Yuána 15
15
ˈGór ˈdúwaká ubaa kolmlé
1Aalé Yíésu kieye, Yú he ˈgór ˈdúwaká. ˈJaachú he máá ˈguor ootoloká. 2Mu kolm ye ki ˈgie-, saano hí ma gaa higisinyká ali hai gaa muura, kolm saano hí gaa higissoká íín in hollo hol ki nannaa, giri saano hí hát ˈdabaanká gaa higissoká. 3Itín ˈdeeny chia yú hí geeyká ˈdaalleka, it káána kolm ye ki ˈgie-, ˈJaachú hí in hol ki nannuoká chie. 4Ye gaa yíéđía, yú hí gaa yíéđia. Kolmit hé tákámle ma higisiny, ˈgórle ki taalka, in higita. Itín hí ye ma ki ˈgiinyka, it ma higisiny.
5Yú he ˈgór, itín hí kolmo. Máá ye gaa yíéđuo-, yú gaa yíéđuoká, súmmo higissa. Itín hí ye gaa líítaka, it hé níínní hí uˈdaká mán. 6Máá ye ma gaa iđinyká, he hát kolmit gaalí lay-, gogoyyeká. Kolm hatallóóllá hollo gaalí hol ˈdú shuguna, ˈjiet ha gaalí ki lalama, hai ˈdunnuma. 7Har hí ye gaa iđa-, ˈdeenychú hí gaa ijoka, hé hí feˈdeká heetíe, haí aargiˈda. 8Itin saano burnayká hí gáá higisso-, hí lalichú ká iđaka, hé kinaallá in ˈJaachú ˈdúúw shigia.
9Gielmit ˈJaachú hí ye ká ˈguoká in yú hí ká ˈgaa. Gielmit chiallá gaa yíéđía. 10Hát yú hemuumurit ˈJaachú ki yaal-, mú gielmitle gaa ijóóllá, itín har hí hemuumuritchú ki taalka, gielmitchú haí gaa yíéđianna. 11Yáá hí hééllá geey, giri geer gaa meenchú hí gaa yíéđianno-, geer gaa meenkícho ˈduuwayoká. 12Hemuritchú hééllá: Hát yú hí gielallá itín úba hol geelnedhíe. 13Gielmit máálle sídhle sheelle ˈdú sillieká, hé gielmit níínní guđo-, hí a mé iđoká mán. 14Hé yú hí ki mureká ˈgíéríchle hí naateka, itín hí sheelchú. 15Yáá geđi hí géde ma yegen, ˈdaa giri gedech máállé hí hoteká héllé ekemeyoká muogká. Yáá káána hí sheelchú yie, ˈdaa giri he lullé yú ˈJaachú gaa maaleká, yú hí geeyká. 16Itín it ye ma ka éeny, yaa hí ká shuune, hí hujichaam met ki kuokoy, giri hí seseenne-, saano hí gáá higisso-, saano kinaal bííyyo ali ijo-, hé hí ˈdaa meenychú ˈJaachú ki hegesetoká muí ká shiguoká. 17Hé yú hí kí mureká hééllá: Hol geelnedhíe, Yíésu hí gáál yie.
Gál gál lesallo muuninyká hát gálaat hí nébká
18Aalé Yíésu geđi kieye, Har les gálle hí nebítaka, hát erkob ye nebedheká onnóo. 19Itín hí lésallá gálle kátaka, les hát hí léká gálle onnônyka hé hí giel. Itín ˈdaa giri hí gál lesalloká muuniny-, yú hí waaˈde-, hí lésallá gíl sug ki haycheká in les gálle hí neb.
20ˈDeeny yú hí geeyká táb ˈdodhdhíe, giri yú kieye, Gedech hé máállé hí hoteká ma ˈdú ˈduwanany, yú yieká. Gáál ˈbáál hé ye manyjasie, gaal itín úba haí maanyjasia. Gáál ˈbáál hé he onisinychú chiˈde, gaal he onisinykícho úba hai chiiˈda. 21ˈDaa giri itín hí gálchú-, ubaa Máá ye ali gáá kaayká gaalí muogká, in gaalí hatallá maanyjasia. 22Yú onnônyka ma ká yimen-, gáál ma geenyka, gaal hé onnônyka ađaabano mán. Tá káánaka, gaal hé hát níínní ađaabano gaa faalanká mán. 23Máá ye nébká hé ˈJaachú úba néb. 24Yú onnônyka hé gálaat af ˈdaˈdabsuo-, máádhat hí ma ekemenyká gáál hurt ma gaa eekemenyka, gaal hé onnônyka ađaabano mán. Tá káána gaal hé hé kinaallá arge, kor hé yú ubaa ˈJaachú nyí hol ˈgar nebedhe. 25Tá hééllá hé gaalí Warˈgat Waaˈgiet gaa veere-, giri kieye, Gaal hállééllá ye nebedhe, chieká, he ˈduwasie. #15:25 Warˈgat Arram 69:4
26Máá hí rangʼite-, ˈJaachú gáá yiimetká ali ha yú hí ˈdu gáá kakaa. Máá kinaallá he Hím Naasan ˈJaachú yé gáá ˈdeˈdeen-, hí ˈduuw Waaˈgiet af ki tatuoká. Hím Naasan kinaallá in hí ˈduuwchú geđia. 27Aalé ˈdaa giri kíssóótí ke hol ˈgie-, káána đigallá itín úba ˈduuwchú gálaat haí geđicha.
अहिले सेलेक्ट गरिएको:
Yuána 15: dsh
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Bible Translation and Literacy
