Yuána 11
11
Kúfách Lasaaro
1Aalé máá eny Bedhene-, gaalí Lasááro yegetká kulnadhe. Mú ényle he ény mú nyaaramlé María ubaa Márta hí léká. 2María halúg nyárlé Lasááro kúlláállá, he María giri Máá Guđoká sáláb usiyyoká ˈgas ˈdú fafiyye-, meenyle dhúrle mú ˈgas ki shugudicheká. 3Aalé hada hol nyaaram kinaallá Yíésu ˈdéé ˈdú lay, kieye, Máá Guđo, máá kuun hí gielká hé kulnadhe, yie. 4Aalé Yíésu héél maaleká kieye, Kúlláʼ kinaallá el ˈdáˈdle hé kúfach muuniny. Hééllá hatallá ˈdíéllá he giri fargogint Waaˈgiet gálaat hí aargiro-, Iny Waaˈgiet ˈdúúw egeetká.
5Yíésu íín hé tág Márta ubaa María tá Lasááro giel. 6Tá mu Lasááro kúlalle maaleká mu ál kí ˈjie kinaal aadh naam gaa ˈguole. 7He đueká mu lalille geey, kieye, Ka yimedhíe, kí Yuuˈdía hol ˈdú naat, yie. 8Gál láliká mú geey, kieye, Máá gáál he oonisúóllo, kuun kó káána gál Yuuˈdi ko waar ki tutuneká muunîny, geđi ál kinaallo seseenne? gaalí mú yie. 9Yíésu kieye, Bííy kulich-, ke hujich gaa nannuoká hé aadh ˈgas hí tomon tikiˈde a naama muunîny? Máá bííy kulichká gaa seseenká hé ma riigiriny, ˈdaa giri mu les édhúmle ki seseenká. 10Máá bííy gaa ongʼoˈdeká gaa seseenká in riigiria. Hééllá he ˈdaa giri edhum mú gaa mánká.#11:10 Édhúmallá he Yíésu.
11Mu ˈdeenyéél beeteká geđi gáál geey, kieye, Shééléch kúnnaa Lasááro hé rafe. Yú ha seeme, mú ramo gaa kiisia, yie. 12Mú lalille kieye, Máá Guđo, mu har rafeka, hai miidhandha, gaalí yie. 13Yíésu íín kúfách Lasaaro ˈdeenylé he gáál geđie, tá mú lalille íín rám aađaká he taawue. 14Aalé Yíésu gáál ˈdéé hát ˈdabaanká eiy ki nie, kieye, Lasááro hé mán yie, 15tá ˈdaa giri yú ál kinaal gaa lalayká, ˈdaakíchoka yáá geer ye gaa meedhe-, giri hí ye iiy chegetoká. Ka kée, kí mú bííyle mé nuo, yie.
16Aalé Tómas giri gaalí ˈDíđumos#11:16 ˈDíđumos hélle kieye, Manđaasich. yegetká lalíítí geey, kieye, Múún úba kí mú hol eet, kí mú hol ˈgar kuffo, yie.
17Yíésu ali ki ˈdieká Lasááro hát gaalí galie-, uushich#11:17 Gál Yuuˈdi uushimle he liisham gaalí ger gaa ˈguoˈdeká. afur gaa rafeká maale. 18Bédhene hé Yerúsalem ma gaa faganany.#11:18 Bédhene ki gaa kie-, ki Yerúsalem seseenka, sienyle hé aadh ˈgas tikiˈd ma egeen. 19Aalé gál burnay-, Yuuˈdia-, Márta ubaa María ˈdu gáá yimie-, gáál nyárlé mán yieká ˈdugaka gáál imiro gaa shugudmieká hé ál kinaallá gaa ije. 20Márta Yíésu ká yiimie maalleká đo mú agim naate, María íín ˈbíl ki ˈgisate.
21Aalé Márta Yíésu hol argeká mú geeyche, kieye, Máá Guđo, kúún állá gaa iđînyka, nyárchú hé ma kufúminy. 22Tá káána úba hé Waag heesetoká hát Waag hí ko ká shigichoká yáá óg, chie. 23Yíésu đo Márta geey, kieye, Nyárkú geđi hai loolnodho, uushich yé hai gáá ˈdeeme, yie. 24Aalé Márta kieye, Mu hát kúlích biiy el ˈdaˈd-, Waag gálaat uushim yiem gáá ˈdeđichoká íín úba uushich yé gáá ˈdeenká yáá óg, chie. 25Aalé Yíésu kieye, Uushim yiem gáá ˈdeeny ubaa luolmít he yú. Máá ye iiy yeetká har úba kufúminyka hai loolnodho. 26Tá gál ye lésallá iiy gaa yeetká lulle taalle bííyyo hé ma kufuminy. Kó héél iiy chíe? muí Márta yie. 27Aalé Márta kieye, Iiy-hí Máá Guđo, kúún hát Messíya-, Iny Waagoká yáá iiy yie. Kúún he Máá Warˈgat Waaˈgiet hí hote-, lésallá ka yiimetká, chie.
28Márta hatal chieká đo hol naate, nyaarlé María viiyye, mú nee ki shaakaˈde, kieye, Máá gáál he oonisuoká hé ká ˈjie, ko hegete, chie. 29María héél maaleká đo les gaa kiisate, Yíésu ˈdú siete. 30Yíésu af kinaallá hé hátle é ma híliny, hé ál Márta hol gaa argeká ijo. 31Aalé gál Yuuˈdia ˈbíl gaa ije-, María imiro gaa shugudmieká María kiisanléél argeká mú el gaa veere. Gaal tawunyleka, mu uushicho álle he seseme, gaa bebeme, he yie.
32María ál Yíésu hí gaa ijeká nyuoˈde-, mú argiyyeká, mú ˈgas met les gaa ˈdoyye, kieye, Máá Guđo, kúún állá gaa íđinyka, nyárchú hé ma kufúminy, chie. 33Aalé Yíésu María ubaa gállé hol ˈgieká bebime-, argeká đo geer hí súm gaa ˈdeenedhe, geer hí gudhdhe, 34kieye, Mú ále hí ki galiche? yie. Aalé gaal kieye, Máá Guđo, káde, dháash, gaalí yie.
35Yíésu đo imiro hí gáá okoˈde. 36Aalé gál Yuuˈdia kieye, Bá dhaayyíe, mu hát mú giel! yie. 37Gáál ˈbáál kieye, Mu hé máá in mannayká in eiy ma ˈdéeny! Tá háte, Lasááro kúfach ma ka rían? yie.
Yíésu Lasááro uushich yé gaa ˈdeey
38Yíésu uushich álle kí ˈjobondheká đo geđi geer hí gudhdhe. Úúshích kinaallá he liish gaalí wáár af gaa koy mare. 39Yíésu gáál geey, kieye, Wáár ali af gaa ée, yie. Márta giri nyárle mán yieká kieye, Máá Guđo, mu uushich afurro gaa rafe, afééllá hé moˈdoy, chie. 40Aalé Yíésu kieye, Yú ko ma géeny, iiy chieka, Waag hát fargogiyyoká ha aargiˈda, yú ko ma yéen? yie.
41Aalé gaal wáár ali af gaa eey. Yíésu úr gaa dhaay, kieye, Baabá, ˈdaa giri ye af maalleká yáá ko gielmít hol ˈdu gáá nie. 42Hát kúún aadh lulle ye af mamalloká yáá óg. Tá gál állá ˈgíéllá ˈdaalle ˈdugaka in yú hééllá ki hodhe, giri hát kuun ye ali gáá kaayyeká gaalí iiy yegetká, yie. 43Yíésu héél huogodheká, af gaa guđoká Lasááro ki vie, kieye, Lasááro, yé ka ˈdé! yie. 44Lasááro giri mán yieká hátlé giri gille ubaa ˈgasle gaalí shaasham ki ˈdane-, gaalí mé úba đafar ki ˈdaneká đo uushich yé gáá ˈdie. Yíésu gáál geey, kieye, Mú uushich đafaraamlééllá gaa furáa, mú hayyíe, mu hí siet, Yíésu hí gáál yie.
Yíésu oosle sulle gaalí nie
45Aalé, gál Yuuˈdia burnay-, María ˈdú gáá yimieká, hé Yíésu hí ekeyká il ki argeká, Yíésu iiy yie. 46Gáál ˈbaal íín gál Farisaay ˈdú sedhe, hé Yíésu hí ekeyká gáál geey. 47Aalé gál guguđo-, suoryoká ubaa gál Farisaay hol vie, ˈdéé iđie. Gaal hol yiete, kieye, Háte ki ˈdeeme? Máá állá gaa seseenallá ebá hé burnay-, ke af ˈdaˈdaboká eekemêy! 48Múún ki máállá hélle hol ma hegesenka, gálaat lulle mú iiy hai yeedhe. Gál Rooma hai ká ruuma, ál kúnnaa ki Waag gaa vivisatká ubaa gábárích kúnnaallá hai gáál gaa ugunma, gaalí hol yie. 49Aalé gaal íínííllá máá gaalí Kayáfas yegie-, wár kinaal geerle máá méte suoryo-, onnoyká ˈdéé hodhe, kieye, Itín gon hé níínní hí ógká mán. 50Itín gon it ma tawûny. Itín hé hí ki midhabká mú tikiˈd gáál ˈdú kufunanká kalat, hát gál Yuuˈdi lulle bebewká muuniny, muí gáál yie.
51ˈDeenyééllá hé mú kasle yé ma gáá ˈdíiny. Mu ˈdaa giri wár kinaal geerle máá méte suoryo-, onnoyká in mu hé biiy met gaa ijoká huogodhe. Yaalmit giri Yíésu gál Yuuˈdi ˈdú kufunan-, 52tá gál Yuuˈdi tákámle ma ˈdú kufuminy-, um Waaˈgiet les lulle eiy bash ki yieká úba ˈdú kufunan-, gáál hol ˈdu gáá shuguno-, gáál tikiˈd hođuoká, ta muí hélle huogodhe. 53Ameeny kinaallá in gaal Yíésu ooslé yegeská sulle nie.
54Aalé Yíésu ameeny kinaallá hé úba gál Yuuˈdia hurt đarám ma gaa síen. In đo mu ál kinaal gaa kie, ubaa lalille lés ˈbakat kí ˈjób-, ényle gaalí Eferááyim yeget mare mé nie, ál kinaal gaa yíéđie.
55Af giri gál Yuuˈdi ˈjilallé máá ˈgasso-, urru-, Waaˈgietká hí gálaat ˈdug gaa nadheká ka ˈjobonteká gál burnayká ˈjienle gaa kie, Yerúsalem mé nie, giri ˈjila hátlé ali ma kí ˈdíinyká hol dhidhiroká.#11:55 Hol dhiirinyééllá máádhat héllé suoryoká egedhdhe, máá suoryoká hí suoryosia, hí fás ki ˈdarama. 56Aalé gálaat Yíésu il ki ˈgeˈgedhe, gaal hátlé ˈBíl Waaˈgietká geer gaa ˈgieká hol heegete, kieye, Háte ki yeedhe, mu kín hé ˈjiláállá álle ká yiimet? hol yie. 57Tá gál guguđo-, suoryoká ubaa gál Farisaayká íín hé kis ˈdéé muˈde, giri máádhat Yíésu ál he gaa ijoká óíytaka, mu gáál ˈdéé ˈdú siidho-, mú gaalí ˈgiiliˈgawká.
अहिले सेलेक्ट गरिएको:
Yuána 11: dsh
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Bible Translation and Literacy
