Matiu 4
4
Shetan karǝki Yesu
(Markus 1:12-13; Luka 4:1-13)
1Pǝlǝa Bangŋo Mǝfele loasǝ Yesu um nǝi a ɓabondo ace mǝnana Shetan ɓǝ̀ kya karǝki ka.#4:1 Ɓalli gbal aɓa: Ib 2:18; 4:15. 2Sǝ lang Yesu gilnamur pwari lumi-ine andǝ du lumi-ine ka, nzala wali kǝrkǝr. 3Mǝkarǝkiban pǝlǝa yiu abani sǝ ne wi ama, “Ɓǝ̀ a nda muna mala Ɓakuli ka, banggi atali mǝnia ɓǝa pǝlǝ nɗǝmo.”
4Sǝ Yesu nyesǝi wi ama, “À gilǝ a Malǝmce mala Ɓakuli ama:
“ ‘Girlina na nǝmurǝì
tsǝkiyi ɓwa sǝ nǝ̀ dum
nǝ yilǝmu ka ɗang.
Nda andǝ cau mǝnana
kat kǝ pur a kun Ɓakuli ka.’ # 4:4 Ɓalli gbal aɓa:
Nggur 8:3
. ”
5Pǝlǝa Shetan wari nǝ Yesu aɓa Urǝshalima nggeala mǝfele, sǝ kya tamsǝi a ɓwang Ndàmǝgule mala Ɓakuli, 6sǝ ne wi ama, “Ɓǝ̀ a nda Muna mala Ɓakuli ka ta zurro a nzali! Acemǝnana à gilǝ aɓa Malǝmce mala Ɓakuli ama,
“ ‘Ɓakuli nǝ̀ tsǝk amǝturonjar
male ɓǝ̀a tsǝkiro.
À nǝ̀ eo a ɓabuia,
ace mǝnana wu kǝa
tul kusǝo arǝ tali raka.’#4:6 Ɓalli gbal aɓa: Ang 91:11,12. ”
7Sǝ Yesu pǝlǝi wi ama, “Malǝmce mala Ɓakuli bang gbal ama,
“ ‘Ce a karǝki Mǝtalabangŋo
Ɓakuli mo ɗang.’ # 4:7 Ɓalli gbal aɓa:
Nggur 6:16
. ”
8Shetan nyar ɗǝm wari nǝ Yesu a ɓwang ɓe kǝ nkono nggea mǝdāre, pǝlǝa lǝmndǝki wi ala-murǝm kat mǝnana a ɓanza ka andǝ gulo andǝ gǝna mǝnana a ɓalǝia ka kat. 9Sǝ ne wi ama, “Ɓǝ̀ a wu nǝ ɓun a ɓadǝmbǝam sǝ a nǝ peri abanam ngga, mǝ nǝ po amǝnia yì agir ka kat.”
10Yesu ne wi ama, “Shetan, upi banam! Malǝmce mala Ɓakuli ka na ama,
“ ‘Peri aban Mǝtalabangŋo
Ɓakuli mo,
Kǝ yì mwashat ɓǝrɓǝr na
a nǝ kpate ka.’ ” # 4:10 Ɓalli gbal aɓa:
Nggur 6:13
.
11Nda sǝ Shetan ɗekina Yesu ka, sǝ amǝturonjar yiu à yì bwali wi kam.
Tita turo mala Yesu a Galili
(Markus 1:14-15; Luka 4:14-15)
12Lang Yesu ongŋǝna ama murǝm Hirǝdus Antipas kùrna Yohana a ndàkurban ngga, lo ɗeki nzali Yahudi o a bu-nzali Galili. 13Banì sau a Nazarat ɗang, turo kya do a Kapanahum, a kun Garang Galili a bui mala amǝ Zebulu andǝ amǝ Naftali. 14Mǝnia ka pa anggo ace mǝnana ɓǝa lumsǝ cau mana pur a kun Ishaya mǝɓangna mala Ɓakuli ka ama:
15“Wu kwaki kir wun,
wun amǝ nzali Zebulu
andǝ Naftali.
Wun aɓwana mǝnana
wu do amur njargula ká
a kun Garang,
a nkaring Mur Jodan ngga.
Wu kwaki kir wun,
wun amǝ Galili,
la mala aɓwana mana
amǝ Yahudi na raka.
16Aɓwana mǝnana
à do a pǝndǝa ka,
à sǝna tǎlaban mǝgule.
Yì aɓwana mǝnana
à do a yinggǝli lú ka,
tǎlaban sulǝna a bania.”#4:16 Ɓalli gbal aɓa: Isha 9:1,2.
17Lo a baku mǝno ka Yesu tita hamnǝ cau, kǝ na ama, “Wu pwanzali, wu pǝlǝ nzǝm wun arǝ acauɓikea ma'wun, acemǝnana Domurǝm mala kuli gbashina.”
Yesu tunǝ amǝkpate amǝdǝmbe
(Markus 1:16-20; Luka 5:1-11)
18Yesu na ban gya a kun Garang Galili, sǝ mǝsǝì kpa arǝ aɓwana ɓari amǝ'eambǝu, Shiman mǝnana à tunǝki ama Bitǝrus ka andǝ mǝ'eambǝi Andǝru. À nda ban taula nǝ ndámbú aɓa Garang ace mǝnana yia ka bwal-nji nda turo malea. 19Yesu nea wia ama, “Wu yiu a tam, mǝ nǝ tsǝk wun, wu nǝ̀ pǝlǝ amǝ oari aɓwana acem.” 20À lo tu à nying andámbú malea sǝ à o ate.
21Yesu nggǝ ká a dǝmbǝa ka, yi sǝn aɓea amǝ'eambǝu ɓari ɗǝm, Jemis muna mala Zabadi andǝ mǝ'eambǝi Yohana. À nda ɓa waru andǝ tárria Zabadi. À nda ban taliki andámbú malea. Pǝlǝa Yesu tunǝia. 22À lo à fwa rǝia à nying waru andǝ tárria sǝ à o ate.
Yesu kanigir sǝ twali aɓwana ban rǝkwana
(Luka 6:17-19)
23Yesu gya aɓa nzali Galili kat kǝ kanigir aɓalǝ andakpapi mala amǝ Yahudi, sǝ kǝ hamnǝ Cau Amsǝban mala Domurǝm mala Ɓakuli amur aɓwana. Twalî aɓwana ban ambalang arǝpangŋa andǝ akwano kat. 24Cau male gya akiban aɓa bu-nzali Suriya kat. À yinǝi wi nǝ amǝkwano ɗàngɗáng: a mǝnana à nda ɓa rǝkwana kǝrkǝr, andǝ a mǝnana akukwar kutia rǝia, andǝ a mǝnana à ndanǝ kwano wukiaban, andǝ a mǝnana ɓe kǝ barea wu ka, yi twalia wia ban akwano malea kat. 25Ɓwabunda pas mǝnana à pur a bu-nzali Galili, andǝ Dekapolis#4:25 Dekapolis: Ko “ala lum.” ka, à pu ata Yesu. Aɓea gbal ka à purki arǝ anggea-là Urǝshalima, andǝ mala acili abu-nzali mala amǝ Yahudi andǝ aban mǝnana a nkaring Nggeasala Jodan ngga, kat à o ate.
अहिले सेलेक्ट गरिएको:
Matiu 4: mbu
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© Wycliffe Bible Translators, Inc. and © The Nigeria Bible Translation Trust 2016
