लूका 5:27-32

त्‍यहाँबाट गइरहँदा येशूले लेवी भन्‍ने एक जना कर उठाउने मानिसलाई भन्‍सारमा बसिरहेको देख्‍नुभयो। येशूले तिनलाई भन्‍नुभयो, “मेरो पछि लाग।” लेवीले सबै कुरा छोडेर उहाँको पछि लागे। त्‍यसपछि लेवीले येशूलाई आफ्‍नो घरमा भोज खान बोलाए। त्‍यस भोजमा कर उठाउने धेरै कर्मचारीहरू र अरू थुप्रै मानिसहरू पनि थिए। फरिसी र फरिसीका धर्म-गुरुहरूले गनगनाउँदै येशूका चेलाहरूलाई भने, “तिमीहरू किन कर उठाउने र अरू पापीहरूसँगै बसेर खान्‍छौ हँ?” येशूले तिनीहरूलाई जवाफ दिनुभयो, “डाक्‍टर त निरोगीलाई होइन, रोगीलाई पो चाहिन्‍छ! त्‍यसरी नै म धर्मीलाई होइन, तर पापीलाई पश्‍चात्ताप गर भनी बोलाउन आएको हुँ।”