Yuána 3
3
Nikoˈdémos ubaa Yíésu hol gééychollé
1Ál kinaallá hé máá Farisaay-,#3:1 Gál Yisirayel tikiˈdééllá in gaalí gál Heberew ubaa gál Yuuˈdi yegedhe. Gálallá hé tág nyátál hí burnayye. Gál Farisaay he gál bár kinaalka, nyátál Yuuˈdi ki ˈgađameká. gál Yuuˈdi-, gállé arra-, máállé gaalí Nikoˈdémos yegieká hé hí gaa ije. 2Mu chúúre tikiˈd Yíésu ˈdu gáá yimie, kieye, Máá gáál he oonisúóllo, kuun hát Waag gáá chimie-, gálaat he oonisichoká, nyáá nyí óg. Hé máá níínní Waag hí gaa líítaka, hé ke af ˈdaˈdabo-, kuun hí ekemeychóóllá ekemeyoká mán, yie. 3Aalé Yíésu mú ˈdéé hol ˈdú nie, kieye, Yú ko ˈdúúw geeye, máádhat ˈdaab geđi ma ka ˈdaláanká hé hát níínní Guch Waaˈgiet aargiroká mán, yie. 4Aalé Nikoˈdémos mú yiete, kieye, Máá guđandheká háteeye geđi kí ˈdalmidha? Máádhat hé hát níínní ˈjielle geer higilo-, tá geđi kí ˈdalmaatká mán, yie. 5Yíésu mú ˈdéé hol ˈdú nie, kieye, Yú ko hé ˈdúwaká geeye, máádhat ˈdaab bie ubaa Hím Naasan Waaˈgiet ma kí ˈdaláanká hé hát níínní Guch Waaˈgiet higiloká mán. 6Máádhat íín máádháto hí ˈdale. Máá veel Waaˈgiet yieká íín Hím Naasan Waaˈgieto hí ˈdalle. 7Aaléka, hát yú ko geey-, yú kieye, geđi kí ˈdalidhíe, yú ko yíéllá, ha af ˈdábiny. 8Waanich állé fedoká he ˈdú ˈdarama, ka ˈdaraanká kó maallo, kor ál he gáá ˈdoyká ubaa ál mé nannuoká kó muog. Hát tikiˈdééllá in kuun máádhat hát Hím Naasan Waaˈgiet kí ˈdalmaatká muog, Yíésu hí mú yie.
9Aalé Nikoˈdémos mú yiete, kieye, Héél kor háteeye? yie. 10Yíésu mú ˈdéé hol ˈdú nie, kieye, Kuun in máá gál Yisirayel he oonisuoká háluke, tá háteeye héél eiy ma nannasan? 11Yú ko ˈdúúw geeye, nyiin hé nyí ógká in nyí hogoto, hé nyí ˈdúúw ˈdú ˈdiiyyeká in fayamle ki hí geđia, kor it hé ki hí geđuoká iiy ma chegen. 12Yaalmit lesalloká yú hí geeyká in hí iiy má cheen háluke, tá háteeye, yaalmit uriet-, yú hí ka geđuoká hí iiy chegedhe? 13Hé máá níínní úr mé nieká mán, Máá úr gáá leedheká tákáma. Máá kinaallá he Iny Máádhát. 14Hát tikiˈde Móshe gibit chár tág gaa nieká ˈgór ˈdú ˈdoy-, ˈbakat álle úr ki eeyká, in Iny Máádhat úba gaalí hát kinaal úr ki egee, 15giri ameeny gál mú iiy yeetká luolmit biiyoká aargiroká, Yíésu hí Nikoˈdémos yie.
16ˈDaa giri Waag gálaat lullé les gaa ijoká súm gielká in gáál Inylé ali ka takachká ká shiiche. Máá Íny iiy yeetká sídhle hé ma baađany, taalle luolmit biiyoká hai gaa yíéđima. 17Waag Inyle ali gáá kaayyééllá hé gálaat ˈdeđensetoká ma ka múriny, Íny ˈdaalle gálaat rubach ki shigichoká he feˈde. 18Máá Íny iiy yeetká hé Waag hí ma ˈdeđensen, tá máá Íny iiy ma yéenká hé hátle Waag hí ˈdeđenseto, ˈdaa giri mu Waag Inylé ali ka takachká iiy ma yéenká. 19Waag gálaat ˈdeensenle hé igiˈdoká hééllá: Waag édhúmlé ˈdúwaká íín hé les ká hile, kor ˈdaa giri gálaat héllé ekemeyoká lúl gaa nyakarichká, gaal hé édhum ma géélnen, gaal bííy gaa ongʼoˈdeká he geelney. 20Máá hé ˈdeđewká gaa seseenká hé édhum néb, hé édhum álle yé ma kí ˈdeˈdeminy. Hééllá he ˈdaa giri mu héllé ˈdeđew-, he ekemeyoká ka eedhdhewká ma fedinyká. 21Tá máá hé ˈdúwaká el gaa igiroká in édhum álle yé ˈdú ˈdeˈdeme, giri héllé eekemeyká ˈduuwle hát ˈdaa Waaˈgiet ki ekeyká gálaat hí kiimisatká.
Yuána fayam Yiesu gálaat geey
22Hééllá lulle el ˈdaal Yíésu ubaa lalille kie, lés Yuuˈdia geerlé kinaallá ˈjienlé mare ki fame, ál kinaal ram ki kaadhdhe, gálaat bie gim naannie. 23Yuána íín ál gaalí Áíynon yeget-, Sálim kí ˈjób-, bie hí burnay mare he gálaat bie gim gaa nannie. Aalé gálaat Yuána ˈdú seeseme, muí bie gim naannie. 24Af kinaallá Yuána hátle hé máá hí hiigidheká mán. 25Aalé Yuána lalille ˈbaal ubaa máá Yuuˈdi mare hol ki fáláám dhiiritiká hí yé gáá ˈdiiyye, 26gaal đo Yuána hol ˈdú eedhdhe, mú geey, kieye, Máá gáál he oonisúóllo, máá giri hí hol wár Yorˈdan in ˈdaatí hol gaa ˈgayye-, fayamle kuuní gálaat shigicheká, gálaat lulle hí ˈdú seeseme, gáál bie gim nannáat! gaalí mú yie.
27Aaléka Yuána gáál ˈdéé hol ˈdú nie, kieye, Máádhat hé hé ˈguoká mán, ˈdaab Waag hí he úr ma gáá shíinyká. 28Itín dhúrkícho hát yú gálaat geey-, yú kieye, Yú yáá Messíya#3:28 Af Heberewka Kirísto he Messíya. Messíya hélle kieye, Máá Waag hí salab mé ki liiyye-, Waag hí kansím koyyeká. muuniny, Waago ye máá kinaallá met ká niiyye, yú yieká, it óg. 29Máádhat ini egeetka, shééléchlé hí met egesse, hí af nee kokodhdho. Máá egeetká shééléchle hí af maaleka, shééléchle đo geer súm haí gaa meedhe. Yú úba yáá tág geer ye gaa meedhe. 30Messíya mee hí ˈdeernet-, yú mee ye gaanatká kalat, Yuána hí yie.
31Máá úr gáá yimieká he lullé met ija. Máá lesalloká he máá lesallá, ˈdéé hótle ˈdaa lesieto ki taalla. Máá Waag gáá yimieká íín he lullé met ija. 32Máá kinaallá hé argeká ubaa hé maaleká ˈduuwlé he hogodho, kor mu hé ˈdúwa hogodhoká hé máá hí iiy yegetká mán. 33Tá máá mú ˈdeenyle iiy yieká Waag ˈduuwlé gálaat argisie. 34Máá Waag hí ali gáá kaayyeká ˈdeeny Waaˈgieto ˈdiyime. Waag Hím Naasanle hé mú ˈdú ookodmiche. 35Íny hé ˈJaallé Waag hí geelnedhe, ˈJaalle hí he met lulle gíl geer fie. 36Máá Íny iiy yeetká taalle luolmit biiyoká hai gaa yíéđima, tá máá Íny điidhoká hé idho Waaˈgiet hí ˈdú iđo, mu hé luolmít ma aargiriny.
अहिले सेलेक्ट गरिएको:
Yuána 3: dsh
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Bible Translation and Literacy
