Matìyò 6

Yesò ziʼì jì yi a və diʼ ngyàmtə̀ viʼi fa tsu

1“Ghə̀ŋ tùʼmə̀, la kə ghə̀ŋ a nè nyʉ̀ jùŋ və a zhìʼ Nyìngòŋ tò byìʼì ando ghə̀ŋ kəŋ la viʼi yen ghə̀ŋ. Ghə̀ŋ sə tsèn nè ali, kò Tìʼ ghə̀ŋ a ghə̀ dìʼ a kaŋ lə ku mòʼtə̀ à ghə̀ŋ.

2“Kə diʼi la, à sətsèn wù ku kəfo a wìʼ a ghə̀ ko kiʼi, kə wù lyɨ kənyʉ̀ kì, njèʼè shə̀ʼtə̀. Viʼi vyì a və wamə wamə ne ənyʉ̀ ə ne və sə jèʼè shə̀ʼtə̀ tò ali nfosə ji nə̀ aloʼ ntsèntə̀sə ndi viʼi ə bwomsə vəwenə. Ma gaʼa a ghə̀ŋ nəmwèʼè la viʼi a venə sə dìʼ mù və kɨ li mwetə əmòʼtə ə vəwenə. 3Wù lyi kəfo ə̀ ku a wìʼ a ghə̀ ko kiʼ, wu ku a jì no te wù jèʼè ə wù ə ko a kɨ. 4Kə la diʼi la wù lyɨ kəku, kə wù a ku byìʼì ando wù kəŋ la viʼi yen. Wù ne alì, ə Tìʼ wù yi a ghə̀ yenə ənyʉ̀ ə nlyòmtə və ne ku əmòʼtə ə wu.

Yesò ə ziʼì kùmə̀ əjɨ̀m

(Luk 11.2-4)

5“Ghə̀ŋ nə̀ sə jɨ̀m, kə ghə̀ŋ ə wamə ne a diʼ viʼi vətsenəvə. Vəwenə ə kòŋ ə nlù ə tɨmə a aloʼ ntsèntə̀sə jɨ̀mə̀, bè jèʼè jɨ̀mə̀ a mbyɨ̀sə jì sə, kəŋ la viʼi ə̀ nchò yen vəwenə. Ma gaʼa a ghə̀ŋ nəmwèʼè la viʼi a venə sə dìʼ mù və kiʼi li mwetə əmòʼtə ə vəwenə. 6Wù nə̀ sə jɨ̀mə̀, wu bòŋsə lye kəshi kə lyomtə kə ə jɨ̀m a Tìʼ wù yi a və ko yenə. Wù jɨm ali, à Tìʼ wu yi a ghə̀ yenə nyʉ̀ kə nlyòmtə nè ku mòʼtə̀ ə wu.

7“Ghə̀ŋ sə ə jɨ̀m, kə ghə̀ŋ faŋ mu sə ə kwòʼtə no ghò gàʼa tò gàʼa bè gàʼa zomtə a nə̀ viʼi vyì a və ko kɨ Nyìngòŋ. Vəwenə ə ne və sə kwòʼtə̀ la Nyìngòŋ ə zhʉ əjɨ̀m ə vəwenə byìʼì ando vəwenə ə gaʼa ə lòtə̀. 8Kə ghə̀ŋ ə shəmə vəwenə byìʼì ando ghə̀ŋ nə̀ sə ə njɨ̀mə̀, mu Tìʼ ghə̀ŋ sə kɨ kəfo kì a ghə̀ŋ kəŋ. 9Ghə̀ŋ sə ə jɨ̀m, ghə̀ŋ ə̀ jɨ̀mə a jì ghèn alə̀ la:

‘Tìʼ yes a wù diʼ a kàŋ,

ne viʼi ə kuʼsə zhiʼ ə wu,

10ne və yen əfòyn ə wu,

ne mbyì ghèn ə̀ jèʼè to ndo wù kəŋ to ndə̀ŋndəŋ ando wù ne li a kaŋ.

11Zhis yès layn ə be zhis yès no mətsi ntsèm.

12Lyesə ku ənyʉ̀ ə byɨvə ə yès,

tò ndə̀ŋndəŋ ando yès ə lyèsə̀ ku no ndò yì a ghə̀ ne mbyɨ a yès.

13Kə wu ghʉsə ə mwòmsə ə vi a yès,

bwoŋsə yes fa ənyʉ̀ ə byɨvə.

Byìʼì ando əfòyn ə wu ə soʼo tò wù, à kiʼì tò wù kiʼi kədyòʼ, nə̀ ə bayn ə ghoʼ ghə to məzhʉ ntsèm. Amèyn.’

14“Ghə̀ŋ sətsèn ə lyèsə̀ ku ənyʉ̀ ə byɨvə vyi a viʼi ə nè a ghə̀ŋ, a Tìʼ ə ghə̀ŋ yi a ghə̀ diʼì a kaŋ ne boŋ lyèsə̀ ku vəŋə. 15Ghə̀ŋ sətsèn ə faŋ ke lyèsə̀ ku ənyʉ̀ ə byɨvə ə viʼi, ko Tìʼ ghə̀ŋ ne boŋ lyèsə̀ ku vəŋə.

Yesò ə ziʼì kùmə̀ bàm ə chʉ̀

16“Ghə̀ŋ sə ə bamə əchʉ̀, kə ghə̀ŋ ə nkə̀ʼə̀ a shinsə a nshinsə ando viʼi kəmbɨ̀lə̀ nə̀ nè. Vəwenə nə̀ sə ə bamə əchʉ̀, vəwenə sə kasə əkə̀ʼ ndi viʼi ə nyenə. Ma gaʼa a ghə̀ŋ nəmwèʼè la viʼi a venə sə dìʼ mù və kiʼi li mwetə əmòʼtə ə vəwenə. 17Ghə̀ŋ sə ə bamə əchʉ̀, ghə̀ŋ sə shʉ̀ təkə̀ʼ təŋtə, sàsə̀ ətʉ vəŋə, 18ndi viʼi ə ko və à kɨ la kə diʼ ali, bamə chʉ̀, a kɨ tò Tìʼ ghə̀ŋ yi a və ko yenə. Ghə̀ŋ nè ali, Tìʼ ghə̀ŋ yi a ghə̀ yenə ənyʉ̀ ə nlyòmtə̀ və nè ku əmòʼtə ə ghə̀ŋə.

Yesò ə ziʼi kùmə̀ əghoʼ yi a ghə̀ diʼ a kaŋ

(Luk 12.33-34)

19“Kə ghə̀ŋ ə bàʼtə ə ghʉ əghoʼ a ghə̀ŋ a loʼ a nsè a shə̀. A diʼ kəshi mu nkasə zizi sə lo ə fo a vyi, tsenə və baŋ ə byɨf, mu vətsoŋ zi ə və bè kwaʼ ngə̀ŋ ə kwen tsoŋ. 20Ghə̀ŋ ə bòŋsə baʼtə ghʉ əghoʼ ə ghəŋə a kaŋ. A diʼ kəshi mu nkasə zi ko və lə pfiʼ kəfo akì, mu və zizi ko və lu bàŋ, mu vətsoŋ zi ko və lə kwaʼ ngə̀ŋ ə kwen ə tsoŋ. 21Əghoʼ ə wìʼ ə diʼ no fe, ə kətʉ kə wen sə diʼ tò tsu.

(Luk 11.34-36)

22“Ashɨ ə wìʼ ə diʼ to nə̀ làm a wen a wèn. Ashɨ ə wu sətsèn ə ndiʼ a nkàyn, ə wenə wu ə tsèm sə diʼ nə̀ baynə. 23Ali, mu ashɨ a wu sətsèn ə faŋ ke ndiʼ a nkàyn, wù a jèʼè tò a ntìntìn mfɨnə̀ nə̀ wenə wu no tsèm. Ke la diʼi la ashɨ ə wu sətsèn ə nə̀ faŋ ke ku bayn no fa mpfen, ə wù a ndiʼ no a ntìntìn mfɨnə̀ ə kaynə!

Yesò ə ziʼì la viʼi zi ko və lə kuʼsə Nyìngòŋ be kuʼsə to mə ə ko

(Luk 16.13; 12.22-31)

24“Wìʼ ə zi ko ghə̀ lə ə ndìʼ wù ə shyèʼ a viʼi və bò. Kə diʼ ali, a ghə̀ a bàynə̀ ghə̀ mùʼ kòŋ ghə̀ tsen; ali, ghə̀ nə̀ ngumlə̀ əmùʼ to fa əzhʉ. Wù zi ko wu lə shwèʼ a Nyìngòŋ bè shwèʼ a ə ko.

25“Ma sətsèn ə nə̀ ə gàʼa a ghə̀ŋ la, kə ghə̀ŋ ə kàynə mbyì kùmə̀ ntsìnə̀ ghə̀ŋ. Kə wìʼ ə fa ghə̀ŋ ne kàynə mbyì la yi ne zhɨ gho a, yi ne nyʉ̀ gho a kò la yi ne mòʼ gho a yi əwen a. Wu la gàʼa la ntsìnə̀ ə wìʼ ə nə̀ ko chò fozhɨvə a, əwen ə wìʼ ə ko chò ndisə a? 26Ghə̀ŋ ki li to no mənyin mèn a mə tàynə chò a kaŋ, la mə ko lə wye fozhɨvə, ko mə lə mpfi, ko mə ghʉ kəfo akàŋ, ali Tìʼ ghə̀ŋ yi a ghə̀ diʼì a kaŋ ə lu zhis vəwenə tò zhis. Gaʼa ko ghə̀ŋ kuʼmə chò mənyin na mèn? 27A lè diʼ no ndò fà ghə̀ŋ a ntìntìn a ghə̀ zì ghə̀ kwʉʼsə ngʉʼsə wen a mbyi fambwo ghə̀ kaynə mbyi a?

28“Byìʼì gho a ghə̀ŋ kayn mbyì byìʼì ndisə a? Ghə̀ŋ ki li to ndo əlaŋ ətoʼ ə kwi kuʼ atoʼ, bè tu a. Kò ghə̀ təmə ə shwèʼ kəfo kò la tas ə ndisə ə nə̀ mòʼ. 29Ma ə gàʼa a ghə̀ŋ la, no mə fòyn Sòlomùyn be nə̀ əghoʼ yi a ghə̀ ə nkiʼ no ə tsèm ə ko lu ə lafə zaʼa a kəlaŋ kə mùʼ a ntìntìn əlaŋ a venə. 30Nyìngòŋ lə̀ sətsèn mu nlafsə nkàyntə agəŋ ə ətoʼ layn alə̀, ətʉʼʉ ə diʼ sə layn a boʼòngə̀ŋ ə və chom ə nyùʼ, ghə̀ bè ne lafsə no ghə̀ŋ ale a? Ghə̀ŋ a bwaʼ gho a ghə̀ŋ byɨmə alə̀ a?

31“Kə ghə̀ŋ ə kaynə mbyì bèmə la, ‘Yès ə ne zhɨ gho a, yès ə ne nyʉ gho, yès ə ne mòʼ gho lo?’ 32A nyɨŋ viʼi vyì a və ko kɨ Nyìngòŋ fa bàm ə fo a venə, ali Tìʼ ghə̀ŋ a kaŋ ə kɨ la ghə̀ŋ kəŋ fo a venə. 33Ghə̀ŋ cho ambì ə mwòmsə to ə ndiʼ nti a nkayn to nə̀ viʼi vyì a və ntsi ati əsoʼ ə Nyìngòŋ, ə ndi ghə̀ ne ku kwùʼsə̀ fo a venə no ə tsèm a ghə̀ŋ. 34Kə ghə̀ŋ be nkàyn mbyì byìʼì boʼòngə̀ŋ byìʼì ando ngəʼ ə boʼòngə̀ŋ ə kwʉʼ tò a boʼòngə̀ŋ. No kətsi kə ko nə̀ kiʼi ngəʼ, ghə̀ kwʉʼ tò a kətsi a kì.

अहिले सेलेक्ट गरिएको:

Matìyò 6: bbkDBLnt

हाइलाइट

शेयर गर्नुहोस्

कपी गर्नुहोस्