မဿဲ 16
16
အံ့ဖွယ်နိမိတ်လက္ခဏာ တောင်းဆိုခြင်း
1တစ်နေ့တွင် ဖာရိရှဲနှင့် ဇဒ္ဒုကဲတို့သည် ယေရှုကို စမ်းသပ်လိုသဖြင့် ချဉ်းကပ်၍ ကောင်းကင်မှ နိမိတ်လက္ခဏာကိုပြရန် တောင်းဆိုကြ၏။ 2ယေရှုက “သင်တို့သည် ညနေခင်းရောက်သောအခါ ‘ကောင်းကင်နီသည်ဖြစ်၍ မနက်ဖြန်တွင် ရာသီဥတုသာယာလိမ့်မည်’ ဟု ဆိုတတ်ကြ၏။ 3မနက်ခင်းတွင် ‘ကောင်းကင်နီ၍ အုံ့မှိုင်းသည်ဖြစ်၍ ယနေ့ မုန်တိုင်းကျလိမ့်မည်’ ဟု ဆိုတတ်ကြ၏။ သင်တို့သည် ကောင်းကင်ကို ကြည့်၍ မိုးလေဝသအခြေအနေကို ပိုင်းခြားသိမြင်နိုင်ကြ၏။ သို့သော် အချိန်ကာလများ၏ နိမိတ်လက္ခဏာများကိုမူ ပိုင်းခြားသိမြင်နိုင်ခြင်းမရှိကြ။ 4ဆိုးညစ်၍ ဘုရားသခင်ကို မယုံကြည်သောမျိုးဆက်သည် နိမိတ်လက္ခဏာကို တောင်းတတ်၏။ သို့သော် ငါသည် ပရောဖက်ယောန၏နိမိတ်လက္ခဏာမှလွဲ၍ မည်သည့်နိမိတ်လက္ခဏာကိုမျှ ပြမည်မဟုတ်” ဟု မိန့်တော်မူ၏။ ထို့နောက် ယေရှုသည် သူတို့ထံမှ ထွက်ခွာ၍ ကြွတော်မူ၏။
ဖာရိရှဲနှင့် ဇဒ္ဒုကဲတို့၏ တဆေး
5ကမ်းတစ်ဖက်သို့ ရောက်သောအခါ တပည့်တော်တို့က မိမိတို့သည် စားစရာယူလာရန် မေ့လျော့ကြောင်း သတိပြုမိကြ၏။ 6ယေရှုက “ဖာရိရှဲနှင့် ဇဒ္ဒုကဲတို့၏ တဆေးကို အထူး သတိပြုကြလော့” ဟု မိန့်တော်မူ၏။
7သူတို့က “ငါတို့၌ စားစရာမပါသောကြောင့် ဤသို့မိန့်တော်မူခြင်းဖြစ်သည်” ဟု အချင်းချင်းပြောဆိုကြ၏။ 8ထိုသို့ပြောဆိုကြသည်ကို ယေရှုသိတော်မူသဖြင့် “ယုံကြည်ခြင်းအားနည်းသောသူတို့… သင်တို့၌ စားစရာမပါသည့်အကြောင်းကို အဘယ်ကြောင့်ပြောဆိုနေကြသနည်း။ 9သင်တို့သည် ယခုတိုင်အောင် နားမလည်နိုင်ကြသေးသလော။ မုန့်ငါးလုံးကို ဖဲ့၍ လူငါးထောင်အား ငါကျွေးမွေးခဲ့စဉ် အကျိုးအပဲ့ဘယ်နှတောင်း ကောက်သိမ်းခဲ့ရသည်ကို သတိမရကြသလော။ 10သို့မဟုတ် မုန့်ခုနစ်လုံးကို ဖဲ့၍ လူလေးထောင်အား ကျွေးမွေးစဉ်၌လည်း ဘယ်နှတောင်းကောက်သိမ်းခဲ့ရသည်ကို သတိမရသလော။ 11ငါသည် စားစရာနှင့်ပတ်သက်၍ ပြောဆိုနေသည်မဟုတ်ကြောင်းကို အဘယ်ကြောင့် သင်တို့နားမလည်နိုင်ကြသနည်း။ ထပ်မံ၍ ငါပြောသည်မှာ ဖာရိရှဲနှင့် ဇဒ္ဒုကဲတို့၏ တဆေးကို သတိပြုကြလော့” ဟု မိန့်တော်မူ၏။
12ထိုအခါ တပည့်တော်တို့က ယေရှုသည် မုန့်တွင်ထည့်သောတဆေးကို သတိပြုရန် ပြောဆိုသည်မဟုတ်ဘဲ ဖာရိရှဲနှင့် ဇဒ္ဒုကဲတို့၏ မှားယွင်းစေသောသွန်သင်ချက်ကို သတိပြုရန် ပြောဆိုကြောင်း နားလည်ကြ၏။
ယေရှုသည် ခရစ်တော်ဖြစ်ကြောင်း ပေတရုဝန်ခံခြင်း
13ထို့နောက် ယေရှုသည် ဆီဇာရီးယားဖိလိပ္ပုနယ်သို့ ရောက်သောအခါ တပည့်တော်တို့အား “လူတို့သည် လူသား#16:13 “လူသား” သည် ယေရှုက မိမိကိုယ်တိုင်အတွက် သုံးသောဂုဏ်ပုဒ်ဖြစ်သည်။ကို မည်သူဖြစ်သည်ဟူ၍ ဆိုကြသနည်း” ဟု မေးတော်မူ၏။
14တပည့်တော်တို့က “တချို့က ကိုယ်တော်သည် နှစ်ခြင်းဆရာယောဟန်၊ တချို့က ဧလိယ၊ တချို့က ယေရမိ၊ သို့မဟုတ် အခြားပရောဖက်တစ်ပါးပါး ဖြစ်သည်ဟူ၍ ဆိုကြ၏” ဟု လျှောက်ကြ၏။
15ထိုအခါ ယေရှုက “သင်တို့ကမူ ငါ့ကို မည်သူဖြစ်သည်ဟု ဆိုကြသနည်း” ဟု မေးတော်မူလျှင် 16ရှိမုန်ပေတရုက “ကိုယ်တော်သည် အသက်ရှင်တော်မူသည့် ဘုရားသခင်၏သားတော်ဟူသော ခရစ်တော်#16:16 ဂရိဘာသာအားဖြင့် “ခရစ်တော်၊” ဟေဗြဲဘာသာအားဖြင့် “မေရှိယ” ဖြစ်ပြီး ထိုနှစ်ခုလုံး၏ အဓိပ္ပာယ်မှာ “ဘိသိက်ခံရသူ၊” သို့မဟုတ် “ရွေးကောက်ခံရသူ” ဖြစ်သည်။ဖြစ်၏” ဟု လျှောက်လေ၏။
17ယေရှုက “ယောန၏သားရှိမုန်… သင်သည်မင်္ဂလာရှိ၏။ သင်သည် ဤအရာကို လူ့အနေဖြင့်သိသည်မဟုတ်။ ကောင်းကင်ဘုံ၌ရှိတော်မူသော ငါ၏ ခမည်းတော်က ဖော်ပြတော်မူ၍ သိခြင်းဖြစ်၏။ 18သင့်အား ငါပြောဆိုသည်မှာ သင်သည် ကျောက်ဟု အဓိပ္ပာယ်ရသောပေတရုဖြစ်၏။ ဤကျောက်ပေါ်တွင် ငါ၏ အသင်းတော်ကို တည်ဆောက်မည်။ မရဏနိုင်ငံ၏တံခါးများပင် ထိုအသင်းတော်ကို အောင်နိုင်လိမ့်မည်မဟုတ်။ 19ကောင်းကင်နိုင်ငံ၏ သော့များကို သင့်အား ငါပေးမည်။ ကမ္ဘာလောကတွင် သင်တားမြစ်#16:19 မူရင်းဂရိကျမ်းတွင် “ချည်နှောင်” ဟု ဖော်ပြထားသည်။သမျှသည် ကောင်းကင်ဘုံ၌လည်း တားမြစ်ခံရမည်။ ကမ္ဘာလောကတွင် သင်ခွင့်ပြု#16:19 မူရင်းဂရိကျမ်းတွင် “ဖြေလွှတ်” ဟု ဖော်ပြထားသည်။သမျှသည် ကောင်းကင်ဘုံ၌လည်း ခွင့်ပြုခံရမည်” ဟု မိန့်တော်မူ၏။
20ထို့နောက် ယေရှုက မိမိသည် ခရစ်တော်ဖြစ်ကြောင်း မည်သူ့ကိုမျှ မပြောရန် တပည့်တော်တို့အား တင်းကျပ်စွာ မှာကြားတော်မူ၏။
မိမိအသေခံတော်မူမည့်အကြောင်းကို ကြိုတင်ဟောတော်မူခြင်း
21ထိုအချိန်မှစ၍ ယေရှုက မိမိသည် ဂျေရုဆလင်မြို့သို့ သွားရမည်။ အကြီးအကဲများ၊ ယဇ်ပုရောဟိတ်ခေါင်းဆောင်များ၊ ကျမ်းတတ်ဆရာများလက်တွင် ဒုက္ခများစွာ ခံရမည်။ အသေသတ်ခြင်းကိုလည်း ခံရ၍ သုံးရက်မြောက်နေ့တွင် သေခြင်းမှထမြောက်တော်မူမည်ဟူသောအကြောင်းအရာများကို တပည့်တော်တို့အား စတင်ဖော်ပြတော်မူ၏။
22ထိုအခါ ပေတရုသည် ယေရှုအား သီးခြားခေါ်၍ “သခင်… ထိုသို့မဖြစ်ပါစေနှင့်။ ဤအဖြစ်သည် သခင့်ထံ၌ လုံးဝမကျရောက်စေရ” ဟု ဆိုကာ အပြစ်တင်သောစကားကို လျှောက်လေ၏။
23သို့သော် ယေရှုသည် ပေတရုထံသို့ မျက်နှာမူလျက် “အို စာတန်… ငါ့အနားမှ ထွက်သွားလော့။ သင်သည်ငါ့အတွက် ဆူးငြောင့်ခလုတ်ဖြစ်၏။ အဘယ်ကြောင့်ဆိုသော် သင်သည် ဘုရားသခင်၏ရှုထောင့်မှ မတွေးဘဲ လူ့ရှုထောင့်ဖြင့်သာ တွေးသည်” ဟု ဆုံးမတော်မူ၏။
24ထို့နောက် ယေရှုက “တစ်စုံတစ်ဦးသည် ငါ့တပည့် ဖြစ်လိုပါက မိမိအတ္တကိုစွန့်၍ မိမိလက်ဝါးကပ်တိုင်ကို ထမ်းကာ ငါ့နောက်သို့ လိုက်ရမည်။ 25မိမိအသက်ကို ကယ်တင်လိုသောသူသည် အသက်ဆုံးရှုံးလိမ့်မည်။ ငါ့အတွက် အသက်ဆုံးရှုံးသောသူသည် အသက်ကို ရလိမ့်မည်။ 26လူသည် ကမ္ဘာလောကတစ်ခုလုံးကို ပိုင်ဆိုင်ရသော်လည်း မိမိအသက်ကို ဆုံးရှုံးလျှင် မည်သည့်အကျိုး ရှိမည်နည်း။ မိမိအသက်ဝိညာဉ်ကို မည်သည့်အရာနှင့် လဲလှယ်နိုင်မည်နည်း။ 27လူသားသည် ခမည်းတော်၏ ဘုန်းတော်ကိုဆောင်၍ ကောင်းကင်တမန်များ ခြံရံလျက် ကြွလာလိမ့်မည်။ လူအပေါင်းတို့အား သူတို့ပြုခဲ့သည့်အကျင့်အတိုင်း ဆပ်ပေးတော်မူလိမ့်မည်။ 28ငါအမှန်ဆိုရလျှင် လူသားသည် ဘုရင်အဖြစ် အုပ်စိုးရန်#16:28 မူရင်းဂရိကျမ်းတွင် “မိမိနိုင်ငံတော်နှင့်အတူ” ဟု ဖော်ပြထားသည်။ ကြွလာသည်ကို ဤနေရာ၌ ရပ်နေသောသူတို့ထဲမှ တချို့သည် မမြင်ဘဲ သေရမည်မဟုတ်” ဟု မိန့်တော်မူ၏။
လက်ရှိရွေးချယ်ထားမှု
မဿဲ 16: BCB
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
