Yuána 13
13
Yíésu lalille ˈgas ˈjie
1Aalé ˈjila máá ˈgasso-, urru-, Waaˈgietká hí gáál ˈdug gaa nadheká ka tirtirayyeká, Yíésu aleđuđugulle hát ali kí ˈdiiyye-, lésallá haađuo-, bííy ˈJaalle mé nannuoká hé onnoy. Mu hát gállé lesallo-, hí iiy yieká gielká in gielmit kinaallá taalle muí gáál ká ˈgie, muí gáál aargisie.
2Aalé Yíésu ubaa lalille hátlé gólól gelgaká gaa ijeká, Yúúˈdas Iskáryot giri iny Simonká af kinaallá meeny gíri Sátan hí he mé gaa kaayye, giri gál Yíésu oosle ˈguoká Yíésu ˈdu gáá egewká. 3Yíésu hát ˈJaalle hí he met lulle gíl geer fie-, íín Waag gáá yimie-, kor Waag hol ˈdú nannaatká hé onnoy. 4Aalé gaal hátlé gólol gíl ka ˈgieká Yíésu les gaa kie, đafarlé biiy ˈdugoká fure, đafar bie shugudsanká seet hite. 5Aalé mu ˈdaat ˈjianká bie fadhdhe, lalille ˈgas ˈjiiˈjie, đafar bie shugudsan-, he seet hiteká gáál ˈgas ki shugudie.
6Aalé mu Símon Bétiro mé đig ka yieká, Símon Bétiro kieye, Máá Guđo, kúún ˈgasso ye ˈjiˈjiyya? yie. 7Yíésu mú ˈdéé hol ˈdú nie, kieye, Kuun hé yú ekemeyóóllá kó káána eiy ma náásan, kor aadh eiy, eiy ha naasata, mú yie. 8Aalé Bétiro mú geey, kieye, Hash! Kúún gon kó ye ˈgas ma ˈjiˈjiny, yie. Yíésu mú ˈdéé hol ˈdú nie, kieye, Har yú ko ˈgas ma ˈjiˈjinyka, af kinaalka hé níínní ke hol ka ˈguoká mán, Yíésu hí mú yie. 9Aalé Símon Bétiro kieye, Máá Guđo, af kinaalka hai ˈgas tákámle onnôny, ye gil ubaa mé úba ˈjig, yie. 10Yíésu mú ˈdéé hol ˈdú nie, kieye, Máádhat ˈjidhdheka, waaséél ˈgas tákáma hol ˈdú naadha, ˈjiˈjia, ˈdaa giri gónnatí lulle saaloká. Kuun kó saalnate, kor it lulkícho ma saalnany, Yíésu hí Bétiro yie. 11Kor it lulkícho ma saalnany, muí yíéllá, he ˈdaa giri mu máá ađááb ˈguo-, gál mú oosle ˈguoká mú ˈdu gáá egewká onnoyká.
12Aalé mu gáál ˈgas ˈjím hí gaa đuyyeká mu đafarlé biiy ˈdugoká eedhdhe, kaadhdhe, állé ijeká hol ˈdú nadhe, gáál yiete, kieye, It hé yú hí ki ekeyallá eiy naasate? 13Itín Máá gáál he oonisuoká ubaa Máá Guđo, hí ye chegedhééllá, hé kinaallá taglé. Yú he máá kinaallá. 14Aalé ˈdaa giri yáá Máá kíchia Guđóól ubaa Máá kíchia hí he oonisúól hí ˈgas ˈjieká, itín úba hol ˈgas ˈjiiˈjía. 15Yáá hí yaalmít ká argisie, giri hé yú hí ki ekeyallá úba hí hol ki ekemeychoká. 16Yú hí hé ˈdúwaká geeye, gedech hé máállé hí hoteká ma ˈdú ˈduwanany, héétí máá ˈgassoká hé máállé hí ali gaa kakawká ma ˈdú ˈduwanany. 17Aalé hééllá hí óíyta-, hí ekemeychoka, Waag haí ˈdú ˈgunnuanna.
18Yáá lulkícho ˈdeenykícho ma hogon. Gál yú waaˈdeká yáá tág eiy óg. Tá hééllá hé Warˈgat Waaˈgiet hí hote-, giri kieye, Máá nyí ˈdaat tikiˈd hol ˈgar kokonyóóllá he mé ilchú,#13:18 Warˈgat Arram 41:9 chieká, đusinylé. 19Hééllá hátlé ali ma kí ˈdíinyká yú hí geđia, giri he ali kí ˈdieka, Yú hát he Yúká, iiy haí cheedhe. 20Yú hí hé ˈdúwaká geeye, máá yú ali gáá kaawká máá hí ˈdeenyle iiy yeetká yaa ye iiy yie, tá máá ye iiy yeetká Máá ye ali gáá kaayká he iiy yie, Yíésu hí gáál yie.
Yíésu máá hí gál hí oosle ˈguoká ˈdu gáá egewká ˈdeenyle huogodhe
21Yíésu hatal yieká geer hí súm gaa ˈdeenedhe, gáál geey, kieye, Yú hí hé ˈdúwaká geeye, itín mú tikiˈd gál ye oos ˈguoká gíl geer hai ye gaa kakaa, yie. 22Aalé mú lalille hol ki fuˈjiyye, hol il gaa niiyye, máá muí ˈdeenyle hogodhóól hát kor mááyaká tawuyye. 23Gál lálííllá máá Yíésu hí giel mare íín Yíésu he túmus ki koy. 24Aalé Símon Bétiro máá kinaal af ki helie, kieye, Ebá mú ka yíéso, he kor mááya? yie. 25Aalé máá kinaal Yíésu af ˈbóíy ˈdú nie, kieye, Máá Guđo, hé kinaal mááya? yie. 26Yíésu mú ˈdéé hol ˈdú nie, kieye, He máá balasháállá yú shúón ˈgidhieka yú shiguoká, muí yie. Aalé mu balashá shúón ˈgidhieká, balashá Yúúˈdas Iskáryot giri iny Simonká shie.
27Yúúˈdas tikiˈde balashá af gaa kakaatallá đo Sátan hí hille. Yíésu Yúúˈdas geey, kieye, Hé kua ekemeychoká đo káánallá ékesh, yie. 28Kor gál gólól kinaal álle gaa ijeká hé Yíésu hí Yúúˈdas hatallá ˈdú yieká hé muog. 29ˈDaa giri Yúúˈdas shomodhe bireká hí gíl geer gaa iđeká, gáál ˈbaal tawunyleka, Yíésu mú hé mákárta-, ˈjilaká ka yío, muuninyka, bíre ˈbaal gál he maamanká shíísho, he mú yie, he yegie. 30Yúúˈdas tikiˈde balashá hí gaa bebeyyóóllá đo yíé ˈdie. Af kinaallá biiy hé chuurayyeká.
Yíésu Bétiro hát hí gaa faalanká hodhe
31Aalé Yúúˈdas sedheká Yíésu kieye, Iny Máádhat káána hai ˈduuwaa, Waag íín mú hai ki ˈduuwaya. 32Waag mú ki ˈduwayyeka, af kinaalka Waag íín đo ál ˈjob mú hollo hol ki ˈduuwaycha. 33Ummo, yú aadh ˈgas ninniká tákáma ke hol af ija. Hát giri yú gál Yuuˈdi geeyká in yú hí geđia, itín úba hollo hí ye hol gaa ˈgeˈgete. Tá ál yú mé nannuoká it ál níínní hí kí ˈdiiyyaká mán. 34Yáá hí hemurit kaanaká kí mure, hol geelnedhíe. Hát káána yú hí gielallá, itín úba hol geelnedhíe. 35Itín hí hol geelneteka, hát kinaallá in gálaat lulle hát itín hí lalichúká kiimita, Yíésu hí lalille yie.
36Aalé Símon Bétiro Yíésu yiete, kieye, Máá Guđo, ále seseenne? yie. Yíésu kieye, Ál yú seseenká kó káánallá ál ye el kí veeˈdoká mán, aadh éíyyo ye el gáá verenne, yie. 37Bétiro mú yiete, kieye, Máá Guđo, háteka káánallá yú ko el ma gáá vereninyal? Yú gon ha ko ˈdú kufuma, muí Yíésu yie. 38Aalé Yíésu ˈdéé hol nie, kieye, Kó kín ye ˈdú kufunân? Yú ko hé ˈdúwaká geeye, kúún lúg hátlé ma ˈdânyká a seđe ye gaa faalanna! Yíésu hí Bétiro yie.
अहिले सेलेक्ट गरिएको:
Yuána 13: dsh
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Bible Translation and Literacy
