मर्कुस 2
2
येसुइ कुइच्या रोगइ ङाःयो यातचाक बिरामिकाय स्याक्ताक्सास्यावो
(मति ९:१-८; लुका ५:१७-२६)
1केहि दिन लोन्हे येसु कफर्नहुम सहरताङ द्याह्न्सास्यावा, र येसु किमहाङ दाह्सास्यावो मुना त दाह्यो कुराको खबर रेह्न्तोले भयभय त स्यावा। 2अनि नाःतो मान्तालम येसु मुसास्यावो किमहाङ दाह्तिवाङाकाय, र किमभित्र ह्योक्मालोझ्यान्ते किमको दह्य्लो बाहिरसम्ममा मान्तालमको हुलइ ब्लिङाकाय। येसुइ ओउमयकाय परमेस्वरको आखर प्रचार जाह्ङ्सास्याउधय खेतो। 3ओउच्युक खेरले प्लय जना मान्तालमइ यातचाक कुइच्या रोगइ ङाःयो बिरामिकाय लात्ति येसुकहाङ वानाकानि। 4मान्तालमको हुलको कारनइ ओउमयइ बिरामिकाय येसुकहाङ दाक्सा खाइनिलि। ओउतझ्यान्ते ओउमयइ येसु मुसास्यावोको त्याउसयको छाना भोह्लाक्तिको ओउसयले बिरामिकाय एःनो न्हापदोहि ओम्त येसुको ङ्हाहाङ क्लाःआकानि। 5ओउ मान्तालमको उच्युक ताह्ङो बिस्वास च्यउति येसुइ ओउ कुइच्या रोगइ ङाःयो बिरामिकाय तोसास्यावा, “ङाको होया, नाङको पापलम छेमा स्यावो मुना।”
6तर ओहाङ च्युःङ्तिमुओ केहि धर्मगुरुलमइ लयमयको मनहाङ एतदाह्य्ति बिचार जाह्ङ्धय खेइतो, 7“इ मान्ता धइति एतदाह्य्ति नोःना? इ मान्ताइ परमेस्वरको अपमान जाह्ङ्धय मुना, धइतिदाह्य्सा परमेस्वरइ मात्र पाप छेमा जाह्ङ्सा खाइसास्याउना।”
8अनि ओउमयको ल्हुङतुकको बिचार चिःति येसुइ ओउमयकाय तोसास्यावा, “निङ धइति लयको ल्हुङतुकहाङ ओउत म्हर्तेनय? 9ओउ कुइच्या रोगइ ङाःयो मान्ताकाय ‘नाङको पापलम छेमा स्यावा’ त तोसा, अथबा ‘चिङ र लयको न्हाप लाताक्तिको वाह’ त तोसाहाङ गाउखे सजिलो स्याउना? 10तर ङा मान्ताको चोःकुस#२:१० ङा मान्ताको चोः मान्ताको चोः त तोओ मय्ङखे दानिएल ७:१३ हाङसय वाङो खेना, र दानिएलइ लेखओखे लयको बारेहाङले खेना त दाह्यो कुरा मान्तालमइ चिःपानानि त दाह्य्ति येसुइ इ मय्ङ अथबा उपाधि लयकाय बइसास्यावो खेना। इ ल्हाउदयबाङहाङ पाप छेमा जाह्ङ्सा अधिकार मुना त दाह्यो कुराको प्रमान ङाइ निङकाय बइनेनाङ्स।” ओहाङसयको येसुइ ओउ कुइच्या रोगइ ङाःयो मान्ताकताङ हिल्ति तोसास्यावा, 11“ङाइ नाङकाय तोनेनाङ, नाङ च्योक र लयको न्हाप लात्ति किम पाह्य।”
12मान्तालमइ योति मुतोकहाङले ओउ चिङा, र लयको न्हाप लाताक्तिको रेह्न्तोले पाह्या। ओहाङ मुओ मान्तालम माहा जोक्तो ग्याह्ङोझ्यान्ते, “निइपाय ङ्हा एतताह्ङ्तो गलमा च्यवो नाःआक्तहिलि” त दाह्य्ति परमेस्वरको प्रसङ्सा जाह्ङाकानि।
येसुइ तिरो लेःओ लेबिकाय गोत्सास्यावो
(मति ९:९-१३; लुका ५:२७-३२)
13येसु फेरि गालिल समुन्द्रको किनारताङ द्याह्न्ति आल्सास्यावा। नाःतो मान्तालम येसुकहाङ वाङाकाय, र येसुइ ओउमयकाय स्यानराय बइसा फाःङ्सास्यावा। 14येसु समुन्द्रको किनार स्याउधय आल्धयमुतोकहाङ, येसुइ तिरो लेःओ थाउहाङ च्युःङ्तिमुओ अल्फायसको चोः लेबिकाय च्यउसास्यावा। येसुइ ओउकाय तोसास्यावा, “ङाकाय गुह्ल्ति वाङ र ङाको चेला स्याव।” एत साइति लेबि चिङा र येसुको लोन्हे गुह्ल्ति वाहा।
15लोन्हे येसु र ओउको चेलालम लेबिको किमहाङ राह्मको जेःगा जेःधय खेइतो। तिरो लेःओ नाःतो मान्तालम र अरु पापि मान्तालममा येसुकाय गुह्ल्ति वाहोझ्यान्ते, ओउमयमा येसुकुस ब्रकले ओउ राह्मको जेःगा जेःधय खेइतो। 16येसुइ तिरो लेःओ मान्तालम र अरु पापिलमकुस ब्रक्त मुति जेःधयमुओ च्यउति फरिसि समुहको केहि धर्मगुरुलमइ येसुको चेलालमकाय तोआकानि, “ओउइ धइति ओउतताह्ङो तिरो लेःओ मान्तालम र पापिलमकुस ब्रक्त मुति जेनउ?”
17येसुइ ओउमय नोःओ साइति एतदाह्य्ति तोसास्यावा, “बइदाङ्गिपाय सेल मान्तालमकाय चाहल, तर बिरामि मान्तालमकायखे चाहलेना। ओउतले लयकाय धर्मि त म्हरोलमकाय खेल, तर लयकाय पापि त चिःति पस्ताप जाह्ङ्सा झाकोलमकाय ङा गोत्लाङ वाङो खेनाङ।”
उपाङको बारेहाङ प्रस्न
(मति ९:१४-१७; लुका ५:३३-३९)
18यातपल्त युहन्नाको चेलालम र फरिसिलम उपाङ मुतोक बेलाहाङ, केहि मान्तालम येसुकहाङ वाङ्ति ह्वताकानि, “बप्तिस्मा बयो युहन्नाको चेलालम र फरिसिलम उपाङ मुनय, तर नाङको चेलालमखे धइति उपाङ मुइलि?”
19येसुइ ओउमयकाय जवाफ बइसास्यावा, “दुलाहा ब्रक्त मुतोकहाङ दोह जन्तिलम उपाङ मुनय र? पक्कामा मुइलि! दुलाहा ओउमयकुस मुच्युकसम्मखे ओउमयइ उपाङ मुलेइलि। 20तर एतताह्ङो दिनमा वाङ्ना जब दुलाहाकाय ओउमयकसय वेङ्ति आःल्ना अनि ओउमय उपाङ मुलेनय।
21 इ कुरामा साइनु, सुइमा पुरानो नायकाय नया नायइ काप्निलि। यदि काप्ना त खेयाकायमा, नया कापो नाय स्रुह्म्ना र ओउइ पुरानो नायकाय क्रेत्ताक्नउ अनि ओउ पुरानो नायहाङ झन् ताह्ङ्तो घाङ स्याउलेना। 22र सुइमा धाकसायको नया ङोतिः पुरानो छालाको स्योङथोङहाङ गम्निलि। धइतिदाह्य्सा धाकसायको नया ङोतिःइ पुरानो छालाको स्योङथोङकाय पक्ताक्नउ, अनि ङोतिःमा, स्योङथोङमा बेकामको स्याउलेना। ओउतझ्यान्ते धाकसायको नया ङोतिःखे नया छालाको स्योङथोङहाङले गम्सा परलेना।”
येसु धोओ दिनको प्रभु खेसास्याउना
(मति १२:१-८; लुका ६:१-५)
23यातज्यो यहुदि धोओ दिनहाङ येसु गहुङराङको ल्याम स्याउति आल्सास्याउधय खेतो। येसुको चेलालमइ गहुङको बाला काह्उधय जेःसा फाःङाकानि। 24ओउ च्यउति फरिसिलमइ येसुकाय ह्वताथय, “योसास्याउपा, धोओ दिनहाङ निको नेम-कानुनइ जाह्ङ्सास्याउल त दाह्य्ति तोओ कामलम धइति नाङको चेलालमइ जाह्ङ्नानि?”
25येसुइ ओउमयकाय तोसास्यावा, “राजा दाउद र ओउको होयालम योङक्राइतोक बेलाहाङ, राजा दाउदइ दोह जाह्ङाकान त दाह्यो कुरा दोह निङइ धर्मसास्त्रहाङ पह्रओ नाःतेइलि र? 26ताह्ङो पुजारि अबियाथारको पालाहाङ दाउद परमेस्वरको किमभित्र पोका, र परमेस्वरकाय भेति बयो पबित्र लाङ त्याल्ति जेःआकान। ओउ लाङखे निको नेम-कानुन अनुसार पुजारिलमबाहेक अरु सुइमा जेःसा स्यावाक्ल। अनि ओउइ लयको होयालमकायमा ओउ लाङ जेःसा बयाकान।”
27अनि येसुइ इ कुरा द्युम्ताक्धय एत तोसास्यावा, “मान्तालमखे धोओ दिनको लागि जाह्ङो खेलेल, तर धोओ दिनखे मान्तालमको लागिले जाह्ङो खेना। 28ओउतझ्यान्ते ङा मान्ताको चोःखे धोओ दिनकोमा प्रभु खेनाङ।”
လက်ရှိရွေးချယ်ထားမှု
मर्कुस 2: CHEP
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 2024 (Active), Mother Tongue Translators Society and Wycliffe Bible Translators, Inc. All rights reserved.
