Yauhas 8
8
Tus Pojniam Uas Raug Ntes Vim Deev Hluasnraug
1Tiamsis Yexus nce mus rau pem Roob txiv Ntoo-Roj. 2Hnub tomqab thaum kajntug txoog Yexus rovqab los rau hauv lub Tuamtsev. Muaj neeg coob-coob tuaj nyob puagncig Nws, ces Nws txawm zaum thiab pib qhia lawv. 3Cov xibhwb uas qhia Kevcai thiab cov Falixais txawm coj ib tug pojniam uas lawv ntes tau thaum nws tabtom deev hluasnraug tuaj, lawv yuam kom nws sawv tabmeeg sawvdaws.
4Lawv hais rau Yexus tias, “Xibhwb, muaj neeg ntes tau tus pojniam no thaum nws tabtom deev hluasnraug. 5Nyob hauv peb txoj Kevcai, Mauxes tau xaaj hais tias, tus pojniam uas ua txhaum li no yuavtsum muab pobzeb ntaus nws kom tuag. Zaumno, Koj yuav hais licas?” #Levi 20:10; 2Kev 22:22-24
6Lawv hais li no vim lawv xav ua kom Yexus teb yuamkev, kom lawv thiaj komtxim tau rau Nws. Tiamsis Yexus txawm khoov thiab xuas Nws tus ntivtes sau hauv av. 7Thaum uas lawv tseem pheej nug Yexus qujqees ntxiv, Yexus txawm sawvtsees thiab hais rau lawv tias, “Nej cov uas nyob ntawm no, yog leejtwg yeej tsis tau ua txhaum hlo li, kom tus ntawd xub xuas pobzeb ntaus tus pojniam no.” 8Ces Yexus rov khoov xuas ntivtes sau hauv av dua.
9Thaum lawv hnov li ntawd, lawv txawm khiav ib tug zujzus mus lawm, cov laus xub khiav uantej. Tsuas tshuav Yexus nrog tus pojniam uas sawv ntawd lawm xwb. 10Yexus tsa qhovmuag ntsia thiab hais rau nws tias, “Lawv dua twg tas lawm? Tsis muaj leejtwg rautxim rau koj lov?”
11Tus pojniam ntawd teb tias, “Tus Tswv, tsis muaj leejtwg rautxim rau kuv os.”
Yexus hais tias, “Kuv los yuav tsis rautxim rau koj ib yam thiab. Ciali mus tsev, thiab tsis txhob ua txhaum ntxiv lawm.”]#8:11: Ntau phau ntawv qub uas xuas tes sau thiab ntau phau uas xub txhais lawm, tsis muaj cov lus uas nyob hauv (7:53—8:11) no; qee phau muaj nyob tomqab Yauh 21:24; qee phau muaj nyob tomqab Lukas 21:38; ib phau muaj nyob tomqab Yauh 7:36.
Yexus Yog Qhov Kaj Rau Neeg Ntiajteb
12Yexus rov hais dua rau cov Falixais tias, “Kuv yog qhov pomkev rau lub ntiajteb. Tus uas raws Kuv qab yuav tsis taug kev hauv qhov tsausntuj, tiamsis nws lub neej yuav tshavntuj nrig.” #Math 5:14; Yauh 9:5
13Cov Falixais hais rau Yexus tias, “Tej lus uas Koj hais ko, yog Koj rov ua timkhawv rau Koj xwb; Koj tej lus yeej tsis tseeb.” #Yauh 5:31
14Yexus teb tias, “Tsis yog li nej hais, txawm yog Kuv rov ua timkhawv rau Kuv los tej lus uas Kuv hais yeej tseeb, rauqhov Kuv paub tias Kuv los qhovtwg los thiab Kuv yuav mus qhovtwg. Tiamsis nej tsis paub xyov Kuv los qhovtwg los thiab Kuv yuav mus qhovtwg. 15Nej txiavtxim rawsli neeg lub siab xav; Kuv tsis txiavtxim rau leejtwg. 16Tiamsis yog Kuv txiavtxim, Kuv yeej txiavtxim ncajncees, rauqhov tsis yog Kuv tibleeg xwb; Leejtxiv tus uas txib Kuv los, Nws yeej nrog Kuv thiab. 17Twb muaj lus sau cia rau hauv nej txoj Kevcai lawm hais tias, yog muaj ob leeg ua timkhawv lawm, qhov uas nkawd hais ntawd yeej muaj tseeb tiag. 18Kuv yeej ua timkhawv rau Kuv, thiab Leejtxiv tus uas txib Kuv los, los Nws yeej ua timkhawv rau Kuv tibyam nkaus thiab.”
19Lawv nug Yexus hais tias, “Koj txiv nyob qhovtwg?”
Yexus teb tias, “Nej yeej tsis paub Kuv lossis Kuv Txiv. Yog nej paub Kuv, nej yeej yuav paub Kuv Txiv thiab.”
20Yexus hais tej lus no yog thaum Nws qhia hauv lub Tuamtsev, hauv chav uas tso tej phijxab rau nyiaj. Tsis muaj leejtwg ntes Yexus, rauqhov Nws lub sijhawm tseem tsis tau los txog.
Nej Mus Tsis Tau Qhov Kuv Yuav Mus
21Yexus rov hais rau lawv tias, “Kuv yuav ncaim mus; nej yuav nrhiav Kuv, tiamsis nej yuav tuag vim nej lub txim. Qhov uas Kuv yuav mus, nej mus tsis tau.”
22Yogli ntawd, cov Yudais tej nomtswv thiaj hais tias, “Nws hais tias qhov uas Nws yuav mus ntawd peb mus tsis tau. Puas yog txhais hais tias Nws yuav muab Nws tua?”
23Yexus teb tias, “Nej yog neeg ntiajteb, tiamsis Kuv yog neeg qaumntuj. Nej nyob hauv ntiajteb no, tiamsis Kuv tsis nyob hauv ntiajteb. 24Twb yog vimli no, Kuv thiaj qhia rau nej hais tias nej yuav tuag vim nej lub txim. Yog nej tsis ntseeg tias, ‘Kuv Yog Tus Uas Kuv Hais’ ntawd, nej yuav tuag rau hauv nej lub txim.”
25Lawv nug Yexus hais tias, “Koj yog leejtwg?”
Yexus teb lawv hais tias, “Kuv yog tus uas Kuv twb qhia rau nej thaum chivthawj los lawm.#8:25: Kuv yog tus uas Kuv twb qhia rau nej thaum chivthawj los lawm; lossis Vim licas kuv thiaj yuav qhia txhua yam no rau nej? 26Kuv tseem muaj ntau yam uas yuav hais txog nej thiab ntau yam uas yuav txiavtxim rau nej. Txawm li ntawd los, tus uas txib Kuv los, Nws yog tus tseeb, Kuv tsuas qhia rau neeg ntiajteb raws nraim li tej uas Kuv hnov Nws qhia xwb.”
27Lawv tsis totaub hais tias Yexus qhia txog Leejtxiv rau lawv li. 28Yogli ntawd, Yexus thiaj hais rau lawv tias, “Thaum nej muab Neeg Leejtub tsa dai rau saud lawm, nej yuav paub tias ‘Kuv Yog Tus Uas Kuv Hais’ ntawd; thiab nej yuav paub tias Kuv tsis ua ib yam dabtsi rawsli Kuv lub siab, tiamsis Kuv tsuas hais raws nraim li tej uas Leejtxiv qhia kom Kuv hais xwb. 29Thiab tus uas txib Kuv los yeej nrog Kuv nyob; Nws yeej tsis tau tso Kuv nyob ib leeg li, rauqhov Kuv yeej ibtxwm ua txhua yam rawsli Nws lub siab nyiam xwb.”
30Coob leej uas hnov Yexus hais tej lus ntawd tau los ntseeg Yexus.
Qhov Tseeb Yuav Tso Nej Dim
31Yogli ntawd, Yexus hais rau cov Yudais uas ntseeg Nws tias, “Yog nej ua rawsli tej lus uas Kuv qhia, nej thiaj yog Kuv cov thwjtim tiag. 32Nej yuav paub qhov tseeb, thiab qhov tseeb yuav tso nej dim.”
33Lawv teb tias, “Peb sawvdaws puavleej yog Anplahas cajces, thiab peb yeej tsis tau ua leejtwg qhev li. Uacas Koj lam hais tias, ‘Nej yuav dim’?” #Math 3:9; Lukas 3:8
34Yexus hais rau lawv tias, “Kuv qhia tseeb rau nej hais tias, txhua tus uas ua txhaum yeej ua txoj kev txhaum qhev. 35Tus qhev yeej tsis nrog tsev neeg nyob mus ibtxhis, tiamsis tus tub yuav nyob qhov ntawd mus ibtxhis. 36Yog Leejtub tso nej dim, ces nej yeej yuav dim tiag-tiag li. 37Kuv yeej paub tias nej yog Anplahas cajces. Tiamsis nej pheej nrhiav kev muab Kuv tua, rauqhov nej tsis ntseeg tej lus uas Kuv qhia. 38Kuv hais txog tej lus uas Kuv Txiv qhia rau Kuv, tiamsis nej ua rawsli tej lus uas nej txiv qhia rau nej.”
39Lawv teb Yexus hais tias, “Peb txiv yog Anplahas.”
Yexus teb lawv tias, “Yog nej yog Anplahas cov menyuam tiag, nej yeej yuav ua#8:39: Yog nej yog … nej yeej yuav ua; tej phau ntawv qub uas xuas tes sau, muaj Yog nej yog … ua. ib yam li Anplahas ua. 40Kuv tsuas qhia rau nej rawsli qhov tseeb uas Kuv tau hnov los ntawm Vajtswv xwb, tiamsis nej pheej nrhiav kev muab kuv tua. Anplahas yeej tsis ua li nej ua no ib zaug li! 41Nej ua yog nkaus li nej txiv tau ua los lawm.”
Lawv teb tias, “Peb tsis yog menyuam tsaub, peb muaj tibleeg txiv xwb, peb txiv yog Vajtswv.”
42Yexus hais rau lawv tias, “Yog Vajtswv yog nej txiv tiag, nej yeej yuav hlub Kuv, rauqhov Kuv los ntawm Vajtswv los thiab nimno Kuv nyob ntawm no. Tsis yog Kuv los Kuv xwb, tiamsis yog Vajtswv txib Kuv los. 43Vim licas nej thiajli pheej tsis totaub tej lus uas Kuv hais no? Rauqhov nej nyiaj tsis taus mloog Kuv tej lus qhia.
44“Dab ntxwgnyoog yog nej txiv, thiab nej yeej nyiam ua rawsli nej txiv lub siab. Txij thaum chivkeeb los nws yeej yog tus tua neeg thiab nws yeej ibtxwm tsis ua rawsli qhov tseeb, rauqhov yeej tsis muaj qhov tseeb nyob rau hauv nws hlo li. Thaum nws haislus dag, yog nws coj raws nraim li nws tus cwjpwm, rauqhov nws yeej yog tus niag dag thiab nws yog txhua tus uas dag leejtxiv. 45Tiamsis twb yog vim Kuv qhia qhov tseeb, nej thiaj tsis ntseeg Kuv tej lus. 46Nej cov leejtwg muaj peevxwm qhia tau hais tias Kuv ua txhaum? Yog Kuv yeej haislus tseeb xwb, uacas nej tsis ntseeg Kuv? 47Tus uas nyob rau hauv Vajtswv yeej mloog Vajtswv tej lus. Nej tsis nyob rau hauv Vajtswv, nej thiaj tsis mloog.”
Yexus Thiab Anplahas
48Cov Yudais teb Yexus hais tias, “Qhov uas peb hais tias Koj yog neeg Xamalis thiab Koj raug ib tug dab ntawd, tsis muaj tseeb lov?”
49Yexus teb lawv hais tias “Kuv tsis raug dab. Kuv yeej hwm Kuv Txiv, tiamsis nej saib tsis taus Kuv. 50Kuv tsis tau kom leejtwg hwm Kuv. Tiamsis muaj ib tug xav kom neeg hwm Kuv, thiab tus ntawd yog tus uas tuaj Kuv tog txiavtxim. 51Kuv qhia tseeb rau nej hais tias, tus uas ua rawsli Kuv tej lus qhia, tus ntawd yuav tsis tuag ib zaug li.”
52Cov Yudais hais rau Yexus tias, “Zaumno, peb paub tseeb hais tias Koj raug ib tug dab lawm tiag! Anplahas twb tuag lawm, cov xibhwb cev Vajtswv lus los twb tuag tas huv tibsi lawm, tiamsis Koj tseem hais tias tus uas coj rawsli Koj tej lus qhia mas yuav tsis tuag ib zaug li. 53Peb txiv Anplahas twb tuag lawm, Koj tseem hais tias Koj muaj hwjchim loj dua Anplahas thiab no lov? Cov xibhwb cev Vajtswv lus los kuj tuag tas huv tibsi lawm thiab. Koj xav tias Koj yog leejtwg no maj?”
54Yexus teb tias “Yog Kuv rov qhuas Kuv xwb, qhov kev qhuas ntawd yeej tsis muaj qabhau dabtsi li. Tus uas qhuas Kuv yog Kuv Txiv, Nws yog tus uas nej hu hais tias yog nej tus Vajtswv. 55Nej yeej tsis paub Nws, tiamsis Kuv paub Nws. Yog Kuv hais tias Kuv tsis paub Nws, ces Kuv yog ib tug neeg dag ib yam li nej. Tiamsis Kuv yeej paub Nws, thiab Kuv ua rawsli Nws tej lus. 56Nej txiv Anplahas zoosiab hais tias nws yuav pom hnub uas Kuv los; nimno nws twb pom lawm, nws zoosiab kawg li.”
57Lawv hais rau Yexus tias, “Koj hnubnyoog twb tsis tau muaj tsibcaug xyoo, es koj twb pom Anplahas lawm lov?”#8:57: es koj twb pom Anplahas lawm lov?; tej phau ntawv qub uas xuas tes sau, muaj Anplahas twb pom koj lawm thiab lov?
58Yexus teb lawv tias, “Kuv qhia tseeb rau nej hais tias, uantej yug Anplahas, ‘Kuv Yog!’ ”
59Lawv txawm khaws nkaus pobzeb los yuav ntaus Yexus, tiamsis Yexus khiav dhau thiab tawm hauv lub Tuamtsev mus lawm.
अहिले सेलेक्ट गरिएको:
Yauhas 8: MWW2022
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2022 United Bible Societies. All rights reserved.
