Matyu 11

Lyip Yoona A̱tyu Ba̱ptisman tazwa Yesu Kristi

(Luk 7:18-35)

1Nang Yesu ntyak tyiet mman ta̱m swak ma̱ a̱feang nggu na a̱ni, a̱ si̱ doot a̱ja, a̱ si̱ nat tyiet ma̱ng shei A̱lyiat A̱gwaza na ma̱ a̱ka̱keang fam a̱byin Ga̱lili.

2Jen nang Yoona a̱tyu nyia̱ ba̱ptisman nshya̱ mi̱ njaru a̱ni, a̱ si̱ fwuong nkhang nta̱m nang Yesu nyia̱ a̱ni; nta̱m na tai a̱si̱ nang Kristi#11:2 Wa̱i a̱lyiat: Kristi fa “A̱tyu nang A̱gwaza kup gu tyok a̱ni.” Ma̱r 1:1. na nyia̱ a̱ni, Yoona si̱ ta̱m mman ta̱m gu á̱ghyang, ba̱ nat ba̱ lyip Yesu nyia̱, 3“Nwan wa yet Kristi wu nang zi̱ fwuong chobai gu hu a̱ni a; ke zi̱ fwuong a̱ghyang á̱niet wa?”

4Yesu si̱ nwuak ba shim nyia̱, “Nyi nat nyi hyia̱ ma̱ng Yoona nkhang nta̱m nang nyi fa̱k, nyi si̱ bu li a̱ni: 5Á̱niet a̱fi̱fan shyat nwuan a̱vwuo. Á̱niet a̱ti̱tak ba̱ ta̱luk a̱ni si̱ chong. Á̱ si̱ choot á̱niet gbap, ba̱ si̱ tyia̱ za̱za̱rak. A̱yaashi̱lan si̱ nwuo fwuong a̱vwuo. Á̱ ya̱ngam á̱niet ba̱ ka̱n kwi a̱ni ma̱ng swuan. A̱wot á̱ si̱ bu shei á̱kunak na A̱sham Nkhang ka.#11:5 Ish 26:19; 35:5-6; 61:1. 6Nyi bu tak ma̱ng a̱nggu nyia̱, ‘A̱gwaza na tyia̱ a̱li̱ba̱rka da̱ á̱niet di̱ ba̱ but mi̱ fwuo da̱nian nung a̱ni bah.’ ”

7Nang mman ta̱m Yoona na ndoot á̱ nkat a̱ni, Yesu si̱ nwuo lyiat ma̱ng á̱kpa á̱niet ka tazwa nta̱m Yoona na, nyia̱, “Zang tangka̱i a̱yin hwa nang nyi ku nat nwuan hu mi̱ tswa a̱yit ji? A̱ ku yet a̱bobwot a̱ga̱nga̱ng á̱kwop nang wun hyap wa a̱ni kee? 8Ke nyi ku nat nyi ka li a̱tyu a̱ kup a̱nunuut a̱yaatoot ba̱ byia̱ kurum hwa a̱ni la? Kaai, á̱niet ba̱ khwi a̱nunuut a̱yaatoot ba̱ byia̱ kurum a̱ni, swuat ma̱ a̱ka̱sa á̱gwam nia. Ba̱ swuat a̱yit bah. 9Nyi ku nat nyi li a̱ta̱m a̱kwonu A̱gwaza waa? Ii, n tak nyin a̱tsak a̱lyiat, Yoona swak a̱yaata̱m a̱kwonu A̱gwaza ma̱ng shi. 10Yoona wa nang á̱ lyuut tazwa nggu ma̱ A̱lyiat A̱gwaza na nyia̱,

‘Di, n ta̱m ma̱ng a̱ta̱m nung wu,

gu khwat a̱son ang.

A̱wot a̱ na jhyi ang vak hu, a ba̱ nkai.’#11:10 Mal 3:1.

11“N tak nyin a̱tsak a̱lyiat, ma̱ á̱niet nang á̱nyiuk tyei a̱ni, á̱ ka̱n shya̱ a̱tyu a̱ swak Yoona a̱tyu ba̱ptisman ma̱ng shi a̱ni bah. A̱mgba̱m ma̱ng a̱nia, a̱tyu a̱ yet a̱da̱dei wu mi̱ Tyok Ma A̱gwaza tswazwa hu a̱ni, a̱ shi a̱ swak Yoona. 12Neet di̱n jen nang Yoona a̱tyu ba̱ptisman ku ntsa shei A̱lyiat A̱gwaza na a̱ni, ba̱ng ba̱ tat a̱fwun, Tyok Ma A̱gwaza Tswazwa hu swuo a̱bung ma̱ng a̱ka̱kpa̱t#11:12 Ku: “Tyok Ma A̱gwaza tswazwa hu ya a̱son mi̱ chet.”. A̱wot á̱niet a̱ka̱kpa̱t kwan ba̱ ta̱wap hu mi̱ chet, ku yet si̱ mba.

13“Mat neet nang Yoona ka̱n bai bah, a̱mgba̱m a̱yaata̱m a̱kwonu A̱gwaza ba ma̱ng Musa a̱ ku lyuut doka A̱gwaza ji a̱ni, ku tyia̱ á̱ghyi ba̱ li jen Yoona ji. 14A̱wot ka̱ nyi shim a̱lyiat nang n shei nyin a̱ni, Yoona wa yet Iliya, a̱ta̱m nang a̱yaata̱m a̱kwonu A̱gwaza ba shei á̱zanson nyia̱ a̱ na bai a̱ni.#11:14 Mal 4:5-6. 15Konyan wa chat a̱ lyen a̱ni, gu myiai a̱fufwuo gu fa̱a̱k!

16“Yihwa hwa nang n na ntyan che huni? Ba̱ li nang mman ni̱ nswan á̱ vwuo mi̱ tungga, ba̱ kwop a̱dyii̱ng ma̱ng á̱kpa̱ndang ba nyia̱:

17‘Zi̱ bwom bubwom nyeang.#11:17 Lyuut cha̱chaat: “Zi̱ tyiap gugwa.”

Da̱ nyin, nyi shim nyi si̱ song bah.

A̱wot zi̱ bwom bubwom a̱nak.

Da̱ nyin, nyi shim nyi si̱ byian fwuo bah.’

18“Ma a̱nia wa, Yoona ku swan di̱ mi̱ ya di̱ mi̱ swuo, a̱wot nyi si̱ kwop a̱dyii̱ng nyia̱, ‘A̱ byia̱ a̱ka̱tuk ntswa!’ 19Ma a̱nia wa nung meang, Nggwon A̱tyubishyi, n si̱ mbai, ngya tsa nswuo, nyi si̱ kwop a̱dyii̱ng nyia̱, ‘Di a̱tyu a̱fa a̱lyiak wuni, a̱tyu hyeng, ma̱ng a̱kpa̱ndang á̱niet saai kurum ga̱ndu, mbeang á̱niet a̱ka̱tuk nyia̱ á̱ghyang!’ A̱wot nyi na fi̱k mumwang swuan mat nta̱m nhu na.#11:19 Lyuut cha̱chaat: “Mumwang hu ghwut kpa̱sai mat nta̱m hu na.””

Shi̱ri̱ya tazwa Á̱niet Lak Khwi A̱gwaza

(Luk 10:13-15)

20A̱jawa Yesu si̱ nwuo tyei a̱ka̱keang nang gu ku nnyia̱ nta̱m a̱ri̱bi̱di na ma̱ a̱di̱di̱t a̱ni a̱bun. Mat ba̱ ku lak ghwon á̱ka̱tuk nyia̱ mba wu, ba̱ si̱ lak khwi A̱gwaza wu. 21“Ku swan nyin á̱niet Korazin ma̱ng Ba̱tsaida! Mat ka̱ á̱ wa nyia̱ nta̱m a̱ri̱bi̱di nang á̱ nyia̱ nyin dyo a̱ni, nyia̱ ni̱nia nang á̱ wa nyia̱ ma̱ a̱ka̱keang Taya ma̱ng Sidon, si̱ ba̱ ghwon a̱ka̱tuk nyia̱ mba wu neet a̱fwun bah. Ba̱ si̱ khwi a̱kyakyak a̱yaatoot. Ba̱ si̱ wop á̱pyia̱ mba ntong, ku tak byian fwuo da̱ a̱ka̱tuk nyia̱ mba wu a̱ni.

22“N tak nyin, a̱tuk mam shi̱ri̱ya A̱gwaza ka, a̱bung nang á̱niet Taya ma̱ng Sidon na swuo a̱ni, na yet a̱hyohyoot a̱ swak a̱si̱ nyin ka.

23“A̱wot nyin á̱niet Ka̱fanahum, nyi fa á̱ na nwuak nyin shi mi̱ kyai tswazwa hwa kee? Kaai, á̱ na chyok ma̱ng a̱nyin á̱ nat ndyo da̱ a̱vwuo nkwom.#11:23 Lyuut cha̱chaat: Ha̱dit. Ka̱ á̱ wa nyia̱ nkyang a̱ri̱bi̱di nang n nyia̱ nyin dyo a̱ni, nyia̱ ni̱nia nang á̱ wa nyia̱ mi̱ a̱ka̱tuk a̱keang Sodom a̱wa, si̱ a̱ ni̱ shya̱ ba̱ng ba̱ tat a̱fwun. 24N tak ma̱ng a̱nyin, a̱tuk mam shi̱ri̱ya A̱gwaza ka, a̱bung nang Sodom na swuo a̱ni, ka̱ na yet a̱hyohyoot a̱ swak a̱si̱ nyin ka!”

Yesu Tak A̱gwai di̱ Naai A̱gwaza

(Luk 10:21-22)

25Di̱n jen a̱ja, Yesu si̱ naai A̱gwaza nyia̱, “N dyep ang A̱tyia̱, A̱tyoli a̱ byia̱ tswazwa ma̱ng a̱byin a̱ni. N gwai ang nang a niat nkyang nani da̱ a̱vwuo á̱niet ba̱ fa nyia̱ ba̱ byia̱ mumwang ma̱ng lyen kyang a̱ni; a̱wot a si̱ tyai na kpa̱sai da̱ a̱vwuo á̱niet ba̱ kyiak á̱pyia̱ mba nang mman a̱ni. 26Ii, A̱tyia̱, a li ku myim ang a nyia̱ a̱nia!

27“A̱tyia̱ nung wu, tyia̱ nung kuzang kyang mbwak. Á̱ mbyia̱ a̱tyu a̱ lyen Nggwon ka a̱tsatsak lyen a̱ni bah, si̱ ma̱ A̱tyia̱ wu. A̱wot á̱ bu mbyia̱ a̱tyu a̱ lyen A̱tyia̱ wu a̱tsatsak lyen a̱ni bah, si̱ ma̱ Nggwon ka. Ma a̱nia wa, á̱niet nang Nggwon ka khai a̱ni, bibya ka̱ na tyai mba A̱tyia̱ wu kpa̱sai, ba̱ lyen gu.”

28A̱wot Yesu si̱ nyia̱, “Nyin á̱niet nyi veang ma̱ng pyia̱t a̱kpi̱di̱dyi̱k nkpa̱t a̱ni, nyi bai da̱ a̱vwuo nung. A̱wot n na nwuak nyin fwung. 29Nyi kyiak a̱byi̱ri̱m khwi nung wu dundung ma̱ng a̱nung, a̱wot nyi myiam da̱ a̱vwuo nung. Mat n gyet shonshyon mi̱ fwuo. N si̱ ngyet a̱tyu ghyuai a̱pyia̱. A̱wot nyi na shya̱ fwung mi̱ nfwuo nyin na. 30Mat a̱byi̱ri̱m khwi nung wu swan kpa̱p di̱ kpa̱t bah. A̱wot kpa̱t hu nang n kpa̱t nyin a̱ni, ku yet a̱hyohyoot wa.”

अहिले सेलेक्ट गरिएको:

Matyu 11: TyapNT

हाइलाइट

शेयर गर्नुहोस्

कपी गर्नुहोस्