Maatteeo 16
16
Ajin Variꞌtheei thõõth ꞌcĩ ĩnaat eeta
(Tigiil Maarko 8:11-13; ꞌLuuka 12:54-56)
1Ma ho, ummuddiaak Variꞌtheei hĩ Thadutheei Yeesu nẽ idiimito ĩttĩmanit ĩnõõnnõ ngaatĩ ajini thõõth ꞌcĩ ĩnaat eeta ꞌcĩ aku hẽẽtahujjieen.
2Nẽ uduhaak nẽẽ ĩhõõggõ ĩĩnnĩk, “Má marik hẽẽtkujjieen ꞌjiaat, ainnu niig abũnnaa hatĩ lõõcĩ ahuluthi, 3nẽ má marik lõõcĩ hẽẽtahujjieen nẽ irimanaaĩ ngerrenita, othooꞌthu niig ainnu, ‘Õkõ hatĩ atĩĩlĩ tammu.’ Agayyu niig ngaatĩ aduhaannu thõõth ꞌcĩ aĩ, aaĩ hatĩ lõõcĩ hutuno ngaatĩ acinnu hẽẽtkujjieen nẽ hõllõngaa dẽẽdẽ agayyu ne ꞌcĩ hatĩ edeeꞌnyia ꞌyioko noho ho. 4Adiimmu niig terethiinit, hĩnĩngĩtĩ iiginnu ꞌthẽccanniook nẽ hõllõngaa aꞌnyaku lemiinit! Nẽẽthĩ, terethiinit cĩ Yõõna#16:4 Terethiinit cĩ Yõõna: Baa aku Yõõna ulugoocĩ nẽ ũũk aꞌnyak hẽẽngatõõ cĩ ulugooco waathinniook iyyio. Tigiil ꞌBuuk cĩ Yõõna 1:17; Maatteeo 12:39-40. diooni ꞌcĩ hatĩ aaꞌnyĩhoothĩkuung ngagiita.” Nĩngĩtĩ ũũnnĩkĩ Yeesu ĩhõõggõ nẽ ũũha.
Abũũla cĩg Variꞌtheei hĩ ꞌcĩg Thadutheei
(Tigiil Maarko 8:14-21)
5Ma baa abaaktĩ nẽẽg bũlũc, ĩko ataarriothĩ nuyyiooha ngaatĩ aꞌnyahĩ ũbũnẽẽta. 6Nẽ itilo Yeesu ĩhõõggõ ĩĩnnĩk, “Ĩcĩnĩt abũũla cĩg Variꞌtheei hĩ cĩg Thadutheei jurrung.”
7Baa õthõõth nuyyiooha nyaagwaana aĩ, “Õthõõth Yeesu hoti, hĩnĩngĩtĩ hataarriõthĩ naag ũbũnẽẽta.”
8Baa aga Yeesu muhẽẽnĩt cĩnĩĩng nẽ ĩĩ, “Hõllõngaa aꞌnyaku niig lemiinit cobbi! Inni othoothit niig ĩĩtõ, aitiõõ ũbũnẽẽta tõõ ho? 9Aitiõõ niig hõllõngaa agayyu? Hõllõngaa ammuhooꞌthu niig ũbũnẽẽt baag ĩĩn ꞌtur hĩ eet baag ĩĩn aalibꞌnya ꞌtur buúk nẽ ĩĩn baa lohoddwaana thõng ꞌcĩg alũtaannu niiga? 10Nẽ eetinii ĩbaag ĩĩn aalibꞌnya ꞌwec hĩ lohoddwa baag anyiꞌthiaanĩ ũbũnẽẽta, ũbũnẽẽtĩĩ ꞌcĩg ĩĩn tũkĩramma thõng? 11Nga thĩ agaac ꞌyioko ĩĩtõ, hõllõngaa hothoothi naa thõõth cĩ ũbũneetu? Ĩcĩnĩt abũũla cĩg Variꞌtheei hĩ cĩg Thadutheei jurrung!” 12Ma baa uruta, iita agaacõ nuyyiooha cĩg Yeesu ngaatĩ hõllõngaa õthõõthĩ nẽẽ thõõth cĩ abũũla ꞌcĩg adĩmanniaanĩ ũbũnẽẽta, nẽẽthĩ, baa õthõõth nẽẽ thõõth cĩ õlõng cĩ ꞌlimman cĩ Variꞌtheei hĩ cĩ Thadutheei.
Yeesu nganĩ?
(Tigiil Maarko 8:27-30; ꞌLuuka 9:18-21)
13Ma baa õbõktĩ Yeesu hĩ nuyyiook cĩgĩnnĩg õdõlanit ꞌtaaũn cĩ Caetharea Pilippi, ikia ijin nẽẽ ĩhõõggõ ĩĩnnĩk, “Aĩ ꞌthẽk eeta Ngeertĩ Eeto nganĩ?”
14Ẽdẽcĩ nuyyiooha cĩgĩnnĩg anneek, “Aĩ eeta ũgẽẽgĩ ĩĩnĩ nii Yõaannẽ Batitta nẽ ĩĩtõ ũgẽẽgĩ, ĩĩnĩ nii Eliijja nẽ ũgẽẽgĩ tarĩ, aĩ ĩĩnĩ nii ꞌJeremia, hode põrõvẽtaac umwa.”
15Nẽ ijin Yeesu ĩhõõggõ ĩĩnnĩk, “Ma ꞌthẽk niig ammuku ainnu nganĩ naa?”
16Ẽdẽcĩ ꞌThimõõnẽ Pẽẽtũrũ ĩnõõnnõ anneek, “Ĩĩnĩ nii Krĩstõ, Ngeertĩ Nyekuc ꞌcĩ arũgĩ.”
17Ẽdẽcĩ Yeesu ĩnõõnnõ anneek, “ꞌThimõõnẽ ngeertĩ Yõõna, aggatannii nganiit Nyekuci! Hõllõngaa ammũda nii thõõth icci ẽmmẽn. Eterꞌtheeki nganiit Baaba caannĩ ꞌcĩ aaĩ hẽẽtahujjieen. 18Nẽẽthĩ ꞌyioko, hutuvvii hatĩ gõõng naa nganiit hiinnihii Pẽẽtũrũ, nĩngĩtĩ aĩ, ‘Lõbarab.’ Nẽ lõbarabaa cĩ, hehenyiti hatĩ naa lothippit cĩ lemmioohu nẽ aitiõõ hatĩ ꞌtirriani cĩ daahĩthõõ hõllõngaa ũũlũ ĩhõõggõ. 19Haaꞌnyii hatĩ naa mũhũtẽẽt cĩg habuccieet cĩ hẽẽtkujjieen. Nẽ thõõth ꞌcĩ aburi nii loota nĩnga, abũrrĩ hatĩ hẽẽtahujjieen buúk nẽ thõõth ꞌcĩ elemi nii loota nĩnga, elemmi hatĩ hẽẽtahujjieen buúk.” 20Nĩngĩtĩ ilootĩ nẽẽ nuyyiook cĩgĩnnĩg hiittiõõ hõllõngaa aduhaak eet umwa ngaatĩ ĩĩnnĩ nẽẽ Krĩstõ.
Õthõõth Yeesu thõõth cĩ ꞌcannani hĩ daahĩth cĩnnĩ
(Tigiil Maarko 8:31-9:1; ꞌLuuka 9:22-27)
21Nganĩngĩtĩ kõr tĩho, iꞌthianaaĩ Yeesu uduhaak nuyyiook cĩgĩnnĩg thõõth ꞌcĩ hatĩ adĩmanoothĩk ĩnõõnnõ. Baa aduhaak nẽẽ ĩhõõggõ anneek, “Adiim ꞌthẽk hõkõ naa ꞌJeruꞌthalẽma ngaatĩ hatĩ hõkõ haccananiini gẽrrẽẽt, athĩnĩĩ cĩg makayyioohu, hĩ ĩĩcĩg makayyiook cĩg paadĩrꞌnyaannu, hĩ ĩĩcĩg ꞌlimmanniook cĩg nyattal cĩ Mũũꞌtha. Aaꞌnya hatĩ nẽẽg nganĩĩt haccananĩ gẽrrẽẽt ũdũt. Haruhi hatĩ naana nẽ urutaa cĩ waathinniook iyyio, harũgna hatĩ naa daahĩtha tarĩ.”
22Nĩngĩtĩ õkõõĩ Pẽẽtũrũ Yeesu ngadiiha nẽ eggerꞌnyeek ĩnõõnnõ ĩĩnnĩk, “Aitiõõ hatĩ Nyekuci hõllõngaa ẽlẽmaanĩ thõõth ꞌcĩ aaĩ hĩ ciee hĩdĩmanĩ ũdũt Makayyioohit!”
23Ma ho, ubbuud Yeesu Pẽẽtũrũ nẽ ĩĩnnĩk, “ꞌNyẽẽhĩ muumaa caannĩ ꞌThĩttaan! Alaammaa nii nganĩĩta, aꞌnyahi nii muhẽẽnĩt cĩ eeto nẽ hõllõngaa ĩĩn cĩ Nyekuci.”
24Nĩngĩtĩ aduhaakĩ Yeesu nuyyiook cĩgĩnnĩg annẽẽkĩ, “Má adiim eet umwaa ĩĩn nuyyioohit caannĩ, aꞌnyĩĩk hataarõthĩ ẽlẽ cĩnnĩ nẽ irriongan hurucce cĩnnĩ nẽ ũnũa nganĩĩta. 25Hĩnĩngĩtĩ ẽẽtĩ ꞌcĩ adiim ẽẽla rũgẽt cĩnnĩ, adhuheek hatĩ tuu, nẽẽthĩ, ẽẽtĩ ꞌcĩ adhuheek rũgẽt cĩnnĩ tuu, hĩnĩngĩtĩ nganĩĩta, ammũda hatĩnĩ. 26Ne occa ꞌthẽk ꞌcĩ abũnnaa ꞌcĩ ammũda ẽẽtĩ, hatĩ ũmmũda nẽẽ hẽlẽggĩ vẽlẽk cĩg lootu nẽ udhuheek lori cĩnnĩ tuu? Hode ne occa ꞌthẽk ꞌcĩ occa ataalanĩ ẽẽtĩ lori cĩnnĩ? 27Hĩnĩngĩtĩ õkõ hatĩ aku Ngeertĩ Eeto bulẽẽttaa cĩ Maacõnĩ hĩ aajĩlẽẽt cĩgĩnnĩg nẽ hatĩ ikia ũdũman eet hõdẽĩ hõdẽĩ ꞌgõõlaa ꞌcĩ baa aattiyyi nẽẽg loota nĩnga. 28Haduhaakuung dĩdĩ, aattĩg eeta ũgẽẽgĩ hõrggẽẽnaa cunuung ngaati, ꞌcĩg hatĩ hõllõngaa adaahĩ nga hĩcĩnĩt Ngeertĩ Eeto, ngaatĩ alluuccianĩ habuccieetaa cĩnnĩ.”
अहिले सेलेक्ट गरिएको:
Maatteeo 16: did
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2017, Wycliffe Bible Translators, Inc., All rights reserved.
