Kaba for CAR - ACATBA; 2020  Drama (NT)

Jeju aw dɔ ddingiri Olibəje tə̂. Lo-karɛ̂ kə əsindɔɔ a, n̂-təl naw kəy-polo Lubba tə̂ ngaâ dəwje tɔyn awje rɔɛ̂ tə̂. Nisi nangə̂ ngaâ nunn kutu tɔjude nɛ̂n. Njê-gərəje-Ndu kə Parijinyɛje ddeeje kə marə dɛnɛ̂n kə̂ duwɛ̂ dɔ lo-to-majang tə̂, n̂-ddee dundɛ̂je dannâ kəm dəwje tə̂ tɔyn. N̂-paje darə Jeju nan: «Nje-nɛ̂n-tɔju, juwa dɛnɛ̂n nəənn dɔ lo-to-majang tə̂. Mɔyijə unn ndu arəje nan, ta n-tila dɛnɛ̂nje kə̂ be kə ər n-tɔlde. A əi, ə-pa nan ddi wa?»
N̂-paje baann ta nɛɛ̂n nɛ̂n, bba ta kunda nɛ̂n tar dɔɛ̂ tə̂. A Jeju ula dɔɛ̂ nangə̂ ngaâ unn kutu kuja makəturu nangə̂ kə ngaw jia. A kar tə̂ kə̂ n̂-naynje daw dujeje tar le a, Jeju le in taar ngaâ pa arəde nan: «Horose tə̂ nəənn, dəw kə̂ dda majang ndɔ kâra ang a, unn ər ilɛ̂ nɛ̂n dɔngɔr.»
Jeju təl ula dɔɛ̂ kə nangə̂ ngaâ unn kutu kuja makəturu nangə̂ bbay. Dəwje le ooje tarje le a, dɔtuje kâra kâra, unn kute dɔ dəwje tə̂ kə̂ tɔkə, ndərəng dɔ ngannje tə̂. A Jeju nayn kə karɛ̂ baa kə dɛnɛ̂n le, lo tə̂ kə̂ dundɛ̂ tə̂ le. Yeenn ngaâ Jeju ɔru dɔɛ̂ kə taar ngaâ duje nan: «Deeje dda wa? Dəw kâra gangə sariya dɔi tə̂ ang wa?» Dɛnɛ̂n le ilɛ̂ tə̂ nan: «Əbbə-dəwje, dəw kâra gangə sariya dɔm tə̂ ang.» Jeju pa arɛ̂ nan: «Yeenn a, əman kara m-gangə sariya dɔi tə̂ ang tɔ. Aw, a dang kara ə-təl ə-dda majang ang ngaa.»

Jeju təl pa tar arə dəwje kə̂ banya le bbay nan: «Əman â m-to lo-karɛ kə̂ dɔ nangə tə̂. Dəw kə̂ unn gom a, a nja lo ndul tə̂ ang. Nâ kinga lo-karɛ kə̂ aw arə təbbə.» Dɔɛ tə̂ənn, Parijinyɛje paje arɛ̂je nan: «Əi njaa aw pa tar-naji ləi, tar-naji ləi le to tar kə̂ tɔkɔrɔ ang.» Jeju ilade tə̂ nan: «Tɔkɔrɔ, əman njaa maw pa tar-naji ləm. A tar-naji ləm le to tar kə̂ tɔkɔrɔ. Mba m-gərə lo kə̂ min tə̂ bba m-ddee. Ngaâ m-gərə lo kə̂ maw maw kə tə̂. A sese, ə-gərəje lo kə̂ min tə̂ ang ddəm lo kə̂ maw maw kə tə̂ ang ddəm. Aw ə-gangəje sariya tokə lə dəwje. A əman, m-gangə sariya dɔ dəw tə̂ kâra ang. A bbo m-gangə sariya njaa kara, sariya ləm to kə dɔgɔlɛ̂. Mba maw gangə sariya kə karəm ang. Bɔ kə̂ ulam ee səm. N̂-dda mə Makəturu-Ndu tə̂ ləse nan: ‹Bbo dəwje joo paje tar-naji kə̂ kâra baa a, to tar-naji kə̂ tɔkɔrɔ.› Əman njaa maw pa tar-naji ləm ngaâ Bɔ kə̂ ulam aw pa tar-naji ləm tɔ.» Parijinyɛje dujeje nan: «Bɔije le ee dda wa?» Jeju ilade tə̂ nan: «Ə-gərəmje ang ddəm ə-gərəje Bɔmje ang ddəm. Mba bbo ə-gərəmje a, â gərəje Bɔmje tɔ.»
Jeju pa tar nəənn le arəde kar tə̂ kə̂ naw tɔju nɛ̂n kəy-polo Lubba tə̂. Nar lo tə̂ kə̂ daw ngəm narɛ tə̂. A dəw kâra uwɛ̂ ang, mba kar laa asə ang bbay.

Jeju pa arəde bbay nan: «Mâ kaw ngaâ â sangəmje, a â koyje mə majang tə̂ ləse. Asəje ta kaw lo tə̂ kə̂ maw maw kə tə̂ le ang.» Yeenn ngaâ Jiipije paje horo naan tə̂ nan: «Nâ tɔl rɔɛ̂ wa? Mba n̂-pa nan: ‹Asəje ta kaw lo tə̂ kə̂ maw maw kə tə̂ ang.› » Jeju ilade tə̂ nan: «Sese, ə-toje to dəwje kə̂ nangə̂ nəənn, a əman m-to dəw kə̂ darâ. Ə-toje to dəwje kə̂ duninya tə̂ nəənn, a əman, m-to dəw kə̂ duninya tə̂ nəənn ang. Mba yeenn bba, m-pa marəse m-pa nan, a koyje mə majangje tə̂ ləse. Mba, Əman, ‹M-to›, â bbo ooje nɛ̂n məse tə̂ ang a, â koyje mə majangje tə̂ ləse.» N̂-dujeje nan: «Ə-to nân wa?» Jeju ilade tə̂ nan: «Mâ pa yeenn karəse bbay mba ddi wa? Tarje nya to ta karə m-pa dɔse tə̂ ddəm sariya to nya ta karə m-gangə dɔse tə̂ ddəm. A ne kə̂ nulam, n̂-to tɔkɔrɔ. Nɛ̂n kə̂ moo tɛɛ̂ tə̂ â maw pa marə dəwje kə̂ dɔ nangə tə̂.»
N̂-gərəje to tar lə Bɔ â Jeju aw pa arəde ang. Yeenn ngaâ Jeju pa arəde nan: «Bbo ə-tɔje Ngonn lə dəw kakə tə̂ ə-lɛ̂je kə taar a, â gərəje to ‹Əman, M-to›. Â gərəje to m-dda nɛ̂n kâra kə dɔm baa ang, nɛ̂n kə̂ Bɔ tɔjum njaa â maw pa. Dəw kə̂ ulam ee səm. Ninyam kə karəm baa ang, mba maw dda nɛ̂n kə̂ nəəle kə ndɔ tɔyn.» Kar tə̂ kə̂ Jeju aw pa tar baann le a, dəwje nya ooje məde tə̂ saa.

Jeju pa arə Jiipije kə̂ ooje məde tə̂ saa nan: «Bbo ə-naynje ddəw tar tə̂ ləm a, ə-toje to njê-njaje gom tə̂ njaa. Â gərəje tar kə̂ tɔkɔrɔ ngaâ tar kə̂ tɔkɔrɔ le a kɔruse bbərə tə̂.» Jiipije le paje arɛ̂je nan: «N-to njê kə̂ gəl Abaraham tə̂ ngaâ n-dda bbərə lə dəw ndɔ kâra ang. A ə-pa nan: ‹Ja tee bbərə tə̂ kə ddang tokə baânn wa?› » Jeju ilade tə̂ nan: «Tɔkɔrɔ, m-pa marəse, dəwje kə̂ naynje mə nɛ̂n-dda tə̂ kə̂ maji ang toje to bbərəje lə nɛ̂n-dda kə̂ maji ang le. Bbərə nayn mə kə̂y tə̂ kə ndɔ tɔyn ang. A ngonn nje-kəy nayn mə kə̂y tə̂ kə ndɔ tɔyn. Yeenn bba bbo, Ngonn ɔruse bbərə tə̂ a, â teeje bbərə tə̂ kə ddang tɔkɔrɔ njaa. M-gərə to ə-toje to njê kə̂ gəl Abaraham tə̂. A aw sangəje ddəw ta tɔləm, mba ə-ndikije tə̂ kə tar ləm ang. Əman, nɛ̂n kə̂ moo rɔ Bɔmje tə̂ â maw pa tarɛ̂. A sese, nɛ̂n kə̂ bɔsese pa arəse â aw ddaje.» Dilɛ̂je tə̂ nan: «Bɔjeje to Abaraham.» Jeju pa arəde nan: «Bbo ə-toje to ngann lə Abaraham a, maji karə ə-ddaje kula-dda lə Abaraham. A bbasinɛn, Əman kə̂ m-to dəw kə̂ m-pa tar kə̂ tɔkɔrɔ kə̂ moo ta Lubba tə̂ marəse â aw sangəje ddəw ta tɔləm. Abaraham dda yeenn ang. Sese, aw ddaje kula-dda lə bɔsese.» Dilɛ̂je tə̂ nan: «N-to ngann kayaje ang, Bɔjeje kâra baa to Lubba.»
Jeju pa arəde nan: «Bbo Lubba to Bɔsese a, â ndikimje. Mba min rɔ Lubba tə̂ bba m-ddee. Əman njaa m-ddee kə dɔm baa ang, ne â nulam. Ə-gərəje kandə tar kə̂ maw pa marəse nəənn ang mba ddi wa? Mba asəje ta koo tar ləm ang. Bɔsese to əsu le arə ə-ndikije ta dda nɛ̂n kə̂ bɔsese ndiki. N̂-to nje-tɔl dəwje kunn-kutu nɛ̂n tə̂ nu. Nar dɔ tar tə̂ kə̂ tɔkɔrɔ ndɔ kâra ang, mba tar kə̂ tɔkɔrɔ to məɛ̂ tə̂ ang. Bbo naw nərə ngəm a, to tarje kə̂ inje məɛ̂ tə̂ njaa â naw pa. Mba n̂-to nje-ngəm ddəm n̂-to bɔ ngəm ddəm. A əman, aw ndikije tə̂ kə tar ləm ang, mba maw pa tar kə̂ tɔkɔrɔ. Horose tə̂ nəənn, nan â, a kasə ta tɔjum to m-dda majang wa? Maw pa tar kə̂ tɔkɔrɔ a, ə-ndikije tə̂ kə tar ləm ang mba ddi wa? Dəw kə̂ to lə Lubba a, oo tarje lə Lubba. A sese, ooje tar lə Lubba ang, mba ə-toje to laa ang.»

Jiipije ilaje Jeju tə̂ nan: «Tar kə̂ n-pa nan ə-to dəw kə̂ Samari ngaâ ndil kə̂ maji ang to məi tə̂ le to kə dɔgɔlɛ̂ njaa.» Jeju ilade tə̂ nan: «Ndil kə̂ maji ang goto məm tə̂. Maw wal Bɔmje, a sese aw waləmje ang. Maw sangə karə dəwje pitimje ang. Marə dəw ee tə̂ənn kə̂ aw sangə karə dəwje pitimje ngaâ aw gangə sariya. Tɔkɔrɔ m-pa marəse, bbo dəw ngəm tar ləm a, nâ koy ndɔ kâra ang.» Jiipije paje arəje Jeju nan: «Bbasinɛn n-gərə ngaa, ndil kə̂ maji ang to məi tə̂. Abaraham oy, njê-kilaje mbər tar lə Lubba oyje tɔ, a əi ə-pa nan: ‹Bbo dəw ngəm tar ləm a, nâ koy ndɔ kâra ang wa?› Ə-to dəw kə̂ ngəng uta bɔjeje Abaraham kə̂ oy le wa? Njê-kilaje mbər tar lə Lubba oyje tɔ. A əi, a ta pa nan ə-to nân wa?» Jeju ilade tə̂ nan: «Bbo əman njaa maw piti rɔm a, piti rɔ ləm a to nɛ̂n kâra ang. Bɔmje â aw pitim, ne kə̂ ə-paje nan n̂-to Lubba ləse le. A ə-gərəje Lubba le ang, əman m-gəre. Bbo m-pa nan m-gəre ang a, mâ to nje-ngəm tokə sese. A m-gəre arə maw ngəm tarje laa. Bɔsese Abaraham əjə ndɔ kə̂ mâ ddee nɛ̂n a, dda rɔ-nəəl nya. Noo ndɔ le arə rɔɛ̂ nəəle nya.» Jiipije paje arəje Jeju nan: «Bbali dɔmin ang bbay, a ə-pa nan oo Abaraham wa?» Jeju ilade tə̂ nan: «Tɔkɔrɔ m-pa marəse, kete bba karə Abaraham to, Əman, M-to mban.»
Yeenn ngaâ dotoje ərje ta tilɛ̂ nɛ̂n tɔlɛ̂, a Jeju iya rɔɛ̂ ngaâ tee kəy-polo Lubba tə̂ ɔtu.

सुन्नुहोस् Jan 8