हिब्रू 10:16-25

“परमप्रभु परमेश्‍वर भन्‍नुहुन्‍छ, ‘आउने दिनहरूमा तिनीहरूसँग बाँध्‍ने नयाँ करार यही हो। मेरो व्यवस्था तिनीहरूका हृदयमा राखिदिनेछु अनि त्‍यो तिनीहरूका मनमा लेखिदिनेछु’।” उहाँले अझै भन्‍नुहुन्‍छ, “फेरि म तिनीहरूका पाप र नराम्रा कामहरू सम्‍झनेछैनँ।” यसकारण यी सबै पाप क्षमा भएपछि फेरि पाप मेटाउन बलिदान चाहिएन। यसकारण हे भाइहरू हो, येशूको रगतले गर्दा हामी महापवित्र स्थानमा साहससँग पस्‍न सक्‍छौं। उहाँले आफ्‍नो शरीररूपी पर्दाबाट हाम्रो लागि नयाँ र जीवन दिने बाटो खोलिदिनुभयो। परमेश्‍वरको घरमा अधिकारसम्‍पन्‍न अब हाम्रो एक जना ठूला पूजाहारी हुनुहुन्‍छ। खराब विवेकबाट हाम्रा मन चोख्‍याइएको छ र शुद्ध पानीले हाम्रो शरीरलाई धोइएको छ। यसकारण साँचो मन र पक्‍का विश्‍वासले निर्धक्‍क भएर हामी परमेश्‍वरकहाँ जाऔं। हामीले राखेका आशा बलियोसँग समातिराखौं किनभने आफूले गरेको प्रतिज्ञा परमेश्‍वरले पूरा गर्नु नै हुनेछ। हामी आपसमा एक-अर्कालाई प्रेम र भलाइ गर्ने कुरामा, उत्‍साह दिने कुरामा विचार गर्ने गरौं। कसै-कसैको संगतिमा नआउने बानी छ। त्‍यसो नगरौं। त्‍यसमा पनि बरु प्रभुको दिन आउन आँट्यो भन्‍ने जानेर एक-अर्कालाई अझ हौसला दिने गरौं।