Luka 18

Ikiganiso icha umufwile na umuhisi

1Neke Yesu avalongele ikiganiso, ulwa luvavaje ukumusuka Nguluvi ifilo mbefili, na muladedela imitima. 2Neke atigile “Epwali umuhisi uyumwi mu boma yee mugaya choga kwa Nguluvi nambi ukutuga vanu. 3Na mu boma yiyo epwali umung'inetu mufwile, yamufwatige mbepali, itigila, utuhigage nene na umutavangu vangu. 4Pamwandi abihye, neke pambele ihosise munumbula yakwe itigila, ‘Nambi we singumogopa Nguluvi nambi ukutuga munu, 5neke lino pakuva umufwile uyu akufwahisa, ndimuhigila inongwa yakwe alonga afwahisage mbepali ukunzusila muhongi.’”

6Na Umutwa atigee, “Mupulikisage cheilonga umuhisi umugaya choga. 7Ngali mwitigila Nguluvi savakundilila avahagule vakwe avakumuvembela ikilo na ikimunyi? Ngali mwitigila ahaava ukuvakundilila? 8Nguvalongela sisaahava ukuvakundilila. Neke ulwene nambi ndahihyo, ndawuli peyeasila mung'i Umwana va Umunu, saalufika ulufuuwo mung'i!?”

Umufalisayo na umukong'asa imbemenenge

9Neke Yesu avalongele ikiganiso iki cha avanu avanya lwitupyo ukuta awene vakwiwonaga vagolofu na ukuvabedala avangi mbevali. 10“Avanu vavili vahele ku tembeli kukwifunya: uyumwi Mufalisayo uvakavili Mukong'asa imbemenenge. 11Umufalisayo yula imite ivanga ukwifunya kinyele munumbula yakwe itigila, ‘Nguluvi, ngukulumba pakuva nene sindindawe avanu avangi avaposi, avagaya ulufuuwo, avagoni, nambi ndawe uyu umukong'asa imbemenenge. 12Nene ndakwiyima ukulya filo fivili mufilo ifimufung'ati, ndatwitawula ifitawulwa kimwi kwa finyichumi mufinu fyangu mbefili.’ 13Neke yula umukong'asa imbemenenge, imite pataali na sigelii nambi ukukang'ula amiho kuchanya, ndawe atigilige, ‘Nguluvi, ndegepelage nene ndemunyanzanangifu.’ 14Nguvalongela, uyu apilwike ibita ukwawo we adegepilwe, ukulutila yula. Pakuva yeyeitupyaga aleveswa yeyeilevesaga uyo akung'umikwa pachanya.”

Yesu akuvafunyilila avana avadodo

(Matayo 19:13-15; Maliko 10:13-16)

15Neke avanu vamuletele Yesu avana fyali sambi avageleke amawoko. Neke avanyigendo vakwe pevaluwene ulo vavakenyele. 16Neke Yesu avakemele vase kulumwene, itigila; “Muvalekage avana avadodo vase kwa nene, mulavatanila, pakuva avanu avindawe iwo uwutwa wa Nguluvi wawo. 17Nachene nguvalongela, umunu yeyeavesaga yesiakwanukila uwutwa wa Nguluvi ndawe umwana umudodo sisaingila.”

Umunu umunono

(Matayo 19:16-30; Maliko 10:17-31)

18Umunu uyumwi umutema va Avayudaya, amuwusise Yesu itigila, “Mwigisi ve munofu, ngitage ndawuli pa kuhala uwumi wa mbepali?” 19Neke Yesu amutigile, “Mbi ndawuli ukunigila ndimunofu? Asukuli umunofu pesi yumwi hela, nave ye Nguluvi. 20Usisele Indagilo: ‘Ulava mugoni; ulawulaga, ulahisa, ulolelela uwudesi; velage na choga kulu dado na uyuwo.’” 21Neke umwene atigile, “Iso mbesili ndisisele uluhuma pa wana wangu.” 22Yesu avelige ipulika iso amulonje, “Peupugilwe kinu kimwi, kaguse fyewinafyo mbefili ukavagavile avamikaa, nave uva na uwunono kuchanya, neke pewuse uninile.” 23Neke umwene ave ipulika iso ahuguve pakomi, pakuva e munono hilo.

24Yesu we peamulavila atigee, “Lutalamu vee kuvanono ukwingila ku wutwa wa Nguluvi! 25Pakuva lwiva lupefu ingamiya pakulutila mukidwi icha ulusingi, sindawe umunu umunono pakwingila mu wutwa wa Nguluvi.” 26Na avapulike vatigee, “Mbi apo ye nani, yeahwanite ukupokwa?” 27Yesu atigile, “Lwesiluhwaniti ku avanu kwa Nguluvi luhwanite.”

28Petulo neke atigile, “Wonage hwehwe tufilesile ifinu fyetu mbefili na ukukuninila!” 29Swe akuvalongela, “Nachene nguvalongela, asukuli umunu yeayilesile ikaye, nambi uvakwe, nambi munyalukolo, nambi avegasi, nambi vana, wimila uwutwa wa Nguluvi, 30yesisaanukila kolofu ukulutila ulwa lino; na mung'i iyikusa uwumi wa mbepali.”

Yesu ilonga lwa kadatu ulwa ifwa nu lusilibuko lwakwe

(Matayo 20:17-19; Maliko 10:32-34)

31Swe Yesu akuvategula vala avanyichumi na vavili, nu kuvalongela, “Muwonage! Twigang'amuka ukubita ku Yelusalemu, na ing'ani mbesili sikwila, seandikilwe Umwana va Umunu na avavisi. 32Pakuva atawulwa mumawoko ga avamyanza umo elangwa, apigilwa imbi, afunyilwa amati. 33Nawo vamutova ni mikungo iminyamifwa, pambele vamuwulaga, na ikimunyi icha wudatu asilibuka.” 34Neke avene sivalukagwi ulo nambi ludodo, vevafihe iso kwekutigila kiki, na sivasikagwi isesilonzilwe.

Yesu akumuponia umubofu

(Matayo 20:29-34; Maliko 10:46-52)

35Lwave Yesu peahegelye ku Yeliko, umunu uyumwi umubofu alateng'eme palubali pang'asi isuka ifitawulwa. 36Na avelige ipulika avamalugu pevilutila awusise, “Kwina kiki?” 37Neke vamulongele, “Yesu uva ku Nasaleti ilutila.” 38Swe iyova weitigila, “Yesu ve mwana va Daudi, umbonelage ulusungu nene!” 39Ndawe vala veve valongwe vamukenyelige sambi akatuke, neke umwene peagine hilo ukuyova: “Be mwana va Daudi umbonelage ulusungu nene.” 40Swe Yesu akwima, nu kulagisa vamulete kulumwene. Na peahegelye amuwusise, 41“Wisaka ngupigile kiki?” Swe itigila, “Mutwa, ndisaka ukulava.” 42Ndawe Yesu amutigilige, “Upelwage ukulava! Ulufuuwo lwako lukuponise.” 43Lulusika lulo swe ilava, nu kumufwata, kono we akumulumba Nguluvi. Na avanu mbevali pevasiwene iso vamusumye Nguluvi.

अहिले सेलेक्ट गरिएको:

Luka 18: HeNT2004

हाइलाइट

शेयर गर्नुहोस्

कपी गर्नुहोस्