လုကာ 10
10
တပည့်တော်များကို စေလွှတ်တော်မူခြင်း
1ထို့နောက် သခင်ဘုရားသည် အခြားသောတပည့်တော် ခုနစ်ဆယ့်နှစ်ယောက်#10:1 အချို့သော လက်ရေးမူကျမ်းများတွင် “ခုနစ်ဆယ်” ဟု ဖော်ပြထားသည်။ကို ရွေးချယ်ပြီးလျှင် မိမိကြွတော်မူမည့် မြို့၊ ရွာအသီးသီးသို့ ကြိုတင်၍ နှစ်ဦးစီ စေလွှတ်လေ၏။ 2ထိုသူတို့အား ညွှန်ကြားတော်မူသည်မှာ “ရိတ်သိမ်းရန် စပါးများစွာ ရှိသော်လည်း ရိတ်သိမ်းသူတို့သည် နည်းလှ၏။ ထို့ကြောင့် ရိတ်သိမ်းသူများကို လယ်သို့ စေလွှတ်ပေးရန် လယ်ရှင်ထံ တောင်းလျှောက်ကြလော့။ 3သင်တို့ သွားကြလော့။ ဝံပုလွေများထဲသို့ သိုးများကို စေလွှတ်သကဲ့သို့ သင်တို့ကို ငါစေလွှတ်၏။ 4ပိုက်ဆံအိတ်၊ ခရီးဆောင်အိတ်၊ ဖိနပ်အပိုစသည်တို့ကို ယူမသွားကြနှင့်။ လမ်းတွင် မည်သူကိုမျှ နှုတ်မဆက်ကြနှင့်။
5အိမ်တစ်အိမ်သို့ ဝင်သောအခါ ‘ဤအိမ်တွင် ငြိမ်းချမ်းခြင်းရှိပါစေ’ ဟု ဦးစွာမေတ္တာပို့ကြလော့။ 6ထိုအိမ်တွင် ငြိမ်းချမ်းခြင်းကို လိုလားသူရှိလျှင် သင်တို့ပို့သသောမေတ္တာသည် ထိုသူအပေါ် သက်ရောက်လိမ့်မည်။ ထိုသို့မရှိပါက သင်တို့ပို့သသောမေတ္တာသည် သင်တို့ထံ ပြန်လာလိမ့်မည်။ 7တစ်အိမ်မှ တစ်အိမ်သို့ မပြောင်းရွှေ့ကြဘဲ အိမ်တစ်အိမ်တည်း၌သာ တည်းခို၍ အိမ်ရှင်ကျွေးမွေးဧည့်ခံသမျှကို စားသောက်ကြလော့။ အဘယ်ကြောင့်ဆိုသော် အလုပ်လုပ်သူသည် အခကြေးငွေကို ရထိုက်သောကြောင့်ဖြစ်၏။
8မြို့တစ်မြို့သို့ ဝင်သောအခါ ထိုမြို့သားတို့သည် သင်တို့ကို ကြိုဆိုလျှင် သင်တို့ရှေ့တွင် တည်ခင်းသမျှကို သုံးဆောင်ကြလော့။ 9ဖျားနာသောသူများအား ကုသပေး၍ ‘ဘုရားသခင်၏နိုင်ငံတော်သည် သင်တို့ထံသို့ ရောက်လာချိန်နီးပြီ’ ဟု ဟောပြောကြလော့။ 10သို့သော်လည်း မြို့ထဲသို့ ဝင်သောအခါ ထိုမြို့သားတို့သည် သင်တို့ကို မကြိုဆိုလျှင် ထိုမြို့၏လမ်းမပေါ်သို့ ထွက်၍ 11‘ငါတို့၏ခြေ၌ ကပ်လျက်ရှိသော သင်တို့မြို့၏ဖုန်မှုန့်ကိုပင် ငါတို့ခါချပြီ။ သို့သော် ဘုရားသခင်၏နိုင်ငံတော် ပေါ်ထွန်းချိန်နီးပြီဟု သိမှတ်ကြလော့’ ဟု ဟောပြောကြလော့။ 12သင်တို့အား ငါပြောဆိုသည်မှာ တရားစီရင်သောနေ့တွင် သောဒုံမြို့ထက် ထိုမြို့သည် ပို၍အပြစ်ဒဏ်ခံရလိမ့်မည်။
13အို ခေါရာဇိန်မြို့… သင်သည် အမင်္ဂလာရှိ၏။ အို ဗက်ဇဲဒမြို့… သင်သည် အမင်္ဂလာရှိ၏။ ငါသည် သင်တို့တွင် ပြခဲ့သော အံ့ဖွယ်တန်ခိုးတို့ကို တိုင်ရာမြို့နှင့် ဆီဒုန်မြို့တွင် ပြခဲ့လျှင် ထိုမြို့တို့၌ ရှိသောသူတို့သည် လျှော်ထည်ကြမ်းကို ဝတ်၍ ပြာထဲတွင် ထိုင်လျက် ယခင်ကတည်းကပင် မိမိတို့၏အပြစ်များအတွက် နောင်တရခဲ့ပြီးဖြစ်လိမ့်မည်။ 14တရားစီရင်သောအခါ သင်တို့သည် တိုင်ရာမြို့နှင့်ဆီဒုန်မြို့ထက် ပို၍ အပြစ်ဒဏ်ခံရလိမ့်မည်။ 15အို ကပေရနောင်မြို့… သင်သည် ကောင်းကင်တိုင်အောင် ချီးမြှောက်ခံရပါမည်လော။ မခံရပါ။ သင်သည် မရဏနိုင်ငံတိုင်အောင် နှိမ့်ချခံရလိမ့်မည်” ဟူ၍ ဖြစ်၏။
16ထို့နောက် တပည့်တော်တို့အား “သင်တို့၏စကားကို နားထောင်သောသူသည် ငါ့စကားကို နားထောင်၏။ သင်တို့ကို ငြင်းပယ်သောသူသည် ငါ့ကို ငြင်းပယ်၏။ ငါ့ကို ငြင်းပယ်သောသူသည် ငါ့ကိုစေလွှတ်တော်မူသောအရှင်ကို ငြင်းပယ်ပြီ” ဟု မိန့်တော်မူ၏။
17တပည့်တော် ခုနစ်ဆယ့်နှစ်ဦးတို့သည် ဝမ်းမြောက်စွာ ပြန်လာ၍ “သခင်… ကိုယ်တော်၏အမည်နာမကြောင့် နတ်ဆိုးတို့သည် အကျွန်ုပ်တို့ကို နာခံကြပါ၏” ဟု ပြန်၍ လျှောက်ကြ၏။
18ကိုယ်တော်က “စာတန်မာရ်နတ်သည် လျှပ်စီးလက်သကဲ့သို့ ကောင်းကင်မှ ကျလာသည်ကို ငါမြင်၏။ 19ကြည့်လော့။ ငါသည် သင်တို့ကို မြွေဆိုးနှင့် ကင်းမြီးကောက်များအပေါ်တွင် နင်းခြေရသောအခွင့်နှင့် ရန်သူများအပေါ် အုပ်စိုးရသော တန်ခိုးအာဏာကို ပေး၏။ မည်သည့်အရာမျှ သင်တို့ကို မထိခိုက်စေရ။ 20သို့သော် နတ်ဆိုးတို့သည် သင်တို့ကို နာခံကြသောကြောင့် ဝမ်းမမြောက်ကြနှင့်။ ကောင်းကင်ဘုံ၌ သင်တို့၏အမည်များစာရင်းဝင်သည့်အတွက် ဝမ်းမြောက်ကြလော့” ဟု မိန့်တော်မူ၏။
ယေရှု၏ကျေးဇူးတော်ချီးမွမ်းခြင်း
21ထိုအချိန်၌ ယေရှုသည် သန့်ရှင်းသောဝိညာဉ်တော်အားဖြင့် ရွှင်လန်း#10:21 အချို့သော လက်ရေးမူကျမ်းများတွင် “သန့်ရှင်းသောဝိညာဉ်တော်၌ ရွှင်လန်းလျက်” ဟု ဖော်ပြထားသည်။လျက် “ကောင်းကင်နှင့် မြေကြီး၏အရှင်သခင် ဖြစ်တော်မူသောအဖ… လောကီပညာရှင်များနှင့် ဉာဏ်ပညာထက်မြက်သူများအား ဤအရာများကို ဝှက်ထားတော်မူ၍ ကလေးငယ်တို့အား ဖော်ပြတော်မူသောကြောင့် ကျေးဇူးတင်ပါ၏။ မှန်ပါ၏အဖ။ ဤသည်မှာ အဖခမည်းတော် နှစ်သက်တော်မူသောအရာပင် ဖြစ်၏။
22ငါ့ခမည်းတော်သည် အရာအားလုံးကို ငါ့အား ပေးအပ်တော်မူပြီ။ သားတော်ကို ခမည်းတော်မှလွဲ၍ မည်သူမျှမသိ။ ခမည်းတော်ကိုလည်း သားတော်နှင့် သားတော်ဖော်ပြရန် ရွေးချယ်တော်မူသောသူတို့မှလွဲ၍ မည်သူမျှမသိ” ဟု မိန့်တော်မူ၏။
23ထို့နောက် ကိုယ်တော်သည် တပည့်တော်များထံသို့ လှည့်၍ သီးခြား မိန့်တော်မူသည်မှာ “သင်တို့သည် ယခုမြင်ရသောအရာများကို မြင်ရသောကြောင့် သင်တို့၏မျက်စိတို့သည် မင်္ဂလာရှိကြ၏။ 24ငါပြောဆိုသည်မှာ သင်တို့ မြင်ရသောအရာတို့ကို ရှေးခေတ်က ပရောဖက်များနှင့် ဘုရင်တို့သည် မြင်လိုခဲ့ကြ၏၊ သို့သော်လည်း မမြင်ခဲ့ကြရ။ သင်တို့ကြားရသောအကြောင်းအရာတို့ကိုလည်း ကြားလိုခဲ့ကြ၏။ သို့သော်လည်း မကြားခဲ့ကြရ” ဟူ၍ ဖြစ်၏။
အရေးကြီးဆုံးသောပညတ်တော်
25တစ်နေ့၌ ကျမ်းတတ်ပညာရှင်တစ်ဦးသည် ကိုယ်တော်ကို စမ်းသပ်ရန် “ဆရာတော်… ထာဝရအသက်ကို ရရှိရန် အကျွန်ုပ်သည် မည်သို့ပြုရပါမည်နည်း” ဟု မေးလျှောက်လေ၏။
26ယေရှုက “ပညတ်ကျမ်းတွင် မည်သို့ရေးထားသနည်း။ သင်သည် မည်သို့ဖတ်ဖူးသနည်း” ဟု ပြန်၍ မေးလေ၏။
27ထိုသူကလည်း “ ‘သင်၏ဘုရားသခင် ထာဝရဘုရားကို စိတ်နှလုံးအကြွင်းမဲ့၊ စိတ်ဝိညာဉ်တစ်ခုလုံး၊ ကိုယ်စွမ်းရှိသမျှ၊ ဉာဏ်စွမ်းရှိသမျှနှင့် ချစ်လော့။ ထိုမျှမက ကိုယ်နှင့်သက်ဆိုင်သောသူကို ကိုယ်နှင့်အမျှ ချစ်လော့’ ဟူ၍ ပါရှိပါသည်” ဟု ဖြေလေ၏။
28ယေရှုကလည်း “သင်ပြောသည့်အတိုင်း မှန်ပါ၏။ ထိုသို့ပြုလျှင် သင်သည် အသက်ကို ရလိမ့်မည်” ဟု မိန့်တော်မူ၏။
29ထိုသူသည် မိမိကိုယ်ကိုယ်ဖြောင့်မတ်ကြောင်းမြင်သာစေရန် “ဆရာတော် မည်သူသည် အကျွန်ုပ်နှင့်သက်ဆိုင်သောသူ ဖြစ်ပါသနည်း” ဟု ယေရှုအား တစ်ဖန်မေးလျှောက်လေ၏။
ကောင်းသောရှမာရိလူမျိုးတစ်ဦး၏ပုံဥပမာ
30ယေရှုက “လူတစ်ယောက်သည် ဂျေရုဆလင်မြို့မှ ဂျေရိခေါမြို့သို့ ခရီးသွားစဉ် ဓားပြတို့၏တိုက်ခိုက်ခြင်းကို ခံရလေ၏။ ဓားပြတို့သည် သူ၏အဝတ်ကို ချွတ်၍ ရိုက်နှက်ပြီးသေလုမြောပါးဖြစ်သောအခါ လမ်းဘေးတွင် ပစ်ထားကြ၏။
31ထိုအခါ ယဇ်ပုရောဟိတ်တစ်ပါးသည် ထိုလမ်းအတိုင်းသွားစဉ် ထိုသူကို မြင်သောအခါ အခြားတစ်ဖက်သို့ လွှဲရှောင်သွား၏။ 32ထိုနည်းတူ လေဝိမျိုးနွယ်တစ်ဦးသည် ထိုအရပ်သို့ ရောက်လာသော် ထိုဒဏ်ရာနှင့်လူကိုတွေ့လျှင် အခြားတစ်ဖက်သို့ လွှဲရှောင်သွား၏။
33သို့ရာတွင် ရှမာရိလူမျိုးတစ်ဦးသည် ထိုနေရာသို့ ရောက်လာ၍ ထိုလူနာကို မြင်လေသော် သနားစိတ်ရှိလေ၏။ 34ထိုရှမာရိလူမျိုးသည် လူနာထံသို့ ချဉ်းကပ်ပြီးလျှင် သူ၏အနာများကို သံလွင်ဆီနှင့် စပျစ်ဝိုင်ထည့်၍ အဝတ်ဖြင့် ပတ်စည်းပေး၏။ ထို့နောက် လူနာအား မိမိမြည်းပေါ် တင်လျက် တည်းခိုခန်းသို့ ပို့ဆောင်၍ ပြုစုစောင့်ရှောက်လေ၏။ 35နောက်တစ်နေ့၌ တည်းခိုခန်းပိုင်ရှင်အား ငွေဒင်္ဂါးနှစ်ပြား#10:35 မူရင်းဂရိကျမ်းတွင် “ဒေနာရိနှစ်ပြား” ဟု ပါရှိသည်။ ဒေနာရိတစ်ပြား၏တန်ဖိုးသည် လုပ်သားတစ်ဦး၏တစ်နေ့တာလုပ်အားခနှင့် ညီမျှသည်။ကို ပေး၍ ‘ဤသူကို စောင့်ရှောက်ပေးလော့။ ထပ်မံ ကုန်ကျမည့်စရိတ်ကို အကျွန်ုပ်ပြန်လာသောအခါ ပြန်၍ ဆပ်ပေးပါမည်’ ဟု မှာထားလေ၏။
36ထိုသုံးဦးတို့တွင် မည်သူသည် ထိုဓားပြတိုက်ခံရသော လူနာနှင့် သက်ဆိုင်သောသူ ဖြစ်ပါသနည်း” ဟု မေးတော်မူလျှင် 37ကျမ်းတတ်ပညာရှင်က “လူနာအား သနားကြင်နာ၍ ပြုစုစောင့်ရှောက်သောသူ ဖြစ်ပါ၏” ဟု လျှောက်၏။
ထိုအခါ ယေရှုက “သင် သွား၍ ထိုနည်းတူပြုလော့” ဟု မိန့်တော်မူ၏။
မာသနှင့် မာရိတို့ အိမ်သို့ ကြွတော်မူခြင်း
38ယေရှုနှင့် တပည့်တော်တို့သည် ဂျေရုဆလင်မြို့သို့ ခရီးသွားကြစဉ် ယေရှုသည် ရွာတစ်ရွာသို့ ဝင်တော်မူ၏။ ထိုရွာမှ မာသဟု ခေါ်သောအမျိုးသမီးသည် ယေရှုကို မိမိအိမ်သို့ ကြိုဆိုဧည့်ခံလေ၏။ 39မာသတွင် မာရိဟု ခေါ်သော ညီမတစ်ဦးရှိ၏။ မာရိသည် ယေရှု၏ခြေတော်ရင်း၌ ထိုင်လျက် ဟောပြောသမျှကို နားထောင်လေ၏။ 40သို့သော် မာသသည် ညစာဧည့်ခံခြင်းအမှုများကြောင့် အလွန်စိတ်ပူပန်၍ ယေရှုအနားသို့ ချဉ်းကပ်လျက် “သခင်… ကျွန်မ၏ညီမသည် ဧည့်ဝတ်ပြုရန် ကျွန်မကိုသာ ပစ်ထားခဲ့သည်ကို လျစ်လျူရှုတော်မူပါသလော။ ကျွန်မအား ကူညီပေးရန် မိန့်တော်မူပါ” ဟု လျှောက်လေ၏။
41ယေရှုကလည်း “အို မာသ… မာသ… သင်သည် အလုပ်များကြောင့် စိုးရိမ်ပူပန်လျက် နှောင့်ယှက်ခြင်းကို ခံရလေပြီ။ 42လိုအပ်သောအရာ တစ်ခုတည်းရှိ၏။ မာရိသည် ထိုကောင်းမြတ်သောအရာကို ရွေးချယ်ပြီ။ ထိုအရာကို သူ့ထံမှ မည်သူမျှ မယူဆောင်နိုင်ပါ” ဟု ပြန်၍ မိန့်တော်မူ၏။
လက်ရှိရွေးချယ်ထားမှု
လုကာ 10: BCB
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
