Matius 6
6
Ponudukan Nong Potingkuro Manaak
1Om monuduk i Yisus diolo kavagu, “Ondodomo mujuno nong popoimbulai kou nopo do gaagaya di aandai, ada kou mokiontongo do tulun, do au kovi kaanu diri isuli di Tama tokou silo suruga nong mokiontongo kou noopo.
2Jadi manaak kou nopo do tulun miskin, adano potongkopo popoilo do tulun vokon irad di tulun puupura, do mokiontongo noopo do tulun siri valai sasambayangan om siri ralan miintong do rojoon#6:2 rojoon: ompodon do tulun vokon. Nga patangaronKu marong dikovu iti, do iri noopo rarajou do tulun aanu do isuli diri gaagaya diolo. 3Nga manaakko nopo do tulun, ada do koilo iri tulun sino somoknu. 4Ada do antanganko do tulun ontok do manaakko do tulun vokon om antangan kovi di Tama tokou, om sumuli Isido do manaak dika,” kadi Yisus.
Ponudukan do Sumambayang
(Luk. 11:2-4)
5Om kadi Yisus kavagu, “Sumambayang kou nopo ada sumugut irad di tulun puupura, do aandaiani mingkakat siri valai sasambayangan om siri simpang do ralan do mokiontongo do vokon. Nga patangaronKu marong dikovu iti, do iri noopo rarajou do tulun aanu do isuli diri gaagaya diolo. 6Nga ika nopo sumambayang om suvangno siri biliknu pantok diri auso koontong, om tutubonno i pintu om sumambayang di Tama tokou iri au antangan, do koontongi i Tama tokou dika om manaak di pokionuonnu.
7Om adano sumugut diri tulun kaapir do soumur pigugulian i roiton di sambayangjo, do andasan nopo daa diolo om rongoon di Kinoringan i sambayangjo do irad diri. 8Do aupo nokopokianu kou om noilaanno kasangkat di Tama tokou iri kosimpitan muju. Irino komoionKu dikovu do adano sumugut irad diolo diri. 9Nga aandai do sumambayang kou do irad diti,
‘Tamaja soi suruga,
rojoonja Ika do olidang ino ngaranNu.
10Rikotno kosikap do momorinta dagai.
Om mokianu ikoi supaya maja i tongotulun di kouvanganNu siti vonuvo
inong soi suruga.
11Onuai ikoino do taakanon i kabagal dagai do tadau maino.#6:11 i kabagal dagai do tadau maino: siri solinan vokon pinotulis do: suvab; om siri solinan vokon nogi pinotulis do: pointikid-tikid tadau
12Om ompunaino i salaja
inong dagai do mangampun di kasalaan do tulun si dagai.
13Om poiduo ikoi mantad siri ponsubaan do rogon,
om intirungai ikoino
supaya au kaasu si kuasa di kotua do rogon.
[Ikano i monguasa, om i ogirot om i kivinaang
gosob salaid-laid. Amin,]’#6:13 Kivaro piipiro solinan do mantad di poguluupo do au nokotulis diri tangar do siri pialatan do kurung tagajo.
kanto nono sumambayang.
14Do nong mangampun kou nopo di tulun kisala si dikovu, i Tama tokou silo suruga nogi nga mangampuni di kasalaan muju. 15Nga nong au kovi mangampun do vokon, i kasalaan muju nga aui ompunan di Tama tokou soi suruga,” kadi Yisus.
Ponudukan Nong Potingkuro Mogpuasa
16Om kadi Yisus vagu, “Sombia do mogpuasa kou do sumambayang di di Kinoringan, ada do au tandaian ino pamarasan#6:16 pamarasan: vuros muju supaya auno otutunan di tulun do minogpuasa kou, do tulun nopo di puupura om iradno dii iolo mogpuasa gosob do sumondiang i pamarasan diolo. Nga patangaronKu marong dikovu iti do irino rarajou do tulun aanu do isuli diri gaagaya diolo. 17Nga mogpuasako nopo, lidangonno i pamarasannu om sudaionno ino tobuknu, 18supaya auno otutunan do mogpuasako. Irino i Tama tokou iri au antangan koilo nong potingkuroko ontok do auso koontong dika om manaak Isido di pokionuonnu,” kadi Yisus.
Untuno Porompon soi Suruga
(Luk. 12:32-34)
19Om kadi Yisus kavagu, “Adano ponguntun do arata muju siti vonuvo, do siti nopo vonuvo nga kivaropo lipos om togor do mongorobuk, om aanupo do tulun monguyas om manakau. 20Nga ponguntunno do arata muju do potoouon silo suruga, do silo nopo auso mongorobuk, om monguyas om manakau. 21Do inombo nopo pantok di arata muju om sirino i ginavo muju,” kadi Yisus.
Mato irad do Lampu si Kojuvan
(Luk. 11:34-36; 16:13)
22Om kadi Yisus kavagu, “Mato nopo om irad do lampu dino kojuvan. Jadi nong aandai poongontong di matonu, irino komoion do aandai i gaagayanu ampa nogi irad do anavau i kojuvannu. 23Nga nong araat ino poongontong di matonu, irino komoion do araat i gaagayanu, om irad do otuvong ino kojuvannu. Nong otuvong ino ginavonu diri gaagayanu do araat, songkuro kotuvong i ginavonu do irad dino!
24Ausoi tulun do monontuan do duvo tuan, do nong duvo tuan, au kojuu isido diri kotiso nga iri koduvo au kaandaianjo; ko rumalan marong isido diri isuu di kotiso tuan, om tolikudanjo iri isuu di koduvo. Nong irad dino au kadapat kou do monontuan di Kinoringan nong monontuan kou do siin,” kadi Yisus.
Ada Kou Kosurau diri Kosimpitan Muju
(Luk. 12:22-31)
25Om kadi Yisus kavagu, “Sabap diri patangaronKu marong dikovu iti do ada kouno kosurau minsoromo do kosimpitan dino kovivijaan do kojuvan muju, irad do auso akanon, auso iupon, om auso pakaian. Do irino kovijaan do tatod kiguna mantad di taakanon om i kojuvanno kiguna mantad di pakaian. 26Do antangaino ilo tombolog songintulud silo savat do okoniko mongumo om okoniko kivaro poijanan do pountunan do paraipo nga iolo nogi paakanoni di Tama tokou silo suruga. Nga ikovu nopo om kitorogo marong mantad di tombolog. 27Insan osurau koupo, nga aui moilo i kosuraan muju do palanggau diri umur muju.#6:27 palanggau diri umur muju: siri solinan vokon pinotulis do: palanggau do kojuvan muju
28-29Soromonno marong ilo bunga sumobul silo dumo nong sumurauno do auso pakaian. Au iolo kumaraja, om aui manabid do banang nga ino pun aandai kaantangan. Nga patangaronKu marong dikovu iti do antangaino i Raja Suliman do songkuropo kinakayaanjo nga aui koirad di tongobunga kaandaio di pakaianjo. Om aui sumurau iolo om nokuro do sumurau kou do auso pakaian muju? 30Antangaino ilo sakot iri sumobul si dumo, do sumobul tadau maino, om lumonot irad suvab om sorobon pun piarawoni di Kinoringan. Nong irad dino makinpo do onuan kou Disido do pakaian. Nokuroi do au aparsaya kou marong?
31-32Irad nopo diri, ada kou sumugut di tulun kaapir do sumurau do auso akanon om auso iupon om auso pakaian. Do itino marong kosurau diolo do mogium. Nga oilaani bo di Tama tokou soi suruga nong onu iri kosimpitan muju. 33Nga podulio mujupo marong do i Kinoringan monguasa dikovu om vajano di kouvanganJo, om mantad diri onuu nopo i kosimpitan muju nga onuan Disido kosukupan. 34Irino komoionKu do ada kou kosurau minsoromo di kovijaan do suvab, do suvab nopo nga kivaro kosuraan sondiang. Pabagalonpo tadau maino do osurau kou minsoromo dino kovijaan muju,” kadi Yisus.
လက်ရှိရွေးချယ်ထားမှု
Matius 6: LabukPKV
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 1995, Wycliffe Bible Translators, Inc. All rights reserved.
