mu kieye, Máá Guđo, máá kinaallá mááya? Mú ye ka géesh, mú iiy yeedhe, yie. 37Yíésu mú geey, kieye, Kó mú argiyyo, mu he Máá hí hol geđicháállá, yie. 38Aalé máá giriká kieye, Máá Guđo, yáá ko iiy yie, yie, đo mú ˈgas met les kurram gaa ˈdoy.
39Aaléka, Yíésu kieye, Yú gálaat ˈdéé eiy ki ními ˈdaalle ˈdugaka in lésallá ká yimie, giri gál in mánká in hí yiem ká ˈdeˈdeen-, gál in ˈguoká in ˈdaˈdaboká, yie. 40Gál Farisaay Yíésu hol ˈgieká ˈbaal ˈdeenyéél Yíésu hí hodhe-, maaleká kieye, Héél kor háteeye? Nyiin úba inno nyí maníta? mú yie. 41Yíésu kieye, Itín hí in mannânyka it onnônyka ađááb mán, kor káána hí kieye, Nyáá nyí biiy gaa argiyya, hí chegedhe háluke, ađaabanokícho hé itle hí gaa iđo, Yíésu hí gáál yie.
अहिले सेलेक्ट गरिएको:
Yuána 9: dsh
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Bible Translation and Literacy
