१ यूहन्ना 5
5
संसारमाथिको हाम्रो विजय
1येशूलाई मुक्ति दिने राजा ख्रीष्ट भनेर विश्वास गर्ने जति सबै परमेश्वरका सन्तान हुन्। पितालाई प्रेम गर्नेले पुत्रलाई पनि प्रेम गर्छ। 2परमेश्वरलाई प्रेम गरेर अनि उहाँको आज्ञा मानेर नै उहाँका सन्तानलाई हामी प्रेम गर्छौं भन्ने थाहा हुन्छ 3#यूहन्ना 14:15किनभने परमेश्वरको आज्ञा मान्नु नै उहाँलाई प्रेम गर्नु हो। उहाँका आज्ञाहरू त्यति कठिन छैनन् 4किनभने परमेश्वरको प्रत्येक सन्तानले संसारलाई नै जित्न सक्नेछ। हाम्रो विश्वासले नै हामी संसारलाई जित्छौं। 5कसले संसार जित्न सक्छ? येशूलाई परमेश्वरका पुत्र भनेर विश्वास गर्नेले नै संसार जित्छ।
येशू ख्रीष्टका साक्षीहरू
6येशू ख्रीष्ट पानी र रगतले आउनुभयो, पानीले मात्र होइन, रगतले पनि हो। यो सत्य हो भनी पवित्र आत्मा नै साक्षी हुनुहुन्छ किनभने पवित्र आत्मा नै सत्य हुनुहुन्छ। 7तीनैवटा साक्षीहरू छन्: 8आत्मा, पानी र रगत। यी तीनैवटाले एउटै साक्षी दिन्छन्। 9मान्छेले दिएको साक्षीमा हामी विश्वास गर्दछौं। तर परमेश्वरले दिनुभएको साक्षी अझ बलियो छ। परमेश्वरले नै आफ्नो पुत्रको बारेमा साक्षी दिनुभएको छ। 10त्यसो हुँदा परमेश्वरको पुत्रमाथि विश्वास गर्नेको आफ्नै हृदयभित्र यही साक्षी हुन्छ। तर परमेश्वरमा विश्वास नगर्नेचाहिँ परमेश्वरको साक्षीलाई नै झूटो सम्झन्छ किनभने पुत्रको बारेमा परमेश्वरले दिनुभएको साक्षीलाई नै पत्याउँदैन। 11#यूहन्ना 3:36साक्षी यही हो: परमेश्वरले हामीलाई अनन्त जीवन दिनुभएको छ र यो जीवनको मुहान उहाँका पुत्रमा छ। 12परमेश्वरको पुत्र हुनेसँग जीवन हुन्छ, पुत्र नहुनेसँग जीवन हुँदैन।
अनन्त जीवन
13अनन्त जीवन पाएका छौ भनी तिमीहरूलाई थाहा होस् भनेर नै परमेश्वरका पुत्रमा विश्वास गर्ने तिमीहरूलाई यो लेख्दै छु। 14परमेश्वरको इच्छाअनुसार केही कुरा हामीले माग्दा उहाँले सुन्नुहुन्छ भनेर नै उहाँका अगाडि जाने आँट गर्छौं। 15हामीले जहिले मागे पनि उहाँले हाम्रो कुरा सुन्नुहुन्छ। यो सत्य हो भनी जानेको हुनाले हामीले यो पनि जान्दछौं कि उहाँसित मागेका कुरा हामी पाउँछौं। 16कसैले आफ्नो भाइलाई मृत्युमा नपुर्याउने पाप गरिरहेको देख्छ भने परमेश्वरसित प्रार्थना गरिदेओस् र परमेश्वरले उसलाई जीवन दिनुहुनेछ। तर योचाहिँ मृत्युमा नपुर्याउने पाप गर्नेको लागि मात्र हो। मृत्युमा पुर्याउने पाप पनि छ। तर म तिमीहरूलाई यसको लागि प्रार्थना गर्न भन्दिनँ। 17सबै खराब काम जति पाप हो। तर सबै पापले मृत्युसम्म पुर्याउँदैन।
18परमेश्वरको बालकले पाप गरिरहँदैन किनभने परमेश्वरका पुत्रले उसलाई जोगाउनुहुन्छ र शैतानले उसलाई हानि गर्न सक्दैन। यो हामीलाई थाहै छ। 19पूरै संसार शैतानको अधीनमा भए पनि हामीचाहिँ परमेश्वरका सन्तान हौं भनी हामीलाई थाहा छ। 20परमेश्वरको पुत्र आउनुभयो र उहाँले हामीलाई साँचो परमेश्वरलाई चिन्ने ज्ञान पनि दिनुभयो। यो हामीलाई थाहा छ। हामी उहाँका पुत्र येशू ख्रीष्टमा भएकोले साँचो परमेश्वरमा छौं। उहाँ नै साँचो परमेश्वर हुनुहुन्छ र यही अनन्त जीवन हो।
21मेरा बालकहरू, तिमीहरू मूर्तिहरूबाट अलग बस।
अहिले सेलेक्ट गरिएको:
१ यूहन्ना 5: सरल नेपाली
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Simple Nepali Holy Bible © Nepal Bible Society, 2008.