भजनसंग्रह 36:5-10

परमप्रभु, तपाईंको अटुट प्रेम स्‍वर्गसम्‍म पुग्‍दछ, तपाईंको विश्‍वासयोग्‍यताले आकाशसम्‍म छुँदैछ। तपाईंको धार्मिकता पहाडहरूजस्‍तै उच्‍च छ, तपाईंको न्‍याय समुद्रजस्‍तो गहिरो छ, तपाईंले मानिस र जनावरको हेरचाह गर्नुहुन्‍छ। हे परमेश्‍वर! तपाईंको अटुट प्रेम कति अनमोल छ! तपाईंका पखेटाका छायाँमुनि हामीले सुरक्षा पाउँछौं। तपाईंले दिनुभएको प्रशस्‍त भोजन हामी खाँदछौं, आफ्‍नो भलाइको नदीदेखि तपाईंले पिउन दिनुहुन्‍छ। तपाईं सारा प्राणीका मूल हुनुहुन्‍छ, तपाईंको ज्‍योतिको कारणले हामी उज्‍यालो पाउँछौं। जसले तपाईंलाई चिन्‍दछन्, तिनीहरूलाई प्रेम गरिरहनुहोस्। जो धर्मी छन्, तिनीहरूको भलाइ गरिरहनुहोस्।