Luka 18
18
Há e ra mwât shɔt tanga kuma
1E bama mo, Yɛsu a hwo ha a bemât masâ fwom mɛ gwɔrɔ-há, na a dura a yɛn, yɛn a dopse ra won, ko yɛn a ye waa wɛt. 2A ye, “Mwât shɔt hwak á sɛ̀ e repomo rehak womo de a wok bengyip Dagwi wɛt, ko pyɛ mɛ yá sɛ̀ na mwasi arɔng wɛt. 3Kuma hwak á sɛ̀ e pomo hane mo arɔng womo de á dopse kyese na yɛ, á tang ɛ, ‘Gabɔk wɛt! Gas a me shɔt, na hwo sɛlɛ me na bemât repugu hom!’ 4E mɛsɛng o, mwât shɔt o a wok ɛ wɛt, ko e bama mo, a ye e yey mɛ, ‘Mwa ano de me wok bengyip Dagwi wɛt, pyɛ hom ya sɛ́ na mwasi arɔng wɛt, 5ko ma rɔda gas a yɛ shɔt o, yaga a ga shɔk a me yey; ka ano wɛt, ma rɔda ruru na nepyak vɛ́sɛ mɛ.’ ”
6Ko Darwey a yang ɛn, “Wet in betong na pyɛ de mwât shɔt sana tsak o wane á ha. 7Ko sɛ̌ Dagwi a rɔda gas a vemo de yɛ a ga kasa shɔt, vemo de be dopse tosho nagwi na nabwalak, na yɛ a sɛlɛ hɛn wɛt arɛt? A rɔda sè lɔ̀ɔ e ra sɛlɛ hɛn arɛt? 8Ma sé ha a yin, a rɔda gas a yɛn shɔt ziri na a sɛlɛ hɛn. Ko sɛ̌ jeng de Me de ma tɛ́ me mwat me ba vɛ̄ me, mê sɛ̀ bemat e jey de yɛn a sey tsak o na me arɛt?”
WoFarisi na mwât serês dyâm yeles na pyɛ́
9Yɛsu a to ha a bemat gwɔrɔ-há hemo, yɛn vemo de ba tâng bato mɛn, yɛn vɛ de ba sé berat, ko yɛn a byɛnɛng bwang bemat. 10A yang ɛn, “Bemat beba ba wɔ́ e Gbɔng Duk Re Fongol na be wɔ̀ ra won; gwining á sè WoFarisi, ko wo neba mo á sè mwât seres dyâm yeles na pyɛ́. 11WoFarisi mo a tumal e hagat, a ra won, a ye, ‘Ma feng a hwo, à Dagwi, de ma sé sede bwang bemat wɛt, sede bemat de be kat cwey pyɛ́, na bemat de be ragas neves, na bemât nejwang, kɛ sede mwât serês dyâm yeles na pyɛ́ womo. 12Me tik rê pyɛ́ nepɔlɔ neba e kawɛ sati, na me re a hwo fongol, ko me nɔngɔs jining e ji kuru ye kayɛ pyɛ de ma sɛ̀.’
13“Ko mwât serês dyâm yeles na pyɛ́ a tumal yikyik, a ka doyo bayis mɛ vɔk e lagwi wɛt, ko a tɛ̀ vɔ e rato zɔng, a ye, ‘À Dagwi, tosho reyɔm hom, me mwât banɛn!’ ” 14Ko Yɛsu a yɛnɛ há mo, a ye, “Ma sé ha a yin, a sé e mwat womo de a to ɛ vɔk e lɔ bama de Dagwi a ga tɛ̀ ɛ cik e bayis mɛ, ko a sé e woro wɛt. Yaga kawɛ mwat de a jut tó mɛ, a sé gbɔng o, Dagwi a rɔda tɛ̀ ɛ na a dyɛng to mɛ, ko yɛ womo de a dyɛng to mɛ, Dagwi a rɔda tɛ̀ ɛ na a sè gbɔng o.”
Yɛsu a tɛ̀ nerat e ra nèy
(Mat 19:13-15; Mar 10:13-16)
15Bemat behak ba vey na nèy necereng na Yɛsu, yaga na a bin tɛ̀ vɔ mɛ e ra nɛ. Ko jeng de bemât masâ fwom mɛ ba di ano, ba hwo gyong ɛn. 16Ko Yɛsu a yila nèy o vey na yɛ, a ye, “Tík in nèy, na ne vey na me! Yin ro nɛ wɛt, yaga e bemat sede yerê nèy nemo de ba rɔda ba sangal e ji Segwɔm Dagwi. 17Tsak o mwin me ha a yin: Ka sede mwat a sey Dagwi sede hwey wɛt, na Dagwi a re negwɔm e ra yɛ, ko a rɔda ba yel e ji segwɔm o wɛt.”
Mwat de á sè gbɔng darwey
(Mat 19:16-30; Mar 10:17-31)
18Mwât nuyêl BeYuda hwak a hwo rangâl Yɛsu, a ye, “À Mwat Basa, ma tɔk hwà sé mwat rwat. Mê ra sɛ́ na me bin sɛ̀ neken gbak-gbak arɛt?”
19Ko Yɛsu a yang ɛ, “Yaga sɛ́ de hwà yang me, ma sé mwat rwat arɛt? Vit a mwat rwat sɛ̌ Dagwi nju mɛ zɔng. 20Hwà tɔk badu wɔgɔ: ‘Hwo ra nejwang wɛt; hwo mɔrɔ mwat wɛt; hwo shigi wɛt; hwo ha hâ bɔs e ra mwat hwak wɛt; nɔ̂ng da mō na neng mō nerey.’ ”
21Ko mwat o a ye, “Ma hwo gyenges badu vane mo mwa yimo me wen vey e remo.”
22Jeng de Yɛsu a wok ano, a yang ɛ, “Hwà bidɛ pyɛ jining zɔng. Ci wɔ̀ row kayɛ pyɛ de hwà vɔk, na hwo gas a bepɛng dyām o, ko hwà rɔda ba sɛ̀ yas e lagwi. E bama mo, vey, na hwo ba raa me.”
23Jeng de mwat o a wok ano, a lashe yey mɛ, yaga yɛ a sé gbɔng darwey. 24Sede Yɛsu a di a lashe yey mɛ ano, a ye, “A sé gbang na bedaberey be yel e ji Segwɔm Dagwi! 25E ba sè nduga maryat wo yel e rewôl kwêt tolo, na darwey a yel e ji Segwɔm Dagwi!”
26Bemat de ba wok há mo ba rangal hɛ, ba ye, “Ko sɛ̌ e wǎ de bê ba tɔk sey neken mɛ arɛt?”
27Yɛsu a yang ɛn, “Pyɛ de bemat be tɔk ra wɛt, Dagwi e tɔk ra.”
28Ko Bitrus a yang ɛ, “Di, wot a ga tik pyɛ́ mot mwa na wot a raa hwo!”
29Ko Yɛsu a yang ɛn, “Tsak o mwin me ha a yin: Kawɛ mwat de a ga tik lɔ mɛ, kɛ hwā mɛ, kɛ begwa mɛ beras, kɛ da na neng mɛ, kɛ nèy mɛ, yaga na Dagwi a re negwɔm e ra jey, 30a rɔda sɛ̀ pyɛ́ de ye ba dal yane na nepyak ding-ding e jeng yemo, tanga neken gbak-gbak e jeng de ye kyè vey arɔng.”
Hê tat de Yɛsu a ha e ra reku mɛ
(Mat 20:17-19; Mar 10:32-34)
31Yɛsu a jut bemât masâ fwom mɛ kuru na vɛ beba vɔk e hagat, ko a yang ɛn, “Wok in, wot a sé kyè vɔk e Yɛrusalɛm, e kwɔn de ba rɔda sila kayɛ pyɛ de bezarap Dagwi bà kana jɛk e ra Me de ma tɛ́ me mwat. 32Ba rɔda nára me e vɔ bemat beduk, vemo de ba rɔda shɛgɛsh me, bê dùsa me, ko bê tulus me na netey. 33Yɛn a rɔda dak me na zining, ko yɛn ê mɔrɔ me. Ko e tuk hê tat, ma rɔda sene yi e reku.”
34Ko bemât masâ fwom mɛ ba jut ɛ̀ pyɛ cak e ji há hane mo wɛt. Ba ga lɛrɛ a yɛn cap-há mo, ko yɛn a ka tɔk pyɛ de yɛ a sé ha e ra tɛt o wɛt.
Yɛsu a wunta bayîs bwók de e ra won
(Mat 20:29-34; Mar 10:46-52)
35Jeng de Yɛsu a wɔ́ bagat na Yeriko, bwók hwak a sé e sangal e vwarâ gwong, a sé ra won. 36Sede a wok regyɛng bemat de ra sé kwey, a rangâl vemo de ba sé bagat na yɛ pyɛ de ya sé té. 37Ko ba yang ɛ, “A sé e Yɛsu wo Nazarɛt de a sé kwey.”
38A hwo gbɔ, a ye, “À Yɛsu! Hwêy Davit! Tosho reyɔm hom!”
39Ko bemat de ba sé e yel ba gyong ɛ, yɛn a yang ɛ a sǎ yuu. Ko a gwɛ̌ ye ngyat, a ye, “À Hwêy Davit! Tosho reyɔm hom!”
40Yɛsu a tumal, ko a nɔng ɛn nu, be vey a yɛ na bwók o. Jeng de a vey bagat, Yɛsu a rangal hɛ, a ye, 41“Hwó simo me ra a hwo sɛ́ arɛt?”
Bwók o a yang ɛ, “À Da, me simo na me to bɛrɛng jey.”
42Ko Yɛsu a yang ɛ, “Bɛrɛng jey! Ba ga tɛ̀ o tyang, yaga hwà tɛ̀ gap mō e ra me wɔgɔ, mê tɔk tɛ̀ o tyang.”
43E ji jeng o, a hwo bɛrɛng jey, ko a raa Yɛsu, a nɔ̂ng Dagwi nerey. Jeng de bemat ba di ano, yɛn mwa ba somo Dagwi arɔng.
अहिले सेलेक्ट गरिएको:
Luka 18: bomBI
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
