UBWANDILO 31
31
Yakobu ikugomokela ku kaya
1Yakobu alinkupilika ukuti abana ba Labani bikwibubusya bikuti, “Yakobu egile ikyuma kyitu kyosa iki kyali kya tata; mo muno abwagile ubukabi bosa ubu.” 2Kangi Yakobu alinkwaga ukuti yope Labani atikwangala nagwe bununu, bo mumo abombelaga mbwandilo. 3Popapo Untwa alinkumbula alinkuti, “Sumukaga, ugomokelege ku kisu kya baguso na ku bakamu bako, une nisakuyaga nanugwe.”
4Popapo Yakobu alinkutuma indumi alinkubabilikila abakasi, Rakeli na Leya Ukwisa ku lukubo kuno gyaliko imitimo gyake, 5alinkubabula abakasi bake alinkuti, “Ngetile ukuti ugwisemwe atikungeta bununu bo mumo abombelaga mbwandilo. Loli Kyala gwa batata yo ali nanine. 6Musimenye nanumwe ukuti numbombile ugwisemwe na maka gangu gosa, 7loli umwene ansyobile une, atile nukwandula umfwalo gwangu kalongo. Po bule Kyala akalimwitikisye ukuti ambombele une imbibi. 8Apa linga Labani ayobile ukuti, ‘Imbene ingekanie syo sikuyaga mfwalo gwako,’ popapo syosa itolo mu ntimo silinkubika utwana utukekanie; kangi apa linga ayobile ukuti, ‘Imbene isulula syo sikuyaga mfwalo gwako,’ syosa itolo mu ntimo silinkubika utwana utusulula. 9Mo muno Kyala egile ikyuma kya gwisemwe endile nukumba une. 10Pa kabalilo aka imitimo gipingulilaga ndinkugogwa injosi, ndinkwaga ukuti imbongo isi sikwesya untimo syali sulula ni ndononde kangi ningekanie. 11Popapo mu njosi syangu ugwandumi gwa Kyala alinkumbilikila une, alinkuti, ‘Gwe Yakobu,’ popapo ndinkwamula ndikuti, ‘Al'une!’ 12Umwene alinkuti, ‘Ukete! Imbongo syosa isi sikwesya imbene sulula, ni ndononde kangi ni ngekanie. Nsipelile ukuti siye bo bunobuno papo nsibwene syosa isi Labani ikukubombela ugwe. 13#Bwa 28.18-22Yo une Kyala uyu akusetukile ugwe nkaya ka Beteli, lula ulipakasyege amafuta ibwe lya kukumbukilapo, pala ufingege ulufingo kumyangu. Sumukaga lelo usokemo nkisu iki, ugomokelege ku kisu iki gwapapiligwe.’ ”
14Popapo Rakeli na Leya balinkumwamula Yakobu balinkuti, “Ngimba kasyelemo nnyumba ya tata akandu kamo aka kisakwipelaga ukya kilingo kyitu? Ngimba tukafwana itolo nabandu abahesya nkyeni mmyake? 15Namanga atulisye, kangi alile kyosa ikyuma iki alyambilile pamyitu. 16Ikyuma kyosa iki Kyala egile kwa tata, kyali kyitu uswe na banitu; mma, bombaga itolo syosa isi Kyala akubulile.”
17Bunobuno Yakobu alinkwitendekesya ukusumuka, alinkubafyusya abanake na bakasi bake pa ngamila. 18Alinkusilongosya nkyeni ing'ombe syake syosa ni fitimigwa fyosa ifi akabile nkisu kya Padani-aramu, alinkugomoka ukubuka ku gwise Isaka, nkisu kya Kanani. 19Umwene Labani yo akalipo abukile pakusisenya ulusyoya ing'osi syake, popapo Rakeli alinkuhiya ififwani fya bakyala ifi fyali nnyumba ya gwise. 20Yakobu alinkunsyoba Labani ugwa kikolo kya Aramu pakuleka kusita kumbula ukuti asumwike ukubuka. Alinkwega fyosa ifi akabile, popapo alinkuyonga itolo. 21Alinkuloboka ulusoko Yufrate, alinkulabila ku kisu kya fyamba fya Gileyadi.
Labani ikunkonga Yakobu
22Bo gakindilepo amasiku matatu, Labani alinkupilika ukuti, Yakobu ayongile. 23Popapo Labani alinkubega abakamu bake aba ali nabo, balinkunkonga Yakobu amasiku mahano na mabili, balinkwakumwaga nkisu kya fyamba fya Gileyadi. 24Loli pakilo po Kyala alinkumwisila mu njosi Labani ugwa kikolo kya Aramu, alinkumbula alinkuti, “Uye maso, komma ukumbombela imbibi simo Yakobu.”
25Popapo Labani alinkwakumwaga Yakobu bo ayengile ilisasa mfyamba. Yope Labani na bakamu bake balinkuyenga amasasa gabo mulamula mfyamba fya Gileyadi. 26Umwene Labani alinkundalusya Yakobu alinkuti, “Syo sya fiki isi umbombile gwe mwanangu, apa unsyobile bunobuno une, uyongile itolo na banangu baliti batumwa aba ubakolile mbwite? 27Nongwa ya fiki gwendile itolo kubutitu nukunsyoba une gwe nsita kumbula une, ukuti ndagane nanumwe mbununu mbasindikile nubwikyele, pamopene nukubimbila inyimbo, nukubakubila amalimba na mapango? 28Kangi ngimba gwalekile fiki ukuti ndagane na banangu pamopene na bisukulu bangu? Isi umbombile une syo sya bukonyofu. 29Nayaga pakukubombela imbibi loli Kyala gwa baguso yo ambulile ikilo iki atile, ‘Uye maso, koma ukumbombela imbibi simo.’ 30Syo menye ukuti gwasumukaga papo gwali nubusyukwe bwakugomokela ku nyumba ya guso, loli nongwa yafiki gwahiyaga bope na bakyala bangu?” 31Umwene Yakobu alinkumwamula alinkuti, “Natilaga ukuti kwisa kumboka une abanako abalindwana aba. 32Loli gwesa uyu linga umwagile na bakyala bako yo ise agogigwege itolo. Lilino lelo unnangisye ngete akandu aka kako ugwe, ega tukete akandu aka kako ugwe bo na bakamu bitu aba bikuketa, ega tukete akandu kakaka.” Umwene Yakobu yo akasimenye na panandi ukuti yo Rakeli uyu ahiyile abakyala bala.
33Popapo Labani alinkwingila mu hema ya Yakobu niya Leya, kangi na mu hema sya bakasi bake abatumwa bala babili, loli alinkusita nukubagamo aba kyala bala. Popapo alinkusokamo mu hema ya Leya, alinkwakwingila muhema ya Rakeli. 34Umwene yo uyu ahiyile abakyala ba nnyumba, alinkubafisa nkati mu nyambi iyi bikwitugasyapo bo bikwitoga pa ngamila, alinkwitugalapo. Popapo Labani alinkulonda muhema syosa, loli alinkutoligwa. 35Umwene Rakeli alinkumbula ugwise alinkuti, “Gwe Tata, ungakalalaga apa une ngasumuka mma, namanga ndi mmwesi.” Labani alinkulonda fiyo naloli, loli alinkusita nukubagamo abakyala ba nnyumba bala.
36Popapo Yakobu alinkukalala, alinkumbula Labani alinkuti, “Ngimba ngonangile sya fiki? Ngimba ububibi bwangu bo buliku, pakungonga une nubukalale bosa bo bububu? 37Napapo ulondile upetusenie fiyo mosa mosa mfindu fyangu, kali ukagilemo kamo akandu kako, ukanangisye pabwelu ukuti bosa aba balipo papapa bakabone, abakamu bako na bakamu bangu, ko kuti batulonganie uswe. 38Ifyinja fyosa amalongo mabili (20) ifi ndugele nanugwe, ing'osi syako ni mbene syako sikasopolamo, kangi ngalyamo siku ning'osi yimo ya mu ntimo gwako. 39Iyi linga ikinyamana kilile ndikusita nukwisako nayo kumyako, loli napyanikisyangapo. Linga abandu bahiyile pamusi pamo pakilo yilinkuya nongwa yangu yuyune. 40Utubalilo tu twingi ndikukubilwa nulumu pamusi kangi ni mbepo pakilo, ndikusita nukugona nutulo. 41Ifyinja fyosa amalongo mabili (20) ifi nitugalaga nanugwe silinkuya bo bunobuno itolo. Ifyinja kalongo na fina (14) nabombelaga panongwa ya banako abalindwana babili aba negile, kangi ifyinja fihano nakimo ndikukubombela panongwa ya fitimigwa ifi gwambaga, loli ugwe ulinkwandula umfwalo gwangu kalongo. 42Linga Kyala gwa batata akali nanine, Kyala gwa Abrahamu, Kyala uyu Isaka amputaga, angali ungogile nensita kandu nakamo. Loli Kyala asibwene ingubilo syangu kangi nimbombo iyi nabombile fyobene akulongile pakilo.”
Labani na Yakobu bikufinga ulufingo
43Popapo Labani alinkumwamula Yakobu alinkuti, “Abana abakikulu aba bangu, na ba banabo bope bangu, kangi gyope ni mitimo igyo gyangu une, pamopene na fyosa ifi kufiketa. Loli kali mbombe sya fiki umusyugu ku banangu abakikulu aba, pamo ku bana aba bapapile? 44Oko, tufinge ulufingo lilino ukuti lo luyege lusisimikisyo kuli uswe.”
45Popapo Yakobu alinkwega ilibwe alinkukumbila ukuya kyakukumbukilamo. 46Alinkubabula abandu aba ali nabo ukuti balundikepo amabwe palapala, abene balinkulundika amabwe ga mingi. Popapo balinkulilanila ifindu pabupipi na mabwe aga balundike. 47Amabwe gala balundike Labani alinkugapa ingamu ya Yegara-sahaduta.#31.47 Yegara-sahaduta: ko kuti, ilibungila lyakukumbukilamo. 48Popapo Labani alinkuti, “Amabwe aga tulundike apa umusyugu go gisakuyaga lusisimikisyo kumyako na kumyangu.” 49Yo nongwa iyi ubuyo bula balinkubupa ingamu ya Galedi,#31.49Galedi: nki Aramu ko kuti, ilibungila lyakukumbukilamo. kangi ni ngamu ya Mizipa.#31.49 Mizipa: nkiHiburi ko kuti ubuyo bwakwimapo pakuketa. Papo Labani atigi, “Untwa yo atukete uswe twesa twe babili napa linga tulekene. 50Linga kubanyasya abanangu aba, pamo kwegelapo abangi, napa linga ngayapo une ukusiketa, ukumbukega ukuti Kyala ikutuketa uswe.”
51Popapo Labani alinkwendelela ukuyoba alinkumbula Yakobu alinkuti, “Ukete, ilibungila lya mabwe ili, nikikumbusyo kya ibwe ili ndikumbile pakati ugwe nanine! 52Fyo fibili fififi, ilibungila lya mabwe ili kangi nikyakukumbukilamo kya ibwe ili, lo lusisimikisyo lwakuti nayumo ugwa uswe atisakukisania apa bo atwele ubwite kumwinake. 53Kyala gwa Abrahamu, Kyala gwa Nahori, Kyala gwa bisabo, yo ayege ndongi pakati pali uswe.” Popapo Yakobu alinkufingila ulufingo mwa Kyala uyu Isaka ugwise amputaga. 54Alinkuntwalila Kyala ilikemo nkyamba kilakila, alinkubabilikila abakamu bake ku findu fya pa lusekelo.
55Bo babili balinkugona nkyamba mulamula. Ilya kilabo nulubunjubunju Labani alinkulagana na bisukulu bake na banake abalindwana bala, popapo alinkugomokela kumyake.
လက်ရှိရွေးချယ်ထားမှု
UBWANDILO 31: NNBII
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
BAIBULO INONGWA INUNU © Bible Society of Malawi, 2017.