Matayo 9

Yesu akumuponia umunu umunyalitela

(Maliko 2:1-12; Luka 5:17-26)

1Ndawe Yesu ingilige mukipugu, na ukulowoka inyanza ibita ukwawo. 2Neke avanu avamwi pevamulete umunu umunyalitela, vamutegwe mulupasa, Yesu pe aluwene ulufuuwo lwawo vala avanya kumutegula umutamwa amulonje umunyalitela itigila, “Ve mwanangu veve wikangasage, inzanangifu sako udegepilwe”. 3Neke apene baho valipovali avigisi va indagilo vilonganzige munumbula sawo vitigila, “Umunu uyu ibedala Nguluvi.” 4Neke Yesu weakulukagula lwevihosa mu numbula sawo, ndawe avalongelige, “Kumbi ndawuli mwihosa inzanangifu munumbula senyu? 5Lulikwi ulupefu ukutigila, ‘Udegepilwe inzanangifu sako’, apangi ukutigila, ‘Uwuke ubitage?’ 6Neke mulukagulage ulwa Umwana va Munu inalo uludali konivala lwakudegepela avanu inzanangifu sawo.” Swe akumutigila yula umunyalitela, “Wime tegule ulupasa lwako uwuyage!” 7Ndawe umunu yula ahegige ibitaga kukaye ukwawo. 8Neke ililugu lya avanu lyave likumuwona lyasasave, likumulumba Nguluvi ye atawe uludali ulu kuvanu.

Matayo ikemelwa

(Maliko 2:13-17; Luka 5:27-32)

9Yesu pe ilutila ukuhuma uko, amuwene umunu akong'ome mukaye ya imbemenenge ilitawa lyakwe Matayo, ndawe amulongelige ukutigila, “Ninile.” Ndawe imige nu kumuninila. 10Yesu pealisige ikilyo mukaye ya Matayo, avanyakukong'asa imbemenenge na avanyanzanangifu vasile neke vateng'emale pamwi na Yesu na avanyigendo vakwe pawulilo. 11Neke avene avafalisayo pevaluwene ulu vawusise ku vanyigendo va Yesu vitigila, “Kumbi ndawuli umwigisi venyu peilya pamwi na avakong'asa imbemenenge na vanyanzanangifu?” 12Neke peapulike ulo avalonje itigila, “Avanofu sivibitagi ku mukofi va imigoda nda pesi avatamwa hela. 13Apo nditigila mubite mukiyigise ukuganula ing'ani isi ‘Nene ndisaka ulusungu sindisaka inambika nda.’ pakuva sindasili mukukemela avagolofu, pesi avanyanzanangifu hela.”

Ulwa ukwiyima ukulya pakwifunya

(Maliko 2:18-22; Luka 5:33-39)

14Neke ulusika lulo vase avanyigendo va Yohane neke vamuwuse Yesu pakutigila, “Kumbi ndawuli hwehwe na avafalisayo twakwiyima ukulya na avanyigendo vako sivakwiyima ukulya?” 15Neke Yesu avapitule atigile, “Avalaalike kuluwungo vahuguvala ndawuli umunyaluwungo wealibaho? Nachene siluhwaniti! Pakuva ikimunyi sachusa pesaava ahesiswe umunyaluwungo pepene pe saviyima ukulya.

16“Sikwali umunu yeaipapika ikipapiko ikipya mumwenda umulovela, peapapike apono pala pongelekela ukudemuka. 17Sikovali avanu avavisopa idifayi imya mufisilo ifilovela, wone yisopwe umo ifisilo fitudika na idifayi yibohoka na ifisilo ifyo fiva fyanangike, neke idifayi imya yayisopwa mufisilo ifipya ipo pe mbefili finana.”

Avanyalufuuwo vipigilwa imiitu

(Maliko 5:21-43; Luka 8:40-56)

18Yesu avepealonga isi, ndawe aasige umuvina va isinagogi neke afugame itigila, “Umwalivangu akekufwa yilino de ndisuka wuse ukamugeleke iliwoko lyako nave avamumi.” 19Ndawe Yesu awukige ibita pamwi na vanyigendo vakwe na umuvina va isinagogi.

20Neke pevabitige, umung'inetu umunya wutamwa uwa ukuhuma idanda, yee mufwahu hilo myaka minyichumi na givili aasile mumbele mwa Yesu neke apamise ilipembo lya umwenda gwakwe. 21Pakuva ahosige munumbula yakwe: “Ulwa wone mamise umwenda gwakwe, mba monite.” 22Avelige ipamisa ilipembo Yesu apitwike swe akumuwona, neke peamulongele itigila, “Nyamalage mwalivangu, ulufuuwo lwako lukuponise.” Umung'inetu yula aponite lulusika lulula.

23Yesu peyeafisile mukaye ya umuvina va isinagogi avafisile avanu avakufi va imembe isa ikivembo, na amalugu gikoola na ukuvemba, 24neke peavalongele ukutigila, “Muhume kugati kono! Mbwene umuhinza uyu salafwa nda agonelye tulo hela.” Neke pevamuheke. 25Avanu peyevahumile, Yesu inje neke amwibate iliwoko umuhinza yula swe akwima mumi. 26Ing'ani iso sapulise mung'i yila mbeyili.

Yesu iponia avabofu vavili

27Yesu peilutila peihuma pala avabofu vavili vamufwatige kono wevivemba, “Tudegepele, ve Mwana va Daudi veve.” 28Yesu ave akwingila mukaye, avabofu vala vahegelye, neke Yesu avawuse, “Mwifuuwa ukutigila nene nywanite ukuvapigila ulukani ulo?” Nawo vamutige, “Ena twifuuwa hilo Mutwa.” 29Ndawe avapamisige amiho gawo swe akuvatigila, “Luvelage kwa nyenye ndawe lwemwifuuwa.” 30Amiho gawo swe gidinduka, ndawe Yesu avalagisige nu kuvakenyela ukutigila, “Mulalongela munu yeavesaga ing'ani isi”. 31Neke vave vihega pala vavanzile ukutagalisa ing'ani sa Yesu mung'i yila mbeyili.

Yesu akumuponia umunyakibubwi

32Avanu pevahegige, avanu avamwi vamuletye Yesu umunu umunyakibubwi kangi ina masoka. 33Ave akulihumya ilisoka lila, umunyakibubwi yula avanzile ukulonga, avanu avevalibaho vasumite uwuhulo uwu vitigila, “Sitwetulaluwona nda ulukani ulwindawe ulu mung'i ya mu Isilaeli.” 34Neke Avafalisayo vatigile, “Uyu ihumya amasoka kwa ludali lwa ilivina lya amasoka.”

Yesu akuvawonela lusungu avanu

35Neke Yesu apilimige muboma na mufijiji mbefili akwigisa mumasinagogi gawo, nu kudalika Ulukani Ulunofu lwa uwutwa wa Nguluvi na ukuvaponia inamwa mbesili na uwuhomefu mbewuli. 36Avelige akuvawona avanu malugu avawonie ulusungu, pakuva vawonekige vafuluge nu kuhuguvala witigila ng'olo ingaya umukwamisi. 37Neke Yesu avalongele avanyigendo vakwe ukutigila, “Isanga ngomi hilo neke avanyakubeta vakefu. 38Apo mumusukage umunyamugunda asindike avanyakubeta mu mugunda gwakwe.”

अहिले सेलेक्ट गरिएको:

Matayo 9: HeNT2004

हाइलाइट

शेयर गर्नुहोस्

कपी गर्नुहोस्