Luka 23

Yɛsu e nuyêl Pilatus

(Mat 27:1-2, 11-14; Mar 15:1-5; Yoh 18:28-38)

1Bemat o mwa ba sogo, ba kyè na Yɛsu wɔ e nuyêl Gwɔmna Pilatus. 2Ko yɛn a hwo tɛ̀sɛ kun mɛ wɔgɔ, “Wot a vo mwat womo a sé rigim bemat mot. A sé tang ɛn, yɛn a tala dyâm vwel vɔk na Da vwel BeRoma wɛt, ko a to tē, yɛ a sé Mwat de Dagwi a kasa na a sey bemat wɔgɔ, yɛ à gbɔng gwɔ̀m.”

3Pilatus a hwo rangal hɛ, a ye, “Hwo wɛ hwà sé Gbɔng Gwɔ̀m BeYuda arɛt?”

Yɛsu a toyo a yɛ, a yang ɛ, “Ey, hwà ha yɛt.”

4Ko Pilatus a yâng begbɔng bepiris tanga regyɛng bemat o, “Ma sɛ̀ mwat womo na pyɛ de mê gang ɛ mɛ̀ wɛt.”

5Ko bemat o ba shonong e ra Pilatus wɔgɔ, “A ga luk bemat e sevwêl Yudiya mwa na basa mɛ. Á hwo mɛ̀ e Galili, ko á womo, a ga vɛ̄ hɛ mɛ̀ e ngamo.”

Yɛsu e nuyêl Herodes

6Jeng de Pilatus a wok ano, a hwo rangal hɛn, a ye, “Mwat womo a sé mwât Galili arɛt?” 7Sede a wok, Yɛsu a yi e sevwel de Herodes e re ɛ̀ negwɔm, a tomo hɛ vɔk na yɛ, yaga e jeng o Herodes arɔng á sè e Yɛrusalɛm. 8Jeng de Herodes a di Yɛsu, a vɔk yey pyɛng sizɔng. Yimo á sè gyeng na a di ɛ, yaga a ga kana wokos há e ra yɛ, ko a simo na a di pyɛ bes de Yɛsu e ra. 9A hwo rangsâl Yɛsu nerangsal pyak, ko Yɛsu a toyo a yɛ na pyɛ cak wɛt. 10Begbɔng bepiris tanga bemât basâ Badu ba sé e tumal e hwomo, ko ba sé bûm tɛ́sɛ kûn Yɛsu. 11Herodes tanga bemât como mɛ ba hwo haras a yɛ, ko yɛn a shɛgɛsh hɛ. E bama mo, yɛn a tɛ̀ a yɛ gwogbɔng gworugu gworwat, ko yɛn a to tomo hɛ vɔk na Pilatus. 12Yimo, Herodes na Pilatus bá kana sè bemât repugu, ko e tuk hane mo, ba vo nesa na bemɛn.

Ba yɛrɛ a Yɛsu shɔt reku

(Mat 27:15-26; Mar 15:6-15; Yoh 18:39—19:16)

13Pilatus a hwo yila begbɔng bepiris, na bemât nuyel, tanga regyɛng bemat, 14a yang ɛn, “Yin a vey na mwat womo na me, ko yin a ye, a ga luk bemat. Ma ga kyè e yɛ ngyɛ̄k-ngyɛk e nuyel min, ko ma ka sɛ̀ ɛ na pyɛ de mê gang ɛ mɛ̀ wɛt e ji pyɛ́ de yin a tɛ̀sɛ kun mɛ e ra yɛ. 15Herodes arɔng a ka sɛ̀ ɛ na pyɛ cak wɛt, yaga ano de a to tomo hɛ vey na wot. Mwin, vit a pyɛ de mwat womo a ga ra, yemo de yê tɛ̀ be mɔrɔ hɛ. 16Yaga ano, ma rɔda tɛ̀ be dak ɛ na zining; e bama mo, mê hàla hɛ na a kyè.” [ 17E jeng kanɛ Nzem Gyilsit Nelɔ BeIsrayɛl e sè gbing-gbing na Pilatus a viri a bemat mwât ngyang gwining.]

18Bemat o mwa ba shusha gwolwɛlɛ, ba tē, “Bē wey na mwat womo! Viri a wot Barabas!” 19Barabas á sè mwat de bá tɛ̀ ɛ e ngyang, yaga bá kana ye be ye gup a negwɔm e repomo mo, ko yaga mɔrɔ̂ mwat arɔng.

20Pilatus a to shonong e ra bemat o, yaga a simo na a hàla Yɛsu. 21Ko yɛn a gwɛ̌ ta gwolwɛlɛ, ba tē, “Bē kak ɛ e ra cɔ́gɔt! Bē kak ɛ e ra cɔ́gɔt!”

22Pilatus a to yang ɛn hê netat, “Ko e yɛ̌ pyɛ vyes de mwat womo a ga ra arɛt? Ma ka sɛ̀ pyɛ cak de ya tɛ̀ be mɔrɔ hɛ wɛt! Ma rɔda tɛ̀, be dak ɛ na zining, na be hàla hɛ, a kyè.”

23Ko yɛn a sangal e de tâ gwolwɛlɛ, yɛn a tē ngyat wɔgɔ, sɛ̌ be wɔ̀ kak Yɛsu e ra cɔ́gɔt. E yɛnɛ mo, tɔ̀ mɛn ba shǎl. 24Ko Pilatus a gang Yɛsu na shɔt, yaga na a ra a yɛn pyɛ de ba simo. 25A viri a yɛn mwat de yɛn a simo, womo de bá kana tɛ̀ e ngyang yaga yé gup à negwɔm tanga mɔrɔ̂ mwat, ko a gang a yɛn Yɛsu, na be wɔ̀ ra a yɛ pyɛ de yɛn a simo.

Ba kak Yɛsu e ra cɔ́gɔt

(Mat 27:32-44; Mar 15:21-32; Yoh 19:17-27)

26Sede bemât como bá sè kyè na Yɛsu, yɛn a man na mwat hwak de ba tang ɛ, à Simɔn wo Kirene. A ga yi e nebapomô hey, ko a se kyè wɔ e ji repomo. Yɛn a vo ɛ, ko ba tɛ̀ ɛ, a wut cɔ́gɔt-kak, na a raa mɛ̀ Yɛsu.

27Regyɛng bemat pyak ra raa hɛ. Ko beha behak ba sé tanga yɛn vemo de ba tosho hɛ, ko ba lashe yey mɛn sizɔng. 28Yɛsu a doyo, a yang ɛn, “À behâ Yɛrusalɛm! Yin tosho me wɛt; tosho hin bato min tanga nèy min arɔng. 29Yaga jeng ya sé kyè vey de bemat ba rɔda ba ye, ‘Yin a sé vê yey pyɛng, à yin besang-gwon, yin vemo de yin a ga tɔs nèy wɛt, yin a ga ngas nèy arɔng wɛt!’ 30Jeng á yane de bemat ba rɔda ba hwo tâng beraku, ‘Gaba hin e ra wot!’ ko bê ba tâng berahwol, ‘Báng in hot!’ 31Ka sede bemat be ra pyɛ́ yemo na me de ma sé sede cɔgɔt de ya rɔngɔl lya, e yɛ̌ pyɛ de ya rɔda té na yin de yin a sé sede cɔgɔt de ya hworok arɛt?”

32Ba jut bemat beba arɔng vemo de bá kana gyilsit badu, ba kyè na yɛn, na be wɔ̀ mɔrɔ hɛn tanga Yɛsu. 33Jeng de yɛn a pom e dem de be tâng hɛ, à Gwokup Ratô Mwat, ko yɛn a kak ɛ e ra cɔ́gɔt tanga bemât gyilsît badu beba vane mo, gwining e vwɔ yege mɛ ko hwak e vwɔ mwɛlɛng mɛ. 34Ko Yɛsu a hwo ye, “À Da, hàla a yɛn banɛn mɛn, yaga yɛn a tɔk pyɛ de ba sé ra wɛt.”

Bemât como ba ra cáca na be gas mɛ̀ berugu mɛ e bato mɛn. 35Bemat ba tumal e hwomo, ba bɛrɛng pyɛ́ de ya té, ko bemakûk BeYuda kwong ba haras a yɛ, ba tē, “Á seres bemat behak; ka sede yɛ a sé Mwat de Dagwi a kasa na a sey bemat, ko tik na a sey tó mɛ!”

36Bemât como arɔng ba haras a yɛ, ba vey bagat na yɛ, ko ba nára a yɛ nshî jwaatat, 37ba ye, “Sēy tó mo, ka sede hwo wɛ hwà sé Gbɔng Gwɔ̀m BeYuda!”

38Ba jɛk pyɛ de ya tɛ̀ ba kak ɛ, ko ba tɛ̀ e rak o wɔgɔ, GBƆNG GWƆM BEYUDA A WOMO.

39Ko gwining e ji bemât gyilsît badu de ba kak ɛ a hwo tabas a yɛ nengyas, a ye, “Hwo wɛ hwà sé Mwat de Dagwi a kasa na a sey bemat wɛt arɛt? Sēy tó mo tanga wot!”

40Ko hwak kwong a hwo gyong ɛ, a yang ɛ, “Hwó tele hwo Dagwi wɛt arɛt? Hwo de ba gang o na shɔt sede yɛ. 41Ko gang na shɔt o mot ha sé tyɛng, yaga wot a sé sey tyɛng na pyɛ́ de wot a ga kana ra. Ko mwat womo a ga ra pyɛ cak vyes wɛt.”

42Ko a ye, “À Yɛsu, bàre na me jeng de hwó ba hwo re negwɔm mō!”

43Yɛsu a yang ɛ, “Tsak o mwin me ha a hwo: Yunung, hwà rɔda sè tanga me e Kwɔ̂n Pɔngɔ.”

Rekû Yɛsu

(Mat 27:45-56; Mar 15:33-41; Yoh 19:28-30)

44Sede gwi gwa vey e tē, sevwel o mwa sa ye mwangalang, ko sa sangal ano sɛ̌ dyām tyat nahywegelek, 45yaga gwi gwa tik nà ta. Ko gworugû bâng duk e Gbɔng Duk Re Fongol gwa vugu hɛ bebak o beba. 46Yɛsu a gbɔ na gbɔng fwɔ, a ye, “À Da, ma sé tik gabik hom e ji vɔ mō!” Bama de a ha ano, a hàla neken mɛ.

47Jeng de gbɔng o wo bemât como a di pyɛ de ya té, a nɔ̂ng Dagwi nerey, a ye, “Mwin, mwat womo a vɔk pyɛ vyes cak wɛt.”

48Jeng de bemât mwa vemo de ba tula hɛn na be bɛrɛng pyɛ de ya té ba di ano, ba hwo tòros hɛn vɔk e nelɔ, ko ba tɛ̀ vɔ e bato mɛn yaga lashê yey. 49Ko mwa vemo de ba tɔk Yɛsu kwong tanga beha de bá kana raa hɛ yi e sevwêl Galili ba tumal e jey, ba bɛrɛng pyɛ́ mo.

Lɛrɛ̂ Yɛsu

(Mat 27:57-61; Mar 15:42-47; Yoh 19:38-42)

50-51Mwat hwak á sɛ̀ de ba tang ɛ, à Yɔsɛf. Á yi e Arimatiya, repomô BeYuda rehak. Á sè mwat rwat, ko á sè cik e begwong mɛ. Á sè gyeng jeng de Dagwi ê re negwɔm e ra jey. Ko mwa ano de yɛ á sè gwining e ji bemakûk badu, á simo hâ bemɛn wɛt mwa na pyɛ de yɛn á ra. 52Yɛ wɛ kwong á wɔ́ na Pilatus, á rangal hɛ na be nɔng ɛ revîn Yɛsu, na a wɔ̀ lɛrɛ. 53Ano, a gyirik rɛ e vwel, a hanas rɛ na gworugu gwopwɛng gworwat o, ko a wɔ̀ lɛrɛ rɛ e ji sak de bá kana ta e ji gwofwa, vemo de bá kana lɛrɛ ɛ̀ mwat wɛt. 54Tuk hane ha sé tuk yông pyɛ́, ko ba vey bagât yel e Tuk Shábat.

55Beha de bá kana vey tanga Yɛsu yi e sevwêl Galili ba raa Yɔsɛf, ko yɛn a di sak o na gwong de ba lɛrɛ ɛ̀ revîn Yɛsu e ji vɛ. 56E bama mo, yɛn a to ɛn vɔk e lɔ, ba wɔ̀ yong behal nesang nerat tanga něy mɔmɔ ne nesang hyɔɔlɔl. Ko Tuk Shábat, yɛn a pɔng tyɛng sede remo de Badu mɛn ba ha.

अहिले सेलेक्ट गरिएको:

Luka 23: bomBI

हाइलाइट

शेयर गर्नुहोस्

कपी गर्नुहोस्