မဿဲ 22
22
မင်္ဂလာဧည့်ခံပွဲပုံဥပမာ
1တစ်ဖန် ယေရှုသည် သူတို့အား ပုံဥပမာများဖြင့် မိန့်တော်မူ၏။ 2ယေရှုက “ကောင်းကင်နိုင်ငံတော်၏ သဘောသဘာဝသည် ဤအဖြစ်အပျက်နှင့် တူ၏။ ဘုရင်တစ်ပါးသည် မိမိသားအတွက် မင်္ဂလာဧည့်ခံပွဲကို ကျင်းပပေး၏။ 3ထိုဘုရင်သည် မင်္ဂလာဧည့်ခံပွဲသို့ ဖိတ်ခေါ်ခံထားရသောသူများကို ခေါ်ရန် အစေအပါးတို့အား စေလွှတ်၏။ သို့သော် ထိုသူတို့သည် လာရန်ငြင်းဆိုကြ၏။
4နောက်တစ်ဖန် သူသည် အခြားအစေအပါးတို့ကို စေလွှတ်၍ ‘ဧည့်ခံပွဲကို ငါပြင်ဆင်ထားပြီ။ နွားများနှင့် ဆူဖြိုးသောနွားကလေးများကိုလည်း သတ်ထားပြီ။ အရာအားလုံး အဆင်သင့်ဖြစ်ပြီ။ မင်္ဂလာဧည့်ခံပွဲသို့ လာကြပါဟူ၍ ဖိတ်ခေါ်ခံထားရသောသူများအား ပြောကြလော့’ ဟု မှာလိုက်ပြန်၏။ 5သို့သော်လည်း ဖိတ်ခေါ်ခံထားရသောသူများသည် လျစ်လျူရှု၍ တချို့သည် မိမိလယ်သို့လည်းကောင်း၊ တချို့သည် ကုန်သွယ်ရာသို့လည်းကောင်း ထွက်သွားကြ၏။ 6အခြားသောသူတို့က ဘုရင်၏အစေအပါးတို့ကို ဖမ်းချုပ်၍ နှိပ်စက်ကာ သတ်ဖြတ်ကြ၏။
7ထိုအခါ ဘုရင်သည် အမျက်ထွက်၍ သူ၏တပ်ကို စစ်ချီစေပြီး ထိုလူသတ်သမားများကို သတ်ကာ သူတို့၏မြို့ကို မီးရှို့စေ၏။ 8ထို့နောက် သူ၏ အစေအပါးတို့အား ‘မင်္ဂလာဧည့်ခံပွဲသည် အဆင်သင့်ဖြစ်ပြီ။ သို့သော် ဖိတ်ခေါ်ခံထားရသောသူများသည် မင်္ဂလာပွဲနှင့် မထိုက်တန်ကြပါ။ 9ထို့ကြောင့် လမ်းဆုံလမ်းခွများသို့ သွား၍ တွေ့သမျှသောသူတို့ကို မင်္ဂလာဧည့်ခံပွဲသို့ ဖိတ်ခေါ်ခဲ့ကြလော့’ ဟု အမိန့်ပေးလေ၏။ 10ထိုအစေအပါးတို့သည် လမ်းများသို့သွား၍ တွေ့သမျှလူဆိုး၊ လူကောင်းတို့ကို ခေါ်လာကြ၏။ ထိုအခါ မင်္ဂလာခန်းမသည်လည်း ဧည့်သည်များနှင့် ပြည့်လေ၏။
11ဘုရင်သည် ဧည့်သည်များကို ကြည့်ရှုရန် ရောက်လာသောအခါ မင်္ဂလာပွဲဝတ်စုံမဝတ်ဆင်ထားသော လူတစ်ဦးကို သတိထားမိလေ၏။ 12ထိုအခါ ဘုရင်က ‘မိတ်ဆွေ… မင်္ဂလာပွဲဝတ်စုံကို မဝတ်ဘဲ မည်သို့ရောက်လာသနည်း’ ဟု မေးတော်မူ၏။ သို့သော် ထိုသူသည် မဖြေနိုင်ဘဲရှိ၏။ 13ထိုအခါ ဘုရင်က အခြွေအရံတို့အား ‘သူ၏ ခြေလက်တို့ကို ချည်၍ အပြင်ဘက်အမှောင်ထဲသို့ ပစ်လိုက်ကြလော့။ ထိုနေရာ၌ သူသည် အံကြိတ်၍ ငိုကြွေးရလိမ့်မည်’ ဟု ဆိုလေ၏။
14အဘယ်ကြောင့်ဆိုသော် ဖိတ်ခေါ်ခံရသူများစွာ ရှိသော်လည်း ရွေးကောက်ခံရသူမှာ အနည်းငယ်သာ ရှိသောကြောင့်ဖြစ်သည်” ဟု မိန့်တော်မူ၏။
ဆီဇာဘုရင်အား အခွန်ပေးဆောင်ခြင်း
15ထိုအခါ ဖာရိရှဲတို့သည် စုဝေးလျက် ယေရှုမိန့်တော်မူမည့် စကားတော်ထဲမှ အမှားကို ရှာ၍ ဖမ်းဆီးရန် တိုင်ပင်ကြ၏။ 16ထို့နောက် သူတို့၏တပည့်များကို ဟေရုဒ်ဘက်တော်သားများနှင့်တကွ ယေရှုထံတော်သို့ စေလွှတ်၍ “ဆရာတော်… ဆရာတော်သည် ဖြောင့်မှန်သောသူဖြစ်ပြီး ဘက်မလိုက်တတ်ကြောင်း အကျွန်ုပ်တို့သိကြပါ၏။ ဆရာတော်သည် လူ့မျက်နှာကို မထောက်ဘဲ ဘုရားသခင်၏တရားလမ်းအား မှန်ကန်စွာ သွန်သင်တတ်ပါ၏။ 17သို့ဖြစ်၍ ဆရာတော် မည်သို့ထင်မြင်သည်ကို အကျွန်ုပ်တို့အားပြောပါ။ ဆီဇာဘုရင်အား အကျွန်ုပ်တို့က အခွန်ပေးဆောင်ခြင်းသည် ပညတ်တော်နှင့် ကိုက်ညီသလော၊ မကိုက်ညီသလော” ဟု မေးလျှောက်ကြ၏။
18သို့သော်လည်း ယေရှုသည် ထိုသူတို့၏ ဆိုးညစ်သောအကြံအစည်ကို သိတော်မူသဖြင့် “သူတော်ကောင်းယောင်ဆောင်သူတို့… သင်တို့သည် အဘယ်ကြောင့်ငါ့ကို ထောင်ချောက်ဆင်ဖမ်းရန် ကြိုးစားကြသနည်း။ 19အခွန်ဆောင်ရာတွင်သုံးသည့် ဒင်္ဂါးပြားတစ်ပြားကို ပြလော့” ဟု မိန့်တော်မူလျှင် သူတို့သည် ဒင်္ဂါးပြား#22:19 မူရင်းဂရိကျမ်းတွင် “ဒေနာရိ” ဟု ပါရှိသည်။ ဒေနာရိတစ်ပြား၏ တန်ဖိုးသည် လုပ်သားတစ်ဦး၏တစ်နေ့တာလုပ်အားခနှင့် ညီမျှသည်။တစ်ပြားကို ယူခဲ့ကြ၏။ 20ထိုအခါ ယေရှုက “ဤဒင်္ဂါးပြားပေါ်၌ မည်သူ့ပုံနှင့် မည်သူ့အမည် ပါရှိသနည်း” ဟု မေးတော်မူ၏။
21သူတို့က “ဆီဇာဘုရင်၏ ပုံနှင့်အမည် ပါရှိသည်” ဟု လျှောက်ကြ၏။
ထိုအခါ ယေရှုက “သို့ဖြစ်လျှင် ဆီဇာဘုရင်နှင့်ဆိုင်သောအရာများကို ဆီဇာဘုရင်အား ပေးဆောင်ကြလော့။ ဘုရားသခင်နှင့်ဆိုင်သောအရာများကို ဘုရားသခင်အား ပေးဆောင်ကြလော့” ဟု ထိုသူတို့အား မိန့်တော်မူ၏။
22ဤသို့မိန့်တော်မူသည်ကို သူတို့သည် ကြားလျှင် အံဩ၍ ကိုယ်တော်ထံမှထွက်သွားကြ၏။
သေရာမှပြန်ရှင်ခြင်းအကြောင်း ဆွေးနွေးခြင်း
23ထိုနေ့၌ပင် ဇဒ္ဒုကဲတို့သည် ယေရှုထံသို့ လာကြ၏။ ဇဒ္ဒုကဲတို့က သေလွန်သောသူတို့သည် ရှင်ပြန်ထမြောက်ခြင်းမရှိဟု ခံယူကြ၏။ 24သူတို့က ယေရှုအား “ဆရာတော်… ဇနီးရှိသောလူတစ်ဦးသည် သားသမီးမထွန်းကားဘဲ သေဆုံးသွားလျှင် ညီဖြစ်သူက ထိုအမျိုးသမီးကို လက်ထပ်ယူ၍ အစ်ကိုဖြစ်သူ၏ မျိုးဆက်မပြတ်စေရန် ဆောင်ရွက်ရမည်#22:24 တရား ၂၅:၅-၆။ဟု မောရှေညွှန်ကြားခဲ့ပါ၏။ 25ကျွန်ုပ်တို့တွင် ညီအစ်ကို ခုနစ်ဦးရှိ၏။ အစ်ကိုကြီးသည် အိမ်ထောင်ပြုပြီး သားသမီးမထွန်းကားဘဲ ကွယ်လွန်၏။ ထို့ကြောင့် သူ၏ဇနီးကို ညီဖြစ်သူက ယူရ၏။ 26ထိုနည်းတူ ဒုတိယမြောက်ညီ၊ တတိယမြောက်ညီ စသည်ဖြင့် ညီအစ်ကိုခုနစ်ဦးလုံးသည် ထိုအမျိုးသမီးကို ယူ၍ သားသမီးမထွန်းကားဘဲ ကွယ်လွန်ကြ၏။ 27နောက်ဆုံး၌ ထိုအမျိုးသမီးသည်လည်း ကွယ်လွန်သွား၏။ 28ညီအစ်ကိုခုနစ်ဦးလုံးနှင့် ပေါင်းဖက်ခဲ့သူဖြစ်သောကြောင့် သေရာမှရှင်ပြန်ထမြောက်မည့်ကာလတွင် ထိုအမျိုးသမီးသည် မည်သူ၏ ဇနီးဖြစ်မည်နည်း” ဟု မေးလျှောက်ကြ၏။
29ယေရှုက “သင်တို့သည် ကျမ်းစာကိုလည်းကောင်း၊ ဘုရားသခင်၏တန်ခိုးတော်ကိုလည်းကောင်း မသိသောကြောင့် အယူလွဲနေကြ၏။ 30သေရာမှရှင်ပြန်ထမြောက်မည့်ကာလတွင် လူတို့သည် လက်ထပ်ယူခြင်းနှင့် လက်ထပ်ပေးစားခြင်းကို ပြုကြမည်မဟုတ်။ ထိုသူတို့သည် ကောင်းကင်ဘုံရှိ ကောင်းကင်တမန်များကဲ့သို့ဖြစ်ကြလိမ့်မည်။
31-32သေလွန်သောသူတို့ရှင်ပြန်ထမြောက်ခြင်းနှင့်ပတ်သက်၍ အာဗြဟံ၊ ဣဇာက်နှင့် ယာကုပ်တို့ သေလွန်ပြီးနောက် အချိန်ကြာမြင့်ပြီးမှလည်း ဘုရားသခင်က ‘ငါသည် အာဗြဟံ၏ဘုရား၊ ဣဇာက်၏ဘုရား၊ ယာကုပ်၏ဘုရားဖြစ်၏’ ဟု မိန့်တော်မူသည်ကို ကျမ်းစာ၌ သင်တို့ မဖတ်ဖူးကြသလော။ သို့ဖြစ်၍ ဘုရားသခင်သည် သေလွန်သောသူတို့၏ ဘုရားမဟုတ်ပါ။ အသက်ရှင်သောသူတို့၏ ဘုရားဖြစ်၏” ဟု မိန့်တော်မူ၏။
33ထိုအရာကို လူထုပရိသတ်တို့သည် ကြားသောအခါ ယေရှု၏ သွန်သင်ချက်အပေါ် အံ့ဩကြ၏။
အရေးကြီးဆုံးသောပညတ်တော်
34ယေရှုက ဇဒ္ဒုကဲများကို နှုတ်ဆိတ်သွားစေတော်မူကြောင်း ဖာရိရှဲတို့ကြားလျှင် ကိုယ်တော်ထံသို့စုဝေးလာကြ၏။ 35သူတို့အထဲမှ ကျမ်းတတ်ပညာရှင်တစ်ဦးက ယေရှုအား 36“ဆရာတော်… ပညတ်ကျမ်းထဲတွင် မည်သည့်ပညတ်တော်သည် အရေးကြီးဆုံးဖြစ်သနည်း” ဟု ထောင်ချောက်ဆင်၍ မေးလျှောက်လေ၏။
37ယေရှုက “ ‘သင်၏ဘုရားသခင် ထာဝရဘုရားကို စိတ်နှလုံးအကြွင်းမဲ့၊ စိတ်ဝိညာဉ်တစ်ခုလုံး၊ ဉာဏ်ရှိသမျှနှင့် ချစ်လော့’#22:37 တရား ၆:၅။ 38ဟူသောပညတ်တော်သည် ပထမဆုံးနှင့် အကြီးမြတ်ဆုံးဖြစ်၏။ 39ဒုတိယပညတ်တော်သည်လည်း ထိုနည်းတူဖြစ်၍ ‘ကိုယ်နှင့်သက်ဆိုင်သောသူကို ကိုယ်နှင့်အမျှ ချစ်လော့’#22:39 ဝတ် ၁၉:၁၈။ ဟူ၍ ဖြစ်၏။ 40ပညတ်ကျမ်းနှင့် ပရောဖက်ကျမ်းရှိသမျှတို့သည် ထိုပညတ်တော်နှစ်ချက်အပေါ်တွင် အခြေခံသည်” ဟု မိန့်တော်မူ၏။
ခရစ်တော်သည် မည်သူ၏သားတော်ဖြစ်သနည်း
41ထို့နောက် ဖာရိရှဲတို့သည် စုဝေးနေကြစဉ် ယေရှုက 42“ခရစ်တော်#22:42 ဂရိဘာသာအားဖြင့် “ခရစ်တော်၊” ဟေဗြဲဘာသာအားဖြင့် “မေရှိယ” ဖြစ်ပြီး ထိုနှစ်ခုလုံး၏ အဓိပ္ပာယ်မှာ “ဘိသိက်ခံရသူ၊” သို့မဟုတ် “ရွေးကောက်ခံရသူ” ဖြစ်သည်။ကို မည်သို့ထင်မှတ်ကြသနည်း။ မည်သည့်မျိုးဆက်မှ မွေးဖွားလာသောသူဖြစ်သနည်း” ဟု မေးတော်မူလျှင် ဖာရိရှဲတို့က “ဒါဝိဒ်မင်း၏ သားတော်ဖြစ်သည်” ဟု လျှောက်ကြ၏။
43ယေရှုက “ထိုသို့ဖြစ်လျှင် ဒါဝိဒ်မင်းသည် ဝိညာဉ်တော်၏လှုံ့ဆော်မှုဖြင့် ခရစ်တော်ကို အဘယ်ကြောင့် သခင်ဟု ခေါ်သနည်း။ ဒါဝိဒ်မင်းက
44‘ထာဝရဘုရားသည် ကျွန်ုပ်၏ သခင်အား
“ငါ၏ လက်ယာဘက်၌ ထိုင်လော့။
ငါသည် သင်၏ရန်သူတို့ကို သင်၏ခြေဖဝါးအောက်၌ ချထားလိမ့်မည်” ဟူ၍ မိန့်တော်မူ၏’#22:44 ဆာ ၁၁၀:၁။
ဟု ဆိုခဲ့၏။
45ဒါဝိဒ်မင်းက ခရစ်တော်ကို သခင်ဟူ၍ ခေါ်လျှင် ခရစ်တော်သည် မည်ကဲ့သို့ ဒါဝိဒ်မင်း၏သား ဖြစ်နိုင်မည်နည်း” ဟု မိန့်တော်မူ၏။
46ထိုအခါ မည်သူမျှ အဖြေမပေးနိုင်ကြ။ ထိုနေ့မှစ၍ ယေရှုအား မည်သူမျှ ထပ်မံ၍ မမေးလျှောက်ဝံ့ကြပေ။
လက်ရှိရွေးချယ်ထားမှု
မဿဲ 22: BCB
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
