लेवी 18:26-30

तिनीहरूले यी सबै घिनलाग्‍दा कामहरू गरेर देशलाई अशुद्ध तुल्‍याए तर तिमीहरूले ती काम नगर्नू। तिमी इस्राएलीहरू र तिम्रा माझमा बास गर्ने विदेशीहरू सबैले परमप्रभुका नियम र आज्ञाहरू मान्‍नुपर्नेछ। तब त्‍यो देशले जसरी तिमीहरूभन्दा अघि बसोबास गर्ने त्यहाँका बासिन्दाहरूलाई देश अशुद्ध गरेको कारणले धपाइदिएको थियो, त्‍यसरी तिमीहरूलाई चाहिँ धपाइदिनेछैन। तिमीहरू जान्‍दछौ कि जसले यी घिनलाग्‍दा काम गर्छ, त्‍यो परमेश्‍वरको जन ठानिनेछैन। अनि परमप्रभुले भन्‍नुभयो, “मैले दिएका आज्ञाहरू पालन गर र तिम्रा अघि त्‍यस देशमा बास गर्ने मानिसहरूका चालमा नचल र त्‍यस्‍ता कुनै काम गरेर आफैंलाई अशुद्ध नपार। म परमप्रभु तिमीहरूका परमेश्‍वर हुँ।”