KAHTAMYENGHAN 4
4
Kain Hei Abel
1Tüophei me Adam yoi shekonyu Eve phei mei, hüyange yha püm yekengpe ngai. Yhawe Kain puh, hüyange i, “Youngwanpawe jampu kaiye taowe Kain tüoteki.” Tüokhei yhawe Ite Kain she min. 2Tüophei me yha-e Inao Abel puh. Sha-a Abel nyeeyompa ne hüyange Kain-a kahhampa ne meng. 3Hüyange hipak ngoiwante Kain ne kahtok me lickpu Youngwanpa tangte dopu yahpei. 4#Heb 11.4.Abelwe-o I jing nyee ükhong me üwangne puhpu lan hüyange tüolan yo mepu, üyao pheipulan yah-e pei. Abel hüyange lye dopu te Youngwanpa monghah. 5Hüpoi Kain hüyange lye dopu te Youngwanpa mong yehah. Tüokhei Kain-a mongshih ngai, hüyange I sheta meng. 6Tüojingne Youngwanpawe Kain te i, “Hangne nang mongshih, hüyange sheta mengpu? 7Nange khakshupu lingshih ma-a, yeyah hah shepu a? Hüpoi nange yeshupe lingpu ne mengma-a, nang tafün shongme ünuwe ümme tannang; hatüowe nang tangte onghu nang; hüpoi nange hatüo tükke oklak wongpong.”
8 #
1 Jn 3.12. Tüophei me Kain ne Inao Abel te i, “Kah yete tümni taihah.” Hüyange aope imni kah me ngoh, Inao Abel phei tüi-e Kain yong, hüyange I toi.
9Hüwante Youngwanpawe Kain te i, “Nang nao Abel üpu?” lye janne i, “Taowe yeshing, Tao ü-nao yompa a?”
10Hüwante Youngwanpawe i, “Nange hang lingpu? Nang nao iy-e kahtok mepu üte üngwün nang. 11Hüyange sha-a hanghepa kahtok-e nang yak mepu nang nao iy yahlak jingne ju ka, tüopa kahtok mepu nangte phoiwümpu angtam nang; 12Nange kahtok hamme ülick ngaine lingyapoi sha-a me peiye kahtok-e yoi mepu nangte hango yengai tamlak; kahtoknyu me nang ching taipa hüyange wa-e kempa ja ne menglak.”
13Hüyange Kain-e Youngwanpa te i, “Hatüowa üjingne yenün oklak shaoshi üyong yang. 14Leitüoh, nange tenyih tao tüopa nyoi mepu jange teinang; hüyange nang sheta mepu tao büange tamnang; hüyange kahtoknyu me tao chingtaipa ja hüyange wa-e kempa ne menglak; hüyange aowe tao ngelakei lye tao toikülak.”
15Hüpoi Youngwanpawe Ite i, “Hüke yeje! Aohipawe Kain toilakei, Ite nyit me phuh hahlak.” Hüyange ütamme I ngeye toi külak yang she Youngwanpawe Kainte minsang ja angetam. 16Hüyange Kain Youngwanpa sheshao mepu yanne tai hüyange Eden heong Nod kahtok me ngoh.
Kain Mepu Huhayimlan
17Kain ne I sheko phei mei, hüyange yha püm yekengpe ngai hüyange Enokh puh; hüyange Iye chingnyu ja ling, hüyange hatüote Iha min me Enokh she nyik. 18Hüyange Enokh me Irad puh; hüyange Irad-a Mehujael üpa; hüyange Mehujael-a Methushael üpa; hüyange Methushael-a Lamekh üpa.
19Lamekh me sheko ni ngoh; ja min Adah, hüyange ülaonyu min Zillah. 20Adahwe Jabal puh; I-a nyenok me ngohpu hüyange ching yinmok tampalan pajeiyong ne meng. 21Hüyange Inao min Jubal, I kongki hüyange viwo jonpalan pajeiyong ne meng. 22Zillahwe Tubal-Kain puh; aowe shakphan yan hüyange yanne yaopu ngouyang yaopa ne meng; hüyange Tubal-Kain ünao naoyha Naamah ne ngoh.
23Lamekh-e Inok shekonyu ni te i:
“Adah hei Zillah, üte jaiyah;
Numan Lamekh shekolan, taowe hanghe i, jaitüoh;
hangjingne üte mako satepuwe taowe kahta ja,
hüyange üte yaklepu jingne naoshe ja taowe toiyangki.
24Kain te phuh nyit me hahma-a,
ütingme Lamekh te denyit me nyit me phuh shümlak.”
Seth Hei Enosh
25Hüyange Adam-e yoi shekonyu phei üne-o mei hüyange yhawe moija pai, hüyange I min Seth she nyik, hangjingne yhawe i, “Kain ne toiyangpu Abel nanlei üte Kahwange üli ülao ja pha.” 26Hüyange Seth te-o netan nahaja puh-e tam; hüyange lye I min Enosh she nyik. Tüo hipak me kahtalanne Youngwanpa min nyikne ükong wang.
လက်ရှိရွေးချယ်ထားမှု
KAHTAMYENGHAN 4: KONYBSI
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.