If you would like a copy of this version please contact info@davaraudiobibles.org

Ladakhi New Testament, CC-BY-SA-4.0, The Love Fellowship. Ladakhi New Testament Audio Bible, CC-BY-SA-4.0, Davar Partners International, The Love Fellowship, 2022.

Ladakhi New Testament

Ladakhi Bible by The Love Fellowship is licensed under Creative Commons Attribution-ShareAlike 4.0 License.

حضرت عیسیٰ مسیح مولس، ”میگونلا ستانچیسّی پھیا لاس زانگپو ماچو۔ تیزوگ چونا نامکھے نانّگا جوگسکھان کھیوجے یابنے شزدے چانگ میتھوب۔ گھوسدوم یودکھانگونلا چینبا تانگ زانے مجلِس تانگ لام گُونلا تُونگ ماپھوشیگ، کازوگ میگونّی ستودپا تھوبچیسلا ریاکاریگونّی چواد۔ نگے لدینبا زیرّاد، کھونگونلا شزدے گانگپو تھوبتے این۔ اِین نانگ چینبا تانگ زانے رانگی لاگپا یوما لاگپا یاسپے چی چواد گیُوس چھا ماچوگشیگ۔ چینبا سانگستے تانگنا، تینے کھیوجے نامکھے یابّی سانگوے نانّگا کھیوجے لاس چوکھانبو زِیگستے شزدے سالین۔“

حضرت عیسیٰ مسیح مولس، ”دُعا چوزانے، ریاکاری گُون ژوگس یونگ ماگوس چیازیرنا کھونگون مجلِس تانگ ثانگی ٹُویکا لانگستے میا تھونگچوگستے دُعا چواتھادّانوگ۔ نگے کھیوجا لدینبا زیرّاد تے ریاکاریگونلا شزدے گانگپو تھوبتے این۔ دُعا چوزانے، رانگی نانّگا سونگتے گھو چوگستے سانگوے تھوگنے رانگی نامکھے یابّا دُعا چوشیگ۔ تینے کھیوجے سانگوے نانّگا چوکھانّی لاسگون زِیگستے کھیوجے نامکھے یابّی کھیوجا شزدے سالین۔“
کھیوجے دُعا چوزانے، تونمیدّی تشیگسگون زیرین جان چھوسلوگی میگون ژوگس ماچو، چیازیرنا کھونگونی سامّانوگ دُعا رینگمو چوچیسپوے خُدے کھونگونی دُعا سانین۔ کھونگون ژوگس ماچو، چیازیرنا دُعا چوے سانگ سنگونلا کھیوجے گھوسدومگون نامکھے یابّی کھینّا زادّانوگ۔ کھیوجے دُعا ایتسوگسلا چوس،
”نامکھا جوگسکھانّی نگاجے یاب،
نیرانّگا سروک یودکھان تشانگمے سیوا تھوبشیگ۔
نیرانگی گیالثید گیوگسپا لیبشیگ۔
نیرانگی تھوگ گونگس نامکھے نانّگا ڈوبّا تسوگسلا،
ای دُنیائی کانگ ڈوبشیگ۔
دِرِنگ رگوسپی زان پو دِرِنگ شزدے بیوس۔
نگاجے چنگمین لس کُن لہ مُعافی سال،
کازوگی نگاجے چنگمین بیاکھن کُن لہ مُعافی سالید۔
تشودلتے توسلا دِیگپا چوچیسنے نگاجا سکیوبّا زاد،
یانگ اِبلیسی ژا نہ سترُونگسے بور۔“
حضرت عیسیٰ سی مولس، ”کالتیس کھیوجے گیابگالّا دِیگپا چوکھانگونلا مُعافی تانگنا، کھیوجاگونّی نامکھے یابّیانگ کھیوجاگونلا مُعافی سالّا زادِین۔ اِین نانگ کالتیس کھیوجے گیابگالّا دِیگپا چوکھانگونلا مُعافی ماتانگنا، کھیوجاگونّی نامکھے یابّی کھیوجے دِیگپاگونلا مُعافی سالّا میزاد۔“

”کھیوجاگون روزہ دُوگ زانے، ردوگپو ماچو، کازوگ ریاکاریگونّی کھورانگونّی لدونگبو دِیگپاجیک چوستے روزا دوگکھانبو میگونلا سنگون چوگّانوگ۔ نگے کھیوجاگونلا لدینبا زیرّاد، تے ریاکاریگونلا شزدے گانگپو تھوب تشارتے این۔ اِین نانگ کھیوجاگون روزا دوگ زانے گو لہ مار سکُوسے، لدونگ پو کھرُوسے دُوک۔ می گونلا مانپا نگاتی یاب کا بو سُوانگ میتھونگسا جوکستے یوت نگا تانگ روزہ دوگگھان بو شیشگوس، تینے نگاتی یابی نگاتنگ گُونیکا شزدے چوین“

”کھیوجارانگی پھیا دُنیائیکا نورگون ماساگشیگ۔ تیگون موگپے زاچیس تانگ یھا یونگچیس ماتشاد رکونما یونگستے رکوین۔ اِین نانگ کھیوجارانگی پھیا نامکھے نانّگا نور سوگشیگ، تیرو موگپے میزا یانگ یھا میونگ ماتشاد رکونمیانگ میر رکو۔ کھیوجے نور یودسا کھیوجے سنینگ چھاگسین۔“

”میگ نی زوگسّی اوت پو این۔ میگپو کھامزانگ یودنا کھیوجے لوس گانگپو اوتی گانگین۔ اِین نانگ کالتیس میگپو کھامزانگ میدنا، کھیوجے لوس گانگپو مونڈیگی گانگین۔ کالتیس کھیوجے کھیوجارانگی سیمسّی نانّگا خُدے اوت یود سامکھانبو نگوسپوا مونڈیگ اینّا تینے تے مونڈیگپو تسامشیگ جیگسنانگچان میونگ “

”سوجیکّیانگ مالِک نیسّی جابستوگ کابو مینیان، چیگپوا ناپھراد یانگ چیگپوا لچیسپا چوانوگ، یا چیگپوا سنینگنے جابستوگ جوین یانگ چیگپوا ماتھادّا جابستوگ جوانوگ۔ تینّا تسوگسلا خُدے تانگ نور نیسکوا جابستوگ جُو می نیان۔“

”تیبویپھیا نگے کھیوجا زیرّاد، چی زین، چی تُھونگین یا زوگسلا چی گونین سامستے رانگی میتشیے پھیا تشیر ماتشیر۔ زانّی سانگ رثوگپو یانگ کوسّی سانگ لوسپو کھاگچھیا مانوگا؟ نامکھے چاگونلا ستوسّانگ، تیگونّی جینگ تابّا یا جینگ رنگا یا بانّگے نانّگا ٹو ساگا میدوگ، اِین نانگ کھیوجے نامکھے یابّی تیگونلا زان سالّا زادّوگ۔ تیگونّی سانگ کھیوجا مانّگا رین میچھیا؟ کھیوجا سوجیکّی تشیرکھا چوستے کھیوجے میتشے نانّگا چھوتشود چیگ سکیید تھوبینّا؟“
”کوسلاگی پھیا چیا تشیرّاد؟ سپانگتھانگی مینتوگّون کازوگی لداندوگ ستوسشیگ، تیگونّی لاس چوا یا بال کھالتے کوس تھاگا میدوگ۔ اِین نانگ نگے کھیوجا زیرّاد، گیالپو حضرت سُلیمان، کھورانگی سپالّی نانّگا ما ٹاگپو کوسلاگ گُونانگ تے مینتوگّون ژوگس لدیمو تانگ دزیسپو تھونّگا میدپین۔ کالتیس خُدے دیرینگ یودکھان تھورے میا ثاگّا پھانگچیسچانّی سپانگتھانگی مینتوگّونلا تیتسوگسی کوسلاگ سکون تھوبّادنا، ایمان وتھوگسچان خُدے کھیوجاگونلا تیگونّی سانگ کوسلاگ ٹاگپو سکونّا میزادّا؟“
”تیبویپھیا ’نگاتانگ چی زین یا نگاتانگ چی تُھونگین یا نگاتانگ چی گونین‘ زیرتے تشیرکھا ماچو۔ جان چھوسلوگی میگون تے تشانگمے ستینگرانگنے بانگتانّگانوگ، یانگ کھیوجے نامکھے یابّی کھیوجے تیتسوگس گھوسدومگون کھینّا زادّانوگ۔ اِین نانگ گوما کھیوجاگون خُدے گیالثید تانگ میتشے ٹانگپو پھودچیسّی ستینگرانگنے بانگتونگشیگ، تینے کھونگی تیکا نانتے کھیوجے جان گھوسدومگونّانگ سالّا زادِین۔“
تھورے پھیا دیرینگ تشیرکھا ماچوشیگ چیازیرنا تھورے جونگچیسّی تشیرکھاگونّی سکورلا سامبا تھورے تانگنیانّانوگ۔ دیرینگ تشیرکھا دیرینگ پھیا تسام تھاتھاداینّوگ۔

सुन्नुहोस् مادتھا 6